Arragodus: is de su Tertenia funt stètius is prus fortis in sa Lista C de su campionau de sa Segunda Categoria

E duncas, a cantu parit, nci seu po oi puru (cun gana bona e chentza daboris, chi est una cosa de importu mannu, a su mancu po su chi mi pertocat): est a nai, mellus, ca po oi puru seu prontu po ndi pesai su trabballu cosa mia, ca, cumenti a dònnia giòbia de su mesi (chentza de ndi sartai nemmancu unu, si cumprendit, po totus is doxi mesis chi ddoi funt in un annu), est cussu de scriri unu bellu pagheddeddu, unu bellu tanti (ca sonat mellus puru, fortzis) de rigas in campidanesu (a su mancu, in su campidanesu chi si fueddat innoi in Bidd'e Sorris). Megamu a nci pentzai in custas diis passadas: seus brintaus giai in su mesi de agustu (e no parit berus, a bortas, de cumenti si ndi bobat su tempus, cumenti si iat a podi narai, de su restu), e duncas, s'agataus in mesu in mesu a s'istadi, chi est una de is stagionis prus drucis chi ddoi funt aintru de s'annu, mancai feti poita est su perìodu innoi su prus de sa genti si pigat is ferias, cumenti estus a podi narai (a trassa de s'italianu etotu), o, po ddu narai mellus, su mesi de agustu est cussu innoi su prus de sa genti si ndi andat in ferias, est a nai ca po una parighedda de diis is personas (chini si ddu podit permiti, a su mancu) si nci ghetant in logu de mari, o de montagna (ballit aguali, si cumprendit) e si ndi fuint (iat a fai a ddu narai diaici puru, deu creu) de is biddas e mescamente de is citadis, ca in s'istadi benint a essi giai giai unu forru (e de seguru no seu deu cussu chi abarrat innoi, a totu dì, a disigiai de bivi, mancai, in Milano, o in Torinu, o in Roma puru). E duncas, in s'interis ca is personas si gosant su pàsiu, su spàssiu e si spreviant unu pagheddeddu apustis de un annu de trabballu, deu sigu a pentzai a is cosas mia e duncas, po oi puru, mi tocat a cracai is butoneddus de sa tialu de sa tastiera, cumenti si tzerriat, a trassa de s'italianu puru. A nai sa beridadi no seu innoi po murrùngiai, antzis: immoi chi nci seus nd'aprofitu po torrai gràtzias a su Cielu (e no est de seguru sa primu borta chi ddu fatzu) po su de tenni unu trabballu e duncas sa possibbilidadi de mi guadangiai cussus cuatru arriabis ca mi permitint de mi ndi scabulli de totus is spesas chi nci funt de sighiri in custa vida; e duncas fatzu su trabballu miu cun su coru prenu de prexu, mancai, cumenti a totus is fainas, cumenti a totus is trabballus, a ddu fai po unu annu interu, a sa fini unu incumentzat a si intendi unu pagheddeddu fadiau, cumenti si iat a podi narai. Ma no seu innoi (si ddu torru a arrapiti po un'antra borta puru) a murrùngiai po cantu mi intendu stracu, poita, a narai sa beridadi, tèngiu sa bona sorti de depi fai unu trabballu chi no est meda fadiosu, a su mancu po is cambas, po is bratzus e po totu su restu de su corpus puru; est a nai ca no trabballu in miniera, po fai un esèmpiu de unu de is trabballus prus tostaus, e grais, ca nci funt in custu mundu, a su mancu custu est su parri miu. E si iat a podi narai, puru, ca in Sardìnnia is personas chi ant trabballau me is minieras, mescamente me is annus passaus, no funt stètias pagus de seguru. E sighendi cun cust'arrastu (chi pròpriu si depu narai sa beridadi, no sciu mai cali legas ant a finiri aintru de is artìculus chi ndi pesu in sardu, ainnantis de mi ponni a ddu fai), mi intendu basau de sa bona sorti (cumenti si iat a podi narai, a trassa de s'italianu etotu) po su fatu ca no depu abarrai a totu dì asuta de su sobi, cumenti cussus chi trabballant in su sartu, mancai po ndi stegai is tamatigas, o po ndi boddiri is ochiellus de sa canciofa (o po ddus prantai, ca est una faina fadiosa meda, fortzis tra is fainas prus tostadas tra totus cussas chi unu depit fai in su sartu); e duncas, totu su chi deou fai est cussu de abarrai sètziu, aranti de su computadori. E calincunu de bosatrus iat a podi narai, puru: biau tui! E fatu fatu mi intendu, po diaderus, basau de sa gràtzia de Deus e de sa Divina Providentzia puru (po arremonai unu fueddu chi manigiàt Giambattista Vico, chi est stètiu unu de is prus grandus filosofus chi eus tentu in Italia). 

E duncas, totu su chi bollu fai custu mengianu est circai de ndi pesai unu trabballu chi potzat essi bonu, mancai su trabballu miu (su de scriri) siat sèmpiri aguali, e mancai, cun su tempus, unu ndi potzat perdi unu pagheddeddu de afròddiu, e de gana, cumenti si iat a podi narai. Megamu a nci pentzai pròpriu in custas ùrtimas oras de su restu: no seu s'ùnicu, custu est pagu ma seguru, in custu mundu, a depi fai sèmpiri su pròpriu trabballu: pentzu a su paneteri chi trabballat in su forru de su pani chi ddoi est pròpriu a su costau de domu mia; pentzu a totus cussus chi passant is giorronadas in su sartu a incestai is canciofas; pentzu a unu maistu de muru, pentzu a unu pastori chi sighit su bestiami cosa sua: faint dònnia dì is pròprius fainas, a sa pròpriu ora, mancai cun is pròprius cumpàngius. Si cumprendit beni: chi abarras a totu dì fadendi sèmpiri sa pròpriu cosa nc'est s'arriscu de s'arrosci, e sa isfida est pròpriu custa, deu creu: su de agatai una cosa nova dònnia dì; su de agatai, mancai a solus, chentza de s'apicai a nemus (ddi nau diaici, isperendi ca si cumprendat su chi si bollu narai), sa gana bona po si ndi scidai, po si ndi pesai su letu e po atacai cun is fainas de su fetianu, cun su coru prenu de isperas e s'arrisu in sa cara. Custa iat a podi essi sa bìncida prus manna. E duncas, sa cosa ballit po mei puru, mescamente: e intzandus, est cun su coru e sa conca prena de afròddiu chi andu a incarrerai cun is chistionis chi apu scerau po custa cida. 

Duncas, si naru puru ca, chi fessit po mei, ia a abarrai a totu dì (po oras e oras, si cumprendit) a mi stròllicai cun bosatrus, ca cumenti podeis ligi (e cumprendi, mancai a solus) is chistionis chi mi portu avatu, aintru de sa conchitedda cosa mia, no ammancant de seguru, ma a sa fini, depu pentzai puru ca is cosas chi scriu, is rigas chi ndi bogu aforas, is artìculus chi ndi pesu bessint in unu giàssu chi si tzerriat (ddu scieis beni de su restu, poita no pentzu ca bosatrus seis innoi a lìgi cust'artìculu po sbàlliu) Diàriu Sportivo, chi est unu giornali chi s'agatat in internet e chi murigat (mi benit de narai diaici, gioghendi unu pagheddeddu a fai su poeta, e isperu ca nesciunu de bosatrus tèngiat calincuna cosa de murrùngiai) is chistionis acapiadas a su mundu de sa bòcia (de su càlciu, si iat a podi narai, puru) de is diletantis sardus. E duncas, mancai mi iat a praxi, e meda puru, abarrai innoi a si contai centumilas atras storias (est po cussu, de su restu, chi a bortas tzerriu s'artìculu chi ndi pesu in sardu "contus e contixeddus") tra totus cussas chi mi nd'arribbant cun is libbrus chi liggu, o chi mi nd'arribbant, puru e mescamente, de totus is cosas chi mi sucedint aintru de sa dì, e de totus is cosas chi mi contant is personas chi atobiu, mancai, in sa bia o me is butegas. E duncas, si ddu naru, immoi chi nci seu: chi nci sticu totus custus stròllichiminis, aintru de un artìculu ca iat a depi chistionai de gol, de partidas e de resultaus, est po circai de ndi cassai s'atentzioni (custa est sa ispera mia, a su mancu) de totus cussas personas chi mancai no funt acapiadas a strintu cun is fainas chi pertocant is scuadras sardas chi currint me is campionaus pesaus de sa Federatzioni Italiana de su Giogu de su Càcliu, de sa Lega Natzionali de is Diletantis, e de is de su Cumitau Regionali Sardu, puru, ma chi iant a tenni aggradessu, mancai, de podi fai unu pagheddeddu de esercìtziu cun sa lingua sarda, mancai feti ligendi custu artìculu etotu. E si cumprendit, is personas chi no sighint su mundu de sa bòcia de is diletantis no funt pagus, ma sa ispera mia est ca, gràtzias a custus artìculus etotu, potzant arribbai a cumprendi s'importu chi su sport, e duncas su giogu de su càlciu, tenint po is comunidadis, est a nai po sa genti, po is cristianus chi bivint me is biddas (ballit fintzas po cussas prus pitichinninnias) e me is citadis. No est sa primu borta chi ndi chistionu e chi ndi arraxonu impari a bosatrus de su restu: su sport (ddu tzerriaus diaici, a sa moda de is ingresus etotu) est una faina de importu mannu meda po sa saludi de mannus e de piticus; po sa saludi de su corpus, po incumentzai, est craru, ma puru po sa saludi de sa conca (sa bon'anima de mamma mia, de su restu, si megàt sèmpiri ca chi s'arrogat sa conca, chi s'ammobadiat sa conca, intzandus nd'arribbant is dannus, poita, custu fiat su parri cosa sua a su mancu, chi tui t'arrogas unu bratzu, una camba, unu didu de una manu, intzandus depit feti abertai chi su dannu ndi sanit. Ma chi t'arrogas sa conca, est a nai ca ndi bessis mesu machillotu, cumenti si narat in bidda, (cumenti apu sèmpiri intèndiu narai in bidda mia, a su mancu) intzandus nd'arribbant is arroris, poita sa conca est maba de sanai. 

E duncas, torrendi a nosu, su giogu de sa bòcia (ma ballit po is atrus giogus puru, est craru) est unu agiudu mannu meda, mescamente po is prus giòvuneddus, chi tenint diaici sa possibbilidadi de si spreviai unu pagheddeddu, de abarrai totus impari in unu logu sanu (nc'est chi pentzat ca unu campu innoi si giogat a bòcia siat prus sanu, mancai, de unu bar; megu a narai, duncas, ca su de abarrai a totu dì sètzius, fuiaus a su bar, cumenti naràt sa bon'anima de mamma mia etotu, no est sa cosa mellus ca podeus fai in sa vida cosa nosta; a cussu puntu, duncas, fortzis est mellus su de si ponni is cratzoneddus crutzus e sa camisedda de sa scuadra de sa bidda cosa nosta, e incumentzai a curri avatu de sa bòcia, impari a is cumpàngius cosa nosta etotu). 

E de su restu, si cumprendit, po unu chi giogat a càlciu no nc'est atra cosa de importu prus mannu de sa bòcia; ca is giogadoris iant a abarrai a totu dì gioghendi in campu, tra de issus (cumenti faint, mancai, in s'istadi puru, candu is campionaus de sa Federatzioni Italiana de su Giogu de su Càlciu si frimmant, e mancu mali, duncas, ca is assòtzius ndi pesant is torneus, cumenti ddus podeus tzerriai, de càlciu a cincu, cumenti si narat), ma a sa fini (e cun custu mi torru, mancai, a acapiai cun su chi s'apu narau ainnantis) depint pentzai puru a su trabballu (e sa pròpriu cosa ballit po mei, est craru) fadendi su contu ca is diletantis si tzerriant diaici pròpriu poita no ndi cabant in campu po incasciai barcas e barcas de dinai (cumenti faint, invècias, is grandus campionis de sa Sèrie A). 

E serru sa chistioni (e totus is stròllichiminis, puru) diaici: su spàssiu de is giogadoris diletantis benit a essi trabballu po mei; e duncas, fadendi su contu ca is giogadoris diletantis ndi cabant in campu candu no trabballant (e duncas, me is diis de pàsiu e de festa, cumenti iant a podi essi is domìnigus), po mei is diis ca po is atrus funt de pàsiu e de festa funt diis innoi mi depu ponni a sighiri is fainas cosa mia. Ma si ddu torru a narai torra: no seu de seguru innoi po abarrai totu sa dì murrùngia murrùngia. 
E duncas, fadendi su contu ca seu giai giai arribbau a sa metadi de su logu chi tèngiu de preni, cun is rigas chi scriu, forzis fortzis iat a essi mellus puru chi si nci ghetaus, a fundu 'e susu (cumenti si narat in Bidd'e Sorris), me is chistionis chi pertocant is campionaus de bòcia. E duncas, chi eis lìgiu a su mancu unu de is artìculus chi ndi bessint su giòbia (e mescamente is artìculus chi ndi funt bessendi in custas cidas de s'istadi) scieis beni puru (ma chi no ddu scieis, deu seu innoi pròpriu po si ddu arragodai torra) ca, in s'istadi mescamente, circaus de chistionai de is scuadras chi ant bintu is campionaus e, duncas, chistionaus de is scuadras chi funt arrannèscias a ndi cassai su primu postu de sa lista. Si cumprendit beni, de su restu: is diletantis, est berus, ndi cabant in campu po su spàssiu chi nd'arricint, po si spreviai unu pagheddeddu e po circai de si ndi scaresci de totus is dannus chi nci funt in custa vida; ma a binci, a sa fini, praxit a totus (e no feti a is professioneris, si cumprenit beni) e duncas, mi parit diaderus su mìnimu, su prus pagu ca si podit fai est cussu de ddus arremonai (megu a chistionai, est craru, de is scuadras e de is giogadoris chi bincint is campionaus) e de ddis fai is cumplimentus, cumenti si narat, de su restu. E duncas, scieis puru (chi seis costumaus a ligi is artìculus chi ndi bogaus aforas dònnia dì, in italianu puru, est craru) ca cun su giassu de su Diàriu Sportivu sigheus is campionaus de s'Ecellenza, de sa Promotzioni, de sa Primu Categoria fintzas a nd'arribbai, duncas, a su campionau de sa Segunda Categoria (chi cust'annu, cumenti eis a sciri giai, ma chi no ddu scieis si ddu torru a contai deu, ca seu innoi pròpriu po custu puru, est stètiu pretziu, ddi naru diaici, in seti listas, partendi duncas de sa Lista A e fintzas a arribbai a sa Lista G). 

E duncas, po oi apu scerau de si torrai a contai cumenti funt andadas is cosas in sa Lista C, chi est cussa chi pertocat totus is scuadras ollastrinas. E duncas, no m'abarrat ca incarrerai, cumenti fatzu dònnia giòbia (e fiat ora puru!, s'at a megai calincunu de bosatrus). 
E sa primu cosa chi podeus fai, est cussa de andai a castiai, impari, si cumprendit, cumenti funt cuncodradas is cosas po su chi pertocat sa lista: a su primu postu, cuncas, agataus is biancus-arrùbius de su Tertenia (sa fotografia chi bieis est stètia fata de Cristina Piroddi, e ddi torraus gràtzias!), chi ant serrau sa stagioni cun calincuna cosa cumenti a sessantacincu puntus in buciaca, chi ndi funt arribbaus gràtzias a binti partidas bintas e cincu partidas chi ant serrau cun su resultau in paridadi. Is de su Tertenia, acoitaus a ddu narai, cust'annu ant pèrdiu feti una borta. Cun sessantacuatru puntus (chi funt, si cumprendit beni meda, unu in mancu de cussus chi tenint is de su Tertenia), chi ballint po su segundu postu de sa lista, agataus is de sa Bariese, chi funt una de is duas scuadras chi nd'ant pesau cust'annu in Barì (s'atra est cussa de su Barisardo, chi currit in su campionau de s'Ecellenza, chi est, tra is atras cosas, su prus mannu tra totus cussus chi si giogant in s'isula cosa nosta). Is de sa Bariese, duncas, funt stètius bonus a ndi pesai una cursa de importu mannu, fadendi su contu chi nd'ant cassau bintunu bìncidas (una in prus de cussas chi nd'ant cassau is de su Tertenia), ant serrau po una borta feti sa partida cun su resultau in paridadi, ma a sa fini funt arrutus po cuatru bortas (contras a s'ùnica partida pèrdia de is de su Tertenia). E duncas, chi est berus ca is de su Tertenia funt stètius is prus fortis de totus (candu bincis unu campionau, de su restu, bolit narai ca nd'as pesau una cursa toga meda, custu est pagu ma seguru), sa pròpriu cosa si iat a podi narai po is de sa Bariese puru: sa fortza de sa scuadra chi bincit unu campionau, duncas, si cumprendit mellus andendi a castiai cantu funt stètius bravus is aversàrius. E is de sa Bariese, immoi chi nci seus podeus narai custu puru, si funt arrèndius feti me is ùrtimus minudus de sa stagioni, est a nai ca ant circau de ndi cassai su primu postu de sa lista fintzas a s'ùrtimu segundu de giogu. A su de tres postus, invècias, agataus is de su Triei, chi ant serrau sa stagioni cun cincuantanoi puntus (ses in mancu de is chi tenint is de su Tertenia, ca a fai is contus nci poneus pagu meda, de su restu), chi ndi funt arribbaus gràtzias a dexennoi partidas bintas, duas partidas chi ant serrau cun su resultau siddau in paridadi (cumenti si iat a podi narai, e cumenti mi praxit a narai, de su restu) ma tocat a narai, puru, ca is biancus-birdis nd'ant dèpiu inguti cincu unconis marigosus (cumenti si iat a podi narai), est a nai, duncas (gei si cumprendit, deu creu) ca ndi funt arrutus po cincu bortas, est a nai, po dda segai prus a crutzu puru, ca ant pèrdiu calincuna cosa cumenti a cincu partidas. Tra is de su Triei e is de su Scalepranu, chi ant serrau sa stagioni regolari (cumenti eus incumentzau a dda tzerriai, a trassa de is ingresus etotu) cun corantaseti puntus in buciaca, nc'est unu stampu (ddi nau diaici) de doxi puntus; e tra is de su Scalepranu e is de su Tertenia nci funt giai binti puntus de diferèntzia (dexiotu, po essi prus pretzisus puru, e si cumprendit: chi unu giornalista bolit fai beni su trabballu cosa sua, intzandus depit essi pretzisu po su chi si podit, est craru). E duncas, po sa cursa a su primu postu, seus chistionendi sèmpiri de su chi est sucèdiu in sa Lista C, est craru, ddoi fiant tres scuadras, fortis meda, e si cumprendit, su spàssiu de is tifosus, chi ant sighiu totu sa storia de su campionau, giorronada po giorronada, est stètiu mannu meda. E duncas, cumenti fadeus dònnia borta, candu chistionaus de sa scuadra chi at bintu su campionau (po torrai a sa chistioni chi su trabballu miu, a bortas, est a fai sèmpiri sa pròpriu faina, cumenti unu cantanti, mi megu a solu a solu, chi depit cantai, in logus diversus, sèmpiri is pròprias cantzonis), sa cosa mellus chi podeus fai est cussa de andai a biri, po incumentzai cun is arraxonamentus cosa nosta (mellus puru cumenti sonat: po sighiri cun is arraxonamentus chi nd'eus pesau fintzas a immoi) cumenti funt andadas is cosas a is de su Tertenia, chi cust'annu funt stètius sighius de Federicu Scattu, unu de is allenadoris prus giòvuneddus chi s'agatant, a su mancu in dì de oi, in Sardìnnia. Duncas, sa stagioni de sa Segunda Categoria est partida, est incumentzada su primu fini de cida de su mesi de ladamini (sa cida apustis de s'incumentzu de is campionaus de sa Primu Categoria e de sa Promotzioni puru): is biancus-arrùbius, duncas, nd'ant cassau is primus tres puntus gràtzias a su cuatru a zeru chi nd'ant pesau, in domu cosa insoru, in sa partida contras a is de su Gairo. In sa cida apustis, sa cida avatu, cumenti si iat a podi narai, puru, is de su Tertenia ant bintu, cun su resultau de cuatru a duus, in domu de una scuadra forti cumenti is de su Ac Sarrabese. Su cuindixi de su mesi de ladamini, po sa de tres bessidas, is de su Tertenia ant bintu, cun su resultau, togu meda, de tres a zeru, contras a is de su Scalepranu (chi eus arremonau ainnantis, chi si nd'arragodais). A sa de cuatru bessidas, est a nai in sa partida chi s'est giogada su bintiduus de su mesi de ladamini, po is de su Tertenia nd'est arribbada sa primu partida pèrdia (sa primu surra, si iat a podi narai diaici puru): sa partida chi ant giogau in domu de is de su Seui Arcuerì, difatis, s'est serrada cun su resultau de duus a unu po is grogus-asullus (cumenti tzerriaus is de su Seui Arcuerì, po is caboris chi tenint in sa camisedda e, duncas, in su sìmbulu de sa scuadra etotu). Ma cumenti m'arrapitu (e s'arrapitu) fatu fatu, in su giogu de sa bòcia, cumenti in sa vida, sa cosa de importu mannu no est cussa de no nd'arrui mai; sa cosa de importu prus mannu benit a essi sa de si ndi torrai a strantaxai acoitu apustis chi nd'arruis, chi imbrunchinas. E duncas, is de su Tertenia, tocat e fait a ddu narai, si ndi funt strantaxaus acoitu meda, chi est berus ca, apustis de cussa partida pèrdia, ant bintu po tres bortas de sighiu: in s'ùrtima bessida de su mesi de ladamini (chi s'est giogada su bintinoi) is biancus-arrùbius funt arrannèscius a binci contras a is de su Girasole (sa scuadra chi nd'ant pesau in una biddixedda pitichedda meda, cumenti est sa de su Gelisuli, chi fait calincuna cosa cumenti a mille e trescentus animas), cun su resultau finali, bellu meda, de cincu a unu; is cosas funt andadas beni puru in sa partida contras a is de su Lotzorai (chi s'est giogada su cincu de su mesi de donniassantu), chi s'est serrada cun su resultau de cuatru a zeru, (unu resultau tundu tundu iat a fai a narai, intzandus), e in sa bessida de su doxi (sempiri de su mesi de donniassantu, est craru), is de su Tertenia nd'ant cassau sa bìncida prus toga, a  su mancu po su chi pertocat sa primu parti de sa stagioni, gràtzias a su noi a zeru chi ant scutu in faci de is de is Amatori de Jerzu (una de is duas scuadras chi s'agatant in dì de oi in Jerzu, fadendi su contu ca s'atra, chi est sa prus manna de is duas, currit in su campionau de sa Primu Categoria). A sa de otu bessidas (e seus chistionendi, sèmpiri, de is partidas chi ballint po sa lista de s'andada) is de su Tertenia funt arrannèscius a binci, cun su resultau de duus a unu, in domu de is de sa Bariese (e custa, si cumprendit gràtzias a totu su chi eus narau fintzas a immoi), est stètia una de is bìncidas prus grais, ddi naru diaici, de totu sa stagioni, mescamente poita nd'ant cassau is tres puntus in domu allena, cumenti si narat. Sa partida apustis, invècias (e seus chistionendi de sa de noi bessidas, chi s'est giogada su bintises de su mesi de ladamini) is de su Tertenia, chi giogànt, tra is atras cosas, aranti de is tifosus cosa insoru, si funt depius acuntentai de unu puntixeddu feti, fadendi su contu ca sa partida s'est serrada cun su resultau de zeru a zeru (in biancu, si iat a podi narai puru, a trassa de cumenti si narat in italianu etotu candu duas scuadras, chi s'atobiant s'una contras a s'atra, no arrannescint a fai nemmancu unu gol). Apustis de cussa partida, una pagheddeddu isfortunada, si podit narai chentza de timi de si sballiai, is de su Tertenia ant incumentzau a curri a forti meda: me is ùrtimas cuatru partidas de sa lista de s'andada, difatis, ant bintu po tres bortas, partendi de sa partida chi s'est giogada su primu fini de cida de su mesi de idas, candu ndi iant pesau unu ses a zeru, grai meda, in sa isfida in domu de is de su Perdasdefogu. In sa bessida de su dexi de su mesi de idas (sa de undixi bessidas, po essi prus pretzisus e ancora prus crarus), is de su Tertenia funt arrannèscius a binci contras a is de s'Ilbono, cun su resultau finali de cincu a zeru. In sa partida chi ant giogau su dexesseti (sèmpiri de su mesi de idas, gei si cumprendit, deu creu) is biancus-arrùbius si funt dèpius acuntentai, torra, de feti unu pntixeddu, fadendi su contu ca sa isfida chi ant giogau contras a is meris de domu de s'Atleticu de Lotzorai si fiat serrada cun su resultau de unu a unu. In s'ùrtima bessida de su duamilla e bintitres (chi s'est giogada su trinta de su mesi de idas), invècias, is de su Tertenia funt arrannèscius a binci cun su resultau de unu a zeru, contras a is de su Triei. Is cosas ddis funt andadas beni, puru, me is partidas chi ballint po sa torrada. Ma su duamilla e binticuatru est incumentzau, chi pròpriu depeus narai sa beridadi, cun duas partidas chi si funt serradas in paridadi: sa primu est stètia cussa contras a is de su Gairo (chi funt stètius bonus a aguantai, cun su resultau chi est abarrau siddau, cumenti si iat a podi narai, in su zeru a zeru); sa segunda est stètia cussa contras a is de s'AC Sarrabese, cun su resultau de unu a unu. De sa de tres giorronadas (seus chistionendi de sa lista de partidas chi ballint po sa torrada, est bastanti craru, berus est?), chi est cussa chi s'est giogada, po si cumprendi mellus puru, su bintunu de su mesi de gennàrgiu, e fintzas duncas a sa de otu bessidas (chi s'est giogada su tres de su mesi de martzu), is de su Tertenia funt stètius bonus a binci po atras ses bortas, partendi de su tres a zeru chi nd'ant pesau in sa partida contras is de su Scalepranu, sighendi cun su tres a zeru chi ant scutu a faci de is de su Seui Arcuerì (e fait a narai, duncas, ca in sa partida de sa torrada, is de su Tertenia ant torrau sa furria a is aversàrius), su duus a unu chi nd'ant pesau in sa partida in domu de is de su Gelisuli, po arribbai duncas a su noi a zeru (bellu e tundu tundu) chi funt arrannèscius a ndi cassai in sa partida, chi ant giogau in domu cosa insoru, aranti de is tifosus arrùbius-biancus, contras a is de su Lotzorai. Sa partida de su binticincu de su mesi de friàrgiu, invecias (e chi ballit po sa de seti bessidas) is de su Tertenia funt arrannèscius a binci contras a is Amatori de Jerzu, cun su resultau de cincu a zeru. Apustis, est arribbada sa bìncida, cun su resultau de unu a zeru, in sa partida chi ant giogau, in domu cosa insoru etotu, contras a is de sa Bariese. Su dexi de su mesi de martzu, invècias, in sa de noi bessidas (po su chi pertocat, sèmpiri, sa lista de partidas de sa torrada), is de su Tertenia nd'ant arregotu feti unu puntixeddu, in sa partida contras a is de su Villagrande (s'assòtziu chi nd'ant pesau in Biddamanna Strisàili), cun su resultau de duus a duus. Me is ùrtimas cuatru bessidas de s'annu, peròu, is biancus-arrùbius ant bintu sèmpiri, partendi de su cuatru a unu chi nd'ant pesau contras a is foghesus, passendi po su tres a zeru chi nd'ant pesau in domu de is de s'Ilbono, arribbendi, intzandus, a su ses a zeru chi nd'ant pesau contras a is de s'Atleticu de Lotzorai e serrendi totus is giogus cun sa bìncida, de importu mannu meda (fortzis est stètia una de is bìncidas de importu prus mannu chi nd'ant cassau, a su mancu po su chi pertocat is partidas de sa torrada) contras a is de su Triei, cun su resultau de duus a unu. 
E immoi chi apu acabbau de ndi bogai aforas totus custus numerus, sa cosa mellus chi si iat a podi fai, po cumprendi cumenti funt andadas is cosas in domu de is de su Tertenia, est cussa de andai a arraxonai apitzus de totus is cosas chi m'at contau s'allenadori de is arrùbius-biancus, Federicu Scatu, in una ciaciarrada chi nd'eus pesau impari pròpriu apustis de s'ùrtima partida de sa stagioni, chi est stètia cussa contras a is de su Triei, cumenti s'apu narau immubagora de su restu. E sa cosa chi mi praxit de prus, si ddu depu scoviai, sa cosa chi mi praxit de prus de su trabballu miu (ma ballit po sa vida puru), est candu is personas mi contant is storias cosa insoru. 
«Me is ùrtimus annus chi apu fatu cumenti a giogadori – m'at contau Federicu Scattu – apu bistiu sa camisedda de is de su Tertenia, cumenti si narat. Invecias s'annu passau (seus chistionendi de sa stagioni de su duamilla e bintiduus – duamilla e bintitres ndr), ainnantis de nc'apicai is botineddus a sa pùncia, cumenti si narat in italianu puru, apu giogau in un'antra scuadra, sèmpiri innoi in Ollastra, e po is ùrtimas partidas apu decìdiu de sighiri is de sa Bariese, me is pannus de s'allenadori, fadendi su contu ca fiant annadendi in acua mabas, ma po bona sorti seus arrannèscius comentecasiat a ndi cassai sa sarvesa, cun una pariga de giorronadas ancora de giogai, ainnantis de sa fini de su campionau. Duncas – at sighiu a mi contai Federicu Scattu – deu pentzu pròpriu de essi lassau arragodus bonus innoi in Tertenia, cumenti a giogadori ma, mescamente, cumenti a omini, cumenti a persona. S'assòtziu, duncas, teniàt in conca sa bidea de fai torrai a partiri sa scuadra apustis de sa cabada, de sa furriada, cumenti si iat a podi narai, puru, in su campionau de sa Segunda Categoria. Duncas, is dirigentis e su presitendi ant prefèrriu donai is crais de sa scuadra me is manus de una persona chi connosciant beni e, mescamente, me is manus de una persona chi connoscessit beni is piciocus de su Tertenia, e totu s'ambienti, cumenti si narat, a trassa de s'italianu etotu». E duncas, si cumprendit, Federicu Scattu, mancai giòvuneddu, s'est ghetau a fundu e susu in custa aventura nova. «A narai sa beridadi, e sa cosa ballit pruschetotu po is primus cidas de trabballu, no credia e no pentzamu de curri po sa bìncida de su campionau e no pentzamus de ndi podi pesai numerus diaici bonus, cumenti eus fatu. Candu depis torrai a partiri apustis de un'annada lègia meda, su strobbu prus mannu est ca is piciocus no tenint sa gana bona chi iat a serbiri, est a nai ca no tenint s'afròddiu po torrai a curri. In prus, si iat a podi narai puru ca is dirigentis no ant pigau cussa biga manna de giogadoris chi, mancai, ti iant a podi donai una manu de agiudu a torrai a partiri acoitu. Su Tertenia, duncas, at agatau s'acòrdiu cun is giogadoris chi serbiant po sighiri a andai ainnantis cun custu progetu; eus decìdiu de scumiti apitzus de is piciocus de sa bidda etotu, fadendi su contu ca in sa rosa nci fiant giai piciocus chi teniant una bella esperièntzia a is pabas, e chi funt abarraus in sa scuadra mancai depestus giogai in su campionau de sa Segunda Categoria. Cun su tempus, e gràtzias a is partidas chi seus arrannèscius a binci, mescamente me is primus bessidas de sa stagioni noba, intzandus eus incumentzau a cumprendi ca si podestus giogai totus is cartas chi tenestus me is manus, fadendi su contu ca is cosas po su chi pertocat sa lista si funt fatas drucis acoitu». 
Sa cosa mellus chi si podit fai, peròu, est cussa de no si fai pigai tropu de s'affròddiu, mescamente candu is cosas ti andant beni: po binci unu campionau, difatis, no est bastanti su de binci cuatru o cincu partidas de sighiu; sa crai de totu su giogu, duncas, est cussa de abarrai umilis, cumenti si iat a podi narai. 
«E de su restu no tenestus s'òbbrigu de binci su campionau po s'ammarolla, cumenti si iat a podi narai. Festus prontus a giogai un'annada selena, circhendi mancai de abarrai atesu de is postus prus bàscius de sa lista; sa bidea fiat cussa, mancai, de incumentzai cun su trabballu concas a su benidori, fadendi su contu ca pentzamus de curri po sa bìncida de su campionau de sa stagioni de su duamilla e binticuatru – duamilla e binticincu. E duncas, totu su chi est sucèdiu cust'annu est stètiu unu ispantu mannu, mescamente po is dirigentis. Ma de su restu, me is annus chi apu fatu innoi in s'assòtziu de su Tertenia, candu giogamu ancora, emu giai tentu s'ocasioni de connosci totus is giogadoris chi ddoi fiant, giai, in sa rosa: sciemu beni cantu fiant fortis e sciemu beni su chi podiant donai a sa scuadra; e pròpriu po custu, fadendi su contu de totus is calidadis bonas chi custus giogadoris tenint, ca pentzamu ca si podessit fai calincuna cosa de importu mannu giai a partiri de cust'annu etotu, cumenti est sucèdiu, de su restu. Est pagu ma seguru, chi bolis binci unu campionau nc'est bisòngiu ca totus is cosas andint beni, chentza dannus: a contus fatus, duncas, podeus narai ca nd'eus pesau una stagioni de oru, e is primus a essi abarraus spantaus seus stètius pròpriu nosu. Sa bìncida chi nd'eus cassau in domu de is de su Triei, a s'ùrtima giorronada, est stètia sa crai de sa stagioni, fadendi su contu, pruschetotu, ca issus no pèrdiant una partida in domu de s'annu passau. In cussa partida, incècias, seus stètius bonus a ndi furriai su resultau, fadendi su contu ca eus serrau su primu tempu cun su resultau de unu a zeru po is aversàrius cosa nosta, ma in su segundu tempus nd'eus cassau duus gol. Sa bìncida si dda seus sudada, cumenti si narat, e immoi si gosaus sa festa».  
 

Attività realizzata col contributo della Regione Sardegna - IMPRENTAS 2023-2024. LR 22/2018, art. 22