Salta al contenuto principale
latte dolce scotto rovesciata

Sèrie D: is de sa Torres cassant sa primu bìncida a sa de undixi giorronada; su Lanusè sighit a bolai in artu; Altzaghena e Latte Dolce abarrant a buca asciuta

Is de sa Sèrie D, (ma feti cussus, po imoi, in s'interis chi seus ancora abetendi de cumprendi cumenti s'ant a ponni is cosas po totus is atras scuadras in Sardinnia, partendi de is de s'Eccellenza fintzas a nd'arribai a cussus de sa Secunda Categoria) sighint a curri avatu de sa bòcia e sighint a andai ainnantis cun is partidas: custu domìnigu passau, difatis, su dexi de su mesi de Gennàrgiu, s'est giogada sa de undixi giorronada. In campu is de s'Altzaghena, is tattaresus de su Latte Dolce, is de su Lanusè e is de sa Torres; sartant, invècias, is partidas tra is de su Crabònia e is de s'Insieme Formia, e tra is de su Murera e is de su Vis Artena (po su chi pertocat is scuadras sardas), sèmpiri po crupa de su tiau de su Covid. Andaus duncas a biri mellus cumenti funt andadas is cosas.

Is de su Lanusè faint su prenu de afròdhiu e de prexu, e si cumprendit beni su poita: domìnigu est arribada sa secunda bìncida de sighiu in domu, in sa batalla contras a is de su Giugliano, cun seti puntus aguantaus me is ùrtimas tres bessidas, e sa lista chi imoi fait prus pagu a timi, cun is ollastrinus chi tenint in buciaca doxi puntus in totu, e seti scuadras a is pabas. Is meris de domu partint forti meda e apustis de cincu minutus de giogu po pagu no faint su primu gol, cun Sylla chi ferrit su pau cun d'unu tiru velenosu chi fiat acanta a frigai su portieri de is strangius Mola. Apustis nci provat po duas bortas Camilli, ma est Stendardo chi, a su de bintiseti minutu, donat unu bellu corpu de conca a sa bòcia scuta de Arvia, cun Mola chi no nci podit fai nudha, e firmat su gol. Su Lanusè sighit a giogai beni meda e is piciocus sighius de mister Greco iant a podi agatai su secundu gol puru, candu Attili lassat partiri unu tiru bellu cantu forti, de atesu meda, e ndi pigat in prenu sa traversa. In campu peròu nci funt puru is aversarius de su Giugliano, cun Orefice chi currit allestru cumeti a una lepori e, candu seus a su de coranta-cuatru minutu, arribat facci a facci cun Lo Greco, ma su portieri de is sardus serrat sa porta e salvat su resultau. In su secundu tempus su Lanusè circat de serrai sa partida e is giogus: nci provat ancora Attilu, chi donat una carvada de pei a sa bòcia ma Mola no si fait frigai torra. Su portieri de is strangius peròu nd'arruit po sa secunda borta a su de binticincu minutu, candu su portoghesu Varela sfundat in sa zona de dereta de su campu e agatat su secundu gol po is suus. Po is strangius est unu domìnigu de scaresci in pressi, cun is cartellinedhus arrubius bodditus de Tarascio e Poziello.

Nudha de fai po is de s'Altzaghena, chi si dha depiant biri contras a is de su Monterosi, is primus de sa lista, in d'una de is partidas prus bellas e togas de totu sa giorronada. Nc'est de nai puru chi is smeraldinus si dha funt giogada beni, cun coru, passientzia e coràgiu, ma fortzis cun d'unu paghitedhu de fortuna in prus is cosas podiant andai mellus. Is piciocus sighius de mister Cerbone, si fait prexei a dhu nai, ant giogau beni meda su primu tempus. Is primus de sa lista aciapant su primu gol de su domìnigu apustis de noi minutus de giogu, cun Piroli chi arranescit a donai una carvada de pei a sa bòcia, chi fiat badda badda in area de rigori apustis de su tiru de Pellacani, chi fiat atumbau in su pau. A su de trinta-ses minutu, peròu, is strangius smeraldinus aguantant s'unu a unu, gràtzias a su tiru bellu meda de Defendi, cun d'una carvada de pei de deretu. Is duas scuadras acabant su primu tempus in paridadi, ma in su secundu tempus Sivilla torrat a aciapai su gol po is meris de domu de su Monterosi. Sa partida abarrat bella e oberta fintzas a su de noranta minutu, cun s'Altzaghena chi nci provat in totus is modus a aciapai su gol, ma Salvato e is cumpangius si difendint beni e si ndi pigant, diaici, sa de ses bincida de sighiu in domu cosa insoru.

Is de sa Torres ant depiu abertai po dexi giorronadas po agatai sa primu bìncida de candu funt partius is giogus, in su mesi de Cabudanni, cun s'allenadori nou, mister Graziani, chi si gosat sa bella partida fata de is piciocus cosa sua. A nai sa beridadi, is de sa Torres iant giogau beni meda puru contras a is de su Nola e contras a is de sa Nuova Florida, ma est contras a is de su Gladiator chi nd'arribant is primus tres puntus prenus. Nc'est de nai puru chi is aversarius funt arribaus a sa batalla de domìnigu passau in saludi, apustis de essi bintu contras a sa Nocerina, e apustis de su puntixeddu bodditu contras a is de su Savoia, cun Monterosi, sa scuadra primu de sa lista, e is de su Murera chi ant depiu sunfriri, e meda puru, po si ndi scabulli de is aversarius. Pròpriu po su chi eus nau imoi, sa bìncida de is de sa Torres tenit unu sabori ancora prus druci. Is meris de domu partint a forti e aciapant su primu gol apustis de feti duus minutus de giogu: Melli scudit sa bòcia conca a Bilea, chi si fait agatai prontu e scidu in mesu in mesu a s'area de rigori de is strangius e donat una carvada de pei, cun su deretu, a sa bòcia chi stampat sa porta de Fusco, cun su portieri chi no nci podit fai nudha. Is strangius peròu no abarrant a castiai is aversarius e a su de dexi minutu Falco tirat beni meda sa bòcia, ma Frasca cun d'unu miràculu salvat is suus. A su de binti minutu, sa Torres po pagu no aciapat su secundu gol, candu Bilea, piscau torra de Melli, sparat sa bòcia tropu in artu. Sa partida abarrat alluta e oberta, cun is strangius de su Gladiator, seus a su de bintunu minutu, chi nci provant cun Tripicchio, chi tirat a cropu siguru, cun su pei mancosu, ma Frasca arrespundit cun d'una parada de campioni. Me is ùrtimus minutus de su primu tempus sucedit de totu: Di Paola pigat in prenu sa traversa cun d'unu tiru bellu meda cun su pei mancosu; de s'atra parti, La Vigna piscat Mascia chi lassat partiri unu tiru forti cantu bellu chi ferrit apitzus de sa traversa. Su primu tempus si serrat cun sa giogada de La Vigna chi peròu no intzertat su tiru, cun sa bòcia chi bessit de su campu chenza cassai sa porta. In su secundu tempus is de sa Torres agatant su secundu gol: seus a su de binti-tres minutu candu Fadda fait curri allestru meda Mascia chi si lassat a is pabas De Carlo e apustis stampat sa porta difendia de Fusco, cun d'unu tiru cun su pei mancosu. Sa Torres, a cussu puntu de sa partida, si depit difendi de is atacus de is de sa Gladiator ma isfrisant puru su de tres gol cun Melli. Me is ùrtimus minutus de sa partida, Schiaroli ndi ingollit duus cartellineddus grogus, unu avatu de s'atru, e lassat is cumpangius cosa sua in dexi ominis. A su de corantotu minutu, is strangius agatant su gol de sa bandera cun De Carlo, fillu de su De Carlo chi at giogau puru in su Casteddu, chi est bravu meda a donai unu cropu de conca a sa bòcia. Me is ùrtimus minutus de sa partida, sa Torres apoderat beni e si gosat diaici sa primu bìncida. Si cumprendit beni, intzandus, su prexu de s'allenadori de is arrubius-brau, Archimede Graziani, chi a s'acabada de sa partida scoviat a is de Torrestv: «Is piciocus funt trabballendi beni meda me is allenamentus aintru de sa cida; is resultaus chi ndi seus ingollendi e is partidas bellas e togas chi seus fadendi in custas ùrtimas giorronadas dipendint de custu. Seu prexau meda po sa bìncida, ma su prexu prus mannu est po cumenti is giogadoris ant pesau sa partida». Poi Graziani serrat sa chistioni: «Seus feti a s'incumintzu de su tretu chi imoi si spetat de fai; nc'at a essi de trabballai e de curri ancora meda po arribai atesu cumenti totus isperaus».

Domìnigu trotu, invècias, po is de su Latte Dolce, chi ndi ingollint sa de cuatru partidas perdias in dexi bessidas, sa de tres partida perdia de is ùrtimas cuatru giogadas: is tattaresus, chi bisànt de torrai a partiri a forti in s'annu nou, ant a depi abertai a su mancu atras binti-cuatru oras po torrai in campu e nci torrai a provai (crasi nc'at a essi, difatis, sa partida contras a is meris de domu de sa Nocerina, chi ballit po sa de seti giorronada), cun sa lista chi donat pentzamentus legius, cun is biancus-brau chi tenint feti dexi puntus in buciaca e feti cuatru scuadras a is pabas. Sa partida si serrat cun su resultau de unu a zeru po is meris de domu de su Savoia, cun is campanus chi agatant su gol chi ballit po is tres puntus a su de trinta-tres minutu de su primu tempu, candu, mancu a dhu fai aposta, is de su Latte Dolce fiant gioghendi beni meda: nci penzat, intzandus, Poziello, cun d'unu corpu de conca a sa bòcia chi ballit po sa bìncida. In su secundu tempus, is strangius sardus circant de aguantai sa paridadi, ma su Savoia andat acanta a su secundu gol cun Orlando, chi ferrit in prenu su pau. Su Latte Dolce si giogat is ùrtimas cartas cun Scotto, ma Esposito no si fait frigai. Is de su Savoia, cun custus tres puntus, si lassant a is pabas is de su Murera, cun is binti puntus chi ballint po su de tres postu in sa lista.

 

In questo articolo
Campionato:
Argomenti:
Stagione:
2020/2021
Tags:
Serie D