Intrat s'atonzu e torrant a proi is decretus de su Guvernu: totu s'Italia at a depi inguti un atru mesi de assètiu

In s'interis chi is decretus de su Guvernu (cussus chi seus abbituaus comomai a tzerriai DPCM) sighint a bessì aforas in grandu cantidadi, s'ùrtimu difatis est stetiu frimau de su Presidenti Giuseppe Conte pròpriu in custas oras e at a balli giai de crasi, su cincu de su mesi de Donniasantu, sa genti isperat chi totu custu carraxu potzat diaderus acabai chitzi, ma is tempus peròu no funt bonus: a cantu parit, funt arribendi atras regulas e, pruschetotu, una lista de fainas chi no s'ant prus podi fai: tra is atras cosas, nc'at a essi torra s'òbbrigu de abarrai acorraus in domu, a su mancu de is dexi de su noti fintzas a is cincu de su mengianeddu; torra duncas puru cun is paperis de si portai avatu, est a nai cussa chi in italianu tzerriant "autocertificazione". Difatis eus a podi bessì de domu feti po fai is cumassionis, po comprai sa cosa de papai, po nd'arremonai una, o po motivus de trabballu (po chini tenit sa fortuna de podi trabballai), o po motivus de saludi.

A narai sa beridadi, no eus cumprendiu beni cumenti nci seus torra atapaus in custa situatzioni: ariseu (chi fadeus su contu chi s'istadi est acabada feti de cinquanta diis) festus totus spratus in logu de mari a pigai su sobi; imoi si funt torra serrendi me is aposentus e nisciunu in dii de oi podit sciri fintzas a candu: de siguru is regulas nobas ant a balli fintzas a su tres de su mesi de Idas, candu in d'unu primu tempus pariat chi ndi podestus bessiri aforas de custu dannu mannu in cuindixi-binti diis.

Christian Solinas, su guvernadori de sa Sardinnia, me is diis passadas si d'est pigada contras a is sardus: a parri suu, chi s'agataus torra in custu dannu mannu est po crupa de sa genti, chi no at arrispetau is règulas; po meda genti, invecias, is guvernadoris de is regionis e is de su Guvernu Italianu iant potziu fai calincuna cosa in prus, in istadi, po afortiai su sistema de is trasportus, de sa sanidadi e de sa scola. Imoi, a cantu parit, est tropu tradu: sa cosa chi s'abarrat de fai est de inguti un'atra fita de assètiu, o cumenti narant is ingresus, de "lockdown".


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020