Crabònia: is traballus de fai a su "Carlo Zoboli" no funt ancora patius; Carlo Foti e is atrus dirigentis saludant totus e si ndi andant

Mancu  su tempus de si gosai sa promotzioni in su campionau de sa Serie D, arribada gràtzias a is cincuanta-cuatru puntus pesaus in binti-tres bessidas, chi su Crabònia depit giai pentzai a is primus trumentus, e a is primus strobus, de sa stagioni noba.
Su Cunsillu Diretivu de sa scudra, difatis, at donau is dimissionis e oberrit diaici unu cetidu cun is de su comunu: badda badda, in d-una chistioni chi parrit dònnia dii prus callenti, nci funt is traballus de fai in su campu de sa citadi, su "Carlo Zoboli", chi depit essi postu a norma, diaici si narat, sighendi totus is règulas donadas de sa Lega Natzionali de is Diletantis, pruschetotu po is arrècias chi serbint a stesiai su pùbblicu de is giogadoris, e po cussu chi pertocat is "tribunas", chi depint podi arriciri a su mancu milli personas, cun is tifosus allenus chi depint podi abarrai atesu de is de domu. Tra is atras cosas, nc'at a essi de amanniai cussus chi tzerriant spolladroxus, e in prus nc'at a essi de pesai s'aposentu po su dottori.

Cosas chi andant fatas, e a lestru, si cumprendit beni su poita, ma nc'est de aciungi puru chi po is scuadras chi ndi artziant de s'Eccellenza, sa LND donat unu pagu de tempus in prus po si ponni torra paris cun totus is atrus.

De cussu chi si cumprendit imoi, peròu, no at a essi un istadi fàcili po is biancus-brau, chi iant giai perdiu su Ds Sebastian Puddu e, in s'interis, fiant traballendi giai po cuncodrai sa rosa; immoi su presidenti Carlo Foti, impari a is vice-presidentis Antonio Desogus e Francesco Setzu, s'amministradori delegau Checco Fele e su diretori generali Stefano Canu funt prontus a ndi cabai de sa barca, cumenti si narat.

«Apustis de cuatru annus — si ligit in d-unu comunicau scritu de sa sotziedadi — chi eus biviu cun passioni manna po custus caboris, pentzaus chi est arribada s'ora de acabai custu acapiu trumentau cun s'Amministrazioni Comunali de Crabònia. No podeus arrexionai apitzus a sa stagioni chi benit chentza sciri cumenti ant a bandai is traballus in su campu. Nd'eus giai chistionau cun is de su comunu, cun d-unu progetu, su trexi de su mesi de Maju, ma po imui est ancora totu frimu».


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020