Salta al contenuto principale
antonio madau

Is de sa Tharros scioberant Antonio Madau: s'allenadori nou ndi pigat su postu de Maurizio Nulchis

Sa fentana de su mercau po s'annu duamila e binti \ duamila e bintunu s'at a serrai sa primu dii de su mesi de Ladàmini, duncas is scuadras sardas point sighiri a murigai is cartas po un antru bellu pagheddu de cidas, cun is giogus in campu chi ant a torrai a partiri feti su trexi de su mesi de Cabudanni, cun is partidas de sa Coppa Italia e, apustis, su bintiseti, s'ùrtimu dominigu, cun su campionau.

In s'interis chi is giogadoris funt currendi e fadiendi po is allenamentus, is presidentis s'acudint po aderetzai is rosas. Sa noba de importu prus mannu, a su mancu po su chi s'est intediu me is ùrtimas oras, est cussa chi pertocat Antonio Madau, chi est s'allenadori nou de sa Tharros, una de is scuadras prus fortis e arrispetadas, cun d-una storia a is pabas chi chistionat assoba.

Madau nd'aproillat apustis de s'esperièntzia in sa panchina de is de sa Sigma de Casteddu, una de is scuadras prus giovanas de totus in s'ùrtimu campionau de Promozione, e prima ancora, iat trabballau beni meda cun is de su Cuartu 2000, chi iant aguantau sa salvesa in su campionau de su duamila e sexi \ duamila e dexiaseti pròpriu bincendi sa partida de is play-off contras a is aristanesus; e cun is de su La Palma, chi in su campionau de su duamila e dexiotu \ duamila e dexianoi fiant arrannescius a ndi lompi fintzas a is partidas de is play-off e apustis fiant atziaus in Eccellenza.

Madau at a podi contai apitzus de s'agiudu de su vice-allenadori Andrea Manca.
Madau, tra is atras cosas, iat giai giogau cun is biancus-arrubius in su duamila e cincu, cun Nino Cuccu chi, a s'època,  fiat s'allenadori.

Duncas su presidenti de sa Tharros, Tonio Mura, est arrannesciu a aderetzai allestru is cosas, apustis de is dimissionis ghetadas de Maurizio Nulchis, chi pròpriu sabudu passau nd'at sciusciau s'acapiu cun sa sotziedadi. In d-unu primu tempus pariat chi s'allenadori nou podessit essi Fabrizio Carracoi, ex Arrolese e Serramanna,  ma poi sa storia est andada cumenti scieus.

In questo articolo
Squadre:
Allenatori:
Campionato:
Argomenti:
Stagione:
2020/2021
Tags:
Promozione