Sa stòria de Pasquale Meloni: su coru suu si firmat in s'interis de sa partida tra Sigma e Sant'Aleni

Po bona sorti, tocat diaderus a ddu nai, totu est acabau feti cun d-unu atzìchidu mannu meda, poita cun custas cosas, de sicuru, no si podit brullai.
In s'ùrtimu domìnigu, difatis, prus de is risultaus de is partidas, at fatu chistionai sa stòria de Pasquale Meloni, su dotori chi sighit in campu is picciocus de su Cuartu Sant'Aleni: po una borta perou no est stètiu issu a donai agiudu a is giogadoris ingotus, ma is cosas funt andadas a s'imbressi.
Seus a su 42' de su secundu tempus de sa partida chi is biancu-birdis funt gioghendi in su campu de sa Sigma De Amicis,  in Via Crespellani, in sa zona de Mulinu Becciu, in Casteddu: totu est andendi beni po is cuartesus, chi funt bìncendi po duus a unu, ma totindunu, cumenti chi ddi fessit cabau unu lampu in conca, Pasquale Meloni, otant'annus, si intendit mali e si fùrriat a terra, cun spantu mannu de is giogadoris de is duas scuadras, de sa genti che est aproillada po biri sa partida e de s'àrbitru.

Candu sussedint custas cosas tocat a essi prontus, dònnia segundu est de importu mannu po sravai una vida: Enzo Carta at cumprèndiu impressi ita fiat sutzedendi a su coru de Meloni; diaici s'allenadori de is portieris de is casteddaius s'est acutu po agiudai su collega.
Po bona sorti Carta at acabau de pagu de fai su cursu de “Primu succursu e BLSD” e sciit beni cali funt is cosas chi serbint: is manus e sa buca po cussa chi si narat “Rianimazione Cardio Polmonare”, ma pruschetotu su “defibrillatore”, s'aparèchiu chi cun d-una scarriga de currenti agiudat su coru a torrai a partiri. Nc'est pròpriu una lei chi narat chi totus is scuadras de calciu ndi depint tenni a su mancu unu in su campu innui giogant e imoi est pru facilli cumprendi poita.
A pustis Pasquale Meloni est arribau, cun s'ambulanza, a s'uspidalli de Pauli, innias est stètiu operau, e imoi est aforas de perìculu.
Invècias Sigma e Cuartu s'ant torrai a biri su doxi de friàrgiu po acabai de giogai is ùrtimus tres minutus de sa partida.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020