Salta al contenuto principale
Aleksander Ceferin UEFA

Is de sa Bundesliga funt stetius is primus a partiri torra cun is partidas; Ceferin: «Sa Germània at a essi unu esèmpiu bonu po totus is atrus»

Is primus chi funt torraus a partiri cun is partidas, pròpriu sàbadu passau, funt stetius is tedescus de sa Bundesliga.
A nai sa beridadi no nc'est de ndi fai nisciunu spantu, poitta, de su restu, ndi festus chistionendi giai de meda, ma su prexiu e s'afroddiu de sa genti, si cumprendit beni su poita, si faint intendi.

De sicuru est una noba bona po totus is sportivus, no feti po is italianus, ma ballit puru po cussus chi bivint me is atrus logus in totu Europa.
Apustis de prus de sesanta diis de cussu chi tzerriant "lockdown", cun su mundu chi pariàt si fessit firmau po sèmpiri, est unu passu de importu mannu: sa bòcia at agiudai is tifosus a nd'acabai de inguti custu unconi marigosu, isperendi chi s'istadi potzat essi prus druci de su beranu.
Po su presidenti de sa Uefa, Aleksander Ceferin, «est una cosa bella meda chi is de sa Bundesliga apant torrau a incumentzai cun is partidas. A parri miu — sighit a contai — est unu modu po torrai a nci ghettai sa gana bona in su coru de sa genti. Seu siguru ca su chi ant fatu in Germània at a serbiri cumenti a esèmpiu po totus is atrus. Bollu fai is augùrius a totus is giogadoris e a totus cussus chi funt traballendi e sighendi custas fainas».

In Italia, in s'interis, funt ancora arraxonendi apitzus de su chi tzerriant "protocollo": is scuadras de sa Sèrie A, in custa diis, funt torrendi a partiri cun in is allenamentus, ma po imoi no scieus cun siguresa candu ant a podi partiri is partidas puru.
Est a nai chi tocat a abertai e biri cumenti ant a bandai is cosas: sa fatzendha prus callenti est cussa chi pertocat is apuntoraus.
In Germània, po nd'arremonai una, ant detzidiu de ponni in corantena feti sa persona chi nd'at ingolliu su virus; in Italia, invecias, a su mancu po is dotoris de su Cumitau Tennicu Scientificu e po is de su Guvernu, in corantena iat a depi andai totu sa arrosa de sa scuadra.

In questo articolo
Campionato:
Argomenti:
Stagione:
2019/2020
Tags:
Bundesliga
Ceferin