Unu progètu europeu po unu sinnali importanti

Su primu campionau sardu de futbàlu po totus, sportivus cun normali abilidadi e cun cussas speciali, est acabau in Sennori su mesi de donniasantu.
S'organizatzioni est de su Comitau regionali sardu de su CSEN, cun unu progètu europeu "sa noa frontiera de su sport po totus", participau de sa RAS.
Custu Campionau, bìnciu de sa scoadra Sporty ASD APS de Oristànis, gheta unu sinnali importanti : est nàsciu unu sport chi bolit poniri a su centru su giogadori, e non is abilidadi, su spassiu e non sa capassidadi de binci.
Is atras sotziedadi chi ant participau funt:
Gabbiano Onlus ASD (Oristano), Associazione Aquile in sicurezza Onlus (Alghero), Gli Equilibristi Onlus ASD (San Giovanni Suergiu), ASD Una ragione in più (Oristano), Special Team del Liceo "Galilei" (Macomer).
A s'acabu de su Campionau est lòmpiu unu importanti riconnòscimentu: Sennori est nomenara "citadi de su futbàlu po totus", e sa Sardinia est candidada a èssiri su logu in ui si pòdint fai is Campionaus de s'europa cun custa noa manera de fai sport.