Po is scuadras de sa Segunda Categoria ammancant feti cincu giorronadas po serrai is giogus

E duncas, po custa cida puru, chi est sa segunda po su chi pertocat su mesi de martzu, a cantu parit, de su chi ndi potzu cumprendi, nci seus ancora, est a narai, ca a su mancu po su chi mi pertocat, seu in peis, seu abbili a fai, a ndi pesai su trabballu chi tengu de sighiri (e chi est cussu de cracai butoneddus in sa tialu de sa tastiera, po scriri artìculus), e custu bollit narai ca in s'interis, in custus ùrtimus seti diis, no seu acabbau nè a s'uspidali e nè in atrus logus lègius, cumenti iant a podi essi is prasonis e is logus innoi nci ghetant is macus (o iat a essi mellus a scriri: nci ghetànt, fadendi su contu ca is manicòmius, de su chi ndi potzu sciri, funt totus serraus. Ma custu no bollit narai, mi arrapitu fatu fatu, ca no nci siant logus, mancai aintru de is uspidalis etotu, innoi serrant, innoi nci ponint totus cussas personas chi, nareus diaici, ndi bessint aforas de conca. E su chi m'arrapitu, puru, intzandus, est ca in custu mundu nci bollit diaderus pagu a bessiri aforas de conca, mancai po una tontesa, mancai po una cosa de pagu contu. E sa pròpriu cosa si iat a podi narai po is chi dda acabbant in prasoni, ca a bortas bastat unu sbàlliu e t'agatas bellu ca frigau: gei dda eis a connosci, de su restu, sa istoria chi pertocat Beniaminu Zuncheddu, berus est?)
. 
E chi pròpriu si depu narai sa beridadi, e immoi chi nci seu si contu custa cosa puru, seu cunvintu ca po dda acabbai a s'uspidali (chi no peus puru) nci bollat pagu meda, ca unu no est chi si depat impegnai prus de su tanti chi serbit: bastat a ponni mabi unu pei, bastat a imbruncuai innoi mancai no iast a depi, e ses bellu ca sciasciau a terra (mellus, dda acabas sciasciau a terra); e immoi si contu custa cosa puru: duncas, in s'ierru seu costumau a fai su fogu dònnia dònnia merì, apustis chi scurigat, apustis chi ndi cabat su sobi e apustis chi serru is fainas acapiadas a su trabballu cosa mia, e po allui su fogu seu costumau a allumiai una pariga de paginas de is giornalis chi compru, aintru de sa cida, e chi mi serbint, mescamente, po su trabballu. E duncas, eia, tengu giornalis allogaus de una pariga de annus, a cantu parit, chi est berus chi nd'apu cassau una pagina, e duncas, eia, un artìculu de su duamilla e binticuatru, e chi chistionàt, pròpriu, de Andrea Capone (gei si ddu eis a arregodai: eia, seu chistionendi de cussu piciocheddu chi giogàt in su Casteddu una bella pariga de annus fait); e duncas, de su chi apu potziu lìgi, si domandu: si ddu arregodais cumenti est mortu? E duncas, eia, a cantu parit, ddu ant agatau mortu, a corantatres annus, a Palatzu Tirsu, cun sa conca segada, e de su chi nd'ant potziu cumprendi is chi ant fatu is indaginis (cumenti si iat a podi narai furendindi su fueddu de s'italianu etotu), e megu a chistionai, est craru, de is carabineris e de is de sa politzia, ca aproillant po cumprendi cumenti funt andadas is cosas candu sucedint is dannus e is arroris mannus, Capone nd'est arrutu de is scabas e, cumenti si iat a podi narai (e cumenti si narat, de su restu) nc'est abarrau. In su Cielu potzat essi s'anima cosa sua. 
E duncas, eia, de is novas chi podeus ligi me in su giornali, e de su chi podeus ascutai a sa televisioni, su mundu (ma po no andai tropu atesu: s'Itallia e fintzas sa Sardìnnia) est prenu a cucuru (est a narai ca funt fintzas tropus) de istorias de genti chi, mancai, benit a essi stumbada in s'interis chi est tressendi sa bia (e tressai est unu de cussus fueddus chi mi praxint meda, ma meda, e chi mi nd'arregodant de sa bon'anima de mamma mia, chi mi ddu arrepititat fatu fatu, fadendi su contu ca domu nosta s'agatat, pròpriu, aranti de una bia innoi tressant una biga manna de machinas. E duncas, deu creu ca mamma mia mi ddu at ai narau po a su mancu unu millioni de bortas, de aturai atentzioni candu ndi bessemu de domu, e custu, mescamente, candu fia unu piciocheddu, unu pipieddu, mellus puru, piticu meda de edadi), e po custu ca megu a si narai (e si ddu arrapitu fatu fatu, no po si portai maba sorti, e si cumprendit, ma po si fai a cumprendi, mellus, cumenti dda pentzu apitzus de sa chistioni) ca po dda acabbai totus sciasciaus, in terra o, peus puru, in su letu de unu uspidali, bastat mesu segundu trotu, e s'arrori est bellu ca fatu. 
Ma po oi no nci pentzaus, est a narai, duncas, ca no si bollu ponni in conca pentzamentus lègius, fadendi su contu ca custu est (custu iat a depi essi, po ddu narai mellus puru) s'artìculu chi ndi bessit aforas po unu giassu chi sighit is fainas de su mundu de is giogadoris, de is allenadoris e duncas, eia, de is scuadras sardas de diletantis. 
Ma chini mellus de unu giogadori de bòcia (mancai unu diletanti etotu, est a narai, duncas, unu de cussus giogadoris chi ndi cabant in campu po curri avatu de sa bòcia, e avatu de is giogadoris aversàrius puru, feti po su spàssiu chi ndi tenit) podit sciri, e podit cumprendi cantu pagu nci bollit po si strupiai? 
Tocat a pentzai ca unu giogadori arriscat de si pigai una cannedda, est a narai, po ddu narai mellus puru, una carvada de pei a sa cannedda, dònnia segundu chi nc'est me is noranta minudus de sa partida. 
E mancu a ddu fai aposta, cumenti si iat a podi narai, a trassa de cumenti si narat in italianu, po si fai a cumprendi mellus de ita seu chistionendi, po custa cida apu intèndiu a su telefunu, po ndi pesai una ciaciarrada (un'intervista, cumenti si iat a podi narai a trassa de cumenti si narat in italianu etotu) a Micheli Chelo, ca cust'annu est gioghendi impari a is de su Bonorva. E duncas, ddi apu domandau, tra is atras milli cosas, tra is atras milli legas chi eus pigau, chi fiat bastanti prexau de sa stagioni chi ndi fiat pesendi, e eus fatu su contu ca in dì de oi, candu seus arribbaus (candu issus, mellus, chi ndi cabant in campu, funt arribbaus) a sa de dexi giorronadas de sa lista de partidas de sa torrada, tenit fatus (est a narai ca nd'at pesau, chi si praxit de prus cumenti sonat mancai diaici) calincuna cosa cumenti a seti gol, chi funt pagus, po su chi ddi pertocat, a parri su a su mancu. 
E duncas, eia, Chelo m'at contau ca at tentu unu dannu a su genugu, e custu ddi est sucèdiu in sa partida chi is de su Bonorva iant giogau, a s'andada (fiat su noi de su mesi de donniasantu, po bolli essi pretzisus cumenti unu giornalista iat a depi essi chi bollit fai beni su trabballu cosa sua), contras a is de s'Altzaghena; Chelo m'at contau, puru, ca is cosas ddi podiant andai peus, ma meda peus, de cumenti ddi funt andadas a sa fini, fadendi su contu ca fiat pentzendi giai ca su dannu podiat essi diaici mannu ca po issu sa stagioni iat a essi potzia acabbai sa dì (e si podeis immaginai beni totu su disisperu chi ndi tenit unu giogadori candu si strupiat e no podit giogai po mesis e mesis de sighiu, fadendi su contu ca sa cosa prus toga chi podit fai unu giogadori est pròpriu cussa, e mi parit craru puru, de ndi cabai in campu po giogai a bòcia. E candu ses un atacanti, intzandus sa cosa mellus chi tui podis fai candu ses in campu est cussa de fai gol). 
E invècias, custu est su chi m'at contau, a su mancu, gràtzias a su Cielu, gràtzias a Deus (a parri miu, e si ddu naru acoitu, no estus a depi circai Deus, o su Cielu, feti candu is cosas si andant mabi, ma estus a depi torrai gràtzias, mescamente, candu is cosas si andant beni puru, o mellus meda de cumenti podiant andai), s'est dèpiu feti arramangai is manigas (diaici m'at narau, e diaici si narat, de su restu. E custu puru est unu modu de narai chi m'est sèmpiri praxiu meda, chi pròpriu si depu narai sa beridadi, po cumenti sonat furriau in sardu, ca si narat in sa pròpriu manera de s'italianu etotu, diaici nd'aprofitaus po fai unu pagheddeddu de grammatica puru) e sighiri cun sa fisioterapia (ddi naru diaici) e duncas, eia, cun is esercìtzius chi tocat a fai po fai sanai is giunturas de is ossus, po nd'arremonai una. 
E duncas, eia, in unu fueddu, nci funt momentus in sa vida innoi tocat a tenni passièntzia (passièntzia manna nci bollit po bivi in custu mundu, po si bivvi custa vida, m'arrapitu fatu fatu a solu a solu), e chini prus de unu chi s'ingollit podit sciri de cantu passièntzia serbit po abertai a sanai? 
E duncas, eia, po serrai sa chistioni apicada a Micheli Chelo (diaici no eis a podi narai, po custa cida, ca s'artìculu chi ndi bssit aforas po is Novas de su Diàriu Sportivu est prenu fintzas a cucuru, feti, de strollichiminis, e de contus e de contixeddus chi nci brintant pagu e nudda cun su mundu de sa bòcia, fadendi su contu ca po su chi pertocat s'artìculu de oi, s'apu fatu giai duus eseèmpius apitzus de is istorias chi pertocant duus giogadoris de bocia, e unu est unu giogadori diletanti chi est currendi, impari a is de su Bonorva, in sa Lista B de su campionau de sa Promotzioni, e in dì de oi, ma mancai de custa cosa nd'eus a chistionai mellus in su benidori, s'agatant a su segundu postu), m'at narau ca ddi dispraxit, e meda puru, de essi arrannèsciu, a su mancu fintzas a oi, fintzas a custu puntu de sa stagioni, a nd'essi cassau feti seti gol. 
Ma nc'est de narai, puru, chi Chelo nd'est torrau in campu de pagu cidas (est a narai, mellus: est torrau in campu una pariga de cidas fait feti), e duncas immoi stait beni e est prontu po ndi pesai una biga manna de gol, custu est su chi iat a bolli fai, a su mancu, cun sa ispera chi potzant serbiri a is de su Bonorva (custa est sa ispera cosa sua, a su mancu) po ndi cassai, po primu cosa, su segundu postu de sa lista (a is pabas de una scuadra forti cumenti est cussa de s'Alighera, fadendi su contu, e si nd'apu giai chistionau, est craru, me is cidas passadas, e is cosas sighint a abarrai agualis, is cosas sighint a essi diaici, ca is grogus-arrùbius sighius de Mauru Gioricu no ant pèrdiu nemmancu una partida cust'annu. Ca nci funt stagionis chi ti andant beni meda, nc'est pagu de aciungi, e nci funt stagionis, e annadas invècias, e ballit po totus, no feti po is giogadoris, is allenadoris e is scuadras de bòcia, innoi totu su chi ti podit andai mabi, intzandus, ti andat mabi) po ndi cassai sa brintada (ddi naru diaici) me in su torneu de is play-off, po ddu narai a trassa de is ingresus, e chi funt, intzandus, is partidas chi si giogant a sa fini de sa stagioni regolari, apustis chi si serrat su campionau, duncas, tra totus is cuatru scuadras chi nd'arribbant a is pabas de is primus de sa classi. 
E duncas, eia, Chelo m'at scoviau una cosa de importu mannu meda, chi m'est abarrada prantada in conca, candu m'at contau ca de issu etotu s'abertat meda, e chi est severu puru cun issu etotu, poita sciit su chi podit fai, e si inchietat, e no pagu (e mi parit crara puru, cumenti a cosa) candu no arrannèscit, mancai, a giogai beni cumenti iat a podi, e candu no arrannèscit, mescamente, a ndi pesai is gol chi ndi iat a podi pesai. 
Ma nc'est de narai, puru, immoi chi nci seus, ca Chelo est de duas partidas de sighiu, de duas partidas s'una avatu de s'atra, chi est fadendi gol, fadendi su contu ca nd'at pesau duus gol in sa partida contras a is de su Campanedda, e chi s'est giogada duas cidas fait, e nd'at cassau puru unu goiteddu (po ddu narai diaici, isperendi ca nesciunu de bosatrus tengiat calincuna cosa de murrungiai, e megu a brullai, est craru) in s'ùrtima partida chi ant giogau in domu de is de s'Altzaghena, cumenti apu acutu giai a si narai, e custu est sucèdiu sabudu passau, po essi prus pretzisus. 
E duncas, eia, Chelo m'at narau ca immoi ca su dannu est a is pabas (e mancu mali, m'acudu a narai deu de parti sua), intzandus est torrendi a essi, e impressi puru, su giogadori forti chi est sèmpiri stètiu. E mi benit a narai custu puru: no nc'est nudda, deu creu, de prus bonu, de prus togu, de ndi sanai de unu dannu, de un arrori, e torrai a fai sa vida chi fadiast ainnantis; deu creu ca siat pròpriu diaici chi cumprendeus cantu est de importu sa saludi: candu dda perdeus, mancai po una carvada de pei a su genugu. E duncas, eia, est candu perdeus is cosas (ballit po is amigus puru, po fa un esèmpiu) ca cumprendeus cantu ballint po nosu. E duncas, eia, diaici seus. 

Ma po torrai a is legas chi mi pertocant prus de acanta, e chi pertocant s'artìculu chi teneis asuta de is ogus, no potzu sighiri a andai ainnantis chentza de fai su contu de su tretu chi eus giai fatu cust'annu (e in custu mesi mescamente) e su tretu chi s'ammancat de fai po serrai su de tres mesis de custu duamilla e bintises puru. E duncas, eia, e no mi parit nemmancu berus a si ddu podi narai, custu domìnigu chi nd'at a arribbai tra una pariga de diis fetis (chi est berus ca seu incumintzendi a scriri e a ndi pesai custu artìculu de mercuis, chi est s'undixi; e custu artìculu, cumenti a dònnia dònnia cida, e gei ddu scieisi cumenti andant is cosas, ndi bessit de giòbia; e cras at a essi su de doxi), at a essi su cuindixi: e duncas, eia, po sa metadi custu mesi de martzu est giai giai bellu ca scroxau (cumenti mi praxit a narai, cumenti mi praxit a arrapiti, e chi seis costumaus a ligi custus artìculus, o chi ndi eis lìgiu a su mancu unu tra totus cussus chi nd'apu bogau aforas, nareus, in custu ùrtimu annu e mesu, intzandus scieis beni de ita seu chistionendi) e immoi no s'abarrat atru de fai ca si scroxai s'ùrtima metadi, fadendi su contu (e sighendi su dìciu) ca "sa coa est maba de scroxai", pròpriu diaici. E duncas, eia, s'eus a depi arramangai is manigas (e ballit po totus, a partiri de mei, po incumentzai) po circai de nci lompi, sanus e fortis, a su mesi de abrili. 
Sa nova de importu prus mannu po su chi pertocat su tempus chi est passendi (e mancu mali chi est sighendi a passai, ddi naru diaici) est ca sa cida chi at a benni, 'tendei 'tendei (po manigiai unu modu de narai ca apu sèmpiri intèndiu de sa bon'anima de mamma mia, e chi m'est sèmpiri praxiu meda, ma meda), at a essi s'ùrtima po su chi pertocat s'ierru, fadendi su contu ca no custu sabudu, ma su chi nd'at a benni apustis, est a narai, su sabudu de su bintunu, eus a essi giai in su beranu. 
E mi parit una cosa stramba meda, immoi chi nci pentzu, ca po cust'annu, a su mancu fintzas a immoi, no apu ancora biu is arrondibis boba boba in su Cielu, ma mancai at a essi ancora chitzi, o mancai, immoi chi ddu apu scritu, apa a podi biri su primu arrondibi unu de custus merìs chi ant a benni, ca su tempus parit fatu, de su restu. 
E totu custu si ddu megu a narai po su chi pertocat, eia, mi parit bastanti craru, su tempus chi passat; e po su chi tempus chi at a fai (gioghendi, pròpriu, a fai is previsionis de su tempus, cumenti faint is grandus dotoris a sa televisioni), intzandus si potzu narai feti ca est fadendi diis bellas, de sobi, e sa temperadura ndi artziat fintzas a arribbai a dexesseti e fintzas a dexiotu gradus, e no funt pagus, e si cumprendit (chi pentzaus ca, comentecasiat, seus sèmpiri in s'ierru ancora, mancai po atras dexi diis feti) ma po custu fini de cida at postu acua, est a narai ca, de su chi ndi podeus cumprendi, at a proi, mancai feti po unu pagheddeddu, siat su cenabara, siat su sabudu e fintzas su domìnigu. 
E po su restu, e cun custu dda acabbu, diaderus, de mi strollicai cun bosatrus e de si fai sa conca a acua (cumenti si megàt sa bon'anima de mamma mia etotu, ca mancai apustis chi abarrat a su telefunu a ciaciarrai cun calicuna amiga po un'ora, si megàt: "oia 'ta dannu, m'at fatu sa conca a acua". Ma sa beridadi est ca ddi praxiat, e meda puru, e deu fortzis apu pigau de issa, a ciaciarrai cun is amigas, mancai puru a su telefunu) si potzu narai (po chini est sighendi sa faina, est craru) ca custu domìnigu chi nd'at a benni at a essi su de cuatru de sa caresima, e no mi parit nemmancu berus a pentzai ca apu incumentzau a fai su "giogu" (diaici mi praxit a ddu tzerriai, a su mancu, mancai de giogu nci siat pagu e nudda; ma mi praxit a pigai sa caresima, eia, a trassa de unu giogu, a trassa de un esercìtziu chi fait beni a sa conca, a su corpus e a s'anima puru cosa mia) su dexiotu de su mesi de friàrgiu, e intzandus, eia, ammancant atrus duus domìnigus e apustis nc'at a essi su domìnigu chi tzerriaus de Is Pramas, e chi est cussu chi nd'arribbat (cust'annu nd'at a arrui in s'ùrtimu domìnigu de su mesi de martzu, chi at a essi su bintinoi) ainanntis de su domìnigu de Pasca Manna (chi cumenti eis a sciri beni, nd'at a arrui cust'annu su cincu de su mesi de abrili. Eia, cust'annu sa Pasca nd'arruit chitzi, e sa cosa no mi dispraxit, fadendi su contu ca s'annu chi at a benni, e chi at a essi su duamilla e bintiseti, sa Pasca Manna nd'at a arrui, 'tendei 'tendei, ddu apu circau pròpriu immubagora, chi pròpriu si depu narai sa beridadi, su bintotu de su mesi de martzu). 

E duncas, eia, su chi potzu fai est sighiri cun sa dieta cosa mia, e cun is esercìtzius, po su chi arrannèsciu a fai, po su chi seu abbili a fai; e in custu perìodu de s'annu, eia, mi sonant beni meda is fueddus de totus is allenadoris chi intendu candu ndi pesaus, impari, is ciaciarradas a su telefunu chi apustis benint a essi is artìculus, e duncas is intervistas, chi podeis lìgi me in su giàssu de su Diàriu Sportivu: ellus, megamu a si contai ca is allenadoris no ammancant mai de mi narai, de m'arrapiti, duncas, ca sa cosa de importu prus mannu po binci is partidas, e intzandus, sa cosa de importu prus mannu in su giogu de su càlciu, funt is allenamentus, po incumentzai, ca tocat a fai aintru de sa cida po si cuncodrai po beni po giogai is partidas in su fini de cida; e duncas, eia, una de is cosas de importu prus mannu benint a essi is sacrìficius chi tocat a fai chi tui bollis giogai beni: s'apu giai contau, de su restu, de totu su chi at dèpiu fai Micheli Chelo (e cumenti a issu nci nd'ant a essi atrus milli, de giogadoris chi depint fai fisioterapia apustis chi si strupiant) po ndi sanai de su dannu chi nd'at tentu, fadendi su contu ca issu etotu m'at scoviau ca teniat milli cosas, milli fainas de sighiri (tra su trabballu e totu su restu de is cosas) ma at agatau su tempus po trabballai apitzus de issu etotu, po circai de ndi bessiri, po circai de ndi sanai de s'arrori chi at tentu; e duncas, eia, in su giogu de sa bòcia (ma sa chistioni ballit, deu creu de podi narai custu, po totus is atrus sport puru e po totus is cosas chi depeus fai e sighiri in custa vida, chi a bortas benit a essi marigosa e tostada meda de matziai e de inguti) serbit a fai sacrìficius: depis agatai su tempus, po incumentzai, po andai a is allenamentus (mancai chentza de ndi perdi, chentza de ndi sartai nemmancu unu), mancai nci siant cosas chi ti iant a fai prus prexei (pentzu, po arremonai un esèmpiu, a su chi fadeus candu no trabballaus: andaus in giru me is negòtzius a si comperai s'arrobba de bistiri; andaus a castiai is film a su cinema, andaus a passillai cun sa sposa, o cun su sposu, ballit aguali, cosa nosta; andaus a si papai sa pitza, o a buffai birras e binus me in su bar); e in prus, est craru, depis sighiri unu pagheddeddu de dìeta (eia, sa cosa torrat paris paris cun su chi si iat a depi fai, sèmpiri po chini nci credit, in su perìodu de sa caresima), mancai tui no siast unu giogadori professioneri; est craru ca unu giogadori chi ndi cabat in campu po trabballu (e duncas, eia, po ndi incasciai una bella barca de dinai, cumenti sucedit a is grandus campionis chi currint in su campionau de sa Sèrie A) depit fai una dieta meda prus tostada de su chi spetat, de su chi tocat (po ddu narai mellus puru, mancai innoi in su Campidanu de mesu, e a su mancu, innoi in Bidd'e Sorris, chi est su logu innou seu stètiu pàsciu e crèsciu, seus costumaus a manigiai su fueddu "spetai" puru, ca in su fueddariu, mancai, s'agatat pagu e nudda) a unu giogadori professioneri. 
Ca chi ses unu diletanti, chi mancai currit in su campionau de sa Segunda Categoria, chi tenis pagu pagu scraxiu, cumenti si narat, mancai no ddi fait nudda (e, mancai, s'allenadori cosa tua no t'at a pigai a frastimus po custu), ma chi ses unu giogadori professioneri, intzandus no ti ddu podis permiti, poita, mancai, no arrannèscis nemmancu a ti troddi (po manigiai unu modu de narai ca apu sèmpiri intèndiu in bidda, mescamente candu fia unu piciocheddu piticu e andamu a is iscolas medias) de cantu ses grassu, e duncas, chi no arrannèscis a ti troddi, chi no arrannèscis nemmancu a movi unu passu, intzandus ti benit a mabi (mabi meda) su de fai su gol, o de curri avatu a is aversàrius. E duncas, eia, tocat a fai dietas e sacrìficius po abarrai sanus, po abarrai fortis, in saludi, e po trabballai (est custa sa chistioni de importu prus mannu, sa letzioni de importu prus mannu chi si nd'arribbat de sa caresima) apitzus de tui etotu (e deu creu ca sa istoria de Micheli Chelu, ca s'apu arremonau ainnantis potzat cratzai beni meda po si cumprendi mellus). 
E cun custu, po custa cida puru, apu acabbau de mi strollicai cun bosatrus (e mancu mali, s'at a megai calincunu de bosatrus, berus est? E si torru a arrapiti, po custa borta puru, ca chi nci sticu totus custus strollichiminis aintru de is artìculus chi ndi pesu in sardu est, po primu cosa, poita mi praxit, e meda puru, su de mi podi strollicai unu pagheddeddu cun bosatrus, e sa cosa de importu ancora prus mannu est ca, fadendi diaici, a su mancu custu est su chi mi praxit a pentzai, su chi mi praxit a crei, arrannèsciu, mancai, a ndi cassai s'atentzioni unu pagheddu de totus, e pentzu mescamente a totus is femineddas, chi tenint aggradessu de podi ligi calincuna riga, calincunu fueddu in sardu campidanesu, mancai, torra, feti puru po fai unu pagheddu de esercìtziu, e megu a chistionai, duncas, de totus cussas personas chi no funt acapiadas a istrintu cun is chistionis chi nd'arribbant de is campus de giogu e chi pertocant, est craru, is scuadras de is diletantis sardus) e incumintzu a si narai ca, po su chi at a fai in custu artìculu, ma de seguru sa cosa at a andai ainnantis in s'artìculu chi nd'at a bessiri sa cida chi at a benni (e sèmpiri chi su Cielu at a bolli custu beni po mei, po bosatrus e duncas, eia, po nosu), s'apa a chistionai (mellus: eus a andai a castiai impari) cumenti funt cuncodradas is cosas me is otu listas chi pertocant su mundu de sa Segunda Categoria, e po su prus po su chi pertocat sa cursa po ndi cassai su primu postu de sa lista, chi est su giogu, de su restu, chi eus giai fatu po is campionaus de s'Ecellenza, de sa Promotzioni e de sa Primu Categoria, in custas ùrtimas cidas. E mi intendu basau de sa bona sorti, cumenti si iat a podi narai, a scerai custa lega po s'artìculu de oi, chi fadeus su contu ca in custu fini de cida chi at a benni is scuadras de sa Segunda Categoria no nd'ant a cabai in campu, est a narai, eia, ca ant a abarrai frimas a si pasiai (e mi parit giustu puru) po unu turnu, cumenti si iat a podi narai. E duncas, eia, eis cumprèndiu beni, is giogus po su chi pertocat sa Segunda Categoria ant a torrai a partiri su bintiduus de su mesi de martzu, cun s'ùrtima giorronada chi nd'at a arrui su bintises de su mesi de Abrili, e custu bollit narai, a fai is contus nci poneus pagu meda, ca ammancant feti cincu giorronadas po serrai is giogus (e mi parit ariseu ca funt incumentzaus, po si narai, duncas, de cumenti si ndi bobat su tempus a bortas), fadendi su contu, in prus, ca is scuadras de sa Segunda Categoria, impari a cussas de sa Primu Categoria, no nd'ant a cabai in campu nemmancu po su sabudu de sa Cida Santa (e invècias is scuadras de sa Promotzioni ant a giogai sa dì ainnantis de sa Pasca Manna, cumenti funt costumadas a fai de una bella pariga de annus, a narai sa beridadi, a narai de is cosas cumenti funt). E diaici seus, duncas. 

E intzandus, chi seis de acòrdiu cun mei, andaus a castiai, impari, e si cumprendit bastanti beni, cumenti funt cucodradas is cosas po su chi pertocat sa Lista A, e megu a chistionai de su campionau de sa Segunda Categoria, cumenti s'apu arremonau pròpriu immubagora, in custu artìculu etotu. 
E duncas: a su primu postu de sa lista agataus, po custa cida puru, is casteddaius de sa Next Gen Himalaya (diaici si tzerriat sa scuadra), chi tenint allogaus in buciaca, apustis de bintunu giorronadas giogadas a is pabas, calincuna cosa cumenti a cincuantatres puntus, chi ndi funt arribbaus (a fai is contus nci poneus pagu meda) gràtzias a sexi partidas chi ant bintu e cincu partidas chi ant serrau cun su resultau siddau in paridadi. E duncas, sa primu cosa chi nc'est de narai est ca is de s'Himalaya no ant pèrdiu nemmancu una partida, a su mancu fintzas a oi, e no est una cosa de pagu importu, antzis, e si cumprendit beni: in totus is listas chi sigheus cun su Diàriu Sportivu (e chistioni de cussa de s'Ecellenza, is duas de sa Promotzioni, is cuatru de sa Primu Categoria po dda acabbai cun is otu de sa Segunda Categoria), e chi no seu sballiendi, no nci funt medas scuadras chi no ant pèrdiu nemmancu po una borta; mi benint in conca, immoi, is de s'Alighera, chi currint in su campionau de sa Promotzioni, in sa Lista B, e chi funt fadendi ispantus mannus, ddi naru diaici, e mi parit giustu puru: candu una scuadra est diaici forti ca nesciunu arrannèscit a dda frimai, intzandus tocat a ddis fai is cumplimentus, atra cosa mellus de fai deu pentzu ca no nci siat. 
E sa pròpriu cosa ballit, intzandus, po is de s'Himalaya puru, mancai issus gioghint in una categoria unu pagheddeddu prus pitichedda de sa Promotzioni, ma custu no bollit narai, e mi parrit bastanti craru, po sa caridadi de Deus, ca no siant fadendi a biri a totus cantu funt fortis; po immoi podeus narai ca funt is prus fortis in sa lista cosa insoru, e si minescint de s'agatai a su primu postu in sa lista. 
Ma, custu est pagu ma seguru, is de s'Himalaya no funt currendi a solus po circai de ndi cassai sa bìncida de su campionau e, duncas, s'artziada in su campionau de sa Primu Categoria. 
Candu ammancant (cumenti s'apu giai narau, ma a torrai a arrapiti is cosas mabi no fait e no s'at a fai, cumenti narànt, de su restu, is latinus: "repetita iuvant", si megànt) feti cincu giorronadas po serrai sa stagioni, is casteddaius tenint is de La Salle giai giai apicigaus a is carronis, chi cumprendeis su chi si bollu narai, e chi mi permiteis de manigiai custus fueddus (ca mi sonant beni meda, tra is atras cosas): sa scuadra de Cuartu Sant'Aleni, e chi giogat is partidas cosa sua in su Campu de Santu Lorenzu, in Pauli, tenit allogaus in buciaca calincuna cosa cumenti a cincuantunu puntus, chi funt, est craru, duus in mancu de is chi tenint is de s'Himalaya, e chi ndi funt arribbaus gràtzias a sexi partidas bintas (su pròpriu tanti de partidas chi ant bintu is casteddaius primus de sa classi) e a tres partidas chi ant serrau cun su resultau in paridadi; is de La Salle, acudeus a narai custu puru, cust'annu e fintzas a immoi ant pèrdiu po tres bortas. Ma po sa cursa concas a su primu postu nci depeus ponni, est craru, puru is de su Setimu, chi tenint allogaus in buciaca calincuna cosa cumenti a cincuanta puntus, tres in mancu de is chi tenint is casteddaius de s'Himalaya e feti unu in mancu de is puntus chi tenint, invècias, is de La Salle, chi apu arremonau pròpriu immubagora de su restu. 
Si potzu narai, puru, immoi chi nci seu, ca is de su Setimu ant acutu a binci po cuindixi bortas, e po cincu bortas si funt dèpius acuntentai de ndi cassai unu puntixeddu feti; in prus, in custas bintunu giorronadas chi tenint fatas, funt arrutus feti po una borta, in sa primu bessida chi est ballia po sa lista de sa torrada, in domu cosa insoru etotu, contras a is de su Kalagonis, ca si ddu naru immoi chi nci seus e immoi chi ddus apu arremonaus, s'agatant a su de cuatru postus in sa lista, cun trintatres puntus in totu. 
Ma torraus, duncas, a sa cursa concas a su primu postu: si cumprendit ca in dì de oi, a su mancu de su chi ndi podeus cumprendi castiendi is numerus chi nd'ant pesau, cussus chi tenint is mellus cartas, is cartas prus togas (chi cumprendeis su chi seu circhendi de si narai) funt pròpriu cussus de s'Himalaya, siat poita tenint cussus duus puntixeddu in prus de is chi tenint is segundus de sa lista, e siat, mescamente e pruschetotu, poita no ant mai pèrdiu nemmancu una partida. 
E immoi, podeus fai custu contu puru giai chi nci seus, is de s'Himalaya, candu ant a torrai a partiri is giogus (est a narai su domìnigu chi nd'at a arrui su bintiduus de su mesi de martzu, e duncas, eia, tra duas cidas), si dda ant a depi biri contras a is de sa Johannes, in domu cosa insoru etotu, e apustis, ant a depi torrai sa visita (cumenti seus costumaus a narai) a is de sa Castiadese, e duncas, eia, ant a depi giogai in domu allena; su doxi de su mesi de Abrili, chi at a essi sa cida apustis de sa Cida Santa e duncas, apustis de sa Pasca Manna, is de s'Himalaya ant a arriciri is de su La Pineta; su dexennoi de su mesi de abrili, invècias, nc'at a essi sa partida de importu mannu meda contras a is de su Setimu, in domu cosa insoru, e at a tocai a biri, po sa dì, cumenti ant a essi cuncodradas is cosas in sa lista, poita chi is de su Setimu depessint abarrai, cumenti funt in dì de oi, cun feti tres puntus in mancu de cussus chi tenint is primus de sa classi, intzandus cussa partida iat a podi tenni un importu mannu meda, e si cumprendit bastanti beni, deu creu, po sa bìncida de su campionau, fadendi su contu, in prus, ca in sa partida de s'andada, is de s'Himalaya e is de su Setimu iant serrau sa isfida cun su resultau de unu a unu. Is de s'Himalaya, duncas, ant a serrai is giogus in sa partida, in domu cosa insoru, contras a is de su Jupiter. 
E immoi chi nci seus, andaus a castiai cumenti est cuncodrau su calendàriu, sèmpiri po is ùrtimas cincu giorronadas chi ammancant ancora de giogai po sa stagioni de su duamilla e binticincu – duamilla e bintises, po is de su La Salle puru, ca s'agatant a su segundu postu; e duncas, acudu a si narai puru, immoi chi nci seu, immoi chi sa cosa m'est bènnia in conca, ca sa scuadra chi at a arrannèsci a ndi cassai su segundu postu de sa lista, intzandus at a tenni sa possibbilidadi, ddi naru diaici, de giogai is partidas finalis; custu bollit narai ca eia, nc'ant a essi is play-off (po ddu narai cumenti ddus tzerriant is ingresus) po is scuadras de sa Segunda Categoria puru, e sa regula benit a essi crara meda: is segundus in sa lista A s'ant a atobiai contras (si dda ant a depi biri, chi si sonat mellus mancai diaici) contras a is segundus in sa Lista B; is de sa Lista C s'ant a atobiai cun is segundus de sa Lista D e diaici a sighiri cun is listas E, F, G e H. 
E duncas a is biancus-arrùbius de La Salle ddis at a tocai a difendi, cumenti si narat, e cumenti seu narendu, de su restu, su segundu postus me is cincu partidas chi ammancant de innoi a sa fini de sa stagioni: po primu si dda ant a depi biri contras a is de su Sinnai, immoi, cumenti ant a torrai a partiri is giogus, su bintiduus de su mesi de martzu (e megu a chistionai, est craru, de is giogus chi pertocant sa Segunda Categoria, de ita seus chistionendi desinò? E megu a brullai unu pagheddeddu, ma unu pagheddeddu feti, e si cumprendit, berus est?); apustis is de sa La Salle ant a depi giogai contras a is de s'Academia Sarrabese, in domu allena, contras a is casteddaius de su Mulinu Bèciu, torra in domu cosa insoru, po serrai sa stagioni cun is partidas contras a is cuartesus de sa Ferrini e a is casteddaius de sa Johannes. Is de su Setimu, invècias, e cun custu si saludu, po custa cida puru, ant a depi giogai contras a is de sa Castiadese, contras a sa Jupiter e contras a s'Himalaya in domu cosa insoru, e contras a su La Pineta e a su Burcei, in domu allena. 
E cumenti si narat: eus a biri cumenti ant a andai is cosas. 
Po immoi: si saludu e si imprassu. A si torrai a ligi tra seti diis, est a narai giòbia chi at a benni, e sèmpiri chi su Cielu at a bolli custu beni po nosu.







Attività realizzata col contributo della Regione Sardegna. IMPRENTAS 2025-2026. LR 22/2018 art. 22