Salta al contenuto principale
lanteri scuola calcio
Sibilia chistionat craru: «Proibbiri su sport a is pipius est cosa de macus»

Is campionaus de is mannus andant ainnantis ma po is piciocus prus piticus si ndi studant giai totus is giogus

A nai sa beridadi, chi podeus giogai a fai is filosofus mancai feti po trinta segundus, sa vida de s'omini in custu mundu est prena fintzas a cuccuru de dudas; est una cosa chi ballit po totus, in dònnia tempus e in dònnia logu. Scieus beni cumenti andant is cosas: oi nci seus, crasi mancai no prus. Poita seus fadendi totu custu giru de fueddus e de chistionis, s'ant a domandai in medas? Nc'arribaus allestru. De su mesi de Martzu, difatis, sa vida nosta no est prus sa pròpria: su spaniamentu de su virus, sa timoria po sa mobadia, su numeru de is apuntoraus, chi sighit a abarrai artu meda, s'ant potau a cambiai is nostas abbitùdinis, dha sas tzerriaus diaici, e fintzas is fainas chi sigheus dònnia dì.

Is Decretus chi ndi aproillant de is de su Guvernu, de cida in cida, si nant su chi si podit fai e, mescamente, cussu chi est proibbiu.
Torraus duncas a nosu. Candu is campionaus de bòcia si funt firmaus in totu Italia, sa chistioni prus spinosa fiat de cumpredi candu is giogus podessint torrai a partiri. In su mesi de Cabudanni, cumenti eus biu, is campionaus funt torraus a incumentzai, ma imoi sa chistioni de importu prus mannu est cumprendi fintzas a candu ant a sighiri a andai ainnantis.

Po is scuadras, dhu scieus, no est facili, poita in medas biddas is sindigus funt tenendi, tra is atras cosas, is campus sportivus serraus.
Podit puru sutzedi, duncas, de acabai de giogai una partida chentza de essi sigurus de torrai a cabai in campu sa cida infatu, poita mancai, in s'interis, is giogadoris ndi boddint s'influèntzia e depint abarrai in assètiu a su mancu po dexi diis.

In medas fiant timendi chi in s'ùrtimu Decretu, chi est bessiu aforas pròpriu domìnigu passau, su presidenti Giuseppe Conte studessit torra is fainas de is giogadoris, e invècias is cosas funt andadas beni, a su mancu po imui. Ma feti po su chi pertocat is scuadrasde is giogadoris prus mannus. Po medas piciocheddus prus piticus, difatis, chi mancai si spreviant in cussas chi tzerriaus "scolas de calciu", no nc'at a essi nudha de fai, a su mancu po imoi. Una decisioni, si cumprendit, chi no totus ant arriciu cun coru bonu, antzis, nc'est gai calincunu chi est artziendi sa boxi, cumenti at fatu, po d'arremonai unu, su presidenti de sa LND Cosimo Sibilia, chi contat: «Su Dpcm nou at cunfirmau is timoria chi tenestus: de una parti sighint is fainas de is diletantis me is campionaus natzionalis e regionalis, ma no podeus nai a su pròpriu po is fainas de is campionaus provincialis e de cussus chi pertocant is giogadoris prus giovanus. Seus proibbendi a is prus piticus de podi fai sport, mancai totus is sociedadis apant spendiu dinai meda po si ponni apostu cun is règulas. No si podeus scaresci chi su sport agiudat a abarrai in saludi».


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Argomenti:
Stagione:
2020/2021
Tags:
Covid