Coronavirus, sa Federazione Medico Sportiva Italiana arrecumandat: «Allenamentus firmus fintzas a su tres de abrili po is professionistas, is diletantis invècias depint abertai atras novas»

Nc'est diaderus pagu de nai, o de aciungi: po imoi, a sa de seti dii a pustis de su Decreto Legge chi at serrau totu s'Itallia aintru de domu, non si podit fai atru chi s'apoderai a is noas chi nd'arribant de su Guvernu, de sa Protezione Civile e de totus is dotoris chi funt sighendi sa chistioi de su spaniamentu de su Coronavirus. Po primu cosa, in dii de oi, parit craru chi is giogus ant a torrai a partiri prus tradu de su cincu de abrili, cumenti invècias bisàstus unu pagheddu totus, a nai sa beridadi, e chi ballit po sa Serie A, sa Serie B, sa Serie C, sa Serie D ma ballit puru po is campionaus de is diletantis, partendi de s'Eccellenza, duncas, fintzas a ndi lompi a sa Terza Categoria. Est cussu chi si fragat, a su mancu, a ligi is fueddus fatus bessiri de sa Federazione Medico Sportiva Italiana in d-unu comunicau, innui s'arrecumandat «po is sotziedadis de professionistas de sighiri a firmai totus is allenamentus a su mancu fintzas a su tres de abrili, po is sotziedadis de diletantis fintzas a candu no ant a arribai noas nobas e po cussus de su “Settore Giovanile Scolastico” fintzas a su trinta de su mesi de làmpadas».

Totu custu po arrespundi a su fatu chi medas scuadras de professionistas fiant sighendi a fai atobiai is giogadoris po is allenamentus, mancai a a pagu a pagu, est a nai a grupus de cuatru-cincu personas. Calincuna cosa in prus, comentesisiat, s'at a cumprendi imoi chi est bessendi su Decreto “Cura Italia”, cun su Guvernu chi at acabau de ndi arrexonai pròpriu in custas oras. In d-unu primu tempus, pariat chi is allenamentus de is scuadras de Serie A podessint torrai a partiri su bintunu de su mesi de martzu, ma is cosas funt cambiadas. Duncas non si podit sciri candu ant a torrai a partiri is campionuas; chi totu depessit andai beni meda, s'iat podi giogai giai su dexianoi de custu mesi, ma a castiai cumenti funt andendi is cosas po imui, nd eus a torrai a chistionai po is primu diis de su mesi de lampadas.

Attività realizzata col contributo della Regione Sardegna. LR 22/2018 art. 22, comma 2. Avviso 2019-2020