Is scuadras de is diletantis funt abetendi arresputas: serbint règulas nobas po torrai a partiri cun is allenamentus

In s'interis che is scuadras funt acabendi de ndi pesai e cuncodrai is rosas de is giogadoris po batallai me is campionaus chi ant a balli po su duamilla e binti \ duamilla e bintunu, is de sa Lega Natzionali de is Diletantis funt traballendi e arrexonendi po cumprendi cumenti torrai a fai partiri totus is giogus. Sa chistioni prus callenti est cussa chi pertocat su chi tzerriant "protocollo sanitario", est a nai totu is regulas de sighiri po circai de firmai su spaniamentu de su virus.

Nd'eus giai chistionau meda: is de sa Federatzioni funt arranescius a fai acabai is campionaus de is professionistas, mancai chenza genti a castiai sa partida de su campu.
Est una cosa de importu mannu, poita me is mesis passaus pariat chi no nci fessint prus isperas, a su mancu po cust'annu, po su mundu de sa bòcia.
Imoi, invecias, at a tocai su mundu de is diletantis: nc'at a essi de cumprendi cumenti manigiai is fainas, partendi de is allenamentus; est a nai cumenti garantiri sa saludi de is giogadoris, o cumenti cuncodrai is logus de atobiu, po nd'arremonai unu.

De su chi scieus in dii de oi, su protocollo pesau de is de sa FIGC me is primus diis de su mesi de Làmpadas no permitit a is diletantis de torrai in campu, mancai giai totus is Guvernus Regionalis ant torrau a oberri is giogus, una chistioni chi ballit, po nd'arremonai unu, po su chi tzerriaus "calcetto". In Sardìnnia nc'est stetia una pragoni firmada de su presidenti Christian Solinas, bessida aforas su cuatru de su mesi de Triulas.

Is assotzius sportivus, imoi, funt abetendi chi is de sa Lega e de sa Ferderaztioni pighint po bonas is règulas in chistioni, ma a cantu parit at a serbiri un atru pagheddu de tempuspo aderetzai totus is cosas. Nc'at a essi de aturai atentus, poita is règulas chi funt andadas beni po is professionistas, mancai ant a bandai trotas po is diletantis, pruschetotu po una chistioni de dinai: no totus is scuadras s'ant a podi permiti is spesas po is esamis a is giogadoris, po nd'arremonai una.






Attività realizzata col contributo della Regione Sardegna. LR 22/2018 art. 22, comma 2. Avviso 2019-2020