Segunda Categoria: andaus a castiai cali funt is scuadras chi funt a unu passu feti de sa bìncida de su campionau

E duncas, atacu a scriri e a ndi pesai s'artìculu po custa cida, po s'ùrtimu giòbia, 'tendei 'tendei, po su chi pertocat su mesi de martzu, mancai mi intenda unu pagheddeddu stracu, unu pagheddeddu fadiau (cumenti apu sèmpiri intèndiu narai in bidda mia, chi est Bidd'e Sorris, in su Campidanu de mesu) e immoi, chi boleis, andu a si ispiegai puru su motivu. 
E duncas eia, seu atachendi a ghetai aforas is rigas po custu artìculu otu diis ainanntis, prus o mancu, de candu si ddu eis a agatai asuta de is ogus, e duncas, otu diis ainanntis de candu at a fai a ddu ligi in su giàssu de su Diàriu Sportivu, cumenti seis costumaus a fai, de su restu, de una bella parighedda de annus (arriendi e brullendi, ant essi passaus calincuna cosa cumenti a cincu annus, prus o mancu, de candu apu tentu sa possibbilidadi de incumentzai su trabballu in lingua sarda, chi est cussu chi megu a sighiri a fai, de su restu, e mi parit bastanti craru. E nd'aprofitu puru, immoi chi nci seu, po si narai, po si scoviai ca custa cosa de podi trabballai gràtzias a sa lingua cosa mia, a sa lingua materna, cumenti si iat a podi narai, furendindi sa trassa de s'italianu etotu, mi praxit meda ma meda. Antzis, pentzu ca siat una de is gràtzias prus mannas chi mi nd'est protzia de su Cielu, chi arrannèsceis a cumprendi ita seu circhendi de si contai). 

E po segai a crutzu sa chistioni, ca no seu innoi, custu est pagu ma seguru, po si fai perdi su tempus chi mancai nemmancu teneis, si potzu narai ca nc'est unu dìciu, ca m'arrapitu fatu fatu (mescamente candu mi depu scroxai is fainas acapiadas a su trabballu), e chi mi praxit meda, e chi cratzat ancora mellus, e chi narat ca "chini tenit su tempus po fai una cosa no iat a depi abertai a s'incras po dda fai". 
E duncas, eia, fadendi su contu ca su trabballu po su chi pertocat custa cida (fadeisì su contu, po cumprendi mellus de ita seu chistionendi, ca seu atachendi a scriri cust'artìculu in su megama de su dexiotu de su mesi de martzu) ddu apu giai serrau, e po beni puru. Eia, nci funt cidas prus drucis, e atras prus marigosas, e megu a chistionai de su trabballu cosa mia, si cumprendit? E duncas, eia, custa cida est stètia druci cumenti a su tzucuru, poita, mescamente, is scuadras chi currint in su campionau de sa Segunda Categoria no ndi funt cabadas in campu poita si funt pigadas, cumenti narat beni su calendàriu cosa insoru, su calendàriu chi megant a sighiri, e chi est stètiu pesau de is de sa Lega Natzionali de is Diletantis, impari a is de sa Federatzioni de su Giogu de su Calciu, una dì de pàsiu; e isperu chi si cumprendat ca sa giorronada de pàsiu fiat stètia decidia ainnantis de s'incumintzu de is giogus, e mi parit bastanti craru: no est chi ddis est acucau in conca, cumenti si narat (po manigiai unu fueddu chi m'est sèmpiri praxu meda meda, e chi intendia mescamente de sa bon'anima de mamma mia), de studai totus is giogus poita no ndi teniant gana, e a narai sa beridadi no sciu nemmancu poita is de sa Lega nc'apant stichiu unu domìnigu chentza de giogus, diaici, in mesu in mesu a su mesi de martzu, ma est pròpriu su chi ant fatu. 

E duncas, custu bollit narai, a su mancu po su chi mi pertocat, ca apu dèpiu scriri calincunu artìculu in mancu (fadendi su contu ca is scuadras chi currint me is otu listas de sa Segunda Categoria funt abarradas frimas a castiai is atrus, cumenti s'apu narau pròpriu immubagora), tra cussus chi ndi pesu in italianu dònnia dònnia cida. 
E su tempus chi apu guadangiau (o chi apu risparmiau, chi si praxit de prus cumenti sonat sa cosa) ddu apu postu, chi mi permiteis de manigiai custus fueddus, po ndi pesai is artìculu in sardu po duas cidas, mancai cust'artìculu chi teneis asuta de is ogus, ddu apa a acabbai de pesai in una pariga de diis, e no de seguru totu in unu megama. 
E chi pròpriu si depu narai sa beridadi, oi su cielu est torra prenu de nuis, e est torrendi a proi, e duncas no est ca nci siat meda atru de fai de bellu, e duncas, tantu ballit chi mi pongu a trabballai unu pagheddeddu, fadendi su contu, mescamente, ca tra una cida, prus o mancu, at a incumentzai sa Cida Santa e duncas, eia, no mi iat a fai schifu, cumenti si iat a podi narai, su de podi serrai su trabballu chi apa a depi fai in sa cida ainnantis de sa Pasca unu pagheddeddu prus drabessi. 
E po ddu fai, eia, mi parit bastanti craru, tocat a s'arramangai is manigas (po manigiai unu modu de narai chi babbu miu m'at sèmpiri arrapitiu, fintzas de candu fia unu pipieddu piticu, e chi m'est abarrau prantau in conca, cumenti eis a podi cumprendi a solus). 

E duncas, nc'est un antru contixeddu chi mi iat a praxi a si intregai, immoi chi nci seu (ma apustis, e si ddu promitu giai de immoi, apa a torrai, deretu deretu, a chistionai feti, e si naru feti, de partidas e de resultaus e de is chistionis chi nd'aproillant de su mundu de sa bòcia de is scuadras diletantis sardas), e chi pertocat is tempus candu andammu a is iscolas medias, e chi nci brintat, chi s'apicigat, s'acapiat, po ddu narai diaici puru (scereiddu bosatrus su modu de narai chi si cratzat mellus), cun sa Cida Santa (ca seu abertendi cun s'afròddiu de unu pipieddu, e mancai no nc'eis a crei mai). 
E duncas, cumenti s'eis a arregodai a solus, candu andastus a iscola (candu unu andat a is iscolas, po ddu narai mancai diaici puru) una de is cosas prus fadiosas no fiat, mancai, cussa de sighiri is letzionis po cussas cincu oras a sa dì, ma sa cosa prus trumentosa (a su mancu a parri miu, e tocat a fai su contu ca a is iscolas medias fia unu de is prus bravixeddus de sa classi mia, e duncas, a fai is fainas cosa mia fadia allestru meda, prus allestru, mancai, de su chi nci poniant is cumpàngius cosa mia, chi cumprendeis su chi seu circhendi de si narai) fiat torrai a domu e, mescamente, su de si depi ponni a fai is compitus, cumenti seus costumaus a ddus tzerriai. E duncas, eia, mi nd'arregodu ca, po sa Cida Santa, is iscolas (sa cosa ballit puru po is iscolas superioris) serrant su mèrcuis (est a narai, mellus, ca s'ùrtima dì de iscola, de is letzionis, ainnantis de sa Pasca Manna, fiat a su mèrcuis), e intzandus, candu torrammu a domu, mi ponia acoitu a fai su trabballu cosa mia (e no fiat pagu de seguru, ca candu is maistas si poniànt a si donai is tialus de esercìtzius de fai, intzandus no fiant pròpriu de manu ligera. E sa pròpriu cosa sucediàt, chi no peus puru, candu andammu a is iscolas superioris in Casteddu), isperendi de mi ndi liberai (de mi ndi scabulli) allestru de cussu arrori. E sa bidea cosa mia, mancai, fiat cussa de ndi pesai totus is compitus chi si donant me is oras de su megama, e in su merì de su mercuis, po tenni scapius de su trabballu totu is diis chi ddoi fiant ainnantis de sa Pasca, partendi, mancai, de su giòbia. E custu fiat cussu (si seu contendu custu contixeddu pròpriu po arribbai a custu puntu de sa istoria) chi mi consillat de fai sa bon'anima de mamma mia, ca a su studiu cosa mia nci teniàt meda, ma meda: po issa, antzis, su studiu, su de studiai e de andai beni a iscola (po ddu narai mellus puru) fiat una de is cosas de importu prus mannu in custa vida, o a su mancu, po sa vida mia; e immoi potzu narai ca chi seu fadendi custu trabballu, chi est cussu de scriri cust'artìculus, (e duncas, eia, ndi seu bèssiu a fai su giornalista, cumenti m'est bèniu de si narai), unu trabballu chi mi praxit, e meda puru, est gràtzias a totu su chi m'at consillau, de bonu, sa bon'anima de mamma mia; e chi dda apu acabbada a fai custu trabballu, chi no est fadiosu cumenti, mancai, funt atrus trabballus, est gràtzias, puru e mescamente, a totus is consillus chi m'at donau issa, chi m'at regalau sa bon'anima de mamma mia, in Cielu siat. 
E duncas, eia, oi, chi est mèrcuis, m'est bèniu in conca (e po custu chi si ddu apu contau) de s'afròddiu e de sa gana bella chi mi pigàt candu depia fai is compitus po is vacantzas de sa Pasca (vacantzas crutzas, chi petzaus chi durant prus pagu de una cida, a contus fatus; ma sèmpiri vacantzas fiant) de candu, de piciocheddu, dda acabammu stracu e giai giai mortu, ma prexau, cumenti si iat a podi narai, cumenti una Pasca. Poita at a essi berus, puru, ca in custu mundu (macu e totu ghetau apari, cumenti mi praxit a narai fatu fatu) ddoi funt, custu est pagu ma seguru, traballus meda ma meda prus tostaus e fadiosus de su chi depu fai deu (ca a sa fini no depu fai atru ca mi nd'abarrai, po cincu-ses-seti oras de sighiu a cracai butoneddus de una tastiera, aranti de su tialu de computer; e duncas, eia, mi megu a solu a solu, no depu spacai perdas a cropus de marteddu), ma a sa fini dònnia trabballu, si podit narai diaici, apustis de unu tanti de oras chi ddu fais, ti fadiat. E si cumprendit beni. 
Su trabballu cosa mia, chi pròpriu si depu narai sa beridadi, mi pigat a is ogus, e mescamente a conca; ma su de abarrai sètziu po totus cussas oras, giai giai dònnia dì (e chi no abarru sètziu po trabballai, abarru sètziu, comentecasiat, po ligi e po studiai, e duncas, eia, si iat a podi narai ca po calincuna cosa cumenti a doxi oras abarru in sa cadira, e tocat a nc'aciungi ca po atras ses oras, mancai seti puru, abarru crocau in su letu po dromiri), ti cancarat is cambas, e mancu mali ca tengu su tempus, puru, aintru de sa dì, po mi spreviai unu pagheddeddu e, mescamente, (custa est una de is cosas prus bonas chi fatzu), po mi fai una bella passillada, chi est pròpriu cussu chi apa a fai immoi, cumenti ndi studu totu, fadendi su contu ca s'artìculu, po custa cida, est bellu ca incumentzau; e fadendi su contu, in prus, ca is strollichiminis chi tenia badda badda in conca (e chi eis lìgiu a su mancu unu de is artìculus chi nd'apu bogau aforas in custus ùrtimus duus annus, scieis beni ca in sa conca mia ddoi funt una biga de legas, e de contixeddus, chi no abertant atru ca de ndi bessiri aforas) funt bellus ca spaciaus, intzandus po oi potzu tirai pagu pagu su suidu, cumenti si iat a podi narai, e apa a sighiri a scriri, mancai, cras etotu. 

E duncas, sa cida passada, chi si nd'arregodais (e desinò deu seu innoi puru po custu) si fia chistionendi de cumenti funt cuncodradas is cosas po su chi pertocat sa cursa concas a su primu postu me is otu listas de sa Segunda Categoria; e intzandus, fadendi su contu ca sa cida passada seu arribbau (apu acutu a arribbai, chi si praxit de prus, mancai, cumenti sonat diaici) a sa Lista E, po custa cida no potzu fai atru (no nc'est cosa mellus de fai, po si ddu narai manigendi atrus fueddus) ca sighiri in cuss'arrastu etotu, torrendi a incumentzai, torrendi a partiri, duncas, cun sa Lista F.

E duncas, is giogus in custa lista (e megu a chistionai mescamente po su chi pertocat sa cursa concas a su primu postu e duncas po ndi cassai s'artziada in su campionau de sa Primu Categoria), funt benendi a essi spassiosus meda, e sa cosa, sa chistioni ballit siat po is tifosus chi sighint is partidas sètzius, mancai, me is cadireddas de is tribbunas chi ddoi funt totu a giru a giru in su campu, e mescamente po is giogadoris chi, a sa fini, funt cussus ca in campu ddoi cabant po curri avatu de sa bòcia, po totus is noranta minudus de sa partida, e po curri avatu a is aversàrius puru. 
E duncas, eia, po su chi pertocat sa Lista F ddoi funt, a su mancu in dì de oi, tres scuadras chi funt currendi po circai de ndi cassai is primus duus postus de sa lista, e cumenti eis a sciri beni (ma chi no ddu scieis, deu seu innoi po si ddu arregodai, o po si ddu fai sciri, chi andat beni aguali), is primus de sa lista ant a tenni sa possibbilidadi de giogai in su campionau de sa Primu Categoria de sa stagioni chi at a benni (e chi at a essi, est craru, cussa de su duamilla e bintises – duamilla e bintiseti); sa scuadra chi invècias nd'at a cassai su segundu postu de sa lista at a curri po is partidas finalis, impari (o contras, ca mi parit chi cratzit mellus puru) cun is atras scuadras chi ant a arribbai a su segundu postu me is atrus gironis. E duncas, sèmpiri po su chi pertocat sa Lista F, a su primu postu agataus is de s'Otava, cun corantanoi puntus in totu, chi nd'ant cassau gràtzias a catodixi partidas bintas e seti partidas chi ant serrau cun su resultau in paridadi; si potzu narai puru, immoi chi nci seu, ca is de s'Otava ant pèrdiu feti una partida in custas bintiduus bessidas, e seus chistionendi, duncas, de sa isfida chi ant giogau in domu de is tattaresus de su Centru Storicu (eia, sa scuadra si tzerriat pròpriu diaici), candu fiat su sexi de su mesi de donniasantu, po sa de otu giorronadas de sa lista de partidas de s'andada. E de sa dì, intzandus, is de s'Otava funt stètius bonus a binci po doxi bortas, e ant serrau sa partida in paridadi feti po duas bortas (e po duas bortas de sighiu, fait a narai custu puru); e fait a narai puru ca totus e duas is bortas sa partida s'est serrada cun su resultau de zeru a zeru, est a narai, duncas, ca is de s'Otava no funt arrannèscius a ndi pesai nemmancu unu goiteddu, ma no est una cosa chi ddis sucedit fatu fatu, a narai sa beridadi; antzis, in custa stagioni ddis est capitau feti po cuatru bortas in totu, apitzus de bintiduus partidas giogadas. E in s'ùrtima isfida, intzandus, is primus de sa classi funt stètius bonus a binci contras a is de su Codaruina, in domu cosa insoru etotu, cun su resultau, togu meda, e si cumprendit, de ses a duus. Cun corantases puntus (chi funt, a fai is contus nci poneus pagu meda, feti tres in mancu de is chi tenint is de s'Otava) agataus is de s'Atleticu de CastedduSardu chi, est craru, funt ancora bisendi de ndi cassai su primu postu in sa lista, fadendi su contu ca ammancant cuatru partidas de giogai ainnantis de s'acabbada de is giogus, e custu bollit narai, duncas, ca in su pratu ddoi funt calincuna cosa cumenti a doxi puntus, e duncas, eia, iat a podi sucediri de totu, cumenti si narat (e cumenti m'est bèniu de narai, de su restu). Is de su Atleticu de CastedduSardu in s'ùrtima bessida ant serrau sa partida contras a is de sa Viddalbese (sa scuadra chi nd'ant pesau in BiddaEcia, cumenti si tzerriat in campidanesu) cun su resultau de cuatru a unu; e duncas, eia, podeus narai puru ca ant bintu catodixi partidas e po cuatru bortas, invècias, ndi funt arrutus a terra, est a narai ca ant pèrdiu sa partida e funt abarraus a buca asciuta, cumenti si narat, po su chi pertocat is puntus; e sèmpiri po cuatru bortas, intzandus, is de s'Atleticu ant serrau sa partida cun su resultau siddau in paridadi, e custu bollit narai, mi parit bastanti craru (ma ddu torru a arrapiti po totus cussus, e mancai po is femineddas, mescamente, ca mancai no funt acapiadas a istrintu cun is chistionis, cun is regulas chi pertocant su giogu de sa bòcia), ca funt arrannèscius a si ponni in buciaca atrus cuatru puntus. A su de tres postus, e cun custu deu creu ca si potzat serrai sa lega acapiada a sa Lista F, agataus is de sa Folgore de Tissi, cun calincuna cosa cumenti a corantatres puntus, est a narai, ses in mancu de cussus chi tenint allogaus is primus de sa classi de s'Otava (e no funt pagus, mi parit de podi narai custu, mancai in su pratu nci siant ancora, cumenti s'apu narau immubagora, ancora doxi puntus, e duncas, atras cuatru partidas de giogai) e feti tres in mancu de is puntus chi tenint is de s'Atleticu de CastedduSardu. E duncas, eia, eis cumprèndiu beni: chi po sa cursa a su primu postu, mancai, is de sa Folgore de Tissi tenint me is manus is cartas prus lègias tra totus is tres scuadras chi s'agatant in artu in sa lista, podint ancora isperai de ndi cassai su segundu postu, chi iat a balli, no si naru cumenti a s'oru (poita s'oru, si fatzu custa butada puru, spetat sèmpiri a is chi arribbant a su primu postu, e duncas, spetat a chini bincit su campionau), ma de seguru cumenti a s'argentu, cumenti si iat a podi narai, e cumenti megu a narai, de su restu. Is de su Florinas, chi s'agatant a su de cuatru postus, in dì de oi tenint calincuna cosa cumenti a trintaseti puntus, chi funt doxi in mancu de is chi tenint is de s'Otava, e si cumprendit beni, po su chi s'apu narau fintzas a immoi, ca tra is de sa Folgore de Tissi e is de su Florinas ddoi est una forada, ddi naru diaici e manigiu custu fueddu isperendi ca si cumprendat su chi seu circhendi de si ispegai, de ses puntus, is grogus-arrùbius tenint noi puntus in mancu de sa scuadra chi agataus in su segundu postu. In s'ùrtima bessida is de sa Folgore de Tissi (e seus chistionendi de una bidda pitichedda meda, chi s'agatat a otu chilometrus de Tattari, e chi fait calincuna cosa cumenti a duamilla e trescentus e cincuanta animas) ant bintu sa partida, chi ant giogau in domu cosa insoru etotu, contras a is de su Tzaramonte, cun su resultau de tres a unu. E duncas, immoi chi nci seus, podeus andai a castiai impari, e sèmpiri chi seis de acòrdiu cun mei, cumenti funt cuncodradas is cosas po sa giorronada chi at a benni, e duncas, eia, seu chistionendi de is partidas chi s'ant a giogai custu domìnigu chi est arribbendi (e chi at a essi, tra is atras cosas, su domìnigu de is pramas, po ndi furai sa trassa, po ndi furai is fueddus a s'italianu etotu). E duncas is de s'Otava si dda ant a depi biri contras a is de su Monte Muros, chi s'agatant a s'ùrtimu postu de sa lista, e si cumprendit ca is de s'Otava tenint is possibbilidadis prus mannas, ddi naru diaici, de ndi ingolli is tres puntus prenus, fadendi su contu ca tenint calincuna cosa cumenti a trintacincu puntus is prus de is chi tenint is aversàrius. Is de s'Atleticu de CastedduSardu, invècias, ant a depi torrai sa visita (cumenti si iat a podi narai) a is de su Turritana, chi s'agatant, issus puru cumenti a is de su Monte Muros etotu, me is ùrtimus postus de sa lista, cun bintitres puntus in buciaca e feti tres scuadras a is pabas (ma chi is cosas depessint abarrai diaici, eia, is de su Turritana iant a essi sarvus, cumenti si narat). E serru is chistionis acapiadas a sa Lista F cun is de sa Folgore de Tissi, ca a cantu parrit, de su chi ndi podeus cumprendi, tenint de giogai sa partida prus dificili, mancai tengant sa possibbilidadi de giogai in domu cosa insoru etotu, ma contras a una scuadra forti cumenti est cussa de su Centru Storicu de Tattari, chi eus arremonau ainanntis in custu artìculu etotu. 

E immoi, deu creu ca sa cosa mellus chi si podit fai est cussa de sighiri a castiai cumenti funt postas is cosas, invècias, in sa Lista G (e seu chistionendi sèmpiri, est craru, de su campionau de sa Segunda Categoria), innoi a su primu postu agataus is nuoresus de su Santu Predu, chi funt currendi a forti meda, e chi tenint (po incumentzai si depu narai pròpriu custu, desinò cumenti si fait a cumprendi cantu funt currendi a forti?) calincuna cosa cumenti a cincuantases puntus in buciaca, e chi ndi funt arribbaus gràtzias a dexiotu partidas bintas e duas partidas chi ant serrau cun su resultau in paridadi; e duncas, eia, is nugoresus de su Santu Predu ant pèrdiu, a su mancu fintzas a oi, feti po duas bortas: contras a is de su Calagonone, in sa de cuatru bessidas de sa lista de partidas de s'andada (e fiat su dexennoi de su mesi de ladamini, po si cumprendi mellus apari), e in sa primu bessida de custa stagioni, candu ndi fiant arrutus contras a is de s'Irgolese, sa scuadra de Irgoli, e deu creu ca siat bastanti craru de su nomini. A su segundu postu, cun cincuantaduus puntus (eia, cuatru in mancu de is chi tenint in buciaca is de su Santu Predu) ddoi funt pròpriu is de su Calagonone, chi eus arremonau, de su restu, pròpriu immubagora: is segundus de sa classi (ddus tzerriu diaici) ant bintu po sexi bortas, a su mancu fintzas a immoi, e po cuatru bortas ant serrau sa partida cun su resultau siddau in paridadi; custu bollit narai, puru, ca apitzus de bintiduus bessidas ndi funt arrutus, issus puru, feti po duas bortas: contas a is de su Santu Predu, chi ddis ant torrau sa furria, cumenti si iat a podi narai (e cumenti apu sèmpiri intèndiu narai in bidda cosa mia, de su restu), in sa partida de sa torrada, e contras a is de s'Orani, in sa de ses partidas de sa lista de s'andada, chi si fiat giogada su duus de su mesi de donniassantu (e candu chistionu de is partidas passadas, de is partidas, po si ddu narai mellus puru, chi si funt giogadas in totus custus mesis passaus, intzandus mi benit de pentzai ca, eia, a bortas parrit pròpriu ca su tempus si nci bobit, e no mi parit nemmancu berus). Tra is duas scuadras, duncas, cumenti s'apu narau, baddant (est a narai ca in mesu a is duas scuadras ddoi funt) feti cuatru puntixeddus, e immoi eus a biri cumenti ant a andai is cosas, fadendi su contu ca in sa giorronada chi s'at a giogai custu fini de cida chi est arribendindi (e chi est arribendindi allestru e acoitu cumenti chi fessit unu leporeddu chi si scapat a curri in mesu in mesu a su sartu, po giogai unu pagheddeddu a fai su poeta puru, chi mai ammanchit unu stìddiu de poesia in sa vida cosa nosta, e no feti su giornalista sportivu) is de su Santu Predu si dda ant a depi biri contras a is de s'Otzana; e invècias is de su Calagonone ant a depi arriciri sa visita de is de su Ilbono, ca po su chi pertocat su contu cosa insoru, funt currendi, in dì de oi, po circai de ndi cassai is puntus chi ddis ant a serbiri po nd'arribbai a sa sarvesa. E no si ndi boleus scaresci de is de su Lodine, sa scuadra chi pertocat, tra is atras cosas, una biddixedda pitichedda meda (ca de su milli e noicentus bintotu fadiat parti de su comunu de Gavoi, ma de su milli e noicentus otantotu est torrada a essi una biddixedda po contu sù, chi cumprendeis su chi seu circhendi de si contai), ci fait calincuna cosa cumenti a trescentus animas (a narai sa beridadi, funt prus pagu de trescentus animas, a bolli essi prus pretzisus cumenti unu giornalista, de su restu, iat a depi essi chi bolit fai beni, in gràtzia de Deus, si cumprendit, su trabballu cosa sua), e custu po si narai, ca eia, nci funt scuadras de bòcia (po cumprendi cantu est sa passioni chi sa genti tenit po custu giogiu) fintzas me is biddixeddas prus piticheddas chi ddoi funt spratas in totu s'isula stimmada cosa nosta. E duncas, eia, is de su Lodine ndi funt pesendi una stagioni toga meda, fadendi su contu de totu su chi s'apu contau fintzas a immoi: is piciocus sighius de Massimilianu Vacca, chi est stètiu, tra is atrus, s'allenadori de is de s'Ovodda me is annus passaus, funt arrannèscius a binci po trexi bortas, e po ses bortas nd'ant cassau unu puntu (est a narai ca si funt dèpius acuntentati de si ponni in buciaca feti unu puntixeddu), e custu bollit narai, duncas, eia, ca po ses bortas ant serrau sa partida cun su resultau in paridadi. Ma is de su Lodine, a fai is contus nci poneus pagu meda, tenint calincuna cosa cumenti a undixi puntus in mancu de is chi tenint is de su Santu Predu, mancai contras a is primus de sa classi siant arrannèscius a ndi pesai (e apant fatu, duncas) una partida de importu mannu meda, chi s'est serrada cun su resultau in paridadi, de zeru a zeru. E duncas, eia, is de su Lodine in dì de oi, candu ammancant feti cuatru partidas po serrai sa stagioni, podint isperai feti de ndi cassai su segundu postu in sa lista (chi iat a balli, chi iat a regalai sa possibbilidadi de curri po is partidas finalis de sa stagioni, cussas duncas chi si giogant apustis chi si serrant is campionaus, e chi seus costumaus a tzerriai, a trassa de is ingresus etotu, play-off), mancai peròu tengiant calincuna cosa cumenti a seti puntus in mancu de is chi tenint is de su Calagonone. E duncas, cun doxi puntus ancora in su pratu (cun cuatru partidas ancora de giogai) si podit narai ca is cosas podint mudai, e meda puru, ma a sa fini, de su chi ndi podeus cumprendi in dì de oi, cussus chi tenint is cartas prus bonas in manu, e chistionaus de sa cursa concas a su primu postu, est craru, funt pròpriu is nugoresus, ma in su giogu de sa bòcia no si podit mai sciri cumenti ant a andai, cumenti ant a acabbai is cosas, ca is ispantus fatu fatu benint a essi mannus meda. 
E duncas, sa cosa mellus chi podeus fai, arribbaus a custu puntu de sa lega, e de sa chistioni, est cussa (a su mancu a parri miu) de andai a castiai cumenti funt cuncodradas is cosas, e seu chistionendi sèmpiri de sa Lista G, po su chi pertocat sa giorronada chi at a benni, e chi at a essi sa de undixi giorronadas in sa lista de sa torrada. Is de su Santu Predu si dda ant a depi biri pròpriu contras a is ùrtimus de sa lista, e megaus a chistionai de is de sa Castor de Tortolì, chi in dì de oi tenint in buciaca feti undixi puntus (e ddi naraus feti undixi chi pentzaus ca funt calincuna cosa cumenti a corantacincu puntus in mancu de is chi tenint is de su Santu Predu), e duncas, si cumpredit beni, is de su Santu Predu iant a podi, iant a depi binci sa partida chentza de si imbrutai tropus is manus, cumenti si iat a podi narai (e cumenti apu sèmpiri intèndiu narai de sa bon'anima de mamma mia), ma a sa fini in su giogu de su càlciu (e sa cosa toga, fortzis, benit a essi pròpriu custa) no podis mai sciri cumenti ant a andai, cumenti ant a acabbai is cosas. E depeus fai is contus, puru, immoi chi nci seus, ca is de su Lodine ant serrau s'ùrtima partida chi ant giogau (eia, in custu fini de cida passau) in paridadi, e ant dèpiu giogai, 'tendei 'tendei, pròpriu in domu de is de sa Castor de Tortolì, cun su resultau de unu a unu. Po is de su Calagonone, invècias, nc'at a essi de giogai sa partida in domu de is de s'Atleticu de Sarule, chi est una scuadra ca, in dì de oi a su mancu, s'agatat a su de ses postus in sa lista, cun calincuna cosa cumenti a trintacincu puntus in totu; e tra is duas partidas, si cumprendit, cussa chi parit prus fadiosa, prus trumentosa, benit a essi cussa de is de su Calagonone, ca depint binci po fortza chi ndi bolint cassai su primu postu, o mellus, depint binci po fortza, fait a ddi narai diaici puru (e fortzis cratzat fintzas mellus), po tenni ancora isperas de binci su campionau; chi depessint perdi, invècias, e chi is nugoresus depessint arrannèsci a binci, cumenti iat a podi sucedi fadendi su contu ca seus chistionendi sèmpiri de sa partida de is primus de sa classi contras a is ùrtimus de sa lista, cun totu cussu chi custu cumportat, intzandus is nugoresus si ndi iant a podi bobai a cincuantanoi puntus, e su vantagiu apitzus de is de su Calagonone iat a podi arribbai fintzas a seti puntus, candu ant a ammancai, peròu, feti tres giorronadas, cun feti noi puntus in su pratu. E serraus cun is de su Lodine, chi ant a depi curri in domu de is de s'Osini, po una partida chi, a su mancu diaici si parrit, iat a podi essi toga, bella e spàssiosa; a su mancu, est cussu chi s'auguraus po su beni de is tifosus, chi a sa fini funt cussus chi andant po si castiai, po si gosai su spetaculu, e po su beni de is giogadoris chi nd'ant a cabai in campu, fadendi su contu, mescamente, ca unu giogadori diletanti ndi cabat in campu feti po su spàssiu, e po si sprèviai unu pagheddeddu de is trumentus chi nd'arribbant in custa vida, partendi, pròpriu, de is trumentus acapiaus a su trabballu (ma is trumentus, in custa vida, s'acapiant puru a atras centumilla cosas, e no feti a is chistionis chi pertocant su trabballu). 

E sigheus a andai a castiai cumenti funt postas, cumenti funt cuncodradas is cosas po su chi pertocat sa Lista H, chi est s'ùrtima po su chi pertocat su mundu de sa Segunda Categoria. E duncas, eia, innoi puru (est a narai: in custa lista puru, chi si praxit de prus cumenti sonat) a is primus postus, currendi concas a sa bìncida de su campionau, agataus tres scuadras, partendi de is primus de sa classi de su Tavolara, una scuadra de Olbia Terranoa, cun calincuna cosa cumenti a cincuantotu puntus allogaus a su callenti in buciaca, e chi ndi funt arribbaus gràtzias a dexiotu partidas bintas e a cuatru partidas chi ant serrau cun su resultau in paridadi. E duncas, castiendi is numerus chi is de su Tavolara nd'ant pesau fintzas a immoi (po ddu narai mellus puru: totus is numerus ca funt arrannèscius a ndi pesai fintzas a immoi, ca mi parit chi sonit mellus puru), sa primu cosa chi si potzu narai est ca, eia, is de su Tavolara funt currendi, a forti, a trassa de is de s'Alighera, ma in su campionau de sa Segunda Categoria e no in cussu de sa Promotzioni, cumenti invècias est capitau a is grogus-arrùbius, ca duncas no ant pèrdiu nemmancu una partida. Eia, chi si seis pèrdius in totu custa biga de fueddus, si ia a bolli narai, si ia a bolli fai a cumprendi ca nci funt duas scuadras feti, a su mancu in dì de oi, e feti po su chi pertocar sa Sardìnnia, e feti po su chi pertocat is campionaus pesaus de sa Federatzioni Italiana de su Giogu de su Càlciu e de sa Lega Natzionali de is diletantis, chi no ant ancora pèrdiu nemmancu una partida: is primus, is prus mannus, ddi naraus diaici, funt pròpriu is de s'Alighera, chi eus arremonau ainnantis; e is segundus benint a essi pròpriu is de su Tavolara, chi funt currendi in su campionau de sa Segunda Catergoria ma bisant giai, e mi parit bastanti craru puru, s'artziada in su campionau de sa Primu Categoria; e deu creu ca si ddu siant minescendi, po manigiai unu fueddu chi apu sèmpiri intèndiu in bidda mia. 
Is de su Tavolara, si potzu contai custu puru, immoi chi nci seu, tenint una biga de gol fatus, de gol pesaus: benint a essi calincuna cosa cumenti a otantases gol in totu, e no funt pagus, e si cumprendit; e tenint puru una de is difesas prus fortis, e prus abbilis, fadendi su contu ca nd'ant bodditu feti bintiduus. Sa scuadra, o mellus: s'ùnica scuqadra chi at fatu mellus, in dì de oi, funt is de su Gulfu Aranci (cumenti ddus tzerriaus innoi in su Campidanu de mesu), cun otantanoi gol fatus in custu campionau, e no benint a essi pagus de seguru. E a su segundu postu de sa lista, intzandus, agataus pròpriu is de su Gulfu Aranci, ca tenint totus is cartas bonas po sighiri a curri is aversàrius, e megu a chistionai de is de su Tavolara, chi s'agatant a su primu postu de sa lista cun feti (feti po modu de narai) tres puntus in prus de is chi tenint is asullus-arrùbius. Ma fadendi su contu, cumenti s'apu narau giai (ma is latinus si megànt ca su de arrapiti is cosas agiudat, apustis, a si ddas arregodai mellus), ca nci funt ancora doxi puntus badda badda in su pratu (tres puntus a partida, po cuatru partidas ancora de giogai; e su contu benit a essi bastanti facìli), intzandus iat a podi sucedi ancora de totu; e nosu eus a biri, impari a totus is atrus (e a totus is atras puru) cumenti ant a andai is cosas in campu. E megamu a si narai ca fadendi su contu ca nci funt atras cuatru partidas de giogai, no si ndi podeus scaresci de is de su Palau, chi tenint allogaus in buciaca cincuantacuatru puntus, ca benint a essi cuatru in mancu de is chi tenint is de su Tavolara, e feti unu in mancu de is chi tenint is de su Gulfu Aranci. Custas tres scuadras, duncas, ant a podi curri po ndi cassai is primus duus postus de sa lista, e sa scuadra chi invècias at a serrai sa stagioni a su de tres postus, intzandus, s'at a depi strexi, cumenti si narat candu arribbas in unu logu prus a tradu de totus is atrus, e duncas, no aciapas prus nudda de su chi fiast circhendi. 

E acudu a si narai, feti, ainnantis de si saludai, ca in sa giorronada chi at a benni, cussa chi s'at a giogai custu domìnigu, is de su Tavolara si dda ant a depi biri contras a is de su Portu Santu Paulu, e invècias is de su Gulfu Aranci ant a depi arriciri sa visita de is de su Portu Cervu. Po is de su Palau, invècias, nc'at a essi de giogai sa partida, in domu cosa insoru etotu, contras a is de su La Salette, una de is scuadras chi nci funt in Olbia Terranoa, e chi s'agatat, in dì de oi, prus o mancu, a metadi de sa lista.




Attività realizzata col contributo della Regione Sardegna. IMPRENTAS 2025-2026. LR 22/2018 art. 22