Salta al contenuto principale
dammacco

Is scuadras sardas cuncodrant is rosas po su benidori: totus is afaris pesaus fintzas a imoi in Sèrie D e Eccellenza

Sa friscura chi est fadendi in custas ùrtimas diis (seus chistionendi, est craru, de su chi pertocat su tempus) est agiudendusì a si ndi fai scaresci, a su mancu po unu paghedhu, totus is disprexeris chi eus tentu sa cida passada, candu sa Sardìnnia at incumentzau a pigai fogu (est sèmpiri sa pròpriu storia, e si dispraxit a du nai, dònnia annu), cun totus is dannus chi ndi funt arribbaus apustis, fadendi su contu de totus is matas abruxiadas, cun is meris de medas aziendhas chi nc'ant perdiu giai totu (tra bestias mortas e campus chi funt stètius arrovinaus de su fogu, bai e circa fintzas a candu). Is sardus peròu, cumenti sutzedit fatu fatu, candu nc'est de si donai una manu de agiudu s'unu cun s'atru, si faint sèmpiri balli: nc'est, duncas, chini est arragollendi unu paghedhu de dinai in giru, ma nc'est puru chini at preferriu de si imbrutai is manus cun is trabballus chi nci funt de fai, mancai agiudendu a portai acua bona me is logus chi funt abarraus chenza de nudha po crupa de is dannus, o ingollendi (e arregallendi) is seminis de prantai po ndi torrai a pesai is fainas me is campus. Apustis de is dannus chi su tempus mau at fatu s'annu passau in Bitzi (e si dhu arregodaus beni), s'agataus torra a cumbati contras a sa sfortuna, e no podeus fai atru, po imoi, che pregai chi totu andit beni. In s'interis, sighint (e sigheus) a chistionai de su tialu de Covid puru: sa cida passada, difatis, calincunu timiat chi sa Sardìnnia podessit essi torra pintada de grogu, poita is apuntoraus, e duncas su spaniamentu de sa mobadia, no funt ancora acabbaus, a cantu parit, antzis, funt sighendi a cresci de numeru, candu mancant feti binti-seti diis a su mesi de Cabudanni chi, cumenti narat su nomini, est unu de cussus de importu prus mannus po nosu, poita torrant a incumentzai totus is atividadis, partendi de is letzionis me is scolas, fintzas a arribbai, chi est sa chistioni de importu prus mannu po su Diario Sportivo, a is partidas de bòcia, cun sa Coppa Italia po is scuadras de s'Eccellenza e de sa Promozione e duncas cun is campionaus de sa stagioni noba, est a nai sa de su duamilla e bintunu \ duamilla e binti-duus.

Po su restu, is de su Guvernu ant a fai sciri, de cida in cida, cumenti ant a sighiri a andai is cosas, po su chi pertocat su Covid, est craru, ma mescamente po su chi pertocat is obbrìgus e is cosas chi si podint (o no si podint) fai: is nobas, cumenti scieus beni, ant a bessiri sa cenàbara ma ant a balli feti de su lunis avatu; abarrat ancora de cumprendi, e nosu pentzaus chi nc'at a bolli un antru paghedhu de tempus po crariri mellus sa situatzioni, cumenti ant a essi cuncodradas is cosas po su chi pertocat su "green pass" (cumenti dhu tzerriant in ingresu), poita calincunu est incumentzendi a pentzai e a nai chi est una règula chi andat contras a sa libbertade de is cristianus. Eus a biri, intzandus, ita nd'at a essi de nosu, ma de seguru (seus chistionendi sèmpiri de su Covid, est craru) cun totus is turistas chi ndi lòmpint in Sardìnnia is arriscus de fai spaniai ancora de prus sa mobadia no funt pagus, ma no podeus nemmancu sighiri a bivi cun is timorias e is pentzamentus legius in conca a totu dì, pruschetotu poita is turistas portant dinai (e trabballu), cumenti scieus beni. E duncas, a su mancu po oi, circaus de pentzai feti a is cosas bonas de sa vida e no a is cosas mabas.

In s'interis chi is Olimpiadis puru sighint a andai ainnantis, mancai ingui puru nci siant giai is primus apuntoraus po crupa de s'influèntzia, cun is italianus chi funt boddendindi is primus medallas (cussas de oru funt ses, a su mancu in dì de oi), sa cosa prus bella chi mi benit de contai, ainnantis de incumentzai a chistionai, cumenti a sèmpiri, de is scuadras de bòcia de sa Sardìnnia, est su de torrai a biri sa genti a passillu me is bias, me is rugas, chentza cussu tiau de carotedda in faci (mellus: in sa buca e in su nasu). Nci fia pentzendi pròpriu s'atra dì, ca no mi parit mancu berus de torrai a biri sa genti arriendi e chistionendi cumenti festus costumaus a fai fintzas a s'annu passau; est diaderus una cosa bella po su coru e imoi isperaus chi sa mobadia, e is dannus, si lessint diaderus in paxi. Mancai, custu est su bisu, a su mancu, eus a torrai puru a ndi pesai is festas me is pratzas de is bidhas nostas: iat a essi diaderus una bella cosa po is comunidadis nostas, chi iant a podi torrai a bivi in acòrdiu e allirghia, apustis de totus custas lagrimas e apustis de totu sa tristura chi nd'eus bodditu in totus custus ùrtimus mesis. Acabbau de nai custu, andaus ainnantis cun is nobas, scritas cumenti a sèmpiri in su sardu de su Campidanu de mesu po is amigus de su Diario Sportivo, chistionendi, po sa primu cida de su mesi de Agustu puru, de totus is fainas chi is scuadras sardas ndi funt pesendi in su mercau, chi est s'afrodhiu prus mannu po totus is tifosus in custu periudu. A nai sa beridadi, is spantus prus mannus nd'arribbant giai totus de is scuadras chi ant a curri in sa Sèrie D e in su campionau de s'Eccellenza, cumenti a eus a biri mellus tra pagu, ma puru is scuadras de Promozione e de sa Primu Categoria funt incumentzendi a cuncodrai is rosas po sa stagioni noba chi at a benni, mancai is cosas no siant ancora diaici craras, po crupa, torra, de su Covid chi nd'iat a podi sciusciai totus is giogus, pròpriu cumenti est sucèdiu s'annu passau.

Is biancus-asullus de su Muristeni, inzandus, cun su presidenti Marco Carboni chi po is fainas de su mercau sighit a trabballai cun Matteo Zanda, chi est su portieri puru de sa scuadra, funt sighendi a ndi pesai sa rosa po sa stagioni de su duamilla e bintunu \ duamilla e binti-duus: me is ùrtimas diis, difatis, si funt serraus is acòrdius cun Matteo Saias, unu difensori nasciu in su milli e noicentus noranta-cincu, chi me is ùrtimus annus at bintu is campionaus de s'Eccellenza impari a is de su Crabònia e impari a is de su Castiadas, chi at agiudau puru in custus ùrtimus duus mesis, gioghendi po is partidas de su campionau de s'Eccellenza a otu scuadras. Impari a Saias, nd'arribbat puru su centrucampista ingresu de bintun annus (est nasciu in su duamilla), Mattew Savage, chi me is ùrtimus duus annus at agatau scuadra in su Sarrabus, gioghendi cun is de su Castiadas e is de su Murera. Est fàcili cumprendi totu su prexiu e s'afrodhiu chi s'allenadori Nicola Manunza tenit in su coru, po una scuadra chi, a su mancu diaici si parit in dì de oi, est giai bona meda e forti. Arribbant nobas de importu mannu meda puru de is ollastinus de su Castiadas, chi ant donau is crais de sa scuadra me is manus de Virgilio Perra, e imoi funt trabballendi in su mercau po circai de ndi pesai una rosa chi potzat curri po s'artziada in Sèrie D. Me is ùrtimas oras, is birdi-biancus ant agatau s'acòrdiu cun Rafael Zuchi, unu difensori forti meda, nasciu in Brasili in su milli e noicentus noranta-cuatru, ma cun su passaportu italianu. Zuchi nd'arribbat in Sardìnnia apustis de is esperièntzias fatas cun is de s'Athletico Paramense, candu fiat piciochedhu piticu, e apustis cun Guaratinguetà, Portuguesa e Tigres. Zuchi at giogau puru me in su campionau ispagnolu, in su duamilla e dexiotu, cun is de s'Almudavar, in cussa chi ballit cumenti a sa nosta Sèrie C, and apustis est bobau in Giordania, po giogai in sa Sèrie A de ingui cun is de su Sahab SC. Po su chi pertocat sèmpiri sa difesa, ndi funt lòmpius puru duus piciochedhus piticus ma chi tenint bisus mannus meda de giogai e de cresci: sesu chistionendi de Gioele Zedda, nasciu in su duamilla e unu, chi duus annu fait iat bintu su campionau de s'Eccellenza cun is de su Crabònia e s'annu passau, invecias, at giogau adderetura in Sèrie D cun is de su Murera; e de Alessio Cardia, unu piciocu de su duamilla e duus, chi at giogau, beni meda, tocat a dhu nai, impari a is de su Ilartzi, po is primus seti giorronadas de su campionau de s'Eccellenza chi balliat po su duamilla e binti \ duamilla e bintunu e chi est stètiu sciusciau, cumenti scieus e cumenti si ndi arregodaus beni, me is ùrtimas diis de su mesi de Ladàmini. A centrucampu, invècias, ndi torrat Christian Ruggieri, chi iat giau giogau e bintu su campionau cun su Castiadas e apustis at giogau puru impari a is de su Muristeni e impari a is de su Cuartu Sant'Aleni. Po su chi pertocat s'atacu, invecias, su nomini callenti est cussu de Giacomo Santoro, nasciu in su milli e noicentus noranta-seti, chi tenit me is pabas calincuna cosa cumenti a centu partidas (e puru cuatru gol) fatas cun is de su Budoni in Sèrie D. Ant a abarrai po un'antra stagioni cun sa camisedha de su Castiadas apitzus su portieri Matteo Forzati, su centrucampista Mirco Carboni e in atacu Musie Tesfai. Is de su Castiadas funt circhendi de acapiai a sa scuadra, puru po s'annu duamilla e bintunu \ duamilla e binti-duus, su difensori Giacomo Chessa e su centrucampista Sandro Scioni. Po su chi pertocat is atras scuadras sardas chi ant a curri in su campionau de sa Sèrie D, is de su Lanusè lassant partiri Vittorio Attili, chi at agatau un acapiu cun is de sa Vastese. Attili, nasciu in su milli e noicentus noranta-cincu, saludat is cumpangius suus apustis de duus annus, po calincuna cosa cumenti a cincuantotu partidas (e cuindixi gol) fatas, cumenti a centrucampista ma puru gioghendi in atacu. Is de su Lanusè peròu ant agatau s'acòrdiu cun Nicolò Manca, unu giòvunu nasciu in su duamilla e unu, chi at a giogai po su de tres annu de sighiu cun is ollastinus. Is de su Murera puru no abarrant de seguru a castiai is atrus cun is manus in manu e faint sciri de essi agatau s'acòrdiu cun d'unu giogadori forti e de esperientzia manna cumenti a Gaetano Dammaco, unu numeru dexi chi at acabbau de giogai su campionau cun is de sa Nocerina, cun dexi gol fatus e giogadas bonas meda. Su diretori-sportivu de is de su Murera est arrannesciu a ndi pesai s'acapiu cun su piciochedhu chi ndi aproillat de Bari, mancai nci fessint atras scuadras chi dhu fiant circhendi. Dammaco at incumentzau a giogai beni meda cun is de su Matera, apustis andat a giogai in sa Primavera (est a nai sa scuadra de is piciochedhus de dexiotu annus) de su Torino, ma s'allenadori de sa scuadra manna, Mihajlovic, du tzerriat fatu fatu po fai is allenamentus impari a is giogadoris chi currint in Sèrie A. Cun is de su Matera giogat fintzas in Sèrie C, cun trintatres partidas fatas e cuatru gol; apustis giogat aforas de s'Italia, cun is de s'Akragas. In su mesi de Gennàrgiu de su duamilla e noi, ndi cabat de categoria, in Sèrie D, po giogai impari a is de sa Reggio Audace (chi imoi si tzerriat torra Reggiana). In Sèrie D, Dammaco giogat puru cun is de su Team Altamura, po sexi partidas, cun duus gol fatus. Tra is scuadras de Sèrie D sardas chi funt movendi is cartas in su mercau, nci funt de seguru puru is de sa Torres, chi funt giai fadendi bisai is pròprius tifosus, cun d'una scuadra chi parit giai forti po curri po s'artziada in Lega Pro. Su diretori sportivu Andrea Colombino at serrau is chistionis po s'acapiu de atrus cuatru giogadoris chi ant a trabballai impari a s'allenadori de is arrubius-asullus Alfonso Greco, cun is allenamenus in truma manna chi funt partius pròpriu sabadu passau, s'ùrtima dii de su mesi de Treulas, est a nai su trintunu, e apustis ant a sighiri in Gavoi e in Ollolai. Intzandus, po su chi pertocat s'atacu, nd'est lòmpiu in sa rosa Adama Diakite, nasciu in Costa D'Avorio in su milli e noicentus noranta-tres, chi nd'aproillat in Sardìnnia apustis de su campionau giogau impari a is de sa Nocerina, cun noi gol fatus. Diakite at giai giogau, adderetura, in Sèrie B cun is de su Padova, e in Sèrie C impari a is de s'Albinoleffe, de sa Casertana, de su Martina e de su Modena, po calincuna cosa cumenti a noranta-cuatru partidas in totu, e undixi gol me is pabas. In Sèrie D, Diakite arrannescit a fai unu gol dònnia tres partidas, in mèdia, cun is esperièntzias fatas impari a is de su Taranto, de su Savòia e de sa Nocerina, cun trintunu gol fatus in noranta-cincu bessidas. Po su chi pertocat sa difesa, invècias, is de sa Torres imprassant Paolo Dametto, nasciu in Sardìnnia, cresciu in Arborea, chi at giogau me is ùrtimus annus impari a is de su Picerno, chi ndi funt artziaus in Sèrie C pròpriu in custa diis, po ndi pigai su postu de is de su Gozzano. Dametto, de piciochedhu piticu, at giogau me is scuadras po is giòvunedhus de su Castedhu, ma at giogau puru in Sèrie C cun sa camisedha de is de su Prato, de su Lumezzane, de sa Reggiana, de s'Olbia, de sa Feralpisalò e de sa Pistoiese, po calincuna cosa cumenti a duus-centus partidas in totu. S'atru nomini callenti, in domu de is de sa Torres, est cussu de Davide Sabatini, unu giogadori chi nd'arribbat de Roma, nasciu in su milli e noicentus noranta-noi; s'annu passau at giogau impari a is de su Vis Artena, cun doxi gol fatus (chi no funt pagus). In su campionau de Sèrie D at giogau puru impari a is de su Monterosi, Albalonga e Team Nuova Florida, cun d'una esperièntzia de otanta-cuatru partidas. Serraus is nobas chi pertocant is de sa Torres cun su nomini de s'ùrtimu arribbau, dhi naraus diaici: seus chistionendi de unu piciochedhu chi nd'aproillat de s'Albania, Eduard Adin Dita, nasciu in su duamilla e tres, unu difensori chi est stètiu circau de medas atras scuadras in totus custus annus chi giogàt impari a is de su Foligno. No nci funt peròu feti is scuadras de Sèrie D e de s'Eccellenza chi funt fadendi spantus me in su mercau, poita est una cosa chi ballit puru po is scuadras de sa Promozione. Is de su Istintinu, po nd'arremonai una, ant depiu circai un allenadori nou apustis de essi segau s'acapiu cun Pierluigi Scotto, chi me is ùrtimus duus annus at pigau me is manus is crais de sa scuadra, mancai feti po una pariga de mesis, a sa fini de sa stagioni. Is de sa Torres, diaici, ant scerau de sighiri a andai ainnantis, po sa stagioni oba de su duamilla e bintunu \ duamilla e binti-duus, cun Paolo Congiu, chi iat giai giogau cun sa camisedha de su Istintinu e chi fiat s'allenadori de is de su Porto Torres. Po su chi pertocat is giogadoris, invècias, torrat a giogai cun is biancus-asullus su centrucampista Luca Ruggiu, nasciu in su milli e noicentus-noranta, chi nd'arribbat apustis de is esperiènzias impari a is de su Li Punti e de su Porto Torres, ma no si ndi podeus scaresci de is annus fatus impari a is de su Latte Dolce de Tattari e de su Sorso. Sèmpiri de is de su Porto Torres nd'arribbat puru Nicolò Carrozzi, de su milli e noicentus noranta-noi, impari a Tommaso Nieddu, nasciu in su milli e noicentus norantunu, chi peròu at giogau s'ùrtimu campionau impari a is de sa Macomerese. S'Istintinu, me is diis passadas, iat giai agatau s'acòrdiu cun d'unu campioni cumenti a Fabrizio Serra, nasciu in su milli e noicentus otanta-tres, chi giogat a bòcia de una vida, cun is camisedhas, tra is atras, de sa Torres, de s'Alighera, de su Tempio, de su Castedhu Sardu. Ant abarrai po un antru annu in su Istintinu puru Stefano Mereu, de su milli e noicentus otanta-seti, e Alessandro Piras, nasciu in su milli e noicentus otanta-tres. In sa rosa, abarrat puru Samuele Oggiano, piciochedhu piticu nasciu in su duamilla e tres, a sa de tres stagioni cun is de su Istintinu.

 

Attività realizzata col contributo della Regione Sardegna. IMPRENTAS 2020-2021. LR 22/2018 art. 22

 

In questo articolo
Squadre:
Campionato:
Argomenti:
Stagione:
2021/2022
Tags:
Serie D