S'Eccelenza torrat a duus fuori quota: s'urtima borta est stetiu in su duamilla e dexi

Is piciocus piticus, ddu scieus, in su calciu, diaici cumenti in sa vida, funt su benidori; est a su mancu de dexi – cuindixi annus chi is presidentis de is scuadras de Eccellenza ndi funt arraxonendi totus impari, po cumprendi cumenti si cumportai cun sa chistioi de is Fuori Quota, chi, duncas, detzidit apitzus a su nùmeru de giòvunus de nci ghetai in su giogu. Is cosas funt craras: cust'annu ndi serbint tres in campu, de su primu minudu fintzas a s'ùrtimu, po arrispetai s'arregula, ma candu is scuadras sardas giogant contras a cussas de su continente, me is partidas de sa Coppa Italia de Eccellenza o mancai in cussas po is play-off de Eccellenza, intre de duus in sa lista de totu Italia, su nùmeru ndi cabat a duus. Is presidentis si funt atobiaus sàbudu passau, s'otu de friàrgiu, a innantis de sa finalissima de sa Coppa Italia chi cussus de su Crabònia ant giogau impari a cussus de s'Atletico de Uri e ant agatau un acòrdiu: a partiri de s'annu chi benidi, po atrus cuatru annus, fintzas a su duamilla e bintitres – duamilla e binticuatru, ant a depi giogai po forza feti dus piciocheddus. Po su duamilla e binti – duamilla e bintunu, inzandus, nc'at a essi logu po unu nàsciu a pustis de su primu de gennàrgiu de su duamilla e unu, e po unu nàsciu a pustis de su primu de gennàrgiu de su duamilla e duus. S'urtima borta chi in su campionau de Eccellenza serbiant feti duus giogadoris Fuori Quota est stètiu in su duamilla e dexi – duamilla e undixi, cun su Progetto Sant'Elia chi iat bintu sa batalla po ndi bolai in Serie D. A pustis, is presidentis de is scuadras de Eccellenza iant pediu a Andrea Delpin, chi, a is tempus, fiat su presidenti de su Comitato Regionale de sa LND, de fai artziai su nùmeru de duus a cuatru, custu po agiudai is sociedadis a ndi pesai is arrosas chenza po fortza depi spendi tropu dinai cun is giogadoris prus matucus.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020