Is de sa Villacidrese de Biddacidru aciapant duus gol cun Figos e lassant a buca asciuta is primus de sa lista de s'Ilva

Arriendi e brullendi (ma s'iat a podi nai puru, pista pista e trisia trisia, cumenti narat babbu miu e cumenti naràt puru sa bon'anima de nonnu miu) seus arribbaus a su beranu, cun sa stagioni prus bella, toga, druci e saborida de s'annu chi est brintada de calincuna cosa cumenti a setanta-duas oras, prus o mancu. Dda apu tzerriada "sa stagioni prus druci" pruschetotu po su tempus e mescamente po is temperaduras: is megamas funt bellus e callentis, e candu no si ponit a suai cussu tialu de bentu forti e fastidiosu e fridu (cumenti est sucèdiu fintzas a ariseu, unu strobu chi est sighiu po duas-tres diis de sighiu), benit giai su disìgiu de si ponni a manigas crutzas e mancai, de si nchi ghetai, spratus, in logu de mari. Si nau subbitu chi de contus e contixeddus apitzus de su mundu de sa bòcia de is diletantis sardus nci ndi funt una biga po custa cida puru, ma ddu scieis, de su restu, cantu mi praxit, fintzas a s'ammachiadura (ddi nau diaici) a ciaciarrai de su chi sucedit in su mundu, partendi de su chi biu a foras de sa fentana de s'aposentu de innoi trabballu, fintzas a lòmpi a is arroris chi funt sighendi a sucediri in Ucraina. Cumenti dònnia borta, si promitu ca si nd'apa a furai pagu tempus, chi ddu sciu beni, chi su tempus est una de is fortunas prus mannas chi manigiaus, dònnia dì, in custa vida, e pròpriu po custu estus a depi aturai atentus po no arriscai de nci fuiai segundus e minudus in s'abiga, avatu de chistionis tontas e pagu utilis. Po si ndi contai una: mi ndi seu acatau de cantu cussu gioghiteddu (ddu tzerriu diaici...) chi est Facebook (ma ballit po totus is atividadis chi unu podit sighiri in cussu chi tzerriaus "internet", a sa moda ingresa), e chi deu manigiu feti po su trabballu chi fatzu po su giassu de su Diario Sportivo, ti ndi potzat suciai su tempus, chentza mancai de ti nd'acatai. Incumentzas a castiai is fotografias chi ndi bogant a foras is atrus, ti ponis a ligi su chi ant scritu is amigus tuus e, no parit mancu berus, su tempus si nci bobat. Pròpriu po custu seu fadendi su gioghiteddu de mi donai feti cincu-dexi minudus po castiai totus is novidadis chi ndi bessint a foras in dònnia minudu de sa dì in cussu tialu de Facebook, poita, chi si depeus nai sa beridadi, is cosas chi pubblicaus nosu etotu medas bortas no funt perdas de oru (ddi nau diaici); est a nai ca a bortas de sa conca nosta ndi bessint puru tontesas, chi poi donaus a papai (chi mi cumprendeis po su chi bollu nai...), est a nai, chi pubblicaus in sa pagina cosa nosta. E chi poneus a menti, estus a depi abarrai a totu di cravaus aranti de su computer o de su tialu de telefonu cellulari a ligi e cumentai.

E duncas, a parri miu, a su mancu, est sèmpiri una cosa futa incumentzai s'articulu de sa cida chistionendi unu pagheddu de su tempus, chi est una cosa chi pertocat s'umori cosa nosta e mescamente sa saludi: chi fait tropu basca si parit, giai giai, de si podi scallai; chi fait tropu frius si parit de morri de su disisperu; chi proit tropu timeus de s'allupai e chi no proit nudda nudda si benit sa timoria de no tenni prus acua de si buffai. A nai sa beridadi, immoi chi nci seu pentzendi impari a bosatrus, est de unu bellu pagheddu de tempus chi no proit beni: eia, est berus, me is cidas passadas ddoi fiat su cielu prenu de nuis, e mancai cancu stiddiu de acua nci d'at ghetau puru, ma no sciu no sciu chi si potzat bastai po totu s'istadi chi at a brintai, ma po oi mi iat a praxi abarrai cun su coru e cun sa conca prena de isperas bonas, e duncas, chentza pentzamentus lègius, e fadeus chi po oi si gosaus su chi si nd'arribbat.

In sinteris, iant a depi ammancai feti seti diis, partendi de oi, a sa fini de su chi podeus tzerriai "stadu de apprentu", diaici a su mancu furriaus de s'italianu su chi si tzerriat "stato di emergenza", e duncas de sa primu dì de su mesi de Abrili nd'iant a depi arrui, sighendi su chi funt narendi is de su Guvernu, cun Mario Draghi in primu fila, totus is obbrigus e is proibbisciones pesadas po cumbati su spaniamentu de su tialu de virus de su Covid (e custa storia, ge ddu scieis mellus de mei, sighit a andai ainnantis de duus annus), incumintzendi de su chi pertocat is caroteddas (me is logus obertus, a cantu parit, no iant a depi serbiri prus,e fiat ora mi megu deu) fintzas a arribbai a su chi ant tzerriau, a sa moda ingresa, "Super Green Pass", est a nai su documentu chi donant feti a cussus chi tenint is punturas de is vacinus fatas e chi serbit po brintai me is localis, me is teatrus (tanti po arremonai una pariga de logus), me is ufìcius e fintzas me is logus innoi trabballaus; a cantu parit de sa primu dì de su mesi de Maju no nc'ant a essi prus custas chistionis, ma po is turistas, est a nai po totus is personas chi nd'aproillant in Italia (e duncas in Sardìnnia puru), su Green Pass no at a serbiri prus a partiri de sa primu dì de su mesi de Abrili, poita meda genti ndi lòmpit de logus innoi no nd'ant mai pesau custa règula o, chi puru dda ant pesada, cumenti eus fatu nosu in Italia, dda ant sciusciada (e bella che scarescia) de una biga de tempus.
Totus custas nobas si ddas contu (e sigu a si ddas contai) poita mi parint bellas (mancai de prus) de una dì de sobi in logu de mari, mescamente apustis de totu cussu chi eus passau in custus duus annus, ca fortzis est mellus mancu a nci pentzai prus, e de su restu, s'omini nci ponit pagu tempus a si ndi scaresi de is cosas, a bortas, e no sciu chi custu est unu beni o unu mali, a si nai sa beridadi.
Su chi seu circhendi de nai, est chi fortzis si ndi scaresceus, a lestu meda a nai sa beridadi, de totus is dannus chi faint is guerras, po nd'arremonai una, fadendi su contu chi is de sa Russia e is de s'Ucraina (chi dònnia dònnia dì sighint a domandai s'agiudu de is esercitus de sa Nato e de s'Europa) funt sighendi a si sperdi pari pari(ballit po is sordaus, chi funt pagaus po fai sa guerra, ma ballit puru po totus cussus chi in Ucraina nci bivint e iant a bolli a sighiri a bivi in paxi); sa chistioni est andendi ainnantis de unu mesi, prus o mancu, e a cantu parit no nc'est sa gana (de una parti, est craru, ma mancu de s'atra) de agatai un acòrdiu. Ma de custu puru ndi seu chistionendi meda (fortzis fintzas tropu me is ùrtimas cidas) e duncas po oi, no nc'eis mancu a crei, si nci ghetaus me in su mundu de sa bòcia, chentza si strollicai mancu po un atru segundu in prus.

Intzandus parteus de sa noba prus frisca ( o prus callenti, chi si parrit mellus...), chi est cussa chi pertocat sa partida, chi s'est giogada pròpriu ariseu merì, tra is meris de domu de sa Villacidrese de Biddacidru e is de s'Ilva de La Maddalena, chi in dì de oi s'agatant a su primu postu de sa lista. Is cidresus, invecias, s'agatant a su de otu postus in lista, cun coranta puntus (sexi in mancu de is chi tenint is de s'Ilva, e no funt pagus!), pesaus gràtzias a is undixi partidas bintas fintzas a oi e is seti partidas chi si funt serradas in paridadi. S'ùrtima partida binta de is piciocus allenaus de mister Mannu est stètia pròpriu cussa de ariseu e si cumprendit, apustis de is contus chi eus fatu immoi, s'afroddiu chi tenint Figos e is cumpagnius cosa sua. Pròpriu Figos est stètiu su giogadori chi nd'at pesau su resultau finali, cun duus gol. A nai sa beridadi, peròu, is allenus funt partius a forti, e mellus de is aversarius, contendi chi apustis de feti doxi minudus de giogu ant aciapau su gol chi ballit po s'unu a zeru: Aiana nc'at scutu sa bòcia pròpriu in sa conca de Di Pietro, apustis nc'at pentzau Chiappetta a donai un antru bellu cropu de conca a sa bòcia, chi est andanda a finiri pròpriu me in su seti de sa porta difendia de su portieri de domu Pisanu (po is chi no ddu sciint beni, candu chistionaus de su "seti" megaus a chistionai de s'àngulu chi su pau de sa porta fait cun sa traversa, chi est una de is zonas prus difìcilis de ci lompi, si cumprendit beni su poita, po su portieri). A is de sa Villacidrese de Biddacidru peròu serbint feti una pariga de segundus po torrai a ponni is cosas in paridadi, cun Alessio Figos chi ndi cassat sa bòcia scuta de Angheleddu e, a duus passus de sa porta de is allenus, dda scudit a is pabas de Manis po su gol chi ballit po s'unu a unu. Sa partida pigat fogu e a mitadi de su primu tempus, est a nai a su de bintunu minudus, est torra Alessio Figos a aciapai su gol, cun unu tiru scutu a forti meda, in mesu a s'area de rigori de is aversarius. Po s'atacanti chi ndi lompit de Pirri, diaici, nd'arribbant atrus duus gol apustis de cussus fatus pròpriu domìnigu passau contras a is de s'Ossese. In su segundu tempus puru, is cidresus sighint a giogai beni meda e a atacai conca a sa porta de Manis: nci provat Porru, brintau in campo pròpriu de una pariga de minudus, cun unu tiru scutu de atesu, ma sa bòcia ndi bessit a foras de su campu, isfrisendi su pau de sa porta difendia de Manis. Apustis, a su de binti minudus, nci provat puru Angheleddu, cun unu bellu cropu de conca, ma Manis bobat po ndi cassai sa bòcia e sarvat is suus. A su de bintunu minudus, is primus de sa lista nd'iant a podi cassai su gol de su duus a duus cun unu tiru de is undixi metrus, po unu fallu fatu de is meris de domu apitzus de Molina; Cacheiro si ndi pigat sa responsabbilidadi ma Pisano bobat po ndi cassai sa bòcia chi andat a sbàtiri contras a su palu e apustis ndi bessit a foras de su campu. Candu is duas scuadras funt giai lòmpias a sa mes'ora de giogu, sèmpiri in su segundu tempus, est craru, Molina nci torrat a provai cun unu corpu de conca, ma Pisano cassat sa bòcia. Candu ammancat feti unu minudu de giogu (est a nai a su de corantacuatru minudus), Dombrovoschi partit a s'atacu e cun una giogada toga meda, de cuatru passus de sa porta difendia de Pisano, scudit sa bòcia apitzus de sa traversa. Sa pròpriu cosa capitat a Aiana, a su de coranta-seti minudus, cun unu tiru scutu de is sexi metrus, cun sa bòcia, torra, (parit una brulla ma invecias podeus chistionai feti de isfortuna) chi pigat in prenu su pau de sa porta de Pisano cun unu tiru cun su pei mancu. Is de s'Ilva de Sa Maddalena, duncas, torrant a domu insoru cun is buciacas sbuidas de puntus e is de s'Ossese, chi s'agatant a su segundu postu de sa lista, chi tenint feti duus puntus in mancu; est craru chi mister Acciaro e is piciocus cosa sua bolliant circai de si ndi fuiri, ma is cosas funt andadas mali. Grandu prexu e grandu afroddiu, invecias, e su motivu est craru, in domu de sa Villacidrese de Biddacidru, chi s'agatat in dì de oi a su de otu postus in sa lista ma tenint ancora de giogai una partida, contras a is casteddaius de sa Ferrini, chi est stètia posta po su trexi de su mesi de Abrili, de mèrcuis. Andaus a castiai, immoi chi nci seus, cumenti funt postas is cosas me in sa lista de s'Ecellenza: a su primu postu (nd'eus chistionau fintzas a immoi), ddoi funt is de s'Ilva, cun cinquanta-ses puntus, pesaus in binti-seti bessidas, cun dexiaseti partidas bintas e cincu chi si funt serradas cun su resultau in paridadi; cincuanta-cuatru funt is puntus chi tenint allogaus in buciaca is biancus-nieddus de s'Ossese, sighius de mister Loriga, chi funt sèmpiri currendi po sa Copa Italia Natzionali. A su de tres postus in sa lista ddoi funt is arrubius-brau de su Taloro de Gavoi, chi pròpriu domìnigu passau si ndi funt pigaus unu bellu puntixeddu in sa partida contras a is meris de domu de su Sant'Aleni de Cuartu: is ominis de Fadda ant bintu po cuindixi bortas cust'annu, a su mancu fintzas a immoi, e tenint otu partidas chi si funt serradas in paridadi, po calincuna cosa cumenti a cinquanta-tres puntus in totu. Is de sa Ferrini ndi tenint, invecias, corantanoi, e in dì de oi s'agatant a su de cuatru postus in sa lista, ma est berus puru chi depint giogai ancora una partida, dda eus giai arramomonada, pròpriu contras a is cidresus. Is de sa Nuorese de Nùgoro, chi in s'ùrtima bessida ant bintu in domu de is de s'Asseminese de Assèmini cun su resultau de tres a unu, tenint in buciaca corantotu puntus, chi ballint po su de cincu postus in sa lista. A su de ses postus, agataus is de su Sant'Aleni, chi eus giai arremonau ainnantis, cun corantaseti puntus. Corantacuatru invecias funt is puntus chi ant aciapau in bintiseti bessidas is campidanesus de sa Kosmoto de Muristeni, sa scuadra de su presidenti Marco Carboni. De is de sa Villacidrese po oi eus chistionau fintzas tropu (megu a brullai, est craru, ma est sa beridadi...): si potzu sceti arregodai chi tenint coranta puntus, cumenti is puntus chi tenint allogaus is de su Budune etotu, chi s'agatant a su de otu postus in sa lista impari a is de su Ilartzi puru. Is de su Poltu Ridundu tenint trinta-cuatru puntus in totu, chi ballint po su de undixi postus in sa lista e nd'arribbant gràtzias a dexi partidas bintas e a cuatru partidas chi si funt serradas cun su resultau in paridadi; trinta-cuatru funt is puntus po is de su Bosa puru, sighius de mister Salvatore Carboni. Is de s'Arbus, chi tenint cincu scuadras a is pabas e chi fatu fatu cambiant allenadori (me is cidas passadas nc'iant bogau a mister Nunzio Falco po donai is crais de sa scuadra a mister Agus, ma me is ùrtimas diis nd'est torrau Falco poita Agus at tentu strobus cun su trabballu cosa sua e no podiat prus sighiri sa scuadra), tenint in buciaca calincuna cosa cumenti a trintunu puntus; is de s'Idolo de Arthana nd'ant pesau binti-ses, gràtzias a seti partidas bintas e a cincu partidas chi si funt serradas in paridadi; po is de su Guspini, chi s'agatant a su de cuindixi postus in sa lista, cun feti tres scuadras a is pabas, is puntus funt binticuatru, gràtzias a ses partidas bintas e a ses partidas serradas in paridadi. Serraus is chistionis de sa lista po su chi pertocat su campionau de s'Ecellenza cun is ùrtimas tres scuadras, partendi de is tattaresus de su Li Punti, binti-ses puntus pesaus gràtzias a ses partidas bintas e a cuatru partidas serradas in paridadi; is de su Castiadas funt is chi s'agatant peus, poita funt sighendi a trumentai cun sa rosa de is giogadoris, chi funt pagus: po si fai a cumprendi de ita seu chistionendi, iat a bastai a nai chi in sa partida chi is biancus-birdis ant giogau in domu de su Ilartzi, su binti de su mesi de Friàrgiu, funt cabaus in campu cun feti otu giogadoris e, est craru, apustis de dexi minudus iant giai bodditu tres gol, fatus de Atzei, e de Caddeo. A su de sexi minudus is de su Castiadas, chi immoi funt sighius de mister Carlo Deriu, funt abarraus cun feti ses ominis in campu e duncas s'arbitru de sa partida no at potziu fai atru chi serrai sa batalla, sighendi su chi narant is regulas, de su restu.
Duncas is de su Castiadas tenint feti sexi puntus e domìnigu passau ant pèrdiu sa partida, in domu cosa insoru, contras a is de s'Arbus, cun su resultau, torra, de tres a zeru.
A s'ùrtimu postu de sa lista ddoi funt is campidanesus de s'Asseminese de Assèmini, cun doxi puntus pesaus gràtzias a tres partidas bintas e tres partidas chi si funt serradas in paridadi. Immoi chi nci seus, fadendi su contu chi po custa cida puru seus spacendi su tempus chi teneus (e chi mi donant) po scriri in su sardu campidanesu chi si fueddat in Bidd'e Sorris, chi est sa bidda mia, podeus castiai, a lèstru meda, sa lista de partidas chi s'ant a giogai custu domìnigu chi nd'at a benni (e chi est giai giai po nd'arribbai, e pròpriu po custu su giòbia, a su mancu a parri de chini scriri, est una dì meda ma meda prus druci de su lunis...), e chi ant a balli po sa de undixi giorronadas.
Is de s'Ilva de Sa Maddalena ant a circai de si ndi scabulli in pressi de su disprexei po sa partida chi ant perdiu ariseu in sa batalla in domu cosa insoru contras a is tattaresus de su Li Punti, cun is ominis sighius de mister Salis chi tenint calincuna cosa cumenti a trinta-cuatru puntus in mancu de is primus de sa lista. Is de s'Ossese, invecias, ant a arriciri, in domu cosa insoru, is ùrtimus de sa lista, chi cumenti eus giai nau funt is de s'Asseminese de Assèmini. Po is de su Taloro de Gavoi nc'at a essi sa partida, in domu, contras a is de su Poltu Ridundu de Alessio Mulas, chi est su giogadori chi at fatu prus gol de totus, fintzas a immoi, cun dexiaseti gol. In domu de is casteddaius de sa Ferrini, invecias, arribbant is de s'Idolo. Una de is partidas de importu prus mannu at a essi cussa tra is meris de domu de su Bosa e is de sa Villacidrese de Biddacidru.
 

Attività realizzata col contributo della Regione Sardegna. IMPRENTAS 2021-2022. LR 22/2018 art. 22