Serie D: is de su Murera ndi bodhint tres bussinadas de is de su Cassino ma domìnigu chi benit nci torrant a provai contras a is de su Giugliano

Chi est berus ca po is diletantis at a serbiri un antru pagheddu de passièntzia po torrai a curri in campu avatu de una bòcia, is de sa Sèrie D sighint, mancai a arrogus e a mussius, cumenti si narat, a andai ainnantis cun is giorronadas o, mellus, cun is recùperus de is partidas chi funt sartadas me is cidas e me is mesis passaus.

Pròpriu custu domìnigu, duncas, seus chistionendi de su binti-duus de su mesi de Donniasantu, est tocau puru a is de su Murèra, cun is grogus-brau chi nd'ant ingotu su primu disprexei de s'annu, in sa batalla in domu de is de su Cassino, chi at fatu tres gol e si nd'est pigau is tres puntus chi dhoi fiant, badda badda, in sa mesa.
Nc'est de nai puru ca is piciocus sighius de mister Francesco Loi funt stetius meda sfortùnaus e si funt ingotus a solus, s'iat a podi nai diaici, poita ant arregalau duus gol a s'atra scuadra, apustis de feti dexi minudus de s'incuminzu de sa partida: in d'unu primus tempus cun d'unu sbàgliu de Loi, agoa cun d'unu rigori donau de s'arbitru po una giogada de Satta, cun Vitiello chi at fatu is duus gol po is meris de domu. In su segundu tempus, invècias, si nc'est postu puru su portieri de su Murèra, Vandelli, chi no est arrannèsciu a apoderai sa bòcia me is manus, apustis de su cropu de conca de Giglio, cun is stràngius chi nd'ant bodditu, diaici, puru su de tres gol.

Imui is de su Murèra ant a torrai a cabai in campu domìnigu chi benit, est a nai su bintinoi de su mesi de Donniasantu, in domu, contras a is de su Giugliano, po recuperai sa partida chi si fiat depia giogai pròpriu su binticinu de su mesi de Ladàmini.
Impari a is grogus-brau de su Sàrrabus, torrant in campu atras duas scuadras sardas: seus chistionendi de is ollastrinus de su Lanusè, chi ant a arriciri is de su Latina, e de is tataresus de su Latte Dolce de mister Stefano Udassi, chi si d'ant depi biri contras a is de su Vis Artena, in domu cosa insoru, cun is biancus-asullus chi, fintzas a imui, no ant ancora bintu mancu una borta.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020