Su mondiale chi no est mondiale, imparamus dae su “diletantismu”

Sos campionados sunt finidos e intro de unas cantas dies at a cumintzare su mondiale, su circo “massimo” de su pallone. Totus, in totu su mundu, amus a sighire s'aventura de sas iscuadras/natziones chi partetzipant. Ma faghet resonare su mondiale de ocannu. Faghet pensare. Ca abbaidende sas immàgines de su Brasile paret craru a totus ca oe prus de eris, su pallone est unu show, e sigomente est unu show, he must go on, depet sighire, mancari chi parte de sa populatzione de cussos tretos sigat a mòrrere de sa gana e de custu trèulu mannu chi lis est rutu a conca non nde at a guadangiare nudda. Gasi est.

In sas bidonville de Rio, in medas, ananti de sas barracas ponent una fatzada de linna chi, comente a una iscena teatrale, ammuntat su chi b'est in palas e chi sa gente non depet bìere. Cussos brasilianos si donant s'impressione de su chi no est a sa sola. S'immàgine. S'idea chi donat custu mondiale, fatu de medas faeddos, de isponsor e multimedialidade, est comente chi esseret istadu una iscova manna, chi nche mundat totu su disiperu suta de unu tapete mannu de ipocrisia, cundida cun su showbiz e una idea de isvilupu posta a fundu a susu, in ue sas esigèntzias de sa gente las detzidint sa multinatzionales. Tando b'at cosa meda de pensare, ca in fines, totus amus a abbaidare sas partidas e nos amus a ismentigare de su chi b'est a segus e a suta de sas tribunas. Comente amus giai nadu bortas meda, tocat a traballare pro chi bi siet unu càmbiu de prospetiva. L'imparamus dae su “diletantismu”, in ue prima de totu faeddamus de gente chi giogat, de valores chi agatamus in campu, prima chi de valores chi nde sunt foras. Imparende custos cuntzetos a sos pitzinnos, mancari – in unu tempus chi at a bènnere – sos mondiales ant a pòdere torrare a èssere de totu su mundu (non solu de una parte), sena chi bi siat bisòngiu de fraigare fatzadas fintas pro ammuntare su chi nemos cheret bìere, sena de carrigare subra de unu pallone sa responsabilidade de su chi foras non cheret cambiare, ca su pallone, comente ischimus, est fatu de pedde, ma a intro est prenu de ària e, faghe oe faghe cras, riscamus de si lu bìere crepare in manos.