Prameddu, su pallone e s'immàgine de sa Sardigna

De Tore Cubeddu

Onni unu de nois donat una immàgine de su chi est. Sa matessi cosa acuntesset a sas comunidades, a sas regiones e a sas natziones. A bortas est unu seberu. A bortas sa mediatzione intro de s'idea chi sos àteros si faghent e de su chi est in sa realidade. Custa chistione est tantu prus bera pro sa Sardigna, una terra rica de istòria e cultura chi, bortas meda, no resèsset a comunicare comente diat a chèrrere su chi est, su chi podet donare.

E puru diat a fàghere a pònnere paris cun creatividade su chi semus e tenimus cun su chi cherimus fàghere. Comente?

Oe totus chistionant de sos gigantes de Monti Prama, comente in annos passados amus chistionadu de sos nuraghes, de sos putzos e de su cantu a tenore e pagas dies a como est istada publicada una cartina chi mustrat cantos sitos de importu bi sunt in terra nostra. Ma issaras pro ite ancora oe no amus seberadu cale immàgine donare de su chi semus? Ite semus isetende pro nàrrere a su mundu “Ispantaebos, custa est sa Sardigna!”

Cando unu annu a como sa Lega Nazionale Dilettanti, pro su de 52 torneos de sas regiones (unu de sos atòbios isportivos de prus importu pro s'isport diletantìsticu) at seberadu comente mascotte a Prameddu (unu gigante istilizadu e furriadu a giogadore de pallone), at mustradu cantu s'isport e sa popularidade sua podent fàghere pro sa terra nostra e pro s'immàgine sua.

Bastat a si fàghere unu giru in internet e a pònnere “Prameddu” pro lu agatare in sos sitos de totu sas federatziones, pro nde pòdere lèghere una ispiegatzione istòrica, pro nde pòdere bìere sas fotografias. In su situ de una iscuadra marchigiana chi aiat giogadu su torneo b'est iscritu: “Per voi, quando la sveglia risuonerà all'alba, immaginatevi ci sia Prameddu. Il simbolo della manifestazione. Immaginatevi chi vi canti, come il mio amico sardo, di giocare per la maglia... e basta. Per la maglia delle Marche de fustal.”

E si podent giogare issos pensende a Prameddu, figuradebos cantu lu diamus a pòdere fàghere nois. Podides istare seguros chi issu puru, sos gigantes e finas totu su chi portant in palas ant a èssere a s'ala nostra. (in sa fotografia Luca Raineri, allenadore de sos allievos de custu annu)