Su Cràbonia bolat sempri prus in artu cun bomber Giuseppe Meloni

Su prexu est mannu meda in domu de su Cràbonia, chi est currendi sempri prus a forti gràtzias, pruschetotu, a is gol de bomber Giuseppe Meloni: s'atacanti nùgoresu, nasciu su cuatru de su mesi de ladàmini de su milli e noicentu otantacincu, chi est aproillau po giogai cun is biancu-brau feti in su mesi de idas, candu sa fentana de su mercau fiat giai serrendi, at fatu fintzas a imoi otu gol in campionau me is primu ses bessidas, duus in s'urtimu partida de domìnigu passau, contras a cussus de su Li Punti, in Tattari, chi funt serbius po arregolli is tres puntus, chi nd'arribant a pustis de is atra duas scutas a faci a cussus de su Gùspini, su duus de friàrgiu, e a cussus fatus contras a San Marco de Assèmini, Ossese, Ilartzi e Castiadas. Meloni at fatu puru su gol chi est serbiu po binci sa Coppa Italia de Eccellenza, in sa partida de su noi de friàrgiu, in Aristanis, contras a cussus de s'Atletico Uri. Su giogadori s'annu passau est stetiu cussu chi at fatu prus gol, calincuna cosa cumenti a cincuantunu, in totus is campionaus de Eccellenza de totu Italia.

Su Cràbonia imoi at a depi giogai torra in Coppa Italia contras a is lazialis de su Real Monterotondo Scalo, chi ant bintu sa finalissima in sa batalla cun su Villalba: sa primu partida s'at a giogai su bintises de friàrgiu in Monterotondo, mercuis chi benit; sa secunda partida at a essi su cuatru de martzu, a su “Stadio Comunale Carlo Zoboli”. In campionau, is piciocus de mister Andrea Marongiu funt is primus de sa lista, cun corantotu puntus, chi nd'arribant a pustis de catodixi bìncidas e ses paregius; su Castiadas, secundu de sa lista, sighit cun corantaseti puntus, feti unu in mancu; s'Ossese invecias est sa terza de sa lista, cun corantunu puntus. Po acabai su campionau de Eccellenza amancat feti noi partidas: sa cursa conca a sa Serie D est fadendisì buddida.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020