Salta al contenuto principale
Eccellenza

Su mundu de is diletantis abetat nobas de su Consillu Diretivu de crasi: s'atobiu pesau po arrexonai apitzus de promotzionis e retrocessionis

At a essi unu mesi de Lampadas traballosu meda po totu su mundu de sa bòcia: chi est berus chi is professionistas de sa Sèrie A e is de sa Sèrie B ant a torrai in campu chitzi, mancant feti una pariga de diis, difati, po is semi-finalis de sa Coppa Italia (chi s'ant a giogai Cenàbara e Sàbudu de custa cida, su doxi e su trexi), in s'interis nc'est ancora de cumprendi cumenti aderetzai is cosas po totus is diletantis, e funt medas, in totu Italia, e pruschetotu, cumenti cuncodrai sa stagioni de su duamilla e binti \ duamilla e bintunu. Po is sotziedadis de sa Lega Pro e sa Sèrie D, nd'eus giai arrexonau meda in totu custu tempus, sa chistioni prus marigosa de ingutti est cussa chi pertocat is retrocessionis e ancora no sciesus beni cumenti ant a andai is cosas, poita in dii de oi nci funt scuadras chi funt prontas a batallai contras a is decisionis de sa FIGC.

At a tocai invècias a Gianni Cadoni, su presidenti de su Cumitau Regionali, sighiri totus is fainas chi pertocant is campionaus de is diletantis in Sardìnnia.
«Po nosu est unu perìodu traballosu e atrotoxau, ma seus giai po si ndi scabulli e ndi bessì aforas» — contat.
Agoa aciungit: «Sa LND at decidiu de fai cumintzai sa stagioni noba de sa primu dii de su mesi de Trìulas, cumenti a sèmpiri. In s'interis nci funt de serrai is giogus po is campionaus de cust'annu».
Pròpriu crasi, s'undixi, de giobia, nc'at a essi un atru atobiu de importu mannu meda po su Consillu Diretivu de sa Lega Natzionali de is diletantis: is chistionis de bacagliai no mancant de siguru. «Po imoi seus totus d'acòrdiu po sa promotzioni de is primas scuadras de is listas, prusaprestu nc'est stetiu giai calincunu certidu po su chi pertocat is retrocessionis. Una fita manna de Comitaus Regionalis, e su de sa Sardìnnia est fra custus, ant propònniu, po cust'annu, de ndi sciusciai sa chistioni de is retrocessionis ma nc'esti puru chini, est craru, iat a bolli fai aguali cumenti a is atrus annus».


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Campionato:
Argomenti:
Stagione:
2019/2020
Tags:
Dilettanti
ultimora