Ilvamaddalena, is pentzamentus de Julian Scigliano: «Serrau in domu de prus de cuindixi diis e nisciunu benit a mi fai is esamis»

Is nobas chi eus scerau de contai po oi, su noi de su mesi de Cabudanni, incumentzant, ancora, cun sa storia de s'Ilvamaddalena chi, dhu arregodaus, tenit totu sa scuadra in corantena, in cussu chi tzerriant "isolamento fiduciario", abetendi chi is de sa ASL fetzant is esamis a is giogadoris po cumprendi chi nci funt, diaderus, apuntoraus de su Covid aintru a sa rosa.
Su trumentu de is biancus-asullus-arrubius-brau nascit su merì de su binticuatru de su mesi de Agustu, candu Julian Scigliano, unu giogadori chi nd'arriba de s'Argentina, ma cun passaportu spagnolu, s'est intendiu mabi e at timiu de si nd'essi pigau sa mobadia.

Is de s'Ilvamaddalena, in custa diis, no ant fatu mai su nomini de su piciocu, po arrispetu, ma est stetiu pròpriu issu chi at decidiu de contai sa storia cosa sua, cun d-unu comunicau bessiu me is paginas de Facebook.
«Seu in Italia giai de tres annus — contat — e da prus de un annu bivu innoi a La Maddalena; su trabballu miu est giogai a bòcia. Scriu custus fueddus poita mi seu arrosciu de abarrai serrau in domu, abetendi, de dexiaseti diis, chi is de sa ASL bengiant a mi fai is esamis (est a nai su chi tzerriant "tampone" N.D.R), po sciri chi nd'apu bodditu su virus. Deu pentzu chi siat stetiu totu crupa de su frius chi apu pigau sa noti, ma imoi no sciu cumenti fai a mi ndi scabulli de custu arrori».

Poi sighit: «Apustis de cuatru diis seu torrau a m'intendi beni, chenza nisciunu dannu, e duncas po mei iat a essi ora puru de d'acabai cun custa corantena; seu circhendi calincunu chi mi potzat agiudai, ma po imoi, mancai seu fadendi una biga de telèfonadas, dònnia dii, nisciunu arrespundit. S'unica cosa chi is autoridadis funt bonas a mi nai est: "chenza essi fatu is esamis, no ndi podis bessiri de domu". Ma deu mi domandu: chi nisciunu benit a mi fai su tampone, e deu no potzu andai a solu, cummenti tiau fatzu a torrai a sa vida cosa mia?».

S'Ilvamaddalena iat depi incumentzai sa stagioni noba pròpriu domìnigu chi benit, po sa primu bessida de sa Coppa Italia po is scuadras de s'Eccellenza.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020