S'esèrcitu de is diletantis est abetendi nobas: badda badda dhoi funt coranta milla tesseraus e duamilla e trescentus scuadras

Diario Sportivo, comomai de prus de dexi annus, sighit e contat is istòrias, pruschetotu, de su mundu de is diletantis; est a nai, de totus cussus chi, dònnia domìnigu, ndi cabant me is campus de totu sa Sardìnnia po giogai e po si spassiai totus impari.
Po cumprendi mellus de ita seus arraxonendi, si podeus apoderai a is numerus: seus chistionendi, difati, de una biga de genti; nci funt is pipius pitichededdus meda, chi mancai incumintzant a curri afatu a sa bòcia e a dha pigai a carvadas de pei a cincu-ses annus, fintzas a arribai a is ominis mannus, mancai de prus de corant'annus, chi pròpriu no nci dha faint a smiti cun su sport.

Gianni Cadoni, su presidenti de sa Federatzioni Italiana Giogu Calciu po sa Sardìnnia, fait is interessus de is giogadoris e de totus is scuadras de prus de tres annus.
«Ma is fainas de cuncordai funt ancora medas — at amitiu issu a totu — peròu seu prexau po totu cussu chi eus fatu fintzas a imoi, impari, si cumprendit, a totus is atrus chi funt in su diretivu. Seus unu Cumitau Regionali chi circat de essi organizau beni, po arrannesci a sighiri e arrespundi, a lestru, a totus is dudas chi s'arribant de is sotziedadis. In s'interis nd'eus pesau unu "Uficiu Stampa" e puru unu "Uficiu Marketing"».

Agoa aciungit. «Po cussu chi pertocat su sport, seus un "esèrcitu" cun coranta milla tesseraus, est a nai ca nc'est unu assotziau dònnia coranta cristianus, e seti milla e cincucentus dirigentis; is allenadoris, invècias, funt calincuna cosa cumenti a tres milla e seticentus.
In prus dhoi funt puru milli arbitrus, chi s'agiudant a sighiri, prus o mancu, giai doxi milla partidas in d-unu annu, chi si giogant in trescentus campus. Seus chistionendi de cincucentus sociedadis e de duamilla e trescentus scuadras.
Seus chistionendi, duncas, de unu "esèrcitu" chi imprassat totu s'isula, partendi de La Maddalena fintzas a nd'arribai a Carluforti, passendi de Crabonaxa».



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020