Salta al contenuto principale
Eccellenza

Su trexi de su mesi de Cabudanni ant a torrai a partiri is giogus po sa Coppa Italia de s'Eccellenza e de sa Promozione

Is ùrtimus diis de su mesi de Agustu funt carrigus de nobas po su mundu de sa bòcia: in s'interis chi in Sardìnnia si torrat a chistionai de su tiau de su Covid, su numeru de is apuntoraus, difatis, est torrau a cresci, una cosa chi si depestus abetai, de su restu, contendi chi in s'isula in custus duus mesis dhoi funt aproilladas trumas mannas de turistas, chi nd'arribant de dònnia logu de Italia e de su restu de s'Europa, nc'est puru chi est sighendi a pentzai a su benidori e duncas a s'incumintzu de sa stagioni de su duamilla e binti \ duamilla e bintunu, cun totus is scuadras chi, a pagu a pagu, funt torredi in campu po is allenamentus.

Su doxi passau de su mesi de Agustu su Guvernu at aprovau su documentu cuncodrau de is de sa FIGC apitzus de is règulas de sighiri po torrai a partiri cun is fainas de is giogadoris diletantis e po su mundu de is giogadoris piticus, est a nai cussu de is piciocheddus giovanus.

E intzandus imoi abarrat feti de atendi is datas bonas: sa Coppa Italia de Eccellenza, po nd'arremonai una, at a torrai a partiri su domìnigu de su trexi de su mesi de Cabudanni, cun is de s'Arbus chi peròu si funt giai ghetaus aforas de sa cursa a sa finali e no ant a giogai; diaici nc'ant a essi seti partidas a fac'è pari, cumenti a sèmpiri, e una batalla a tres (su chi tzerriant triangolari) tra is de su Budoni, is de s'Ilvamaddalena e is de su Poltu Ridundu, chi ant a cabai in campu puru su sexi de su mesi de Cabudanni e apustis, impari a totus is atrus, su binti. Funt dexiaseti is scuadras, duncas, chi bisant de si gherrai sa bìncida de sa coppa su ses de su mesi de Gennàrgiu.

Sa chistioni est sa pròpria po su chi pertocat sa Coppa Italia de Promozione, cun doxi partidas a fac'è pari e cuatru triangolaris: su primu est tra is de su Bidda Matzràxia, is de sa Monteponi de Bidd'e Cresia e is de su Cortoghiana, chi ant a brintai me is giogus feti su Mèrcuris, su sexi de su mesi de Cabudanni; su segundu est tra is de su Seulu, is de s'Andromeda de Sriugus Donigalla e is de s'Arròlese; su de tres est tra Poltu Celvu, is de su Calanzanos e is de su Logusantu. Su de cuatru, invècias, at a biri sa batalla tra is de su Codaruina, su Poltu Turre e is de su Istintinu.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Campionato:
Argomenti:
Stagione:
2020/2021
Tags:
Coppa Italia
ultimora