Salta al contenuto principale
coronavirus vincenzo spadafora

Vincenzo Spadafora scoviat: «Torrai a giogai su tres de su mesi de Maju est una cosa foras de sentidu perunu»

Sa duda, chi is cosas sighint diaici, arriscat de diventai una puncia prantada in conca; sa chistioni, de su restu, est sempri sa pròpria: candu ant a torrai a partisi is campioaus de bòcia?
Est craru, is professionistas de sa Sèrie A tenint iteressamentus (e interessus) diversus meda de is diletantis: su mundu de su sport, peròu, po' s'allui torra, at a depi abertai po fortza chi is cosas si pongiant apostu. A innantis de totu, nc'est de pentzai a sa salludi de sa genti: sa bidea est chi po imoi, a su trintunu de su mesi de martzu, a sa de binti-duus dii de corantena, seus feti ( o giai, tocat a biri chi seus pigaus beni o mabi de totu custu carraxiu) a metadi de su tretu.
Castiendi cumenti funt andadas is cosas in Cina, chi est bessendindi aforas de su dannu mannu pròpriu in custa diis, est dàbbile chi ant a serbiri ancora un'antra pariga de cidas.
Apustis at a tocai a fai torrai a partiri totu is fainas e is traballus, circhendi de cumprendi, in s'interis, cantu est stetiu su dannu, est a nai su dinai perdiu, in totu custu tempus.

Is fueddus de su “Ministru po su Sport e is Giòvanus”, Vincenzo Spadafora, funt crarus: «Torrai a giogai a bòcia su tres de su mesi de Maju est una cosa foras de sentidu perunu».
Poi sighit: «Ap'a propònnere de sighiri diaici, cumenti fatu fintzas a oi in totu su mesi de martzu, po totu su mesi de abrili puru».

Est a nai, nudda partidas de bòcia e nudda sport, cosa chi ballit po totus is allenamentus, pruschetotu imoi chi is Olimpìadis funt stetias dilatadas a su mesi de Làmpadas de su duamilla e bintunu.

Maurizio Casasco, su presidenti de sa Federatzioni Medico-Sportiva Italiana ed Europea, aciungit: «Seus traballendi pròpriu po cumprendi candu at a fai a torrai a incumentzai cun su sport. In d-unu primu tempus pariat chi bastessiri abetai fintzas a su tres de su mesi de abrili, ma po firmai su spaniamentu de su virus, a cantu parit, at a serbiri atra passièntzia. Apustis de Pasca Manna? Po imoi non serbit a nudda abarrai apicaus a is datas».

In questo articolo
Campionato:
Argomenti:
Stagione:
2019/2020
Tags:
Coronavirus