Su giogu de sa bòcia est una de is dexi siendas prus mannas in Italia: FIGC e Guvernu traballant po torrai a partiri cun is allenamentus

Sa cosa de importu prus mannu, si ddu seus arrepitendi fatu fatu e de sicuru dannu no fait, est, e abarrat, sa saludi de sa genti: po custu, a su mancu fintzas a su tres de su mesi de Maju, eus abarrai serraus in domu nosta, fadendi a bonus, arrispetendi totus is arregulas e sperendi ca su numeru de is apuntoraus, e pruschetotu su numeru de is mortus, in s'interis, sigat a ndi cabai. Apustis, in cussa chi tzerriant sa "Fase 2", nc'at a essi de pentzai puru a fai partiri torra s'economia, po cussu chi at a essi possibbili, poita nc'est s'arriscu de si sarvai de su tiau de su Coronavirus ma de morri de fami, chi parit sèmpiri una cosa pagu spassiosa, a nai sa beridadi.

Tra is dexi siendas prus mannas chi nci funt, in dii de oi, in Italia, scieus beni custu puru, nc'est su calciu de is professionistas. Est cussu, a su mancu, chi si ligit in d-unu de is urtimus spricullitus fatus de sa FIGC, innui si cumprendit ca seus chistionendi de calincuna cosa cumenti a cuatru miliardus e seticentus milionis de euro, po cussu chi tzerriant "fatturato diretto", su doxi po centu de totu cussu chi prodùsirit su calciu in su mundu, po unu giru de dinai chi, fadendi su contu de totus is fainas e de totus cussus chi nci traballant in mesu, arribat a prus de dexiotu miliardus de euro.

Difatis su Guvernu est circhendi de cumprendi cumenti torrai a allui is giogus, pentzendi po primu a sa Sèrie A e, feti apustis, a sa Sèrie B e a sa Sèrie C, chi tenint perou medas prus problemas, est craru, de aderetzai po sighiri totus is arregulas.
Pròpriu po custu, oi, su binti-duus de su mesi de Abrili, is ministrus Vincenzo Spadafora, po su sport, e Roberto Speranza, po sa saludi, s'ant atobiai, in video-conferenza, cun su presidenti de sa FIGC, Gabriele Gravina, cun Paolo Dal Pino, su presidenti de sa Lega de is scuadras de sa Sèrie A, Mauro Balata, po sa Sèrie B, Francesco Ghirelli, de sa Sèrie C e Cosimo Sibilia, chi sighit is fainas po totus is diletantis. Impari nc'ant a essi puru Damiano Tomasi, de s'assotziu de is giogadoris, Renzo Ulivieri, po is allenadoris, e Marcello Nicchi, po is arbitrus.

Tra is atras cosas, nc'at a essi de detzidi cumenti fai a torrai a partiri cun is allenamentus e, pruschetotu, candu; po sciri calincuna cosa in prus apitzus de is partidas, invecias, est ancora chitzi.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020


Davide Onnis