S’Arbus colat a votos prenos s’esàmene cun sa Monteponi

S’Arbus prima in classìfica no est prus unu ispantu, o mègius, non podet èssere galu cussiderada gasi, ca sos pitzocos de Incani ant coladu unu de sos esàmenes prus tostos de custu inghitzu, cun su màssimu de sos votos, andende a bìnchere in domo de sa Monteponi Iglesias, su segundu ko in fila a pare sonat oe che a unu campaneddu de allarme, contra de una de sas cumpannias prus atretzadas e ambitziosas de su girone. S’incungia fata cun sos mineràrios ampulat a s’Arbus a su cùcuru de sa classìfica, cun s’Orrolese ispitzigada de unu puntu ebbia, a su segundu postu, a tretu de s’istantargiare luego dae sa prima derruta istajonale pro more de sa bìnchida bundante contra de su Siliqua. Bene finas su Quartu 2000 de Meloni, chi calat su bis de bìnchidas in sa trasferta dìlica de Carloforte, mentras ruet sa ex cabulista Villacidrese isciusciada dae su Guspini.