Ecellenza: is de s'Ilva de Sa Madalena ndi artziant a su primu postu de sa lista; prexu mannu puru po is de su Gùspini

E duncas, su giogu est giai giai fatu: seus chistionendi, est craru, de su mesi de Friàrgiu, chi est lòmpiu a s'ùrtima cida; scriu custus fueddus, difatis, su mengianu de su binticuatru, candu mancant duncas feti cuatru diis a sa brintada de su mesi de Martzu. Nc'est feti su tanti de tempus po si papai is ùrtimas tzipulas e is ùrtimus parafritus, e apustis su Carrasegare puru, po cust'annu, at a essi bellu che scarèsciu. De pipius e pipias cuncodraus e bistius a màschera nd'apu biu diaderus pagu (ballit po is mannus puru, ita si ddu nau a fai...), fortzis giai nudda, a nai sa beridadi. Me is atras diis apu lìgiu ca in Casteddu, po su segundu annu de sighiu, su sindigu nd'at depiu sciusciai torra totus is festas e is isfiladas, po crupa, est craru, de su Covid e de su spaniamentu de sa mobadia: mancai su numeru de is apuntoraus ndi siat cabendi dì po dì, is de su Guvernu no ant ancora crariu cumenti ant a cuncodrai is cosas po su benidori: cussu chi in italianu tzerriant "stato di emergenza", de su chi scieus in dì de oi, a su mancu, at a andai ainnantis a su mancu fintzas a su trintunu de su mesi de Martzu, e apustis eus a biri ita nd'ant a bogai aforas. Nc'est giai chini est narendi ca ant a abarrai is obbrigus de apoderai sa carotedda cravada in sa buca e in su nasu candu s'agataus me is logus serraus, po nd'arremonai una, impari a cussu de su "green pass" (ddu tzerriant diaici, a sa moda de is ingresus) chi est su documentu chi in dì de oi, a su mancu, serbit po brintai me is ufìcius (a sa posta, po nd'arremonai unu, feti puru po ndi pinnigai su dinai de sa pentzioni) e me is localis e me is negotzius, e chi donant feti a is chi tenint is punturas de su vacinu fatas, o a cussus chi ndi funt sanaus de s'influèntzia, ma in custu casu su documentu ballit feti po una pariga de mesis.
A ddas ligi diaici, no parint nobas bonas, ma giai est berus chi is de su Guvernu funt trabballendi, dì e noti, cumenti a sèmpiri, de su restu, po s'agiudai a bivi selenus, in paxi e in saludi, e prus de si fidai e de isperai chi totu sigat a andai beni, diaderus, no podeus. M'iat a essi praxiu meda meda a chistionai un antru pagheddu de su Carrasciale o de atras stròllichentzias allirgas, si ddu giuru, e invecias mi ndi seu scidau cun is nobas, chi no mi parint bonas po nudda, a nai sa beridadi, chi ndi lòmpint de s'Ucraina, cun sa Russia chi, a cantu parit, est pesendindi un'antra gherra, e is europeus e is americanus, puru, parint prontus a fai sa parti cosa insoru in totu custu, po circai de difendi s'Ucraina. Poberus is chi bivint in cussus logus, mi benit de pentzai custu mengianu, e bai circa ita totu s'at a tocai de bivi a custu giru, poita s'omini candu s'amachiat e ndi pesat is gherras benit a essi s'animali prus tontu e perigulosu chi s'agatat in totu su mundu,e duncas, po oi no potzu fai atru che nci ghetai aforas, concas a su cielu, cussu milioni de pregarias chi mi benint in conca, isperendi chi deus potzat tenni piedadi de nosu e de su chi seus torrendi a fai, cumenti chi is gherras chi nd'eus pesaus me is tempus passaus no fessint serbidas a si fai cumprendi sa cantidadi de is dannus chi ndi bessint aforas a manigiai is armas e is esèrcitus.
Ma depu circai de pentzai a atru, e drabessi puru, chi no ollu imbrutai totu s'articulu scritu po is amigus de su DiarioSportivo in su sardu campidanesu chi si fueddat in Bidd'e Sorris, e mi ndi depu arregodai puru chi su giassu chi arriciri is articulus cosa mia (ddi nau diaici, isperu chi si cumprendat su chi bollu nai) est apitzus de su giogu de sa bòcia de is diletantis sardus, e iat a tocai a ndi lassai aforas is chistionis acapiadas a sa politica, poita est un afariu chi no si pertocat, ma mi parit una cosa unu pagheddu tonta, su de serrai is ogus e fai finta de nudda candu s'agataus aranti a dannus diaici mannus chi, cosa de importu ancora prus mannu, nd'iant a podi sciusciai sa vida (e su modu de bivi, puru) de milionis e milionis de cristianus.
Po circai de indruciai sa mexia, serru (po diaderus) cun unu contixeddu chi m'est capitau de bivi pròpriu cenabara passau. In s'interis chi fia passillendi in su Corso Vittorio Emanuele Secondo (Cursu Vitoriu Emanuelli Segundu, iat a essi, chi ddu furriu in sardu), in Casteddu, concas a sa machina cosa mia, po mi ndi torrai in bidda, fia pentzendi a su modu, chi mi parit fortunau meda, chi m'est tocau po mi guadangiai su dinai chi mi serbit po papai e duncas po bivi in custu mundu: ddu cumprendeis a solus chi su trabballu miu est cussu de scriri articulus e, si ddu depu cunfessai, a bortas mi parit de "essi arrutu in peis", ddi nau diaici, poita a nai sa beridadi (e ge ddu scieis cantu e mellus de mei) nci funt una cantidadi manna meda de trabballus meda ma meda prus fadiosus (e fastìdiosus, puru) de su chi fatzu deu, fadendi su contu chi depu feti cracai is butonis de sa tastièra, e deu nci pentzu diaderus, chi nc'est genti chi depit abarrai oras e oras, mancai, cravada in mesu a su carraxiu de is machinas de is fàbbricas; e nci funt cristianus, ancora in dìde oi, puru, chi depint abarrai a totu dì atuponaus asuta de terra, in cussas chi tzerriant minieras, in mesu a su pruini; e mi benit de pentzai puru a totus cussus chi trabballant me is sartus, e si scallant asuta de su sobi callenti e buddiu in s'istadi, o s'ammoddiant asuta a s'acua e a su frius in s'ierru, e in bidda mia nci ndi funt medas chi si spacant sa schina diaici, cumenti s'apu contau, mancai po ndi boddiri is ochiellus de sa cancioffa de asuta de terra, o po ndi stegai is tamatigas de is matixeddas. E deu, mi megu, feti po su fatu chi mi ndi potzu abarrai setziu in sa cadira, aranti a su tialu de computer (cumenti ddu tzerriant is ingresus), ia a depi torrai gratzias a deus, dònnia segundu de sa vida mia, po sa fortuna chi apu tentu. E duncas, in s'interis chi in sa conca mia baddànt custas chistionis, apu atobiau duus piciocheddus chi ndi lòmpint de su Gambia (aici m'ant contau apustis, a su mancu), setzius in una mesixedda a foras de una pizzeria, chi m'ant pediu una pariga de francus po si comprai calincuna cosa de papai e, si nau sa beridadi, no mi dda seu intendia de fai finta de nudda, pròpriu po su chi s'apu nau ainnantis, e duncas m'at fatu prexei meda ddis torrai unu stiddiu de agiudu, chi, mi seu fatu tra mei e mei, sa vida certas bortas no depit essi una cosa facili, a segunda de cumenti nci arruis. Sa cida passada s'apu scoviau chi sa vida, a bortas, candu mi pigat beni, a su mancus, mi parit totu una gràtzia, totu unu "arriciri arregalus" de su mundu e de is atrus cristianus; apustis de su contixeddu chi s'apu contau, mi parit de podi nai chi sa vida est una gràtzia puru candu podis donai sa parti prus bona de tui a totus cussus chi atobias, dònnia dì, mancai chenza ddus connosci. E cun custu, po oi, serru diaderus cun is stròllichiminis e mi nci ghetu, a fundu 'e sus, a chistionai feti de bòcia.
Mercuis passau, nd'eus giai chistionau in s'articulu chi nd'apu pesau e chi est bessiu seti diis ainnantis a oi, is de s'Ossese ant bintu sa partida finali de sa Copa Italia de s'Ecellenza, cun su resultau de duus a zeru, contras a is biancu-birdis de su Castiadas; is biancus-nieddus sighius de mister Giampiero Loriga immoi ant a depi giogai sa chi tzerriant "fasi natzionali", est a nai is partidas cun is scuadras chi ant bintu sa Copa me is atras regionis. Po sa scuadra sarda de Ossi, immoi nc'at a essi sa partida, chi at a balli po su primu turnu, contras a is lazialis de su Civitavecchia, chi pròpriu ariseu, su bintitresde su mesi de Friàrgiu, ant bintu sa partida finali contras a is de su Tivoli, cun su resultau de duus a unu, gràtzias a su gol fatu de Proietti, cun unu tiru de is undixi metrus, a duus minudus de sa fini de sa batalla. Is atrus gol funt stètius pesaus de La Rosa, sèmpiri po su Civitavecchia, a su de undixi minudus de su segundu tempus, cun De Costanzo chi, a su de binti-seti minudus, sèmpiri in su segundu tempus, est craru, at aciapau sa paridadi. Is nieddus-asullus bincint po sa segunda borta in sa istoria cosa insoru sa Copa, apustis de calincuna cosa cumenti a bint'otu annus, candu iant batiu is de su Ceccano, in sa stagioni de su milli e noicentus noranta-tres e milli noicentus noranta-cuatru. Sa primu partida tra is de s'Ossese e is de su Civitavecchia s'at a giogai su noi de su mesi de Martzu; po sa partida de sa torrada, invecias, s'at a depi abertai a su sexi, candu is duas scuadras s'ant atobiai a su campu comunali "Walter Frau" de Ossi.
Ariseu, tra is atras cosas, funt cabadas in campu dexi scuadras chi currint in su campionau de s'Ecellenza, po recuperai is partidas chi, me is cidas passadas, ndi funt sartadas po crupa de su Covid. Is campidanesus de su Muristeni ant bintu, cun su resultau de duus a unu, sa partida in domu de is de s'Arbus, gràtzias a is gol pesaus de Anedda e de Fangwa, cun unu tiru de is undixi metrus. Po is arrubius de domu, est arribbau su gol fatu de Stochino, ma, si cumprendit beni, no est bastau. Bella bìncida, puru, po is de s'Ilva de Sa Madalena, chi ant pesau duus gol in domu de su Bosa, gràtzias a is giogadas fatas de Di Pietro e Chiappetta. Tres puntus bellus e grais, po sa cursa a sa sarvesa, po is de su Guspini, che in domu cosa insoru ant bintu sa partida contras a is arthanesus de s'Idolo: Fernandez aciapat su primu gol a su de sexi minudus de su primu tempus, ma Nieddu arrannescit a fai su gol chi balit po sa paridadi cun unu tiru de is undixi metrus, chi donat su unu a unu a is allenus. Nci pentzat Floris, peròu, a arregalai sa bìncida a is suus, pesendindi su gol chi ballit po su resultau de duus a unu, ma nc'est de nai puru chi is biancus-asullus ant depiu giogai totu su segundu tempus cun feti dexi ominis in campu, poita Manca nd'at ingotu unu cartellineddu arrubiu a su segundu minudu. Mercuis druci meda (druci cumenti una tzipula, po torrai a is contixeddus chi eus pigau in custu articulu etotu) po is de sa Nuorese puru, chi aranti a is pròprius tifosus ant bintu sa partida contras a is de su Taloro de Gavoi cun su resultau de unu a zeru, gràtzias a su gol fatu de Piredda. Is de sa Villacidrese de Biddaxidru no podiant sballiai in sa partida contras a is de su Castiadas, e is cosas funt andadas beni meda po s'assòtziu de su presidenti Marrocu, cun Angheleddu e Piras chi ant postu sa firma in sa bìncida.
Duncas, apustis de essi contau cumenti funt andadas is cosas in campu, no podeus fai atru chi andai a castiai cumenti funt postas is cosas me in sa lista, cun totus is scuadras chi currint in su campionau de Ecellenza chi immoi tenint bintitres partidas giogadas. A su primu postu ddoi funt is de s'Ilva de Sa Madalena, cun catodixi partidas bintas e cincu partidas chi si funt serradas in paridadi, chi ballint po calincuna cosa cumenti a corantaseti puntus. Cun unu puntu in mancu, est a nai corantases, nci funt is casteddaius de sa Ferrini, a su segundu postu de sa lista, est craru, cun catodixi partidas bintas (pròpriu cumenti is de s'Ilva), cuatru partidas chi si funt serradas in paridadi e cincu partidas perdias, est a nai una in prus de cussas chi ant perdiu is de Sa Madalena. A su de tres postus, cun corantacincu puntus, ddoi funt is arrubius-brau de su Taloro de Gavoi, impari a is biancus-nieddus de s'Ossese, chi eus giai arremonau ainnantis, chi tenint feti duus puntus prus pagu de sa primu scuadra de sa lista. Po is de su Muristeni puru, chi eus giai arremonau, is cosas funt adendi beni meda, cun corantunu puntus allogaus in buciaca chi ballint po su de cuatru postus in sa lista e chi nd'arribbant gràtzias a doxi partidas bintas e cincu partidas chi si funt serradas in paridadi. Is biancus-asullus s'agatant a su de cincu postus in sa lista, cun tres puntus in prus de is chi tenint is de sa Nuorese de Nugoro, trintotu puntus chi ballint po su sestu postu in sa lista, chi nd'arribbat gràtzias a undixi partidas bintas e cincu partidas chi si funt serradas cun su resultau in paridadi. A su de seti postus in sa lista ddoi funt duas scuadras: is grogus-arrubius de su Ilartzi, e is biancus-birdis de su Cuartu de Sant'Aleni. Is de sa Villacidrese de Biddacidru s'agatant, in dì de oi, apustis de is tres puntus bodditus pròpriu ariseu, cumenti eus giai contau, de su restu, a su de noi postus, cun trintacuatru puntus allogaus in totu, gràtzias a noi partidas bintas e a seti partidas chi si funt serradas cun su resultau in paridadi. Cun trintatres puntus, chi ballint po su de dexi postus in sa lista, agataus is de su Budune, chi tenint, fintzas a oi a su mancus, noi partidas bintas e ses partidas chi si funt serradas in paridadi. Is de s'Arbus, invecias, tenint bintotu puntus, cun seti partidas bintas e seti partidas chi si funt serradas in paridadi; bintotu puntus po is de su Bosa puru. In basciu me in sa lista agataus is de su Poltu Ridundu, cun binticincu puntus; bintiduus puntus funt is chi at allogau is de s'Idolo de Arthana, cun dexianoi puntus ddoi funt is de su Li Punti, sa scuadra de sa zona de Tattari; is de su Guspini s'agatant cun calincuna cosa cumenti a dexiotu puntus, apustis de essi bintu cuatru partidas, contendi puru cussa de ariseu, chi eus giai arremonau, e ses partidas chi si funt serradas in paridadi. A is pabas de is campidanesus ddoi funt is ùrtimas duas scuadras de sa lista: is biancu-birdis de su Castiadas, chi funt sighendi a ndi cabai conca a s'ùrtimu postu e fortzis, po totu su chi s'apu contau me is cidas passadas, funt cussus postus peus, feti po su fatu chi ant sciusciau e torrau a fai de nou sa scuadra e ant depiu puru cambiai s'allenadori me is ùrtimas cidas. A s'ùrtimu postu, cun doxi puntus, ddoi funt is de s'Asseminese de Assèmini, cun feti doxi puntus, chi nd'arribbant gràtzias a tres partidas bintas e a tres partidas chi si funt serradas in paridadi.
Po custu domìnigu chi est arribendindi is giogus de sa Promotzione, de sa Primu Categoria e de sa Segunda Categoria ant abarrai frimus, e custu po permitiri de recuperai totus is partidas chi ndi funt sartadas me is cidas passadas po crupa, sèmpiri, de su Covid. Po sa Lista A, nc'ant a essi de giogai is partidas tra is casteddaius de s'Atletico, chi si dd'ant a depi biri, in domu cosa insoru, contras a is biancus-birdis de su Cuartu Duamilla; in campu ant a depi torrai puru is de su Bidda Matzràxia, chi ant a arriciri, in domu cosa insoru, is de su Gonnos; domìnigu de spàssiu puru po is de sa Fermassenti, chi si dda ant a depi biri contras a is grogus-nieddus de s'Andromeda; su sàbudu, invecias (seus chistionendi de su bintises, est craru), at a tocai a is de su Cortoghiana, chi ant arriciri, in domu cosa insoru, is de su Crabonaxa. Po su chi pertocat sa Lista B, invecias, totus is scuadras tenint dexiaseti partidas giogadas, custu bollit nai chi no nci funt batallas de torrai a recuperai,e si parit una cosa bona meda. In sa Lista C, invecias, ant a cabai in campu feti is de su Porto Torres, chi ant a arriciri in domu cosa insoru is de s'Oschirese de Oscheri, po sa partida chi at a balli po sa de catodixi giorronadas.
 

Attività realizzata col contributo della Regione Sardegna. IMPRENTAS 2021-2022. LR 22/2018 art. 22