Salta al contenuto principale
gonnos saluti

Su mesi de Donniassantu est partiu chenza campionaus: scuadras torra in campu feti in su duamilla e bintunu?

Su mesi de Donniassantu est brintau feti de tres diis, ma comentecasiat si parit de essi giai cumprendiu beni calli at a essi sa cantilena chi s'at acumpangiai a su mancu fintzas a su binticuatru: candu ant a torrai a partiri is giogus?

Chi ligeus s'ùrtimu DPCM, bessiu aforas sa cida passada, est craru chi is diletantis (nosu de Diario Sportivo, ge dhu scieis, de dexi annus chistionaus de cussus chi giogant a bòcia, ma custa est una chistioni chi ballit po totus is sport chi si faint in truma o, comentecasiat, chi no funt de importu natzionali), depint abarrai firmus, a su mancu, po atras binti diis, ma nc'est giai chini est timendi che is campionaus ant abrarrai studaus adderetura fintzas a su mesi de Gennàrgiu de su duamilla e bintunu; a su mancu custa parit essi sa bidea, giai, de medas Cumitaus Regionalis.

Sa duda (ma iat a essi mellus dha tzerriai timoria) prus manna chi totus teneus in conca e in su coru, po imoi, est una: nc'at a essi su tempus po arrecuperai totus is partidas e arrannesci, diaici, a serrai is giogus?

Po cumprendi mellus cumenti est sa chisioni, podeus fait cuatru contus: de s'incuminzu de is campionaus (funt passaus feti trintaseti diis), de is trecentus e trinta-tres partidas chi si depiant giogai (partendi de is de s'Eccellenza, sighendi cun is de sa Promotzione e arribendi a is cuatru gironis de sa Primu Categoria), castiendi a su chi nc'est scritu in su calendàriu, ndi funt sartadas giai setanta (su bintunu po centus); de custas, bint funt stetias arrecuperadas in duus mèrcuis, su de su catodixi e su de su bintinu de su mesi de Ladàmini; diaici nd'abarrant atras cinquanta (su cuindici po centus) ancora de giogai po aparixiai totus is contus.

Cumenti sutzediu fintzas a imoi, duncas, is partidas s'ant a recuperai aintru de sa cida: una chistioni chi iat a podi essi trumèntosa meda po is allenadoris, poita medas giogadoris ant a depi pigai una dii de permissu de su traballu, est a nai de feria, chi bolint giogai a bòcia, ma si cumprendit chi no totus si d'ant a podi permiti, poita po is diletantis prima benit su traballu e feti apustis su spassiu.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Campionato:
Argomenti:
Stagione:
2020/2021
Tags:
Eccellenza
ultimora