Sa LND bollit torrai in campu ma po calincunu is giogus s'iant a depi serrai diaici: pigai una detzisioni no at a essi facili

Chi sighit diaici, pigai is detzisionis apitzu de su sport iat a podi essi prus traballosu de cussu chi, mancai, pentzaus imoi.
Est unu discursu, custu, chi ballit pruschetotu po sa Lega Natzionali de is Diletantis.
Is fainas funt craras: de una parti, difatis, nci funt cussus chi creint ca po cust'annu no nc'est prus nudda de fai, est a nai chi is giogus iant a depi acabai diaici: a su CONI e a su Ministru de su Sport, duncas, iat a tocai scioberai su modu po aparixai is contus de is listas.

Est cussu chi narat, po nd'arremonai unu, Giuseppe Ruzza, su presidenti de su Cumitau Regionali de su Veneto, unu de is logus innoi su nùmeru de is apuntoraus est prus artu. «Seus arraxonendi a totu dii de sa chistioi impari a is atrus cumitaus de su Nord de s'Italia e puru cun cussus de s'Emìlia, de sa Toscana e de su Latzio — at contau Mèrcuis passau —: est berus, totus teneus gana meda de torrai a partiri, peròu sa conca si narat ca custu no s'at a podi fai».
Agoa aciungit. «In Veneto is giogadoris ant a torrai in campu feti candu no nc'ant a essi prus arriscus e, de cussu chi si biri e chi scieus imoi, mi parit ca nc'at a essi de abertai po un antru bellu pagheddu de tempus, po ndi bessiri aforas de custu dannu mannu».

De s'antra Cosimo Sibilia sighit a arrepiti ca «su calciu at a torrai a partiri totu paris, est a nai de sa Sèrie A fintzas a sa Tertza Categoria».
Seus chistionendi de calincuna cosa cumenti a doxi milla sotziedadis, sessanta milla scuadras, prus de unu millioni de giogadoris tesseraus, po giai sescentus milla partidas a s'annu. Est facili a cumprendi chi badda badda ddoi est unu muntoni de dinai. «Ddoi funt scuadras — scoviat Ruzza — chi ant spendiu meda po cuncodrai is arrosas, chi bisant de nd'artziai de categoria. Ci funt puru scuadras chi fiant cumbatendi po no incuiri. Candu eus a pigai is detzisionis, duncas, eus a depi tenni in contu de totu custas cosas, ma is bideas no s'amancant. Comentecasiat at a serbiri una detzisioni chi potzat balli po totus».



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020