Su Guvernu donat una manu de aggiudu cun su Decreto Cura Italia: badda badda binticinu miliardus

Po una dii, circaus de ponni a una parti is pentzamentus, is timorias e sa sprama chi totus teneus po su spaniamentu de su coronavirus; mancai ancora non si potzat sciri candu at a acabai totu custu budrellu, su Guvernu est fadendi de totu po donai una manu de agiudu a sa genti, pruschetotu a cussus chi tenint su dannu prus mannu, po sa chistioi de su traballu: est cussu chi ndi bessit aforas de su Decreto Legge nou, cuncodrau lunis passau, su sexi de martzu, chi si tzerriat pròpriu “Decreto Cura Italia”. Si chistionat de binticincu miliardus e, tra custus, nc'at a essi su dinai puru po torrai a ndi pesai su mundu de sa bòcia. Su ministru de “Sport e Politiche Giovanili” Vincenzo Spadafora, contat: «Nc'at a essi un atobiu istraordinàriu tra duas cidas, tra cussus de su Coni e de su Cip, in tele-conferenza, est craru, po incumentzai a arrexonai apitzus de is cosas de fai, spereus chitzi meda, po torrai a fai partiri totus is fainas». Est craru, is agiudus no ant a essi feti po sa Serie A e sa Serie B ma ant a arribai puru po totus is scuadras de diletantis po totus is assòtzius de sport.
Sa primu cosa est sa “Cassa Integrazione in Deroga”, chi at a balli po totus is traballadoris dipendentis e ballit, est craru, puru po cussus chi sighint is fainas de is assotzius sportivus.
Una de is cosas de importu prus mannu, invècias, est sa “Indennità per autonomi e collaboratori”: si chistionat de sescentu euro, ma po una borta feti, e ballit puru po allenadoris, istrutoris e arguidoris chi arriscànt de abarrai a buca asciuta. Nc'at a essi puru sa “Sospensione dei versamenti” e sa “Sospensione di affitti e canoni di locazione”, est a nai de is arrendus. In su Decreto Legge “Cura Italia” nc'ant postu puru un agiudu po cussu chi tzerriant “Piano sport e periferie”, chi at a permitiri a totus is comunus chi ant bintu su bandu, de tenni, fintzas de imoi, su binti po centu, intamis de su dexi po centu, de su dinai chi spetat.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020