Sabudu marigosu po Latte Dolce e Lanusè: is tataresus perdint po unu a zeru contras a is de su Latina, su Vis Artena fait duus gol e si ndi pigat is tres puntus

In s'interis ca totu s'Itallia currit conca a is festas prus marigosas de is ùrtimus setant'annus (nc'at a essi, difatis, pagu meda de essi prèxiaus e, pruschetotu, s'eus a depi abituai, e allestru puru, a s'idea chi eus a podi atobiai pagu genti po is augurius, po is prangius e po is cenas) is scuadras sardas de sa Sèrie D sighint a cabai in campu po is partidas de su campionau.
Sàbudu passau, duncas, est tocau a is tataresus de su Latte Dolce, chi ant arriciu in domu is de su Latina, po una de is batallas de importu prus mannu de sa de otu giorrònada, contendi chi is strangius s'agatant a su primu postu de sa lista; noranta minutus de giogu e de spassiu puru po is de su Lanusè, chi si dha funt depia biri contras a is de su Vis Artena. A nai sa beridadi, is cosas no funt andadas beni: is piciocus sighius de mister Stefano Udassi ant perdiu po unu a zeru, po crupa de su gol fatu de Pompei, chi est arrannesciu a stampai sa porta de Urbietis cun d'unu tiru de atesu meda. Is strangius po pagu no aciapant su segundu gol puru, cun Di Renzo chi nd'aprofitat de unu sbàgliu de Urbietis ma sa bòcia, apustis de su tiru de su giogadori de su Latina, andat a atumbai contras a su pau e agoa ndi bessit aforas de su campu; me is urtimus minudus de su primu tempus, invècias, Urbietis cassat su tiru de is undixi metrus de Di Renzo.

Giorronada legia po is de su Lanusè puru, chi perdint in domu, po duus a zero, po crupa de su gol fatus de Alonzi, cun d'unu tiru de is undixi metrus, a su de bintunu minutu, e agoa, feti cincus minutus prus a tradu, arribat su gol de Paolacci. Me is ùrtimus minutus de su primu tempus su Vis Artena abarrat in dexi ominis, cun Pompei chi scudit unu corpu de guidu a Varela e s'arbitru no podit fai atru che nci dhu bogai aforas de su campu. In su segundu tempus su Lanusè provat a torrai a oberri sa partida, ma Manni e is cumpangius suus resistint fintzas a sa fini.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020