Arregodus: is de su Lanusè bincint su campionau de sa Promotzioni e ndi artziant in Ecellenza

E duncas, atacu narendusì custu, a su mancu po oi: seu arribbau, e bosatrus chi ligeis su chi scriu impari a mei, a sa parti prus toga, ma fortzis est puru sa prus fadiosa, de sa stagioni e duncas, de su trabballu cosa mia: est a nai ca immoi ca is giogus funt acabbaus, e is bocias funt frimas, e is giogadoris si pigant unu pagheddeddu de pàsiu (e sa cosa ballit puru po is allenadoris, mi parit bastanti craru), e duncas, immoi chi no nci funt prus partidas (e no nc'ant a essi prus partidas a su mancu fintzas a sa metadi de su mesi de Cabudanni, chi est cussu innoi torrant a partiri is campionaus), e no nci funt prus novas chi nd'arribbant de is campus, intzandus po su chi pertocat is Novas (e duncas, po su chi pertocat is artìculus chi scriu in sardu campidanesu e chi ndi bessint aforas dònnia, dònnia giòbia de s'annu, chentza de ndi sartai nemmancu unu, nemmancu po is diis de festa, mancai siat Nadali, o Pasca Manna, o su cuindixi de Agustu), e custa cosa andat ainnantis giai de una pariga de annus, chi pròpriu si depu narai sa beridadi, mi pigu custus duus-tres mesis po si torrai a contai, e po chistionai mellus, chi si praxit de prus cumenti sonat sa cosa, cumenti funt andadas is cosas me is catodixi listas chi sigheus, deu impari a is collegas cosa mia, est craru, po su Diàriu Sportivu. 

E intzandus, fadendi su contu ca custu chi teneis asuta de is ogus est su primu artìculu de custa genia (diaci mi benit de ddu narai, e diaici apu narau, de su restu) chi est bessendindi aforas po cust'annu, andu a si ispiegai, mellus, sèmpiri chi nc'arrannèsciu, cumenti ant a andai is cosas (e megu a chistionai sèmpiri, e feti, po su chi pertocat is artìculus in sardu de is Novas) me in totus is cidas chi ant a benni, a su mancu fintzas a candu no ant a partiri torra is giogus. Ca, chi is cosas ant a andai cumenti funt andadas in sa stagioni de su duamilla e binticuatru – duamilla e binticincu, iant a podi torrai a incumentzai pròpriu a sa metadi de su mesi de Cabudanni. 
Ma fadendi su contu ca giai giai no eus nemmancu spaciau cun custa stagioni, immoi mi parit lègiu a abarrai innoi a ciaciarrai, a chistionai de candu ant a torrai a partiri is giogus. 

E duncas, cumenti fia circhendi de si narai, in totus custus mesis de pàsiu (pàsiu po is giogadoris, si ddu torru a arrapiti, ca po mei, ma puru po is collegas cosa mia, chi scriint impari a mei in su giàssu, ant a essi cidas de trabballu, aguali a totus is atras) eus torrai a bivi totus is cosas de importu prus mannu (ddi nau diaici) chi funt sucedias, partendi, duncas, e mi parit craru puru, de is scuadras chi ant bintu is campionaus cosa insoru. Ca de su restu, cumenti s'apu narau giai atras bortas, su de binci praxit a totus, e no feti, duncas, a is grandus campionis chi currint me is campionaus de is professioneris (cumenti iant a podi essi, po nd'arremonai feti una pariga, is giogadoris chi currint in sa Sèrie A, chi est su campionau prus mannu chi teneus in Italia, gei ddu eis a sciri, e mellus de mei puru, deu creu). 

E duncas, chi boleus fai beni su trabballu cosa nosta (e seu chistionendi po su chi mi pertocat, e po su chi pertocat is collegas cosa mia, chi faint is giornalistas po su giàssu de su Diàriu Sportivu), estus a depi chistionai de cumenti funt andadas is cosas a is scuadras chi nd'ant cassau su primu postu de sa lista, e duncas, si cumprendit beni, s'artziada de categoria, ca in su mundu de is diletantis, est unu de is prexus prus mannus chi nci potzant essi. E po ddu cumprendi, bastat pagu: podeus pigai, po fai un esèmpiu, totus is giogadoris chi currint me in su campionau de sa Segunda Categoria, e chi bisànt, mancai, de nd'artziai in su campionau de sa Primu Categoria. E si cumprendit, ca prus nd'artzias de categoria, e prus is cosas si faint tostadas, ma spassiosas puru, e mi parit craru. E mancai is giogadoris diletantis ndi cabint in campu (a su mancu, is cosas iant a depi andai diaici) feti po si spreviai unu pagheddeddu de su trabballu, o de is trumentus chi ndi boddint aintru de sa cida, totus bisant, mancai, de curri, e de giogai, in scuadras de importu, in cussas chi, mancai, faint parti de su mundu de s'Ecellenza ca, si cumprendit, est su campionau prus mannu, cussu de importu prus mannu, po ddu narai mellus puru, tra totus cussus chi si giogant in Sardìnnia (ma sa cosa ballit, puru, est craru, po totus is atras regionis de s'Italia), e megu a chistionai, sèmpiri (mi parit bastanti craru, ma no si sciit mai) de su mundu de is diletantis, si cumprendit, berus est? 

E duncas, custu est pagu ma seguru, is piciocheddus chi faint parti de is scuadras chi mancai currint in su campionau de sa Primu Categoria, e mescamente de sa Promotzioni, bisant de ndi artziai in su campionau de s'Ecellenza. E cust'annu, acudu a si narai custu puru, su campionau de s'Ecellenza, po su chi pertocat sa Sardìnnia, a su mancu, est stètiu bintu de is de su Budoni, ma de custa cosa, chi si ddu arregodais, nd'apu chistionai, giai e meda puru, me in mesis passaus. E duncas, fadendi custu contu, apu decìdiu ca po is artìculus chi nd'ant a bessiri aforas in totus custus mesis de s'istadi (chi iat a podi essi bella callenti, a trassa de is ùrtimas duas o tres istadis chi si seus lassaus a is pabas is atrus annus), eus a chistionai de is scuadras chi ant bintu is campionaus, partendi de is duas scuadras chi faint parti de su mundu de sa Promotzioni, arribbendi a is scuadras chi ant bintu su campionau de sa Primu Categoria (e m'acudu giai a si narai ca su campionau de sa Primu Categoria est stètiu pretziu, cumenti sucedit giai de una bella pariga de annus, in cuatru listas, e duncas, a fai is contus nci poneus prus pagu de unu segundu, po su chi pertocat sa Primu Categoria, eus a depi chistionai de cuatru scuadras, e megu a arremonai is de su Cannonau de Jerzu, po su chi pertocat sa Lista A, de is de su Samugheo, po su chi pertocat sa Lista B, de is de s'Ozierese de Othieri, po su chi pertocat sa Lista C, e de is de su Campanedda, po su chi pertocat sa Lista D) fintzas a arribbai, duncas, a is otu scuadras chi nd'ant cassau su primu postu po su chi pertocat su mundu de sa Segunda Categoria, chi est stètiu pretziu cun calincuna cosa cumenti a otu listas, e duncas, eia, nc'at a essi de chistionai, e de arraxonai apitzus de otu scuadrixeddas. 

E po su primu artìculu chi ndi pesu, po su chi pertocat is arregodus (e su fueddu nc'at a essi in su titulu puru, po si cumprendi mellus a pari), apu decìdiu de partiri de sa Lista A de sa Promotzioni, e duncas, s'apa a depi chistionai torra (e mellus de su chi apu fatu me in totus is cidas e is mesis passaus, a su mancu custa est s'ispera cosa mia, e immoi nc'est feti de cumprendi chi nc'apa a arrannesci) de is de su Lanusè, chi funt stètius sa scuadra prus forti tra totus is dexiotu scuadras chi ddoi fiant in sa lista. 

Duncas, scieis puru ca candu ndi pesu is artìculus in sardu (e duncas, eia, cussus chi ndi bessint aforas po is Novas de su Diàriu Sportivu) mi praxit, e fintzas a m'amachiai, a nci stichiri in mesu a totus is contus chi pertocant su mundu de sa bòcia, calincunu contixeddu chi, mancai, pertocat su tempus chi passat, o su tempus chi fait (est a narai: chi ddoi est tropu basca, o tropu frius; chi proit tropu, o no proit nudda. E deu creu ca gei si seus cumprendius, berus est?). 

E duncas, po no perdi su costumu, si potzu narai, feti, fadendi su contu ca custu artìculu ndi bessit aforas in su primu giòbia de su mesi de Làmpadas, ca s'istadi benit a essi sa stagioni prus druci (mescamente candu ses unu piciocheddu, o una piciochedda, ballit aguali, piticu de edadi); at a essi poita no depis andai a iscola, at a essi poita is diis funt longas, e meda puru, fadendi su contu ca scurigat apustis de is otu – otu e mesu de su merì, e fadendi su contu ca sa temperadura est bella e druci. Ma custus funt is diis, mancai, innoi incumentzat a nd'arribbai sa basca puru, e ddu scieis, fortzis mellus de mei puru, cantu podit essi bascosa s'istadi innoi in Sardìnnia. 
E po su chi mi pertocat, mi parit de intendi ancora prus basca de su chi fait candu pentzu ca s'isula si prenit fintzas a cucuru de turistas: e no megu a narai ca no ia a bolli nesciunu apitzus de s'isula innoi bivu, ca ddu cumprendu a solu ca su mundu est de totus (diaici iant a depi essi is cosas, a su mancu); est a nai ca cumprendu beni ca is personas tenint totu su diritu de si ndi andai in giru innoi bolint (e sa cosa, a narai sa beridadi, no iat a depi balli feti po is turistas, chi funt cussus ca, si cumprendit, tenint is buciacas prenas de dinai, ma iat a depi balli, puru e pruschetotu, chi boleis, po totus cussus disisparaus, e mi parit ca custu mundu siat prenu, fintzas a cucuru, fintzas tropu, de disisparaus, chi depint lassai, si ndi depint fuiri de su logu innoi funt nàscius e innoi bivint, po crupa de una gherra, o de sa poberesa), ma a sa fini, candu pentzu ca po seti-otu mesis in s'isula innoi bivu (e mi parit bastanti craru: seu chistionendi de sa Sardìnnia) nci funt calincuna cosa cumenti a unu millioni e mesu de cristianus, me is mesis de s'istadi, invècias, arribbaus a essi duas (chi no tres) bortas su tanti de cristianus ca nci funt me in s'ierru. Est a nai ca arribbaus a essi fintzas tres millionis, chi no de prus, de cristianus totus acracangiaus, is unus cun is atrus, in custa isula. 

Ca poi sa cosa no est nemmancu diaici, ca logu gei nci nd'est po totus, ma bastat a andai in logu de mari, mancai me is logus prus famosus, po cumprendi mellus de ita seu chistionendi, ca nci poneus duus segundus a si nd'acatai de su muntoni de genti chi nc'est. E de seguru cussus logus innoi sa genti abarrat totu acracangiada (po manigiai unu fueddu chi intèndia sèmpiri narai de sa bon'anima de mamma mia, e chi m'est sèmpiri praxu, chi pròpriu si ddu depu narai), cun is personas chi funt, giai giai, unu apitzus de s'atru, no funt pròpriu fatus po mei, chi cumprendeis su chi si bollu narai. E duncas, torrendi a su tempus chi fait, cun totu custa genti chi ddoi est in s'isula, cun totu sa genti chi nd'arribbat, mi parit giai giai chi nci siat ancora prus basca de su chi fait; mi parit, giai giai, de m'allupai, ca mi parit, giai giai, ca s'aria no bastit po totus. E, po su chi mi pertocat, chistionu po mei est craru, mi bastat a mi fai una passillada, mancai feti dexi minudus, in una citadi cumenti a Casteddu (chi est unu de is logus prus turisticus, cumenti si iat a podi narai, furendindi su fueddu de s'italianu etotu, tra cussus chi nci funt in s'isula), po mi intendi mabi, de sa genti chi ddoi est in giru me is bias. 

E custa est una cosa chi apu cumprèndiu, e de meda puru: is grandus citadis no funt fatas de seguru po mei, fadendi su contu ca de candu seu nàsciu apu bìviu in una biddixedda chi fait calincuna cosa cumenti a seti milla cristianus, e chi a bortas, eia, mi parint fintzas tropus. E duncas, eia, in Casteddu aguantu calincuna cosa cumenti a duas – tres oras, e si iat a podi narai ca, eia, cabu in citadi feti po mi ndi scabulli de cussas tres o cuatru cumassionis chi depu fai, e acabbau de sighiri is fainas cosa mia, mi nci fù, cumenti chi fessi unu leporeddu chi currit, allestru meda, in su sartu. 
E duncas, po serrai sa chistioni e po dda acabbai cun is strollichiminis, a su mancu po oi, est craru, custa est sa stagioni innoi incumentzaus a murrungiai po sa tropu basca; e teneus, nc'est de narai custu puru, calincuna cosa cumenti a atrus cuindixi diis de beranu, ainnantis chi ndi lompat s'istadi. E podeus feti isperai ca sa basca manna no ndi brintit acoitu, e chi mancai potzat fai calincuna dì de friscura, mancai cun unu bellu bentixeddu; e mancai, iat a podi proi puru, a su mancu unu pagheddeddu, po arremonai un'antra chistioni (eia, sa chistioni acapiada a s'acua, a s'acua chi no nc'est, a s'acua chi est sèmpiri prus pagu e, duncas, po chistionai de sa sicagna, cumenti dda tzerriaus) de importu mannu po totus cussus chi bivint in s'isula. Ca cun totus is turistas chi ndi lompit, e cun su dannu acapiau a s'acua chi est sèmpiri prus pagu, benit a essi un arrori mannu, ca a su mancu po mei, dònnia annu mi parit ca s'acua de bufai potzat no bastai po totus. 
E parit una brulla, calincunu de bosatrus at a essi pentzendi, mancai, ca tèngiu sa conca prena de pentzamentus lègius (prus de su tanti chi serbit), ma dònnia, dònnia annu arribbaus a su puntu ca s'acua chi nc'est no bastat nemmancu po acuai is ortus e is giardinus cun sa fruta. Ma de custa cosa, mancai, nd'eus a torrai a chistionai, mellus, me is artìculus chi ant a bessiri me is cidas chi ant a benni. Ca po custa cida, a su mancu po oi, deu pentzu de essi acabbau cun is strollichiminis. 

E duncas, eia (e fiat ora puru, s'at a megai calincunu), de immoi apa a chistionai feti (e si naru feti! Si ddu promitu!) de resultaus, de partidas e de totu su chi est sucèdiu in sa Lista A de su campionau de sa Promotzioni, mancai deu sia costumau a mi fai pigai de su strollichimini puru candu andu a arraxonai, impari a bosatrus ca custas rigas ddas ligeis, apitzus de is fueddus chi m'arregalant is allenadoris, candu ddus intendu a sa fini de sa stagioni. 
Ca nc'agatu sèmpiri calincuna cosa de importu, calincuna letzioni, cumenti si iat a podi narai, in su chi mi contant is allenadoris; calincuna letzioni, duncas, chi mi iat a podi serbiri in sa vida de dònnia dì, mancai, po circai de aderetzai calincuna cosa chi, mancai, andat trota. O, a su mancu, custu est su giogu chi megu a fai, chi seu fadendi, de una bella pariga de annus, e si potzu narai (e cun custu dda serru po diaderus) ca fintzas a oi su giogu m'est sèmpiri bèssiu beni meda. 
E eus a biri, duncas, cumenti ant a andai is cosas me in s'artìculu chi teneis asuta de su nasu, chi cumprendeis su chi si bollu narai, su chi seu circhendi de si narai. 

E duncas, torrendi a nosu, e duncas, a sa bìncida de su campionau de sa Promotzioni de is de su Lanusè, chi est sa chistioni de importu prus mannu po s'artìculu de custa cida (e si cumprendit beni, deu creu, berus est?) si potzu narai, po incumentzai, ca is biancus-arrùbius-birdis nd'ant cassau is tres puntus chi funt serbius po serrai sa cursa po su primu postu, e duncas, eia, mi parit craru, po binci su campionau, in sa partida chi ant giogau in domu cosa insoru, est a narai a su Lixius (cumenti si tzerriat su campu innoi sa scuadra giogat totus is partidas in domu), contras a is de su Gùspini, cun sa partida (a contus fatus, si iat a podi narai ca est stètia una de cussas de importu prus mannu tra totus is chi ant giogau cust'annu, est a narai, mellus, in sa stagioni de su duamilla e binticuatru – duamilla e binticincu) chi s'est giogada su trexi de su mesi de Abrili (a fai is contus nci poneus pagu meda: fiat su domìnigu ainnantis de sa Pasca Manna, e duncas, cussu chi tzerriaus, a sa moda de is catolicus e de is cristianus, "domìnigu de is pramas"); e duncas, eia, custu bollit narai, puru, ca is de su Lanusè funt stètius bonus a ndi cassai sa bìncida de su campionau candu ammancànt atrus centu e otanta minudus de giogai. E duncas, si cumprendit totu s'atentzioni, e totu su trabballu chi ant dèpiu fai is giogadoris de su Lanusè, sighius, cumenti est craru, de s'allenadori cosa insoru, e seus chistionendi, mi parit bastanti craru, de Albertu Piras, ca in una ciaciarrada chi estus fatu una pariga de oras ainnantis de sa partida, si iat scoviau ca is piciocus cosa sua fiant arrannèscius a trabballai beni meda, cumenti ant fatu, de su restu, po totus is atras partidas chi ant giogau in sa stagioni. 

Is de su Lanusè, e deu ca sa crai po binci is partidas siat pròpriu custa (e chistionu de giornalista, fadendi su contu ca in custa vida no seu mai stètiu un allenadori de is scuadras de càlciu, e nc'est su tanti po pentzai, puru, ca no ddu apa a essi mai; e fadendi su contu ca no apu mai giogau cun una scuadra, ma feti in sa bia, impari a is amigus e a is cumpangius miu de iscola, e feti a is tempus de is iscolas elementaris e de is iscolas medias), funt arrannèscius a ndi cabai in campu, po sa partida de importu mannu chi ant dèpiu giogai contras a is de su Gùspini, cun su coru selenu. 
E de su restu, custa est una cosa chi ballit puru po totus is fainas chi andaus a sighiri me in sa vida cosa nosta de dònnia dì: candu ti fais pigai de is timorias, de is pentzamentus lègius (cumenti si iat a podi narai, e cumenti apu sèmpiri intèndiu narai in bidda mia, e mescamente de is bècius, ma puru de sa bon'anima de mamma mia), intzandus is cosas ti iant a andai a trotas, prus a trotas de su chi timis, cumenti chi a timi una cosa, a s'acabbu, est cumenti a dda tzerriai, chi cumprendeis su chi si bollu narai; est a nai ca prus timis una cosa, e prus possibbilidadis nci funt ca cussu dannu ti ndi potzat arrui in conca, nemmancu a ddu fai aposta (e ddu sciu, eia, ca a bortas parit fatu aposta. E po custu ca seu arremonendi custa gènia de lei, ca narat ca prus timorias tenis in conca e prus possibbilidadis ddoi funt ca cussas timorias bengiant a essi dannus mannus, chi ti nd'arruint in conca candu no ti ddu abertas). 

E duncas, e si cumprendit beni, no depit essi, custu est pagu ma seguru, una cosa facili su de ndi cabai in campu, candu sciis ca is tres puntus chi ddoi funt badda badda in su pratu podint balli po sa bìncida de su campionau, e duncas, ti podint donai su prexu mannu apustis de otu-noi-dexi mesis de trabballu grai e fadiosu. 
«Sciestus beni – at contau Albertu Piras a is giornalistas chi ddu fiant intervistendi – cantu podiant essi de importu is tres puntus chi ddoi fiant in su pratu po sa isfida chi depestus giogai contras a is de su Gùspini, fadendi su contu ca sciestus beni, de su restu, ca cussus tres puntus si podiant donai sa seguresa de nd'artziai torra in su campionau de s'Ecellenza, e, duncas, cun cussus tres puntus podestus serrai sa cursa po su primu postu». 

E duncas, sa dì, is de su Lanusè no funt abarraus de seguru a fai contus: is de su Tortolì, est berus custu puru, s'agatànt con calincuna cosa cumenti a noi puntus in mancu in busciaca (in mancu, e deu creu ca si cumprendat, de is chi teniànt is de su Lanusè, e duncas sessantanoi contras a sessanta, po essi prus pretzisus puru, cumenti unu giornalista iat a depi essi candu fait beni su trabballu cosa sua), ma is de su Lanusè ndi funt cabaus in campu cun sa bidea, crara crara, e s'ùnica, cumenti si iat a podi narai a trassa de cumenti si narat in italianu etotu, de binci sa partida. «Sa dì de sa partida contras a is de su Gùspini – s'at contau Alberto Piras, e chistionu po mei e po totus is atrus collegas cosa mia, megu a chistionai de is giornalistas, est craru, ca fiant ingunis po ddu ascurtai – no seus abarraus ingunis a fai contus: de su restu si podiat bastai a ndi cassai fintzas feti unu puntixeddu, ma a narai sa beridadi ndi lompestus a cussa partida cun otu bìncidas de sighiu a is pabas, est a nai apustis de otu partidas bintas, s'una avatu de s'atra, e ndi bolestus cassai puru sa de noi partidas bintas de sighiu, poita, in prus, eus giogau aranti de is tifosus cosa nosta, e bolestus regalai unu bellu tanti de prexu a totu sa genti chi ddoi fiat a su campu sa dì, e de seguru no fiant pagus. Su campu sportivu de su Lixius sa dì fiat prenu a cucuru de tifosus, cumenti si iat a podi narai, e tenestus, si intendestus sa responsabbilidadi de fai una partida toga, de importu. E mancu mali ca is cosas si funt andadas beni meda». 

Tocat a narai, puru, immoi chi nci seus, ca is de su Lanusè no si funt agataus in acua bonas me is ùrtimus duus-tres annus passaus, fadendi su contu ca, eia, nc'ant dèpiu inguti (nc'ant dèpiu cabai, cumenti si iat a podi narai, mellus puru) duas retrocessionis, cumenti si iat a podi narai a trassa de s'italianu etotu, e duncas, po duas bortas de sighiu nd'ant ingotu sa cabada in sa categoria prus bàscia, e invècias pròpriu s'annu passau, est a nai in sa stagioni de su duamilla e binticuatru – duamilla e binticincu fiant arrannèscius a ndi cassai sa sarvesa in su campionau de sa Promotzioni feti a s'ùrtima giorronada. «Si iat a podi narai ca is de su Lanusè, e chistionu mescamente de is giogadoris cosa mia, de is giogadoris chi faint parti de sa rosa chi megu a sighiri, funt arrannèscius a ndi pesai una stagioni de importu mannu. Su chi bolestus fai, e sa cosa ballit po mei ma ballit, puru, e mi parit bastanti craru, po is dirigentis e po totus is personas chi trabballant in s'assòtziu, po su beni de s'assòtziu, fiat cussa de circai de ndi torrai a pesai s'afròddiu chi nc'est, in sa bidda, po su chi pertocat sa scuadra de bòcia, fadendi su contu ca po crupa de is ùrtimus resultaus, no pròpriu diaici bonus cumenti si podiat isperai, sa genti at pèrdiu unu pagheddeddu de stima po sa scuadra etotu, e gei si cumprendit beni cumenti andant, cumenti podint andai is cosas. Seus chistionendi, de su restu, de una bidda chi me is annus passaus nd'at arriciu totu su beni chi nd'arribbat de su tenni una scuadra chi currit in su campionau de sa Sèrie D. E duncas, eus fatu totu beni e seus arribbaus a si giogai sa partida contras a is de su Gùspini, chi s'apu giai arremonau, de su restu, sciendu beni ca s'ammancat feti unu puntu po serrai sa chistioni e, duncas, totus is giogus. E candu si seus agataus a feti unu passixeddu po ndi torrai a artziai in Ecellenza, giai giai no si parita nemmancu berus, cumenti si narat e cumenti si iat a podi narai. Seus stètius bonus a ndi pesai una stagioni de oru, una stagioni de importu mannu, chi pentzsus, mescamente, a cumenti seus partius cust'annu. E in prus nc'est de nc'aciungi, deu creu, ca seus arribbaus puru in finali de sa Copa Italia, chi est un'antra de cussas cosas chi si prenit su coru de prexu, fintzas a cucuru».

 S'allenadori de su Lanusè, e megaus a chistionai sèmpiri de Alberto Piras, e si cumprendit, fiat giai arribbau a unu passu de s'artziada in su campionau de s'Ecellenza candu trabballàt impari a is de su Tortolì. 
«Est berus – m'at contau Albertu Piras -, po su chi mi pertocat, e chistionu de sa carriera mia cumenti a allenadori, mi nd'arregodu ca festus giai giai po ndi cassai sa bìncida de su campionau candu fia impari a is de su Tortolì, in sa stagioni de su duamilla e bintunu – duamilla e bintiduus, candu estus serrau sa stagioni a su segundu postu de sa lista, cun feti duus puntus in mancu de cussus chi ndi iant cassau is de sa Tharros. Mi nd'arregodu ca s'annu tenestus sa ispera, su bisu de benni torra piscaus po fai parti de su campionau de s'Ecellenza po sa stagioni de su duamilla e bintiduus – duamilla e bintitres, fadendi su contu ca s'Ecellenza po meda, meda annus at tentu unu numeru de scuadras dispari, ma a sa fini no si ndi fiat fatu nudda. E duncas, e chistionu po mei po primus – at sighiu a mi contai Alberto Piras – su de ndi cassai su primu postu e, duncas, s'artziada dereta in Ecellenza, po mei iat a essi una cosa toga e bona meda, e gei si cumprendit, fadendi su contu ca a binci praxit a totus, est a nai, duncas, a is allenadoris de is scuadras de diletantis puru». 

E duncas, po torrai a nosu, o po sighiri cun sa chistioni de importu prus mannu chi s'agataus, asuta de is manus, po s'artìculu de custa cida, podeus andai a castiai cumenti est andada sa stagioni de su duamilla e binticuatru – duamilla e binticincu in domu de is de su Lanusè, ca a bortas no parit nemmancu berus, de totus is letzionis chi si nd'arribbant (e chi ndi podint arribbai, po ddu narai mellus puru) de su mundu de su càlciu, chi est berus (cumenti est berus, e m'eis a iscusai po su giogu de fueddus chi mi nd'est bèssiu aforas) ca is de su Lanusè, pròpriu duus annu fait, in custus tempus etotu (est a narai, duus annu fait, in su mesi de maju po su chi pertocat su duamilla e bintitres), ndi boddiànt, ndi ingolliànt, sa segunda cabada de categoria de sighiu, s'una avatu de s'atra, aranti de unu muntoni de tifosus cosa insoru, a s'acabbada de sa partida ca is meris de domu iant giogau contras a is de su Sant'Aleni, e invècias immoi ant tentu sa possibbilidadi (est a narai, puru, sa bona sorti e sa gana bella) de ndi torrai a artziai sa conca, gràtzias a sa bìncida de su campionau (e sa brulla, diaici mi benit de dda tzerriai, est bella ca sforrada chi pentzaus ca pròpriu is de su Sant'Aleni funt arribbaus a su de tres postus in sa lista, a sa fini de sa stagioni regolari, cumenti podeus tzerriai is partidas chi si giogant in un annu e chi ballint po su torneu regolari, e ant dèpiu giogai is partidas finalis po ndi cassai s'artziada in Ecellenza, contras a is de s'Usinese, chi funt stètius cussus chi ant serrau sa stagioni a su segundu postu, ma po su chi pertocat sa Lista B, e apustis contras a is de su Tortolì etotu, chi ant serrau sa stagioni a su segundu postu, ma in sa Lista A, chi de su restu est sa pròpriu, mi parit bastanti craru, innoi curriànt is de su Lanusè etotu) de su duamilla e binticuatru – duamilla e binticincu. 

E po custa cosa ca s'apu contau immubagora, si iat a podi narai (cumenti seus narendu, de su restu) ca su giogu de sa bòcia est unu pagheddeddu cumenti a sa vida: oi mancai ses prangendi, e cras, a sa pròpriu ora (po sighiri a giogai a ndi pesai una metafora, po cumenti si narat) ses torrendi a fai festa. 
E duncas, eia, si iat a podi narai ca, a su mancu po su chi pertocat su mundu de sa bòcia, no estus a depi fai a binci sa tristura, apustis de una partida pèrdia, o unu campionau andau a trotu, ma estus a depi trabballai, a forti e allestru, po si ndi torrai a strantaxai apustis chi nd'arruis, ca est una cosa, de su restu, ca estus a depi fai totus. E sa storia chi pertocat is de su Lanusè iat a podi essi una de is letzionis de importu prus mannu, po su chi seus narendi. 

Torrendi a s'apicai a totu su chi apu scritu fintzas a immoi in custu artìculu etotu, si iat a podi narai ca, eia, a is de su Lanusè ddis ammancàt (cumenti s'apu giai arremonau, de su restu) feti unu puntixeddu po ndi cassai sa bìncida de su campionau, e custu puntixeddu, bellu e de importu cumenti una perda de oru, nd'est arribbau pròpriu a sa fini, a s'acabbu de sa partida contras a is de su Gùspini; antzis, chi pròpriu depeus narai is cosas po cumenti funt andadas, si iat a podi narai, mi parit su minimu, cumenti si narat, su prus pagu, ca is de su Lanusè nd'ant cassau tres puntus prenus, chi ndi funt arribbaus gràtzias a sa de noi bìncidas de sighiu, cun custa cursa toga meda pesada de sa scuadra de Albertu Piras, chi at incumentzau a curri a forti (meda ma meda prus forti de su chi funt arrannèscius a fai is scuadras de is aversàrius, cumenti si iat a podi narai) giai de sa partida chi is biancus – arrùbius – birdis fiant arrannèscius a binci contras a is de su Tortolì (cun sa partida chi, si ddu arregodais beni, si fiat giogada a sa metadi de su mesi de friàrgiu, est a nai su cuindixi de su mesi de Friàrgiu, po essi prus pretzisus puru, cumenti unu giornalista iat a depi essi), e de cussa partida is de su Lanusè funt stètius bonus a ndi cassai su primu postu de sa lista, e no ddu ant prus lassau stai fintzas a sa fini de s'annu, cumenti si podeis immaginai a solus, fadendi su contu ca, eia, seu scriendi custu artìculu pròpriu poita is de su Lanusè funt arrannèscius a serrai sa stagioni a su primu postu. 

E si potzu contai, puru, immoi chi nci seu, ca eia, is de su Lanusè ant dèpiu fai is contus cun sa maba sorti, e cun is dificultadis, cumenti ddas podeus tzerriai, tra sa fini de su mesi de gennàrgiu e is primus cidas de su mesi de Friàrgiu, candu iant pèrdiu po duas bortas in tres cidas, in domu de is de su Ceraxius, cun sa partida chi si fiat serrada cun su resultau de duus a unu po is meris de domu sighius de Giordano, e  cun sa isfida chi si fiat giogada su bintises de su mesi de Gennàrgiu, e apustis, in sa partida de su noi de su mesi de Friàrgiu, ndi iant bodditu un'antra surra, cumenti si iat a podi narai e cumenti si narat fatu fatu in su mundu de sa bòcia, contras a is de sa Villacidrese, sa scuadra, si cumprendit, chi nd'ant pesau in Biddacidru su presidenti Marrocu impari a totus cussus chi ddi donant una manu de agiudu. In mesu, invècias, si fiant dèpius acuntentai, cumenti si narat, de feti unu puntixeddu in sa partida chi iant giogau, in domu cosa insoru, contras a is de s'Uda, cun sa isfida chi si fiat serrada cun su resultau de unu a unu. 

E duncas, a fai is contus nci poneus pagu meda, is de su Lanusè ant serrau sa stagioni cun calincuna cosa cumenti a setantacincu puntus in busciaca, chi ndi funt arribbaus gràtzias a bintitres partidas bintas e ses partidas chi si funt serradas cun su resultau in paridadi, cun cincu partidas feti pèrdias, e una cantidadi manna de gol (is de su Lanusè funt stètius, a contus fatus, e a fai is contus nci poneus pagu meda, sa segunda scuadra in sa lista de is gol fatus, cun sessantacincu gol, a is pabas, feti, de is de su Sant'Aleni, chi eus arremonau pròpriu ainnantis, e chi ant serrau sa stagioni cun setantunu gol in busciaca, e no funt pagus de seguru, e si cumprendit beni), sessantacincu. 

Is de su Lanusè, de su restu, funt stètius sa segunda scuadra a nd'essi ingotu sa cantidadi prus piticheddedda de gol, est a nai ca nd'ant ingotu feti (e naru feti po modu de narai) trinta gol in trintacuatru bessidas, chi benit a essi, est craru, prus pagu de unu gol a partida. 

Tra is giogadoris de importu prus mannu in sa rosa de is de su Lanusè, agataus, custu est pagu ma seguru, Martins, chi a solu nd'at pesau (est arrannèsciu a ndi pesai, po ddu narai mellus puru) calincuna cosa cumenti a bintiduus gol, e duncas Alfredo Francisco Martins est stètiu su capocannonieri, po furai unu fueddu de s'italianu, de sa Lista A po su chi pertocat sa stagioni de su duamilla e binticuatru – duamilla e binticincu) calincuna cosa cumenti a bintiduus gol. Is de su Lanusè in domu cosa insoru, si potzu narai custu puru immoi chi nci seus, po si fai a cumprendi mellus de cumenti ddis funt andadas is cosas, ndi funt arrutus feti po una borta, est a nai in sa partida chi ant giogau (ddus arremonu torra!) contras a is cuartesus de su Sant'Aleni, ca in s'ùrtima parti de sa stagioni, est a narai me is partidas finalis, funt stètius sighius de un allenadori forti cumenti est Andrea Loi, e chi est stètiu bonu, tra is atras cosas, a binci puru sa partida chi is biancus-birdis iant giogau contras a is de s'Usinese, in sa primu bessida po su chi pertocat is play-off, cumenti seus costumaus a ddus tzerriai, a trassa de is ingresus etotu (a trassa de cumenti faint is ingresus etotu, cumenti si iat a podi narai, mellus puru). 

Si podit narai, puru, ca is de su Lanusè si funt agataus a su primu postu de sa lista puru candu est acabbadda sa lista de partidas chi ballint po s'andada, e duncas, ant atacau a curri po sa lista de is partidas chi balliant po sa torrada cun su primu postu in busciaca, cun totu su de bonu ca custa cosa cumportat, ca cumenti mi narant, mi scoviant is allenadoris fatu fatu, est sèmpiri mellus a essi a su primu postu e no a depi cassai is scuadras de is aversàrius, est a nai a essi a is pabas de is primus de sa classi. 

E candu is de su Lanusè no funt arrannèscius a binci is partidas, cumenti s'apu giai arremonau in custu artìculu etotu, est stètiu po crupa de is giogadoris strupiaus, o ingotus, chi teniant e chi no ndi podiant cabai in campu, mi parit bastanti craru. 
Ma is de s'assòtziu, est a nai su presidenti impari a totus is dirigentis, in su mercau chi s'oberrit in su mesi de Idas funt stètius bonus a cuncodrai mellus sa scuadra chi, a sa fini, at torrau a curri a forti. E po is aversàrius, cumenti si narat, funt abarradas feti is pimpirillas.





Attività realizzata col contributo della Regione Sardegna. IMPRENTAS 2024-2025. LR 22/2018 art. 22