Andaus a biri cumenti funt andadas is cosas me is primus noranta minudus de is campionaus de sa Promotzioni

E duncas, atacu a scriri is fueddus e is rigas de s'artìculu de custa cida candu seu arribbau a su megama de su lunis, chi nd'arruit su catodixi de su mesi de cabudanni, mancai peròu s'artìculu nd'at a bessiri aforas (cumenti seu costumau a fai de calincuna cosa cumenti a cuatru annus, e custu po si narai ca, eia, a bortas mi parrit ca su tempus si nci bobit) feti su giòbia; e su giòbia po su chi pertocat sa de tres cidas de su mesi de cabudanni nd'at a arrui su dexesseti, e custu at a bolli narai ca candu eis a podi ligi custas rigas (candu eis a ligi custas rigas, po ddu narai mancai diaici puru), intzandus s'eus a essi lassaus a is pabas sa metadi (sa metadi prus duas diis, chi pròpriu depu essi pretzisu, cumenti iat a depi essi unu giornalista candu bollit fai beni su trabballu cosa sua) de custu mesi etotu, e mi parrit una nova bona, po incumentzai, e megu a chistionai de su tempus chi passat, de su tempus chi si ndi bobat. 
Poita chi su tempus no passat, e si cumprendit beni meda, mi parrit de podi narai custu, bollit narai ca nc'est stètiu calincunu strobbu mannu, calincunu arrori mannu: e apu incumentzau sa cida, e sa giorronada de oi, intzandus, ligendi in su giornali sa nova chi pertocat sa morti de unu piciocheddu de Serramanna (chi est sa bidda chi abarrat a su costau de sa bidda innoi bivu deu, chi est Bidd'e Sorris), chi est andau a sbati contras a unu muru in s'interis chi fiat guidendi sa mototzicretedda, sa noti tra custu sabudu e custu domìnigu passau, e est mortu a feti dexesseti annus. 
E si ddu megu a narai poita sa nova m'est abarrada prantada in conca, e po si fai a cumprendi ita bolemu narai; e duncas, ainnantis de sighiri cun custu artìculu, mi iat a praxi a ndi bogai aforas, mancai feti scriendiddu in custu artìculu etotu, unu pensu bonu po issu, est a narai, po s'anima cosa sua, chi potzat agatai sa paxi chi si minescit in Cielu; ca candu sucedint arroris, est a narai incidentis diaici lègius e chi pertocant piciocheddus diaici giòvunus, intzandus, eia, arrannèsceus giai giai a si nd'acatai e a cumprendi de cantu est fràgili, e duncas megu a narai, fàcili a si segai, custa vida; chi parrit giai giai ca siat atacada, apicigada a su corpus cosa nosta, cun unu filixeddu de oru. 

E duncas, po torrai a nosu, megamu a si narai ca seu atachendi a scriri, a ndi bogai aforas custas rigas (e gràtzias a su Cielu, ca po oi puru, ca po custa cida puru seu sètziu in sa cadira cosa mia, aranti de su computer, po fai su trabballu chi mi tocat, po fai su trabballu chi mi spetat; e gràtzias a Deus chi tengu ancora sa saludi, est a narai ca nemmancu po oi dda apu acabbada apuntorau, o peus puru, serrau aintru de s'aposentu de unu uspidali; e gràtzias a su Cielu, m'acudu a narai custu puru, ca tengu ancora unu trabballeddu de sighiri) candu seu arribbau, candu seu lòmpiu a su megama de su lunis, e chi pròpriu si depu narai sa beridadi, est una cosa chi no m'est capitau mai (o nareus, no mi capitat de seguru fatu fatu), e megu a chistionai de su de mi ponni a scriri s'artìculu in sardu (chi ndi bessit aforas po is Novas de su Diàriu Sportivu) su lunis, poita candu atacat torra sa stagioni, e candu torrant a partiri totus is campionaus, arribbu a is duas, a is duas e mesu de su megama, ca seu scallau de sa cantidadi manna de fainas chi depu sighiri (e duncas, de sa cantidadi manna meda de artìculus chi ndi depu pesai, ma scritus in italianu, ma peròu) e duncas, mi parrit craru puru, est cumenti chi no tengu is fortzas, e duncas, eia, sa gana po abarrai a cracai is butoneddus de sa tialu de tastiera po, nareus, un'antra pariga de oras (siant, mancai, feti duas). 

Ma custa cida, cumenti eis a sciri giai (e chi invècias no ddu scieis, nd'aprofitu, immoi etotu, po si contai custa cosa puru) funt torraus a partiri feti is giogus chi pertocant is campionaus de s'Ecellenza e de sa Promotzioni (cun su campionau de sa Promotzioni chi est pretziu, ddi naru diaici, in duas listas, cumenti a sèmpiri de su restu o, a su mancu, cumenti sucedit de calincuna cosa cumenti a cuindixi annus, chi no de prus puru), e duncas custu bollit narai, po su chi mi pertocat, ca apu acoitau a mi scabulli de is cosas chi depia scriri po oi, ma su spàssiu (ddu tzerriu diaici) m'at a passai tra duas cidas a partiri de immoi, chi est berus ca in s'ùrtimu fini de cida de cabudanni (est a narai, su sabudu chi nd'at a arrui su bintises, e su domìnigu chi nd'at a arrui su bintiseti) ant a torrai a partiri puru is giogus de is campionaus de sa Primu Categoria, e custu bollit narai ca apa a depi sighiri atru cuatrus listas, e in prus ant a torrai a partiri is campionaus de sa Segunda Categoria puru, po atras otu listas de sighiri in totu; e de custa cosa, de custa chistioni, mancai, nd'eus a chistionai mellus in su benidori. 

E cun custas rigas, cun custas chistionis, cun custa lega (chi est de su restu su modu chi tengu, sa manera chi mi permitit de atacai a scriri s'artìculu in sardu) eus fatu, tra is atras cosas, puru su contu de su tempus chi megat a passai, de su tempus chi si seus lassaus a is pabas e de su chi s'abertat po su benidori; e si potzu narai puru, immoi chi nci seu, ca immoi s'at a abarrai s'ùrtimu giòbia (s'ùrtimu giòbia feti) po su mesi de cabudanni (chi nd'at a arrui su binticuatru) e custu bollit narai, duncas, ca su mesi de ladamini s'at a oberri, e duncas at a incumentzai, eia, cun unu giòbia, e duncas custu bollit narai ca eus a atacai cun su de dexi mesis de s'annu cun un artìculu po is Novas de su Diàriu Sportivu, e mi benit de narai, giai giai, ca no nci iat a podi essi manera mellus, manera prus toga de incumentzai unu mesi. 

E duncas, eia, si ddu torru a arrapiti, totu custu si ddu megu a contai po fai su contu de su tretu chi eus fatu (e megu a chistionai mescamente de su tempus) in custu duamilla e bintises: s'istadi est giai giai a is pabas e immoi seus currendi, forti a totu coddu (cumenti narant innoi in Bidd'e Sorris etotu, chi est su logu innoi seu stètiu nàsciu e pàsciu e innoi m'agatu a bivi in dì de oi puru, apustis de corantacincu annus), concas a sa brintada de s'atonzu, chi at a essi mercuis chi at a benni (e sèmpiri chi su Cielu at a bolli custu beni po mei puru, e po bosatrus e po bosatras ca custus artìculus ddus ligeis), e chi nd'at a arrui su bintitres. 
E deu no biu s'ora, chi pròpriu si depu narai sa beridadi, fadendi su contu ca s'atonzu est sa stagioni innoi torru a intendi is fortzas, e is energias, in su cropus cosa mia, apustis de totus is trumentus (mescamente po crupa de su clima, de sa temperadura) chi mi nd'arribbant, chi ndi ingollu in s'istadi; e s'atonzu, a su mancu po su chi mi pertocat, benit a essi una de is stagionis prus drucis, isperendi feti ca su tempus potzat essi bonu. 

E de su restu, chi andaus a castiai is previsionis de su tempus (cumenti seus costumaus a ddas tzerriai) intzandus nc'est su tanti po essi allirgus e prexaus, e chistionau, a su mancu, po su chi mi pertocat (ca de bosatrus no ddu sciu cumenti si pigat sa cosa): mancai seis de cussus chi funt tristus e primaus (po manigiai unu fueddu chi apu sèmpiri intendiu in bidda mia e chi m'est sèmpiri pràxiu meda meda, chi pròpriu si ddu depu narai) poita s'istadi est acabbendi, cumenti narat sa cantzoni puru (est po acabbai, po ddu narai mellus, fadendi su contu ca teneus de bivi un'antra cidixedda ainnantis chi nd'arribbit s'atonzu) e duncas poita, tra pagu, at a torrai su frius puru, ma chi pròpriu si ddu depu narai, a mei no mi parrit nemmancu berus ca is temperaduras si siant abasciadas giai diaici meda, e chistionu mescamente de su chi sucedit a su noti e a su mengianeddu chitzi; e duncas, in prus, benit mellus a dromiri, po incumentzai, benit mellus a papai e, mancai puru, a ligi calincuna cosa a su noti (chi est una de is cosas chi mi praxint, chi mi andant de prus, fadendi su contu, mescamente, ca no castiu e no tengu televisioni), chentza de timi de si scallai (chentza de si intendi giai giai po pigai fogu). 

E duncas, eia, fia narendusì de is previsionis de su tempus: is massimas (est a narai, mellus: is temperaduras massimas) ant a artziai, custa cida puru, fintzas a trinta – trintaduus gradus, e custu bollit narai ca a su mancu a su mengianu at a sighiri a fai unu bellu callenti, ma a su noti is temperaduras nd'ant a cabai fintzas a dexesseti, chi no sexi puru, in sa dì de su sabudu, chi at a essi, a fai is contus nci poneus pagu meda, sa dì prus frisca tra totus cussas chi nc'ant a essi custa cida. 
De acua, invècias, a cantu parrit, ndi iat a podi fai unu pagheddeddu su sabudu e puru su dominigu, e ispereus ca su tempus malu no strobbit is partidas; e giai chi nci seu, ispereus ca immoi no nd'arribbit sa sicagna, ma de custa cosa puru, mancai, eus a tenni sa manera, sa possibbilidadi po ndi chistionai mellus me in totus is cidas chi ant a benni, e sèmpiri chi su Cielu at a bolli custu beni po mei (e po bosatrus puru). 

E duncas, megamu a si narai, sa primu giorronada de is campionaus de s'Ecellenza e de sa Promotzioni est a is pabas e chi seis de acòrdiu cun mei podeus incumentzai a atacai a chistionai de bòcias, e de resultaus e de partidas, andendi a castiai unu pagheddeddu cumenti funt andadas is cosas, circhendi mancai de ndi bogai aforas calincunu arraxonamentu futu (e chi potzat balli, duncas, puru po is chistionius chi pertocant sa vida cosa nosta, sa vida de dònnia dì; e chi pròpriu si ddu depu narai, se de ndi podi piscai letzionis de importu po sa vida cosa nosta, mancai feti chistionendi de partidas, benit a essi unu de is giogus prus togus chi mi bessint aforas candu ndi pesu is artìculus scritus in sardu); circhendi de donai a is numerus chi ndi pesant is scuadras un antru sentidu, chi mi permiteis de manigiai custu fueddu, e immoi, mancai, si fatzu a cumprendi mellus su chi tengu in conca. 

E duncas, tra is resultaus chi ant fatu prus ispantus, a su mancu po su chi pertocat sa Lista A de su campionau de sa Promotzioni, ddoi est, custu est pagu ma seguru, su ses a zeru chi is de sa Ferrini de Casteddu nc'ant scutu a faci (m'est bènniu de ddu narai diaici, isperu intzandus ca nesciunus tengiat calincuna cosa de murrungiai po cumenti apu cuncodrau sa fràsia) a is de s'Academia Sulcitana; e si cumprendit bastanti beni, deu creu, ca candu arrannèscis a binci una partida cun unu resultau diaici tundu (po furai sa trassa, e duncas su fueddu chi manigiaus in italianu) intzandus custu bollit narai, po primu cosa, ca is cosas ti funt andadas beni meda, a partiri de s'atacu (su de arrannèsci a fai ses gol in una partida feti, e gei ddu eis a cumprendi beni mancai a solus puru, no benit a essi una cosa chi si bidi dònnia cida, dònnia domìnigu) e fintzas a arribbai a sa difesa; tocat a narai puru, immoi chi nci seus, ca is de sa Ferrini ndi funt cabaus torra in su campionau de sa Promotzioni apustis de una bella pariga de annus chi ant fatu currendi in su campionau de s'Ecellenza, chi benit a essi su torneu prus mannu, su torneu de importu prus mannu (s'Ecellenza est sa Sèrie A de su mundu de sa bòcia de is diletantis sardus, si iat a podi narai diaici puru), e invècias is aversàrius de s'Academia Sulcitana ndi funt artziaus in su campionau de sa Promotzioni pròpriu cust'annu, fadendi su contu ca s'annu passau nd'ant cassau sa bìncida de su campionau cosa insoru, in sa Lista A de sa Primu Categoria, gràtzias a su duus a unu chi funt stètius bonus a ndi pesai in sa partida finali chi sa scuadra allenada de Loi (chi est, tra is atras cosas, s'allenadori de is de s'Academia Sulcitana po cust'annu puru) at dèpiu giogai contras a is de sa Gioventù de Sarroch, fadendi su contu ca is duas scuadras iant serrau sa stagioni cun su pròpriu tanti de puntus, a su primu postu de sa lista. 
E duncas, cumenti eis a podi cumprendi a solus puru (est a narai chentza de s'agiudu cosa mia), candu una scuadra cun un'esperièntzia diaici manna a is pabas, cumenti podit essi cussa de sa Ferrini, s'agatat a giogai contras a una scuadra chi nd'est artziada de pagu (de pagu meda) in su campionau, intzandus nc'est s'arriscu ca sa scuadra prus esperta potzat a benni a essi meda, ma meda prus forti de is aversàrius, cumenti si iat a podi cumprendi de su resultau chi nd'est bèssiu aforas etotu a sa fini de sa isfida. 
E duncas, eia, apustis de is primus noranta minudus de giogu de su campionau, po su chi pertocat, est craru, sa stagioni de su duamilla e bintises – duamilla e bintiseti, podeus narai ca is de sa Ferrini parrint giai una de cussas scuadras chi ant a podi curri po ndi cassai su primu postu de sa lista, e de cumenti si funt cumportaus, ddi naru diaici, in sa primu bessida de su campionau, intzandus nc'est su tanti po pentzai, giai, ca iant a podi binci sa cursa po s'artziada in s'Ecellenza a manu bascias (cumenti si narat in italianu), est a narai ca iant a podi lassai feti is pimpirillas a is aversàrius, cumenti capitat fatu fatu (e cumenti est sucèdiu, po nd'arremonai una, a is de s'Alighera, ca s'annu passau, a Nadali, fiant giai mesu segurus, ddi naru diaici, de essi bintu su campionau de sa Promotzioni po su chi pertocat sa Lista B). 

E duncas, eia, de sa primu bessida (e megu a chistionai, mi parrit bastanti craru, de sa primu giorronada de is campionaus) arrannèsceus a si fai sa primu bidea apitzus de totus is fortzas chi nci funt in campu, mancai sa stagioni siat bella longa e iat a podi sucediri de totu. 
Una de is cosas chi podit mudai (ddi naru diaici) is cartas chi ddoi fuint in sa mesa (e duncas, eia, is fortzas de is scuadras chi nci funt in giogu) funt, no nc'eis a crei (e ddu naru unu pagheddeddu po brullai), is infortunius: est a narai ca tui iast a podi tenni puru sa rosa prus forti e prus toga de totu sa lista de scuadras chi currint cun tui (o contras de tui, chi si praxit mancai diaici po cumenti sonat sa fràsia), ma a sa fini chi is giogadoris prus fortis chi tenis si ingollint, si strupiant e no ndi podint cabai in campu, mancai feti po tres-cuatru cidas de sighiu, intzandus arriscas de perdi una biga manna de puntus (po manigiai unu fueddu, e seu chistionendi de su fueddu "biga", ca apu sèmpiri intèndiu innoi in bidda mia, chi est Bidd'e Sorris, e mescamente de is tzius prus bècius) e de abarrai, a sa fini de s'annu, de sa stagioni e de is giogus, cun is manus sbuidas, chi cumprendeis po su chi seu circhendi de si narai. 

E immoi, est craru, is de sa Ferrini ant a depi aturai atentus, cumenti si narat, a no pentzai de essi giai bintu su campionau e, duncas, sa cursa concas a su primu postu, e nci iat a mancai atru, apustis de noranta minudus feti de giogu, de tenni custa bidea in conca; ma is giogadoris po su prus funt totus giòvuneddus e duncas, cumenti m'arrapitint fatu fatu is allenadoris chi intendu po ndi pesai is ciaciarradas (est a narai: is intervistas, po ndi furai su fueddu de s'italianu etotu), nci ponint pagu meda a si ponni bribilliscus in conca (cumenti mi naràt sèmpiri babbu miu candu fia unu piciocheddu piticu); e su trabballu chi, de su restu, depit fai un allenadori, benit a essi pròpriu cussu apitzus de sa conca de is giogadoris cosa sua (chi mi cumprendeis po su chi seu circhendi de si narai), ca po binci is partidas ndi iast a depi cabai in campu sèmpiri cun sa cuncentratzioni arta e cun sa conca sbuida de totus is pensus chi no serbint. E sa pròpriu cosa ballit puru po is de s'Academia Sulcitana, e po totus cussas scuadras chi mancai in sa primu bessida de su campionau nd'ant bodditu una bella surra (e megaus a chistionai de su resultau de sa partida, est craru, berus est?): ant a depi circai de ndi strantaxai sa conca, e in pressi puru, giai de sa partida chi at a benni, e chi po su chi pertocat sa Lista A de sa Promotzioni, at a essi custu domìnigu, est a narai su binti de su mesi de cabudanni. 

Tra is resultaus prus togus, e de importu, chi ndi funt bèssius aforas (ddi naru diaici) apustis de sa primu giorronada de giogus po su chi pertocat su campionau de sa Promotzioni (andaus ainanntis sighendi custu arrastu etotu, duncas) agataus sa bìncida, in domu allena (cumenti si iat a podi narai e cumenti mi praxit meda meda a narai), de is de s'Atleticu de Masainas, sighius e allenaus cust'annu puru de Fabiu Tinti, chi si funt fatus balli (e meda puru) in sa isfida contras a is de su Cus de Casteddu (eia, seu chistionendi pròpriu de sa scuadra chi nd'ant pesau, po cust'annu puru, is de s'Universidadi): is casteddaius s'agatant a curri in su campionau de sa Promotzioni po sa de cincu stagionis de sighiu (e no funt pagus de seguru!), is de su Masainas, invècias, ndi funt torraus in Promotzioni pròpriu cust'annu, apustis de essi bintu su campionau de sa Primu Categoria de s'annu passau; e si cumprendit, duncas, ca una de is cosas mellus po s'umori de is giogadoris est cussa de incumentzani sa stagioni, e duncas su campionau, cun una bìncida e cun is tres puntus allogaus a su callenti in busciaca; in su primus tempus de sa partida, si potzu contai custu, is duas scuadras no si funt ghetadas a s'atacu, ma funt abarradas, ddi naru diaici, in sa metadi de campu cosa insoru, po circai de no ndi buscai su gol, pruschetotu. Ca cumenti mi contant fatu fatu is allenadoris chi intendu po ndi pesai is ciaciarradas e is intervistas, apustis de is partidas, innoi fadeus is contus de cumenti ddis funt andadas is fainas in campu, una de is cosas de importu prus mannu po binci una partida e po bati is aversàrius (cumenti si iat a podi narai, e cumenti si narat, a su mancu, innoi in Bidd'e Sorris), e fortzis est sa primu cosa de fai, chi nci pentzaus beni, est cussa de no pigai, de no ndi ingolli su gol. 

E in prus, tocat a fai su contu ca domìnigu passau ddoi fiat ancora basca meda, mescamente a su megama e mescamente a s'ora de sa partida; e fadendi su contu ca is giogadoris ant torrau a incumentzai cun is allenamentus de calincuna cosa cumenti a trinta diis (chi no calincuna cosa prus pagu puru) intzandus si cumprendit poita ant prefèrriu de no si nci ghetai a s'atacu a trassa de macus (cumenti si iat a podi narai), a sa tzrupa (cumenti si narat candu fais una cosa chentza de nci pentzai, chentza giai giai de cumprendi ita ses fadendi; candu fais, duncas, su chi ti intendis in su coru invècias de su chi ti iat a consillai sa conca; e custa benit a essi una chistioni de importu mannu, chi ballit fintzas po sa vida cosa nosta de dònnia dì, ma immoi est mellus chi no pigu custa lega, poita desinò s'arriscu est cussu de mi strollicai prus de su tanti chi mi potzu permiti de fai, ca no si ndi bollu furai totu su tempus, totu su tempus chi mancai nemmancu teneis). 
Ma custu no bollit narai ca sa partida tra is de su Cus de su Casteddu e is de s'Atleticu de Masainas, mescamente in su primu tempus, siat stètia lègia, e custu no bollit narai ca is tifosus si siant arroscius. Antzis, a narai sa beridadi, is duas scuadras ant provau a ndi cassai, a ndi pesai su gol, ma no nc'est stètiu nudda de fai. E invècias in su segundu tempus sa partida est bènnia a essi meda ma meda prus spàssiosa, e mescamente po is tifosus de sa scuadra allena, e megu a chistionai, intzandus, de is tifosus de s'Atleticu de Masainas, e mi parrit bastanti craru: is duas scuadras ant incumentzau a atacai, a si nci ghetai a s'atacu, chi mi permiteis de manigiai custus fueddus, isperendi ca nesciunu de bosatrus tengiat calincuna cosa de murrungiai (ca mi ndi seu acatau, in custus ùrtimus mesis, in custus ùrtimus annus, ca sa genti tenit sèmpiri calincuna cosa de murrungiai po totu, e est una cosa chi no cumprendu, chi pròpriu si ddu depu narai, ca parrit giai giai ca totu su mundu siat sèmpiri infastidiau po calincuna cosa, ca parrit ca sa genti no agatit nemmancu unu segundu de paxi, nemmancu a ddu pagai a pesu de oru, cumenti si iat a podi narai), fintzas a candu is de s'Atleticu de Masainas ant agatau su puntu chi est bàlliu po s'unu a zeru (e megu a chistionai de su gol, isperu chi siat bastanti craru), e chi nd'at pesau Lorenzu Basciu. Is de su Cus de Casteddu ant circau de aderetzai is cosas acoitu e po cuindixi minudus de sighiu ant circau de stampai (cumenti si iat a podi narai, furendindi sa trassa de s'italianu etotu) sa porta de is aversàrius, ma nc'est de narai ca is difensoris chi nc'at ghetau in campu Fabiu Tinti (e chi est s'allenadori de is de s'Atleticu de Masainas, cumenti s'apu giai arremonau in custu artìculu etotu, de su restu, ma a si ddu torrai a arrapiti po essi prus crarus puru no costat nudda, e nci iat a mancai atru!) ant apoderau beni, ant aguantau beni e no ant fatu sbàllius. 

E su de no fai sbàllius, torra, est una de cussas cosas chi ti permitit, a sa fini de is contus, de binci is partidas: e custa est una règula chi ballit siat po is campionaus de is diletantis, e duncas, eia, po is partidas de is diletantis (e chi funt, de su restu, is partidas chi sigheus nosu cun su giàssu de su Diàriu Sportivu), e siat po su chi pertocat is partidas de is professioneris, cumenti iant a podi essi, po si fai a cumprendi mellus de ita seu chistionendi, is partidas de su campionau de sa Sèrie A, chi donant a sa televisioni, tra is atras cosas, giai giai dònnia dì de sa cida. E chi pròpriu si ddu depu scoviai deu fia unu de cussus chi abarràt a totu dì apicigau a sa televisioni, impari a babbu miu etotu, chi de su restu est su chi m'at regalau, ddi naru diaici, custa passioni (e chistionu, mi parrit bastanti craru, de sa passioni po su giogu de sa bòcia e mescamente is fainas de is assòtzius de professioneris). Ma apustis chi apu incumentzau a trabballai po su giàssu de su Diàriu Sportivu, e apustis chi apu incumentzau a scriri, a totu dì, po trabballu, apitzus de is contus de is partidas de is diletantis, intzandus m'est passada (ddi naru diaici, isperendi ca si cumprendat su chi seu circhendi de si narai) sa gana de abarrai po oras e oras de sighiu aranti de sa tialu de televisioni a castiai is partidas de is professioneris (e custu bollit narai ca immoi, in dì de oi, candu serru is fainas chi mi pertocant e candu acabbu de fai su trabballu chi mi spetat, intzandus sa primu cosa chi fatzu est cussa de ndi studai su computer e de mi nci fuiri atesu, su prus atesu possibili, de su trabballu cosa mia, de is bòcias, de is resultaus, e de totu su chi pertocat su giogu de su càlciu). 

Ma torraus a nosu: fia narendusì (emu pigau custa lega, po si ddu narai puru cun atrus fueddus) ca una de is cosas de importu prus mannu in su giogu de sa bòcia (ma sa pròpriu cosa ballit e si iat a podi narai puru po sa vida cosa nosta de dònnia dì) est cussa de no fai sbàllius; ca a bortas is cosas si andant mabi pròpriu po crupa de is tontesas chi fadeus; e a bortas (po mi torrai a apicai cun cussu chi fia narendusì ainanntis, immubagora, in custu artìculu etotu) fadeus tontesas pròpriu poita (cumenti mi arrapitiat babbu miu, mescamente candu fia unu pipieddu piticu) no seus pentzendi a su chi seus fadendi, ma seus pentzendi a cras (po ndi furai, torra, is fueddus de su chi mi naràt babbu miu po mi strunciai candu fia piticheddu). 
E duncas si cumprendit puru (immoi chi nci seus acudu a si narai custa cosa puru), e si cumprendit mellus, poita is allenadoris circhint de trabballai no feti apitzus de is cambas de is giogadoris cosa insoru (chi mi cumprendeis po su chi seu circhendi de si narai), ma puru e mescamente apitzus de sa conca de is giogadoris, e pruschetotu, eia, po su chi pertocat s'abbilidadi de abarrai cuncentraus. Ca mescamente candu t'agatas a giogai contras a una scuadra prus forti de tui (e in sa vida sucedit prus o mancu sa pròpriu cosa candu t'agatas a fai calincuna cosa de difìcili, chi mancai no as mai fatu, chi est una novidadi, o chi est una cosa chi no ses bonu a fai beni), cumenti fais unu sbàlliu, mancai piticheddu, mancai s'ùnicu in totu sa partida, intzandus nc'est su tanti po pentzai, po scumiti ca is aversàrius cosa tua si nd'ant a aprofitai acoitu, est a narai: sùbitu, chentza de ti lassai su tempus de narai nemmancu mesu "bah" (cumenti apu sèmpiri intendiu narai de babbu miu, e duncas eia, deu creu ca siat unu de cussus dìcius, de cussus modus de narai is cosas chi nd'arribbant, deretus deretus, de s'italianu etotu), chentza de ti lassai su tempus po circai de evitai su dannu. 

Ma torraus a nosu (e m'eis a iscusai chi mi seu strollicau fintzas prus de su tanti chi fortzis mi spetàt, e m'eis a iscusai chi nc'apu stichiu totus custus strollichiminis, ma de su restu, chi eis lìgiu a su mancu unu de is artìculus chi nd'apu bogau aforas po is Novas de su Diàriu Sportivu in custus ùrtimus annus, intzandus scieis beni cumenti mi pigat s'afròddiu candu scriu is artìculus in sardu, est a narai, duncas, ca mi benit de mi ingiogatzai meda ma meda): is de s'Atleticu de Masainas, apustis chi nd'ant pesau su primu gol, e apustis de essi aguantau su resultau in s'interis chi is de su Cus megànt a fai de totu po ndi cassai su puntu de s'unu a unu, ant agatau sa giogada chi est bàllia po su duus a zeru, cun Andrea Iesu chi at serrau is giogus e sa isfida; e megaus a chistionai de unu de is giogadoris prus fortis (feti puru po sa cantidadi manna, po su tanti de gol chi est arrannèsciu a ndi pesai me in custus ùrtimus duus-tres annus; e fait a ddu narai: est forti po diaderus; ma cumenti a issu, est craru, nc'ant a essi atrus cincuanta, chi no centu, atacantis diaici fortis; e mancai cumenti ant a andai ainanntis is campionaus, est a nari in su benidori, apa a tenni s'ocasioni, puru, de si chistionai de totus is atrus atacantis chi nci funt. po custas stagioni, in su campionau de sa Promotzioni e de s'Ecellenza (e mancai, puru, in su campionau de sa Primu Categoria e de sa Segunda Categoria) chi si giogant innoi in Sardìnnia. 

E immoi chi nci seus, po su tempus chi m'abarrat e, mescamente, po su logu chi m'abarrat de preni ainanntis de serrai s'artìculu de custa cida, deu ia a fai su pròpriu giogu chi apu fatu fintzas a immoi, est a narai su de si torrai a contai is novas de importu prus mannu chi ndi funt arribbadas apustis de sa primu giorronada po su chi pertocat su campionau de sa Promotzioni, e de sa Lista A, e ia a sighiri duncas andendi a castiai impari a bosatrus (e sèmpiri chi ndi teneis gana) su chi est sucèdiu in sa Lista B. 
E duncas, eia, sa primu cosa chi si potzu narai (e chi est una de is cosas de importu prus mannu) est ca, apitzus de is otu partidas chi si funt giogadas custu domìnigu passau (e megu a chistionai, si ddu bollu arregodai torra, a bortas sa cosa no siat bastanti crara, sèmpiri de sa Lista B de su campionau de sa Promotzioni), duas si funt serradas cun su resultau, de importu mannu meda, de ses a unu. E immoi andu a si contai calincuna cosa de prus. 

E duncas, eia, sa primu partida chi andaus a pigai in consideru est cussa tra is de su Monte Alma, chi si dda funt depius biri, ddi naru diaci, contras a is de su Thiesi: is nieddus-birdis, e megu a chistionai de sa scuadra allenada e, duncas, sighida, po cust'annu puru de Gianmariu Rassu (e s'acàpiu tra s'allenadori e s'assòtziu de su Thiesi est andendi ainnantis de una bella pariga de annus; e in su mundu de su càlciu, a su mancu mi parrit de podi narai custu puru, funt cosas ca no si biint dònnia dì), s'agatant a curri in su campionau de sa Promotzioni de una bella pariga de annus de sighiu, e s'annu passau funt stètius una de is scuadras chi nd'ant bogau aforas is cosas mellus, fadendi su contu ca funt arribbaus me is primus seti postus de sa lista, a is pabas de is scuadras prus fortis chi fiant currendi, giai de s'incimintzu de s'annu, po ndi cassai sa bìncida de su campionau e, intzandus, s'artziada de sa categoria; is de su Monte Alma, invècias, ndi funt artziaus cust'annu etotu in su campionau de sa Promotzioni (apustis de essi bintu sa batalla, toga meda, contras a is tattaresus de sa Lanteri), ma nc'est de narai, puru, ca is arrùbius-brau (ddus tzerriaus diaici po su cabori de is camiseddas chi si ponint apitzus, mescamente candu depint giogai is partidas in domu cosa insoru) funt trabballendi impari a un allenadori bravu, mancai siat ancora giòvunu, cumenti Ivanu Falchi, e duncas, eia, is giogadoris sciint beni su chi bollit s'allenadori, su chi s'abertat, e sciint beni, tra is atras cosas (chi mi parrit sa cosa de importu prus mannu tra totus cussas chi s'apu arremonau), calli est sa bidea de giogu chi tenit in conca Falchi; e duncas, mancai siant una scuadra nova, ddi naru diaici, in su campionau de sa Promotzioni, funt arrannèscius a su pròpriu a si fai balli, e beni puru, fadendi su contu ca, cumenti s'apu giai narau, funt stètius bonus, funt stètius abbilis a ndi sforrai, a ndi pesai ses gol, e no funt pagus, mescamente po sa primu partida de sa stagioni. Tocat a narai, puru, ca is de su Thiesi funt partus unu pagheddeddu agoa, unu pagheddeddu in retardu (cumenti si narat innoi in su Campidanu de Mesu, cumenti apu sèmpiri intèndiu narai innoi in bidda mia a su mancu) po su chi pertocat sa preparatzioni, sa cunditzioni atletica. A is de su Monte Alma, invècias, is cosas funt andadas deretas, chentza de nesciunu strobbu, e su resultau chi nd'ant pesau est fillu (ddi naru diaici, a trassa de cumenti si narat in italianu etotu) de su chi ant fatu in campu, de su giogu togu meda chi funt stètius bonus a fai a biri a is tifosus cosa insoru (e puru a is tifosus de sa scuadra allena, chi pròpriu si ddu depeus narai). 

At fatu spantus mannus, invècias, po totu cussu chi est sucèdiu apustis (e immoi andu a si contai beni sa cosa...) sa bìncida ca is de su Casteddusardu (Castelsardo, furriau in italianu, ma deu creu ca gei si cumprendat beni mancai diaici etotu) nd'ant pesau, nd'ant cassau in domu de is de su Coghinas: is piciocus sighius de Carlu Nativi, ca est sètziu (ddi naru diaici) in sa panchina de s'assòtziu arrùbiu-brau po su segundu annu de sighiu. E su de tenni sa possibbilidadi de trabballi po duas o tres stagionis de sighiu impari a sa pròpriu scuadra benit a essi unu vantàgiu, cumenti si iat a podi narai, fadendi su contu ca is giogadoris sciint giai cumenti si cumportat s'allenadori, e sciint giai sa bidea de giogu chi tenit in conca, e custu agiudat, e meda puru, a acoitai a agatai is giogadas prus togas, giai de is primus bessidas; e difatis est cussu chi est sucèdiu in sa partida de custu domìnigu passau, ca is de su Casteddusardu ant bintu cun su resultau, bonu e tundu tundu, de duus a zeru; tocat a narai, puru, immoi chi nci seus, e po si cumprendi mellus, ca is de su Coghinas invècias ant pigau un allenadori nou, e seus chistionendi de Celestinu Ciarolu, apustis de una bella pariga de annus (calincuna cosa cumenti a tres stagioni de sighiu, chi bollu essi pretzisu, cumenti iat a depi essi unu giornalista chi bollit fai beni su trabballu cosa sua) chi ant fatu impari a Paolu Congiu ca, tocat a narai custu puru, me is stagionis passada at fatu, nd'at pesau unu trabballu bonu meda, fadendi su contu ca est sèmpiri arrannèsciu a fai arribbai sa scuadra cosa sua me is primus postus de sa lista; est a narai, duncas, ca is de su Coghinas in custus ùrtimus annu ant sèmpiri fatu sa cursa po circai de ndi cassai s'artziada de categoria, ma tra una cosa e s'atra no ant tentu su tanti de fortuna, su tanti de bona sorti chi serbit in su giogu de sa bòcia (e in sa vida puru, chi pròpriu depeus narai sa beridadi), ma nc'ant a torrai a provai po cust'annu puru, custu est pagu ma seguru. 

Po immoi, peròu, is de su Coghinas ndi depint cabai (cumenti naràt sa bon'anima de mamma mia), depint inguti (cumenti si narat in italianu puru) sa primu partida pèrdia in campionau (ca tenit unu tastu marigosu meda, e si cumprendit beni) e nemmencu a ddu fai aposta, is de su Casteddusardu fiant giai arrannèscius a bati, a binci contras is de su Coghinas me is partidas chi balliànt po sa Cupa Italia; e duncas, eia, si iat a podi narai, puru, ca is de su Casteddusardu fintzas a immoi funt stètius sa bestia niedda (ndi furaus sa trassa de cumenti si narat in italianu etotu) de is de su Coghinas. 
E ddu scieis mellus de mei, de su restu, cumenti andant is fainas in su mundu de sa bòcia: est a narai, duncas, ca candu is cosas no andant beni, o comentecasiat no andant beni po cumenti ddas bisàst a s'incumintzu de sa stagioni, intzandus su primu a pagai su contu est sèmpiri (e feti) s'allenadori (e custu fait parti de su giogu, e nci iat a mancai atru): e duncas, 'tendei 'tendei, sa nova prus manna de custa ùrtimas diis, de custas ùrtimas oras nd'arribbat pròpriu, dereta dereta, de sa Lista B de su campionau de sa Promotzioni: Celestino Ciarolu e is dirigentis ant scerau, de acòrdiu tra de issus, de serrai, de segai s'acàpiu chi teniànt, apustis de sa primu giorronada feti de campionau de sa stagioni nova. E de su restu, is dirigentis funt cussus chi cumandant sa navi (ddi naru diaici, isperendi ca nesciunu tengiat calincuna cosa de murrungiai po sa metàfora chi nd'apu bogau aforas); e s'allenadori, cumenti apu giai scritu, est cussu chi pagat is dannus, est a narai, ca est cussu chi si ndi pigat totus is crupas. 
E duncas, ellus, si dispraxit meda po cumenti funt andadas is cosas a Celestinu Ciarolu, mescamente poita, candu ti nci bogant no tenis, est craru, nemmancu sa possibbilidadi de ti fai balli torra, circhendi de strantaxai sa conca, in sa partida apustis; e mancu mali ca is de su Coghinas e Celestinu Ciarolu si funt lassaus beni (de su chi ndi podeus cumprendi ligendi is comuncaus chi ndi funt bèssius a pillu in custas ùrtimas oras), chi est sa cosa de importu prus mannu, mescamente po una scudra chi currit me is campionaus de is diletantis (mancai, peròu, su de binci praxit a totus, e immoi, ndi seu seguru, is de su Coghinas ant a fai de totu po circai de ndi strantaxai sa conca acoitu), poita nc'ammancat puru ca sa genti si pighit a pari po crupa de una partida de bòcia pèrdia.


Attività realizzata col contributo della Regione Sardegna. IMPRENTAS 2025-2026. LR 22/2018 art. 22