Salta al contenuto principale
Muravera

Su Murera oi torrat in campu po giogai contras a is de su Giugliano: sa partida ballit po sa de cincu giorronada

Mèrcuis de importu mannu meda po is de su Murera, chi ant a torrai in campu, custu mericedhu, po recuperai sa partida contras a is de su Giugliano: sa batalla at a incumentzai at is duas e mesu de su megama e s'arbitru at a essi Flavio Fantozzi, chi nd'arribat de Civitavècchia.
Is partidas chi s'ant giogai oi funt, in totu, bintunu e pertocant otu gironis de sa Sèrie D.
Sa partida ballit po sa de cincu giorronada, chi si depiàt giogai su binticincu de su mesi de Ladàmini, ma est sartada, cumenti scieus beni, po crupa de su virus.
Is grogus-brau fiant firmus de prus de unu mesi e funt torraus a partiri pròpriu domìnigu passau, cun sa bìncida, po duus a unu, contras a is de su Gladiator: imoi sa lista regalat prexiu e afrodhiu a is piciocus sighius de mister Francesco Loi, chi s'agatant, in dì de oi, a su de cuatru postu, cun undixi puntus, apustis de tres bìncidas e duus paregius.

Cun custus numerus allogaus in buciaca, bisai su de tres postu in sa lista no est proibbiu de siguru, e no est unu machiori bonu feti po is concas macas, poita is piemontesus de su Savoia tenint feti duus puntus in prus in sa lista.
Ma arrannesci a cassai sa bìncida no at a essi facili, poita is de su Giugliano parint in saludi bona, contendi pruschetotu chi, in s'ùrtimu bessida, ant bintu su derby contras a s'Afragolese, in d'una batalla tra scuadras de sa Campània.

Tocat a Alessandro Cadau, chi domìnigu passau at fatu su primu gol po is de su Murera, spendi cuatru fuedhus po arrexonai apitzus de sa bessida de oi: «Est una partida de importu mannu, contras a una scuadra de importu mannu. Po nosu no est stetiu facili torrai a cabai in campu apustis de totu custu tempus, est craru, e giogai po cuatru bortas in feti dexi diis».
Agoa sighit a contai: «Seus trabballendi beni me is allenamentus àintru de sa cida, obeus sighiri a bobai in sa lista, obeus sighiri, mancai, a spantai totus e s'iat a praxi meda a si fai unu bellu regalu po Paschixedha».

Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Squadre:
Campionato:
Argomenti:
Stagione:
2020/2021
Tags:
Serie D