Sèrie D, s'Aic pedit chi potzant èssere impreados 3 foras de cuota pro fàghere intrare 160 ex giogadores professionistas

S'Assòtziu Italianu Calciatori faghet pressing a sa Lega Nazionale Dilettanti pro minimare de una unidade su nùmeru de sos foras de cuota de pònnere in campu dae su primu minutu. Dae sos bator foras de cuota giai prevìdidos pro s'istajone 2014/15 si diat a dèpere calare a tres. Su motivu? Donare a a su nessi 160 giogadores ex professionistas sa possibilidades de giogare in una sèrie de importu comente sa de bator sèries. Difatis, cun sa reforma de sa Lega Pro, chi benit a èssere Sèrie C ùnica, s'at a passare dae 69 club professionìsticos (33 de prima e 36 de segunda divisione) de s'istajone a penas concruida a 60 (tres girones de 20) de s'annu chi at a bènnere, duncas, cun 9 club in mancu in sos campionados professionìsticos b'ant a èssere a su mancu 180 giogadores (una media de 20 pro iscuadra) sena de cuntratu e cun dificultade finas a agatare unu postu in sèrie D. Su resonamentu chi faghet sa Assocalciatori est chi cun su nùmeru de foras de cuota dae 4 a 3, ant a agatare unu postu in sa de bator sèries a su nessi 162 giogadores “antzianos”, diat a chèrrere nàrrere a su nessi unu pro onni iscuadra ant a cumpònnere sa sèrie D de su benidore.