Salta al contenuto principale
giuseppe conte comitato tecnico scientifico

Su Cumitau Tennicu Scientificu de su Guvernu giòbia atobiat is dotoris de sa Federcalcio po aderetzai is arrègulas de sighiri po torrai a fai partiri is giogus

Totus is luxis sighint a essi apitzus de su mundu de sa Sèrie A: chi no torrant a partiri is giogus de is professionistas de su campionau prus mannu, no ant arribai nobas bonas po totus is atrus, incumentzendi de cussus de sa Sèrie B fintzas a arribai a sa Sèrie D.

Pruschetotu, cumenti eus giai nau medas bortas, sa Sèrie A pesat, diaderus, dònnia annu, unu muntoi de dinai: chi pentzaus a totus is dannus chi su tialu de Coronavirus at fatu, est fadendi e at a podi fai in su benidori, po cussu chi pertocat s'economia, in su mundu de su sport puru, si cumprendit beni poita su Guvernu, su ministru Vincenzo Spadafora e totu is atrus chi sighint sa chistioni, funt traballendi po circai de aderetzai is cosas. Chi est berus chi is diletantis (ballit po cussus de su giogu de sa bòcia ma ballit puru po totus is atrus) ant a tenni a bisongiu de unu agiudu po cuncodrai is campionaus chi ant a benni, si cumprendit poita no si potzant prus fai fadhinas.

In s'interis, nci funt bessidas aforas una pariga de nobas de importu.
Sa prima: s'atobiu de su "Consìgiu Federali" de sa "Federatzioni Italiana Giogu Calciu" de cenàbara, difatis, est stetiu crastinau e ancora no si scit candu at a benni a essi.
Po imoi scieus feti chi giòbia chi benit, est a nai crasi, su seti de su mesi de Maju, nc'at a essi invècias un atobiu, a is tres e mesu de su merì, tra is dotoris de su "Cumitau Tennicu Scientificu" de su Guvernu e cussus de sa "Federcalcio": apitzus a sa mesa, sèmpiri badda badda, sa chistioni de is règulas de sighiri po is allenamentus in trumas mannas e, pruschetotu, su de fai chi calincunu si depessit buscai sa mobadia, cumenti est sutzediu in Germània, innoi ant fatu is tasinantas de tamponis, est a nai is esamis, a is milli e seticentus giogadoris de sa Bundesliga e nd'ant agatau (feti) dexi cun su virus in cropus.

In questo articolo
Argomenti:
Stagione:
2019/2020
Tags:
Coronavirus