Partint is trabballus de is scuadras de sa Rapresentativa

Gratzias a Deus, cumenti si narat, de acua nd'est arruta e sighit a nd'arrui a sircias (o sricias, chi mi praxit de prus, cumenti ddas sa tzerriant innoi in Bidd'e Sorris); fortzis, a narai sa beridadi, est proendi unu pagheddu tropu, a parri miu a su mancu, ca apu intendiu chi me is ùrtimas trinta diis (cussas de su mesi de Donniàsantu, po si cumprendi) at protziu su tanti che me is annus passaus fadiat in trescentus e sessanta cincu diis, est a nai in doxi mesis. Cussus chi tenint is pentzamentus prus lègius, in bidda mia, est craru, funt is massajus (est a nai is chi trabbalant me is campus, me is sartus, e ndi pesant sa canciofa, chi est sa faina de importu prus mannu, po su chi pertocat su dinai chi incasciant), chi abarrant, po forza, sèmpiri acapiaus a su tempus; mi nd'arregodu beni, cumenti chi fessit oi, de totus is trumentus de is tzius e de is fradibis de sa bon'anima de mamma mia (chi est crescia in una famìllia, manna manna meda, de massajus, a partiri de su babbu, e duncas de nonnu miu, chi teniat atrus otu fradis mascus, totus ocupaus cun su trabballu me is campus, pruschetotu cun su trigu) chi in s'istadi timiànt sa sicanza (in bidda dda tzerriant sicidadi, cun su fueddu chi abarrat prus aguali a s'italianu, si nd'acatais a solus) e fintzas su bentu tropu forti (chi ndi sciusciat is piogias, diaici tzerriant is arrigadoris chi si manigiant po acuai is prantas me is campus) e in s'ierru sa cibixia, chi abbruxiat, de su frius, totus is gureus. E duncas seu cresciu in unu logu innoi sa genti abarrat totu castia castia, a conca in susu, po circai de cumprendi, de intzertai cumenti at a girai su tempus. Po su chi pertocat custa cida, parteus de innoi, diaici incumentzaus a s'incarai in su mundu de sa bòcia de is diletantis sardus, su tempus mau nd'at sciusciau (est a nai: at fatu sartai) duas partidas in sa Lista A de sa Promotzione, cussas duncas tra is meris de domu de s'Atleticu de Narcau e is allenus de su Ceraxius, e tra is de su Bidda Matzraxia e is de su Gonnos. Me is atras duas listas de sa Promotzione e me is cincus listas chi faint parti de sa Primu Categoria si funt giogadas, invecias, totus is partidas, chenza nemmancu unu strobbu. Est una feti, mancu mali, sa partida sartada in sa Lista A de sa Segunda Categoria, cussa tra is meris de domu de su Santu Giorgiu de Flumini, chi si dda depiant biri contras a is allenus de s'Azzurra de Pauli. In sa Lista F (chistionaus sèmpiri, est craru, de sa Segunda Categoria), nd'est sartada sa batalla tra is de su Montiferru, sa scuadra de Iscanu, e is allenus de su Sabarussa, cun is duas scuadras chi si funt postas de acordiu po cabai in campu su cuindixi de custu mesi etotu, est a nai su mesi de Idas, o, chi si praxit de prus, su mesi de Nadale.

E immoi chi nci pentzu, oi est sa segunda dì de su mesi nou, est a nai de cussu chi nd'est intrau de feti corantotu oras, e su coru miu est totu unu prexu, chi fortzis mancu nci credeis. Apustis de totus is daboris e is trumentus chi su mesi de Dònniasantu m'arregalat, mancai no ddus ia a bolli (ma in custa fida, deu ddu apu cumprendiu beni, no sciu de bosatrus, nci funt certas cosas chi si nd'arribbant a pitzus chentza domandai su permissu, e aranti a custus arroris mannus podeus circai feti de tenni passièntzia e coru forti, cumenti consillàt, tra is atrus, cussu grandu filòsofu chi si tzerriàt Epicuro e, impari a issu, un antru grandu filòsofu cumenti a Zenone di Cizio, chi fiat su babbu, ddi naraus diaici, de su Stoicismu, una genia de arrexonamentus apitzus de sa vida e de sa natura chi, apustis, est stètia torra piscada de Seneca, tra is atrus) nd'est intrau, duncas, unu de is mesis prus drucis: at a essi chi est prenu a cucuru de festas (partendi de cussa de s'otu de custu mesi etotu, fintzas a arribbai a cussas po sa noti de su trint'unu, chi est s'ùrtima de s'annu e cussa chi si nc'at a portai in su duamilla e binti-duus); at a essi chi su coru de sa genti si prenit de allirghia; at a essi chi is bias de is biddas e de is citadis funt prenas de genti in giru po comparai is regalus; at a essi chi nci funt is luxis apicadas me is palus de is rugas; at a essi po totu custas cosas postas impari (circu de incrutzai!), intzandus, chi mi intendu sèmpiri a trassa de unu pipieddu chi no bidi s'ora de oberri is pachiteddus, mancai comomai no tengiu prus arregallus de oberri, ma s'arregallu prus mannu chi potzu arriciri, dònnia dònnia annu, est a podi castiai, cun saludi e chenza tropus daboris (po su chi mi pertocat), totus is atrus cristianus(partendi de is de sa famillia mia) chi si prexant e faint bonas festas. Custu po su chi pertocat su mesi de Idas, ma apa a tenni ancora s'ocasioni, de innoi a sa fini, de ndi chistionai mellus, ndi seu seguru, mancai me is cidas chi ant a benni etotu.

Po immoi duncas torraus a nosu, cumenti si narat, e a is chistionis de importu prus mannu po su giassu de is amigus de su Diario Sportivo.
Me is ùrtimas diis nd'est aproillada a foras una noba toga meda, chi pertocat is piciocheddus prus piticus chi giogant a bòcia me is scuadras de totu sa Sardìnnia, e seu seguru chi nci ndi funt unu scantu de issus chi funt prexaus meda meda; seus chistionendi, duncas, de sa lista de is giogadoris chi is allenadoris de is scuadras de is "Rapresentativas" (est a nai is scuadras pesadas cun totus is giogadoris prus fortis e prus bravus, chi ant a andai, s'annu chi benit, a si giogai su chi in italianu si tzerriat "Trofeo delle Regioni") ant pesau.
Po su chi pertocat sa Juniores (sa scuadra de piciocus chi tenint fatus no prus de dexiotu annus), duncas, sighida de Albertu Antinori, ariseu, s'unu de su mesi de Idas, si funt atobiaus po su primu allenamentu, in su centru sportivu federali "Tino Carta", in Aristanis, prus de trinta piciocheddus, e intzandus andaus a castiai beni de innoi ndi lòmpint is giogadoris: incumentzaus de is de s'Arbus (chi currint in Ecellenza), chi tenint in sa scuadra de sa Rapresentativa Riccardu Muscas; is de s'Andromeda, invecias, (chi currint in sa Lista A de sa Promotzione), mandant Simone Corteddu; is de s'Atletico de Casteddu (chi currint sèmpiri in sa Lista A de sa Promotzione) si prexant po Fabieddu Porcu; prexu mannu puru in domu de su Bosa, cun Antinori chi ndi piscat Alessandro Unali. Is de su Cabuderra (chi funt fadendi a biri cosas togas medas me in sa Lista A de sa Primu Categoria), sighius de mister Andrea Loi, mandant a giogai in sa scuadra de sa Rapresentativa Matteo Cao. Is de su Castiadas (torra una scuadra de s'Ecellenza) ndi tenint tres: seus chistionendi de Micheli Maganuco, Mattia Melis e Gabrieli Serra. De su Calangianus invecias, una scuadra chi currit in sa Lista C de sa Promotzione, nd'aproillat Raffaeli Sambiagio. Is casteddaius de sa Ferrini, chi in s'interis funt fadendi spantus meda po su chi pertocat is giogus de s'Ecelenza, si prexant po Nicola Murgia. Prexu mannu puru po Mirko Passerò, chi est gioghendi in sa truma de is de sa Frassinetti de Su Masu, in sa Lista A de sa Primu Categoria. Is de su Ilartzi podint essi cuntentus de biri, in sa scuadra pesada de Antinori, unu piciocheddu bravu cumenti a Alessiu Cossu. Is de s'Ilva de La Maddalena funt rapresentaus de Gabrieli Lobrano; is campidanesus de sa Kosmoto de Muristeni ndi tenint tres sceraus po sa Rapresentativa: seus chistionendi, duncas, de Micheli Angiargia, de Filippu Ghiani e de Alessiu Idda. Tres piciocus ndi lòmpint de sa scuadra de sa Nuorese de Nùgoro: Giovanni Bulla, Davideddu Congiunti e Andrea Piredda. Tres nd'arribbant de is biancus-nieddus de s'Ossese: Riccardu Fancellu, Giuanni Ubertazzi, Andrea Zinellu. Is de su Poltu Ridundu funt prexaus meda po Antoniu Seddaiu; is casteddaius de sa Pro Sigma, chi me is ùrtimas cidas ant donau is crais de sa scuadra a Mauriziu Idda e nc'ant bogau s'allenadori chi teniànt ainnantis, est a nai Riccardu Spini, mandant a giogai in sa scuadra de sa Rapresentativa duus piciocheddus fortis e bravus cumenti a Paolu Pilotto e Edoardu Piras. Is de su Sadali, mancai is cosas po sa scuadra sighida de Adamo Marci no s'iant andendi tanti beni in sa Lista B, sèmpiri de sa Promotzione, funt fadendi unu trabballu bonu meda cun unu piciocu cumenti a Manuel Mantega, chi at cunvintu Antinori a ddu tzerriai in sa scuadra chi est pesendindi. Is cuartesus de su Sant'Aleni tenint tres giogadoris in sa lista: seus chistionendi, intzandus, de Matteu Cannas, de Giuanni Fideli e de Sergiu Tamburini. Is de su Ceraxius, chi currint in sa Lista A de sa Promotzione, ant a essi rapresentaus de Gabrieli Pisanu e de Federicheddu Porru. Serraus custa lista longa cun is aristanesis de sa Tharros, sighius de Antoniu Madau, chi funt a su segundu postu de sa lista cosa insoru, e chi funt fadendi giogai unu piciocheddu forti cumenti a Filipu Stevanato.

Chi seis de acòrdiu cun mei, apustis de essi chistionau de su tempus mau, de unu pagheddu de filosofia (chi mai manchit in sa mesa cosa mia!) e de sa scuadra de sa Juniores, andaus puru a castiai cumenti funt cuncodradas is cosas po su chi pertocat sa scuadra de is Allievus, sighius de Andrea Pia, chi si funt atobiaus po sa primu borta propriu ariseu a mericeddu, sèmpiri me is campus sportivus de Aristanis. De s'Alighera nd'aproillat Giacumeddu Pinna, is de s'Arbus mandant Alessandru Sogus, is de su Bosa (chi currint po is giogus de s'Ecellenza) ndi tenint duus: seus chistionendi de Lorenzu Avellino e de Fabieddu Bonu. Is de sa Bittese, sa scuadra de Bitzi, chi currit in sa Lista B de sa Promotzione, si prexant po Pauleddu Aru e po Pier Giorgiu Pau; is de su Crabònia, chi funt sighius de un allenadori de importu mannu e de esperièntzia cumenti a David Suazo, chi fiat s'atacanti de su Casteddu e apustis de s'Inter puru, sa scuadra de Milanu, in Sèrie A, funt prexaus, est craru, po Nicoleddu Muscas e po Christian Fidanza; is de sa Corrasi de Ulìana si prexant, e meda puru, po sa lamada de Salvatoreddu Acquas; is casteddaius de sa Ferrini mandant Ricardu Brai e Gabrielleddu Lai; po sa Kosmoto puru nci funt duus giogadoris in sa scuadra de is Allievus: seus chistionendi de Ricardu Arangino e de Tomaseddu Mudu. Is de sa Nuoresese si prexant po Ludovicu Ruggiu; is de s'Oliena funt fadendi cresci, e beni puru, unu giogadori forti cumenti a Giuanneddu Luppu. Prexu mannu in domu de is de s'Ozierese de Otieri puru, cun Antoniu Marteddu e Luigi Zappareddu chi funt stètius sceraus de Pia. Pròpriu Marteddu est unu de is giogadoris chi est fadendi biri is cosas prus togas e est fadendi is ispantus prus mannus in sa Lista B de sa Promotzione, cun s'atacanti de sa scuadra sighida de Ferruccio Terrosu chi tenit giai fatus calincuna cosa cumenti a ses gol me is primus dexi bessidas e tenit giai, est pagu ma seguru, totus is ogus apitzus de is scuadras prus mannas e prus fortis chi nci funt in dì de oi in Sardìnnia, cun su piciocheddu chi est nasciu su dexiotu de su mesi de Abrili de su duamilla e cincu e tenit, duncas, (chi totus custus numerus no mi faint bessiri a foras de conca e perdi su contu), feti sexi annus, ma est giai gioghendi, chentza tenni nesciuna bregungia, nesciuna timoria, cun is giogadoris prus mannus de issu. Is casteddaius de su Club San Paolo, chi currint in sa Lista A de sa Seguda Categoria, funt prexaus po sa lamada de Lorenzu Morini; is tattaresus de sa scola de bòcia de su Puri e Forti funt rapresentaus de Lorenzu Filia e de Flavio Mereu; is de su Cualtu Sant'Aleni, torra, tenint in sa scuadra de sa Rapresentativa Sarda de is Allievus Luca Crobu. Alessiu Pilo e Enricu Zirolia funt is duus giogadoris chi nd'arribbant de is tattaresus de su Latte Dolce; is casteddaius de sa Sigma si prexant po Matteu Diomedi e Mattia Pinna. Is de sa Tharros de Aristanis faint su tifu po Alessiu Piras; is de sa Torres, chi currint in sa Sèrie D, si podint gosai sa stagioni bona meda, a su mancu po immoi, de Emanueli Carta e de Matteu Del Giudice; is campidanesus de sa Villacidrese de Biddacidru, sighius immoi de Gabriele Mannu, chi nd'at pigau su postu, pròpriu me is cidas passadas, de Congia, funt rapresentaus de Nicolò Zedda.

Eus arremonau is de sa Torres, e mi parit chi nci bolant dus fueddus apitzus a su chi funt bivendi is tattaresus; cumenti si ndi seis acataus, deu pentzu, est de una pariga de cidas chi no chistionu prus (mellus: chi no chistionu prus diaici meda, cumenti sucèdiàt me is mesis passaus e mescamente in totu su duamilla e bintunu) de su tialu de Covid, mancai is cosas de torrai a contai iant a essi una bella pariga, partendi de is leis nobas acapiadas a cussu chi tzerriant Green Pass, chi est su documentu chi serbit po brintai me is logus pùbbricus (cumenti is bar, o is teatrus) e fintzas me is logus innoi trabballaus, e chi ant a cambiai pròpriu su ses de su mesi de Idas, est a nai lunis chi benit, totu custu po cumbati su spaniamentu de sa genia noba de su virus, chi ant tzerriau (si ddu scriu in italianu) "variante Omicron" e chi, a cantu parit, nd'est aproillada de s'Africa. Is de su Guvernu funt circhendi de cunvinci cussus chi no si funt ancora fatus sa puntura de su vacinu a si ndi movi, ma funt circhendi de fai sa de tres punturas a cussus puru chi dda tenint giai fata po duas bortas, poita, a cantu parit de su chi nant is grandus dotoris chi funt sighendi is cosas, tocat a essi segurus de abarrai sanus e intzandus s'at a tocai a fai atras punturas puru, sinuncas nc'iat a essi torra s'arriscu de depi serrai totus is atividadis, pròpriu immoi po is festas de Nadale, po sa segunda borta de sighiu, e chi si depu nai sa beridadi est una cosa chi no bollu mancu pentzai in dì de oi.
Torraus a nosu, duncas: fintzas a immoi is scuadras, a su mancu po su chi pertocat sa Sardìnnia, no ant tentu strobus mannus po crupa de su virus; is giogus funt sighendi a andai ainnantis e fadendi su contu de cumenti funt andadas is cosas s'annu passau (si ddu arregodais, berus? Totus is giogus sciusciaus a sa fini de su mesi de Ladàmini), nc'est feti de essi prexaus. Ma in custas ùrtimas dexi diis, prus o mancu, nd'est bessida a foras sa noba chi pertocat pròpriu is arrubius-brau de sa Torres, chi funt cumbatendi po circai de no fai spaniai su puntori aintru de sa rosa cosa insoru: parit una brulla, ma in pitzus de s'aereu chi at portau sa scuadra torra in Sardìnnia, apustis de sa partida contras a is campanus de su Gladiator (de sa cida passada), e chi est partiu de Roma, ddoi fiat, a cantu parit, a cantu s'est scipiu apustis, unu cristianu cun sa genia noba de su virus in cropu; diaici totus cussus chi fiant in s'aereu funt stètius postus in assètiu, est a nai cussu chi in italianu tzerriaus "quarantena preventiva", cun is giogadoris de sa scuadra tattaresa chi, est craru, si funt depius firmai cun is allenamentus in truma manna. Sa sociedadi peròu at fatu giai sciri chi apustis de is esamis chi is giogadoris ant fatu, a cantu parit no nc'est nemus chi si nd'est buscau sa mobadia, ma po seguresa sa partida chi si depiàt giogai pròpriu custu domìnigu chi benit, contras a is allenus de sa Vis Artena, nd'est sartada, cun is de sa Lega Natzionali de is Diletantis chi no ant ancora decidiu candu at a essi possìbbili a dda recuperai.

Attività realizzata col contributo della Regione Sardegna. IMPRENTAS 2020-2021. LR 22/2018 art. 22