Su Cumitau Regionali s'atobiat crasi: su mundu de is diletantis abetat novas; su Carbònia bolat in Sèrie D, Ilvamaddalena e Idolo in Eccellenza

Mancant feti un'antra pariga de oras, poi su mundu de is diletantis, est a nai totus is sotziedadis de bòcia de s'Eccellenza fintzas a sa Terza, ant a connosci is arrespustas chi funt abertendi de meda tempus, pruschetotu po su chi pertocat is promotzionis e, a sighiri, is retrocessionis.
Funt pròpriu is scuadras primas de sa lista chi no bint pru s'ora de sciri cumenti ant a essi cuncodradas is cosas po sa stagioni de su duamilla e binti \ duamilla e bintunu. De cussu chi ndi podeus cumprendi imoi, a cantu parit no nc'ant a essi scuadras chi nd'ant a cabai de categoria, cosa chi ballit po sa Promotzione, sa Primu e sa Secunda. In Eccellenza, invècias, a ndi cabai at a essi feti una scuadra.
Badda badda, abarrant ancora is chistionis apitzus a cussus chi tzerriasus "ripescaggi", chi pertocant totus is scuadras chi s'agatant, in dii de oi, a su secundu postu de sa lista.

Su Cumitau Regionali de sa Sardìnnia s'at atobiai torra crasi, su dexiaseti de su mesi de Làmpadas, po arrexonai apitzus de is campionaus: is decisionis chi ant a pigai tra issus, apustis ant a depi arribai a is de su Consillu Federali de sa FIGC, su binticincu de custu mesi atotu.

In Eccellenza, chi est su campionau prus mannu de totus cussus chi si giogant in s'isula, su Carbònia, chi est su primu de sa lista, bolat deretu in Serie D; is casteddaius de su La Palma, invècias, ndi cabant in Promozione.

Abarrat de cumprendi imoi cantu possibilidadis tenint cussus de su Castiadas de nci bintrai in sa truma de is "scuadras piscadas torra" (furriaus diaici, in sardu, su fueddu "ripescata").
Ilartzi e Porto Rotondo, cun prexiu mannu, iant a depi abarrai in Eccellenza.

Po su chi pertocat sa Promozioni, invècias, nc'at a essi festa manna po s'Ilvamaddalena, in su Girone B, e pruschetotu po is de s'Idolo de Arthana, chi cust'annu ant biviu unu bisu a ogus obertus, in su Girone A. Is scuadras secundas in sa lista, su Tiesi po su "girone nord", e su Sant'Aleni, po su "girone sud", abetant de cumprendi cumenti ant a bandai is cosas: is nieddus-birdis de mister Gianmario Rassu funt stetius piscaus torra in su duamilla e cuindixi; a cantu parit, duncas, iat a podi essi un annu bonu po is cuartesus.

Po su chi pertocat sa Primu Categoria, nc'at a essi de scabulli sa chistioni tra is de s'Atletico Cagliari e is de su Crabonaxa, chi funt acapiaus impari a su primu postu de sa lista in su Girone A. Torrat in Promozione puru sa Tharros, sa primu scuadra de sa lista in su Girone B; sa Paulese, po su Girone C, e su Porto Cervo, po su Girone D. Chi si depessit decidi po su campionau de Promozione a dexiotu scuadras, nc'iant a podi essi novas bonas po una tra Atletico de Narcau, Bittese e Tempiu.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020