Mèrcuis arricu de partidas: Atletico Uri – Bosa e Muristeni – Li Punti po s'Eccellenza; tres garas in Promozione e otu po su chi pertocat sa Primu Categoria

Oi, su bintunu de su mesi de Ladàmini, est unu mèrcuis po mitadi druci e po s'atra mitadi unu pagheddu marigosu. Parteus duncas da is nobas bonas: in s'interis chi seus scriendi custus fueddus, difatis, si funt gioghendi cincu partidas: duas ballint po su campionau de s'Eccellenza, cun s'Atletico de Uri chi arricit su Bosa e cun is campidanesus de su Muristeni chi funt batallendi contras a is tataresus de su Li Punti; tres, invècias, pertocant su Girone B de sa Promozione: in campu, duncas, nc'agataus is de su Istintinu, contras a is arrubius de s'Oschirese; is de su Valledoria contras a is nieddus-birdis de su Thiesi e is de sa Montalbo de Thiniscòle, chi si dha funt gherrendi contras a is nieddus de sa Lanteri de Tatari, sighius de mister Giulano Robbi.

Otu, invècias, funt is partidas chi ballint po sa Primu Categoria: a is cuatru de su merì funt incumintzaus is giogus po is serramannesus de sa Gialeto, chi arricint is de sa Libertas de Barumini; po is de su Urtei, chi currint in domu contras a is grogus-birdis de su Meana; e po is de su Cus de Tatari, contras a is de su Sènnaru. A is cincu e mesu, at a tocai invecias a is de s'Atletico de Sa Baronia, contras a is de su Narcau. Sigheus cun atras tres partidas: a is ses e mesu de su merì su Siligo at a cabai in campu contras a is de s'Ozierese de Otieri; duas invècias is partidas chi ant a incumintzai a is seti de merì: seus chistionendi de sa gara tra is de su Codronzanu, chi si d'ant a biri contras is arrubius-brau de su Campanedda; aici cumenti is de s'Ovodda, chi ant a cabai in campo po giogai contras a is de s'Ollolai. Po su chi pertocat sa Serie D, is de sa Torres abarrant ancora a buca asciuta, cun sa Nocerina chi si ndi pigat is tres puntus gràtzias a su duus a zeru pesau in sa partida de custu meigama, cun is gol fatus de Diakite e Katseris.

Totus custas partidas, comentecasiat, si faint isperai beni po su chi pertocat su benidori: est a nai ca in diis cumenti a custa si parit diaderus chi su mundu de sa bòcia in Sardinnia tengiat is fortzas po sighiri a andai innantis, mancai su tiau de su Covid, a cantu parit, no s'at ancora lassau in paxi.
E is daboris, in custu sensu, no spaciant: me is ùrtimas oras, difatis, est bessida aforas sa noba, chi nd'arribat de is de s'Usinese chi, a cantu si ligit, tenint tres giogadoris apuntoraus; is arrubius – brau sighius de mister Loriga, chi po imoi s'agatant in su primu postu in sa lista in su Girone B, arriscant de sartai sa partida cun is de sa Macomerese de domìnigu chi benit.
Chi totu at a andai beni, eus a torrai a chistionai de issus puru, ndi seus sigurus, in d-un antru mercuis arricu cumenti a custu.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020