Salta al contenuto principale
carbonia briganti

Nudda de fai po su Crabònia: su gol de Sariang no abastat po ndi furriai su tres a unu bodditu in sa primu partida in domu de su Real Monterotondo Scalo

Cussus de su Crabònia nc'ant cretiu fintzas a s'urtimu segundu ma non nc'est stetiu nudda de fai: s'unu a zeru pesau in sa partida de sa torrada contras a su Real Monterotondo Scalo no abastat po ndi furriai su tres a unu bodditu in sa primu bessida de sa Coppa Italia Natzionali de Eccellenza e duncas is biancus-brau depint giai allogai su bisu de arribai in finalissima. Kassama e is cumpàngius ant fatu de totu, mancai nci fessit bentu meda, unu strobu po is bintiduus giogadoris in campu. S'allenadori, mister Andrea Marongiu, non tenit strùncius de fai a is piciocus cosa sua, poita funt stetius isfortunaus. In su primu tempus, difatis, su Crabònia fiat giai po nd'aciapai su gol: a su primu minudu Cordeddu circat de piscai Gassama e Kassama in mesu a s'area de su Monterotondo, ma nisciunu de is duus giogadoris nc'arrannescit a tirai in porta, cun su portieri Santi chi s'acudit a cassai sa bòcia. A su de undixi minudu, Cordeddu, sempri issu, cun d-unu tiru de sa bandera, piscat bomber Meloni chi bolat in cielu e arrannescit a donai unu bellu cropu de conca a sa bòcia, ma Santi est scidu e narat ca no. Nudda de fai, a su de cuindixi minudu, po Gassama, chi si nci ghetada po ndi pigai, de conca, sa bòcia scuta in mesu a s'area da Zedda. Su Crabònia sighit a si dda gherrai: Cordeddu sparat una fusilada, ma sa difesa de su Monterotondo apoderat. Is meris de domu circant de curri prus a forti: Pinna agatat su gol ma s'arbitru sciusciat totu po crupa de un'acollada de Meloni; me is ùrtimus minudus de su primu tempus Angheleddu fait partiri unu tiru chi ndi bessit aforas po unu pilu. In su segundu tempus, a su de cuindixi minudu, Sariang Kassama agatat su tiru chi stampat Santi e ballit po s'unu a zeru. A su Crabònia serbit a su mancu un antru gol: nci provat torra Gassama, chi arrannescit a tirai ma sa bòcia pigat in prenu su palu. Agoa nci provat puru Meloni, ma cussus de su Monterotondo ndi bessint chentza dannus. Me is ùrtimus binti minudus non sutzedit prus nudda. Su Crabònia imoi depit feti pentzai a binci su campionau.

In questo articolo
Squadre:
Campionato:
Argomenti:
Stagione:
2019/2020
Tags:
Eccellenza
Coppa Italia Nazionale