Me is campionaus no nc'est feti sa cursa po ndi cassai su primu postu: cumenti incumentzant is partidas de sa torrada s'alluit sa batalla po ndi cassai sa sarvesa puru

E duncas, atacu a scriri custas rigas candu ammancant duas diis ainnantis chi nd'arribit su giòbia, chi est sa dì, cumenti scieis beni, innoi ndi bessint aforas is Novas de su Diàriu Sportivu, cumenti seus costumaus a ddas tzerriai, e chi funt, duncas, is artìculus chi ndi pesu in su sardu chi si fueddat, a su mancu, innoi in su Campidanu de mesu, e mescamente, in Bidd'e Sorris, chi est sa bidda innoi seu stètiu pesau, e innoi ancora m'agatu a pasci (cumenti si iat a podi narai po brullai unu pagheddeddu), apustis de corantacincu annus. 

E duncas, megamu a si narai, atacu a scriri custas rigas mancai su trabballu po su chi pertocat sa dì de oi (est a narai de su martis, si ddu arrapitu torra, isperendi ca no si dispraxiat tropu), e po su chi mi pertocat, duncas, est giai giai acabbau: depu feti abertai ca si fetzant is ses de su merì, e intzandus apa a depi (apa a podi, chi si praxit de prus cumenti sonat mancai diaici) intendi, a su telefunu, est craru, Mariano Ruggiero, chi est s'allenadori de is de su Deximeputzu, chi currint in su campionau de sa Primu Categoria, in sa Lista A (po essi prus pretzisus puru, pretzisus cumenti iat a depi unu giornalista, sèmpiri chi bollit fai beni su trabballu cosa sua); e de su restu, si nd'apu chistionau meda, ma meda bortas (ma ddu torru a fai oi puru, ca cumenti narànt is latinus, su de torrai a arrapiti is cosas, fatu fatu agiudat a ddas cumprendi mellus, agiudat a si ddas prantai beni in conca, diaici no si dda scaresceus prus), cun su giàssu de su Diàriu Sportivu (e duncas, eia, impari a is collegas cosa mia chi, pròpriu impari a mei, trabballant in su giàssu) sigheus totus is campionaus chi nci funt, chi si giogant innoi in s'isula stimmada cosa nosta, e megu a chistionai, peròu, e mi parit bastanti craru (ma mancai nci funt personas chi nd'arribbant oi po sa primu borta in su giàssu cosa nosta, e mancai no sciint cumenti andant is cosas, e duncas, ddu torru a arrapiti), de is campionaus chi is de sa Federatzioni Italiana de su Giogu de su Càlciu, impari a is de sa Lega Natzionali de is Diletantis, ndi pesant po is diletantis, est a narai, duncas, po totus cussas personas chi tenint su prexei de curri avatu de una bòcia, po totus cussas personas chi tenint su prexei de fai parti de una scuadra de càlciu, mancai, peròu, no ddu fetzant po trabballu (cumenti sucedit, e biaus issu, s'ant a megai medas personas tra cussas chi ligint cust'artìculu, a is grandus campionis chi currint me is grandus scuadras de sa Sèrie A, fadendi su contu ca benint pagaus una bella barca de dinai, po su chi faint, est a narai, po s'allenai, mancai duas bortas a sa dì, e apustis, po giogai totus is partidas chi ddoi funt in unu annu, e is partidas no funt pagus de seguru, fadendi su contu ca nci funt is giogus de su campionau e cussus puru chi pertocant is copas, po ddu narai diaici, chi cumprendeis su chi seu circhendi de si narai. E duncas, chi fessit po is giogadoris, e mescamente po is tifosus chi sighint is partidas a sa televisioni, a trassa de babbu miu etotu, chi est de una vida chi abarrat apicigau a sa televisioni a castiai partidas de bòcia, nci iant a essi partidas dònnia dì de sa cida, e a dònnia ora. Chi est su chi est sucedendi, de su restu, e mescamente me custus ùrtimus annus, innoi is partidas ddas donant, po ddu narai a sa sorresa, a sa televisioni etotu). 

E duncas, eia, custu bollit narai, intzandus, ca is diletantis depint sighiri po primu cosa su trabballu cosa insoru (chi no est su de giogai a bòcia, e nemmancu su de allenai, po su chi pertocat is allenadoris) e apustis podint pentzai, cumenti mi parit bastanti craru, a su spàssiu, a su sprèviu: ca unu diletanti, cumenti est berus, cumenti s'arrapitu fatu fatu, ndi cabat in campu po si ndi scaresci, a su mancu po cussa ora e mesu de giogus, de totus is trumentus, de totus is arroris chi si ndi podint arribbai apitzus in custa vida, e no feti po su chi pertocat su trabballu, e si cumprendit. 
E duncas, eia, seu fadendi totu custu stracòsciu de strollichiminis, po si acabbai de contai ca, eia, a is ses apa depi intendi (chi su Cielu at a bolli, est craru, ca mancai mi morru in custas mes'oras ca ammancant po nci lompi a is ses. E megu a brullai! E si cumprendit puru, berus est?) Mariano Ruggiero, ca de trabballu fait su muradori, su maistu de muru, cumenti si iat a podi narai, puru, a trassa de cumenti narant is bècius, est a narai, duncas, a trassa de cumenti si narat me is tempus passaus, me is tempus antigus. 
E duncas, eia, fadendi su contu ca Ruggiero fait su trabballu chi fait (e chi no benit a essi ligeru de seguru, tra is atras cosas), intzandus m'at domandau su prexeri de ddu podi abertai fintzas a candu no scapat de su trabballu, poita ainnantis de scapai no arrannèscit a agatai nemmancu mesu segundu po podi ciaciarrai impari a mei de bòcias e de resultaus de partidas, mancai ddi fetzat prexei (e meda puru, ndi seu seguru), e mancai is cosas a is de su Deximeputzu ddis siant andendi beni meda. 

E duncas, chi fessit stètiu po mei, a cust'ora femu stètiu giai a mi fai sa passillada chi mi fatzu dònnia, dònnia dì apustis chi serru cun is fainas acapiadas a su trabballu cosa mia, chi est una de is cosas chi mi praxit a fai de prus (e seu chistionendi de sa passillada, si cumprendit berus est?), poita mi limpiat sa conca (ddi naru diaici, gioghendi fortzis a fai su poeta, prus ca su giornalista), poita m'apaxiat, cumenti si iat a podi narai, puru; ma fadendi su contu ca est de ariseu (chi fiat lunis, e chi fiat su dexennoi de su mesi de gennàrgiu, po benni a essi prus crarus puru) chi est fadendi tempus mau meda, cun totus is scolas serradas, e is campusantus puru, e is parcus, e is campus innoi si giogant is partidas abarrant serraus puru, a segunda de sa zona, a segunda de sa bidda, e fadendi su contu ca abarrat totu proi proi (cumenti naràt sa bon'anima de mamma mia, a su mancu, e mi praxit, e meda puru, e de su restu ddu scieis giai, candu mi torrant a benni in conca totus is fueddus chi manigiàt issa e, pruschetotu, su modu chi teniàt de narai is cosas), e fadendi su contu ca intendu frius e fadendi su contu ca no tèngiu gana de mi sciundi, intzandus apu decìdiu (e si potzu narai ca est una cosa chi no sucedit fatu fatu, antzis, est una cosa chi no sucedit giai mai, chi pròpriu si depu narai sa beridadi, mancu candu seu mesu apuntorau, o candu no mi intendu beni) ca po oi, a su mancu po custu megama, sa passilada dda apu lassai po fata. 
E a narai sa beridadi, po torrai a sa chistioni de su tempus chi est fadendi (e chi est una de cussas legas chi pigu in consideru ainnantis de atacai, de incumentzai a si chistionai de resultaus e de partidas e de su giogu de sa bòcia, chi est sa lega de importu prus mannu po is artìculus chi ndi bessint aforas po custu giassu, e gei ddu eis a cumprendi beni a solus), est de cenabara passau (chi fiat su sexi, e duncas, eia, fiat sa noti innoi s'alluint is fogus po sa festa de sant'Antoni de su fogu) chi est fadendi frius e tempus mau, e est pruendi e meda puru, ma cumenti ddi naraus fatu fatu, s'acua serbit (mescamente in una regioni, in una isula cumenti a sa nosta, innoi fait, mancai, mesis e mesis e mesis de sighiu innoi no nd'arruit nemmancu unu mesu stìddiu de acua, e duncas, eia, cumenti narant in Bosa, a su mancu, sighendi su dìciu: candu proit tocat a ddu lassai fai, isperendi ca no fetzat dannus). 
E duncas, eia, megamu a si narai ca est de una bella pariga de diis de sighiu chi est proendi a forti, e is dannus e is disastrus no ammancant de seguru, de su chi podeus ligi me is giornalis, e de cussu chi podeus intendi a sa televisioni, e immoi tocat feti a isperai ca nesciunu si morrat (o si morgiat, cumenti si iat a podi narai, puru, e cumenti apu sèmpiri intèndiu narai, a su mancu innoi in Bidd'e Sorris etotu, e cumenti si podit narai, pighendi po bonu su chi apu agatau in su fueddàriu). 
Po immoi, duncas, is arroris pertocant is matas: eia, nci funt stètias una biga de matas, e matas mannas puru, chi funt stètias sciusciadas a terra po crupa de su bentu forti, e chi mancai, funt arrutas apitzus de is machinas puru, ma po immoi nesciunu s'est ingotu. 
Apu lìgiu, feti, de unu pastori chi no s'agatat me is sartus chi ddoi funt in sa zona de Biddamanna Strisaili, e de atrus duus pastoris, acanta de Orthullè, ca funt stètius sarvaus, pròpriu me in custas ùrtimas oras de su noti, poita no arrannèsciant a furriai a domu cosa insoru, fadendi su contu ca is bias funt totu acua e ludu, e no si podit passai, mescamente me is zonas acanta de is arrius. 

E duncas, eia, su tempus malu est ghetendu a pari totu s'isula (e mescamente sa zona de s'Ollastra, e fintzas innoi in su Campidanu de mesu) ma de su chi narant is previsionis, a su mancu, de cras is cosas iant a depi essi unu pagheddeddu prus bonas, chi est cussu chi s'auguraus, chi isperaus unu pagheddu totus, berus est? 
E duncas, torrendi a mei, custu bollit narai ca sa passilada, mancai, mi dda apa a fai torra cras, e po oi, mancai, apa a abarrai a trabballai, innoi aranti de su computer etotu, po un'antra orixedda, isperendi, mancai, de tenni unu pagheddeddu de tempus scàpiu de su trabballu giai a partiri de su megama de cras. Ma eus a biri cumenti ant a andai is cosas. 

E duncas, eia, po serrai sa chistioni, proendi giai est proendi e bentu forti giai est fadendindi, mancai m'abertammu de biri cosas peus puru, a su mancu in sa zona cosa mia (e custu bollit narai ca in sa zona cosa mia, e duncas, in Bidd'e Sorris, a custu giru puru seus stètius basaus de sa bona sorti, fadendi su contu ca, a su mancu fintzas a oi, no nci funt stètius dannus). 
E duncas, totu custu, si ddu torru a arrapiti, ddu seu boghendi a foras po chistionai de su tempus (malu meda) chi est fadendi. 

E immoi chi nci seu, immoi chi si seu chistionendi de su tempus mau, acudu puru a si narai ca is scuadras de sa Promotzioni ndi depiant cabai in campu torra cras etotu, chi at a essi (po essi prus crarus puru) su bintunu, e duncas, eia, de mercuis, po giogai sa de tres giorronadas de partidas po su chi pertocat sa lista de sa torrada (est craru), ma a sa fini no si nd'at a fai nudda, poita is de sa Federatzioni, impari a is de sa Lega Natzionali de is Diletantis, ant decìdiu de lassai is cosas cumenti funt (cumenti seu fadendi deu cun sa passillada cosa mia), fadendi su contu ca at a sighiri a nc'essi tempus malu e fadendi su contu, pruschetotu, ca in medas logus, in medas biddas is campus innoi si giogant is partidas funt abarraus serraus, ballit po ariseu (ca fiat lunis, e si ddu torru a arrapiti) e ballit po oi puru, ca est martis (e chi est sa dì innoi apu atacau a scriri custu artìculu, mancai nd'at a bessiri aforas feti in sa dì de su giòbia, cumenti seu costumau a fai po is artìculus chi pertocant is Novas).
 E duncas, eia, e si cumprendit beni, s'arriscu prus mannu fiat cussu de fai perdi su tempus a sa genti, a is giogadoris e a is allenadoris, po incumentzai, ca mancai si depiant fai chilometrus e chilometrus (aintru de sa cida, cun totu su chi cumportat po su trabballu. Ca a bortas, candu nci funt partidas aintru de sa cida, e cust'annu est sucèdiu feti po un'atra borta, in su mesi de cabudanni, is giogadoris depint domandai ferias, si depint pigai una dì de feria de su trabballu, po su chi fia narendi ainnantis apitzus de su mundu de is diletantis, candu nci dda faint, poita desinò, e mi parit craru craru, no podint andai a giogai) po lompi a giogai sa partida in domu allena, in una bidda allena, po scoberri, mancai a s'ùrtimu segundu, ca sa partida no podit nemmancu incumentzai poita, mancai, su campus est postu mabi e no nci funt is cunditzionis (cumenti si iat a podi narai) po giogai sa partida, ca a bortas is campus funt postus diaici mabi, po crupa mescamente de s'acua chi nd'arruit, ca sa bòcia nemmancu currit, est a narai, duncas, ca s'afoxiat (po ddu narai a trassa de is sorresus; fadendi su contu ca innoi in Bidd'e Sorris una de is fainas de importu prus mannu, unu de is trabballus de importu prus mannu chi nci funt de sighiri est cussu acapiaus a sa canciofa, e duncas, eia, a su trabballu me is sartus; e si cumprendit, candu proit meda, pròpriu cumenti est fadendi in custas ùrtimas oras, in custas ùrtimas diis, intzandus no nci podis nemmancu brintai, aintru de su campu, poita nc'afoxas). 

E duncas, eia, is partidas chi si depiant giogai (chi si iant a essi depias giogai, po ddu narai mellus puru, cun totus is verbus cuncodraus in gràtzia de Deus) su bintunu de su mesi de gennàrgiu s'ant a torrai a recuperai (cumenti si iat a podi narai, a trassa de cumenti si narat in italianu etotu) su dexiotu de su mesi de friàrgiu, est a narai su mesi chi at a benni (chi su Cielu at a bolli custu beni po mei, e po bosatrus puru, est craru), e su dexiotu de su mesi de friargiu at a essi de mercuis, e at a essi, in prus, sa dì innoi at a torrai a incumentzai sa caresima, ma de custa cosa, mancai, nd'eus a chistionai mellus in su benidori, fadendi su contu ca su carrasciali est incumentzau feti custu cenabara passau, e deu seu innoi, giai, a si chistionai de sa caresima. 

E duncas, m'eis a iscusai chi mi seu strollicau prus de su tanti, chistionendusì de su tempus malu chi est fadendi, chi at fatu, in custas ùrtima oras, in custas ùrtimas diis, e po immoi, nareus diaici, no m'abarrat atru de fai ca si chistionai de su tempus chi est sighendi a curri, chi est sighendu a passai, po mei e po bosatrus puru. 

Arriendi e brullendi (sa primu dì de s'annu, mi parit de podi narai custu puru, parit ariseu, chi mi permiteis de fai custu giogu cun is fueddus) seus arribbaus a is ùrtimus undixi diis po su chi pertocat su mesi de gennàrgiu puru, chi est bellu cantu tostau de scroxai, ddi naru diaici, a su mancu po su chi mi pertocat, ma tèngu, in dì de oi a su mancu, su coru prenu fintzas a cucuru de isperas bonas, e si ia fintzas a podi narai ca, eia, creu ca nci dda apa a fai, po custu duamilla e bintises puru, a nci lompi a su mesi de friargiu. Chi su Cielu at a bolli custu beni po mei, a su mancu. E s'at a parri una mesu brulla, custa cosa chi fatzu (chi fatzu giai dònnia cida, chi fatzu giai in dònnia artìculu) de abarrai innoi a torrai gràtzias a su Cielu po dònnia dì chi arrannèsciu a mi bivi chentza de ndi tenni dannus o arroris mannus. Ca ddu scieis, deu pentzu, cumenti andant is cosas: oi ses sanu cumenti a unu pisci, ma bastat unu mesu segundu, bastat a ponni mabi su pei innoi ses caminendi, nc'arruis a faci in terra e t'agatas bellu ca stèrriu in su letu de unu uspidali. 
Ca po medas de bosatrus, ddu sciu, mancai, deu seu fadendi is cosas prus grais de su chi funt, ma immoi si ddu naru (est de una pariga de cidas chi si ndi ia a bolli chistionai, mancai acoitu, chentza de si fai perdi totu su tempus chi mancai nemmancu teneis de nci fuiai, cumenti mi parit giustu de su restu): in su mesi de idas, una pariga de diis ainnantis a su Nadali, fia in Casteddu po fai, po ndi pesai is ùrtimas cumissionis (cumenti si ia a podi narai, o cumessionis, cumenti mi consillat de scriri su fueddariu, diaici nd'aprofitu, nd'aprofitaus po fai unu pagheddeddu de grammatica puru, ca mabi no fait de seguru, po serrai sa chistioni cun una rima, ca nci stait sèmpiri beni) e, no nc'eis nemmancu a crei, provai, chi seis bonus, a intzertai su chi mi fiat sucedendi: e duncas, eia, in s'interis chi fia attraversendi sa bia (si iat a podi fintzas manigiai su fueddu "tressai", cumenti apu agatau in su fueddariu e cumenti mi naràt, de su restu, sa bon'anima de mamma mia), e duncas, in s'interis chi fia tressendi sa bia, apitzus de cussas chi, a trassa de s'italianu etotu, podues tzerriai "striscias pedonalis" (e chi est sa zona de sa bia innoi podint, e iant a depi passai is personas chi andant a pei, chi camminant a pei) mi fiant po strecai. 
E de su restu, eia, s'acudu a narai custu puru, me is giornalis fatu fatu ligeus is novas chi pertocant calincunu (o calincuna, ballit aguali) chi est stètiu strecau de una machina, mancai chentza de ndi tenni sa crupa. E sa pròpriu cosa, intzandus, fiat sucedendi a mei: ddoi fiat una picioca chi, mancai, mi parit de podi narai custu puru, fiat pentzendi a cras (cumenti arrapitit fatu fatu babbu miu, e mescamente candu guidat sa machina e murrungiat po cumenti guidant is atrus), o fiat pentzendi a is cosas sua (cumenti mi parit giustu puru, ca ammancànt feti una parighedda de diis po nci lompi a su Nadali, e duncas, eia, est craru ca sa genti tengiat sa conca prena de pentzamentus acapiaus a totus is cosas chi nci funt de comperai, e de sighiri), e duncas, in s'interis chi deu fia tressendi sa bia (o atressendi, si iat a podi narai, e scriri, diaici puru), issa fiat castiendi totu de un'antra parti, cun sa machina frima, e deu pentzammu chi mi essit biu, e invècias cumenti fia aranti de sa machina cosa sua etotu, intzertai ita at fatu: at postu sa primu marcia, ddi naru diaici, e fiat torrendi a partiri, e m'est atumbada apitzus, cun cofanu etotu, e deu fia giai giai apitzus de su cofanu cosa sua e issa sighiat a no si nd'acatai de nudda. E apu acutu a pentzai: labai labai, oi mi funt strechendi e dda acabbu stèrriu in unu letu de unu uspidali pròpriu immoi ca ammancant feti una pariga de diis a su Nadali. 
E mancu mali ca a sa fini, pròpriu candu fia po mi nci crocai asuta de is arrodas de sa machina, cussa pobera picioca si nd'est acatada de su chi fiat fadendi, de su chi fiat cumbinendi (e gràtzias a su Cielu, m'acudu a ddu narai) e at frimau sa machina e est abarrada cun sa buca oberta, a trassa de pisci (chi mi permiteis de fai custa batuda, o custa botada, po manigiai unu fueddu chi apu sèmpiri intèndiu narai de mamma mia), poita giai giai no nci crediat nemmancu issa de su chi fiat sucedendi. 
E in s'interis ca fiant po mi strecai in mesu in mesu a sa bia, ddoi fiant duas guardias, duus vigilis (po ddu narai a trassa de cumenti si narat in italianu etotu) ca fiant in cussa zona etotu; e duncas, s'ùnica cosa chi apu potziu narai a cussa pobera picioca est stètiu: toca baidindi prestu de innoi ca oi t'arrestant puru chi no fais atentzioni a su chi ses fadendi. 

E duncas, eia, cumprendeis immoi poita si naru ca po dda acabbai a s'uspidali bastat pagu meda? E po cussu, duncas, ca torru gràtzias dònnia, dònnia dì a su Cielu po essi in saludi, e chentza tropus daboris. 

E po custa cida puru, deu creu de podi narai custu, a su mancu, apu spaciau cun is contus, is contixeddus e is strollichiminis chi tèngiu badda badda in conca, e si nci podeus fuiai a fundu 'e susu me is chistionis chi pertocant is campionaus, sèmpiri chi seis de acòrdiu cun mei (ma deu creu ca nci siat su tanti po pentzai ca calincunu de bosatrus siat narendu, puru: e fiat ora! E mancu mali ca po custa cida puru dda as acabbada de si fai sa conca a acua, cumenti si iat a podi narai e cumenti mi naràt, torra, sa bon'anima de mamma mia. Ca una de is cosas prus togas chi mi podiant sucediri in custa vida est cussa de dda intendi acanta de mei etotu, in s'interis chi trabballu, e chi scriu in sardu). 

E duncas, arribbau chi seu, a custu puntu de s'artìculu, deu creu ca siat arribbada s'ora (e mancu mali, s'at a acudi a narai calincunu de bosatrus) de si chistionai unu pagheddeddu (ma unu pagheddeddu feti, ca desinò su de chistionai tropu de càlciu si iat a podi fai dannu a sa conca, e a sa brenti, e seu brullendi, est craru, si cumprendit, berus est?) de cumenti funt andendi is cosas po su chi pertocat is de su Tonara, ca cumenti eis a sciri (e chi no ddu scieis, o no si ddu arregodais, intzandus deu seu innoi po fai custu trabballu puru), currint in su campionau de sa Promotzioni, e po essi prus pretzisus puru, si depu narai ca currint in sa Lista A. 

E duncas, po incumentzai, podeus andai a castiai cumenti funt cuncodradas is cosas po su chi pertocat sa lista, cun is de sa Villacidrese (sa scuadra chi nd'ant pesau in Biddacidru, giai de una bella pariga de annus, e manigiu su fueddu "pariga" a sa sarda, fadendi su contu, de su restu, ca is de sa Villacidrese, chi funt sighius de su presidenti de s'assòtziu, Mateu Marrocu, funt una de is scuadras cun sa storia prus manna a is pabas tra totus cussas chi ddoi funt, in dì de oi, in sa zona de su Campidanu de mesu) chi s'agatant a su primu postu de sa lista (e tocat a narai, e fait a narai, puru, ca funt currendi a totu coddu, fadendi su contu, e a fai su contu nci poneus pagu meda, ca funt stètius bonus a ndi cassai, a ndi pesai calincuna cosa cumenti a noi partidas bintas totu de sighiu, est a narai, una avatu de s'atra, partendi de su tres a zeru chi iant scutu a faci de is de su Gùspini, in sa partida de su sexi de su mesi de donniasantu, e fintzas a arribbai a su duus a zeru, tundu tundu, chi nd'est arribbau pròpriu domìnigu passau, in sa partida chi is cidresus ant giogau in domu cosa insoru etotu, contras a is de su Vecchio Borgo Sant'Elia) cun corantacincu puntus in buciaca, e chi funt duus in prus (duus feti, eia) de is chi tenint is de su Terraba Frantziscu Bellu, chi in dì de oi, apustis de dexennoi partidas fatas, tenint corantatres puntus allogaus a su callenti in buciaca, e chi funt su pròpriu tanti de puntus de is chi tenint is de su Gùspini etotu, chi eus arremonau pròpriu immubagora; ma tocat a narai, puru, ca is de su Gùspini tenint una partida in mancu (est a narai, duncas, ca depint giogai ancora sa partida contras a is casteddaius de su Vecchio Borgo Sant'Elia, chi est sartada (chi no s'est potzia giogai, po ddu narai diaici puru, ca fortzis sonat mellus puru) su dexi de su mesi de gennàrgiu po crupa de su tempus malu (e no si podit narai, custu est pagu ma seguru, ca in custas primus binti diis de s'annu no apat fatu tempus malu, su Cielu s'agiudit a ndi bessiri aforas chentza tropu dannus). 
Cun corantaduus puntus, invècias, agataus is de su Castiadas, ca po unu bellu arrogheddu de tempus, po unu bellu tanti de giorronadas s'agatànt a su primu postu de sa lista, ma immoi invècias, cun una partida pèrdia e cun ses partidas chi si funt serradas cun su resultau siddau in paridadi, ndi funt lisciaus (cumenti si iat a podi narai, a trassa de cumenti si narat in italianu etotu) a su de cuatru postus in sa lista. 
E fadendi su contu ca is de su Ceraxius, chi s'agatant a su de cincu postus in sa lista, tenint calincuna cosa cumenti a dexiotu puntus in mancu de is chi tenint is de sa Villacidrese (e no funt pagus de seguru) intzandus si iat a podi narai ca, a su mancu po cumenti funt postas is cosas in dì de oi, sa chistioni acapiada a sa batalla po su primu postu (e po sa bìncida de su campionau) pertocat feti cuatrus scuadras; e naraus "feti" poita is scuadras in totu funt dexiotu, ma si iant a podi fai is contus de cumenti funt andendi is cosas in sa Lista B, sèmpiri po su chi pertocat su campionau de sa Promotzioni, innoi a su primu postu ddoi funt is de s'Alighera, sighius de un allenadori de importu, bravu e cun unu bellu tanti de esperièntzia a is pabas, cumenti est Mauru Giorico, chi funt arrannèscius a binci dexennoi partidas apitzus de dexennoi bessidas, e duncas, is de s'Alighera funt currendi no feti po ndi cassai s'artziada in su campionau de s'Ecellenza (e parit ca no ant a tenni strobbus, a su mancu, diaici si parit chi fadeus su contu de cumenti funt andadas is cosas me is partidas chi ballint po sa lista de s'andada, e fadendi su contu ca, me is partidas chi ballint po sa lista de sa torrada, is de s'Alighera funt sighendi a binci e duncas, funt lassendi feti is pimpirillas, cumenti si iat a podi narai a trassa de cumenti si narat in italianu etotu, a is scuadras de is aversàrius). 
E duncas, eia, megamu a si narai ca chi fadeus su contu de cumenti funt andendi is cosas in sa Lista B de su campionau de sa Promotzioni, po su chi pertocat sa Lista A su spàssiu benit a essi meda ma meda prus mannu, e seu chistionendi no feti de su spàssiu chi ndi tenint is piciocus chi ndi cabant in campu po giogai is partidas, e duncas, eia, seu chistionendi, est craru, de is giogadoris, e chentza de si ndi scaresci de is allenadoris, ma megamu a si narai ca a sa fini nc'est spàssiu mannu puru po is tifosus, e si cumprendit; candu nci funt una pariga de scuadras chi currint, e chi batallant, po su primu postu, intzandus is cosas benint a essi meda ma meda prus spassiosas de sighiri, chi cumprendeis su chi seu circhendi de si narai. 
E duncas, eia, cumenti eis a sciri, in unu campionau de bòcia no nc'est feti sa batalla po ndi cassai is primus postus de sa lista, fadendi su contu (diaici si torru a arregodai cumenti funztionant is cosas, e megu a chistionai de is regulas) ca sa scuadra chi nd'at a cassai (sa scuadra chi nc'at a arrannèsci a cassai su primu postu de sa lista) nd'at a artziai dereta dereta in su campionau de s'Ecellenza, e invècias is cuatru scuadras chi ant a acabbai sa cursa a is pabas de sa primu de sa classi (e seu chistionendi, mi parit bastanti craru, de is scuadras chi ant a serrai is giogus a su segundu postu de sa lista, a su de tres e a su de cuatru postus de sa lista puru) ant a sighiri is giogus po cussas chi tzerriaus partidas finalis (e chi seus costumaus a tzerriai, a trassa de cumenti faint is ingresus etotu, play-off): e duncas, in dì de oi is scuadras chi tenint is cartas prus bonas po ndi cassai is play-off funt is de su Guspini, is de su Terraba Frantziscu Bellu, is de su Castiadas e fintzas a arribbai a is de su Ceraxius, chi s'apu giai arremonau, de su restu). 
Ma in unu campionau, megamu a si narai, no nc'est feti sa batalla, sa cursa po ndi cassai s'artziada de categoria (po chini bincit, est craru), ma nc'est puru sa cursa e sa batalla po ndi cassai sa sarvesa (cumenti seus costumaus a ddi narai), est a nai, sa possibbilidadi de curri in su campionau de sa Promotzioni (po abarrai apicaus a sa categoria chi apu decìdiu de pigai cumenti a lega po s'artìculu de oi) po s'annu, po sa stagioni chi at a benni puru. E duncas, a fai is contus nci poneus pagu meda, a s'ùrtimu postu de sa lista agataus is de s'Ovodda, chi in dì de oi funt sighius, e funt trabballendi, impari a Sandru Crisci, chi nd'at pigau su postu de Moro, chi est stètiu s'allenadori chi ddoi fiat a s'incumintzu de sa stagioni (a narai sa beridadi, Moro fiat arrannèsciu a ndi cassai sa sarvesa, sèmpiri impari cun is de s'Ovodda, in su campionau de s'annu passau), ma chi no est arribbau a papai su panetoni (cumenti si narat); est a narai a est stètiu bogau de sa scuadra una pariga de cidas ainnantis chi nd'arribessit su Nadali. 
Is de s'Ovodda, duncas, tenint in buciaca calincuna cosa cumenti a doxi puntus, e s'agatant a is pabas de is de sa Frecia Parte Montis, sighius de Giancarlu Boi, chi tenint unu puntu in prus, feti, de is chi tenint is de s'Ovodda. Cun sexi puntus in buciaca (e cun duas scuadras a is pabas) agataus duncas is de su Tonara, chi s'apu arramonau ainnantis etotu in custu artìculu, cun sexi puntus, chi funt duus in mancu de is chi tenint is de su Pirri. E serraus is contus chi pertocant is partis prus bascias de sa lista cun is de sa Baunese, ca tenint binti puntus in totu in buciaca e cuatru scuadras a is pabas. 
E duncas, chi is giogus depessint acabbai oi (e invècias, a su mancu po su chi pertocat su campionau de sa Promotzioni, s'ant a serrai feti su bintises de su mesi de Abrili, e duncas, a fai is contus, nci funt ancora tres mesis prenus prenus, prenus fintzas a cucuru, cumenti si iat a podi narai, de partidas, dònnia dònnia fini de cida, chentza de ndi sartai nemmancu unu. E tocat a fai su contu, immoi chi nci seus, ca is scuadras de sa Promotzioni nd'ant a cabai in campu puru su sabudu de sa cida santa, est a narai, duncas, eia, su sabudu ainnantis de sa Pasca Manna), is de s'Ovodda, is de sa Frecia Parte Montis e is de su Tonara ndi iant a depi cabai torra in su campionau de sa Primu Categoria, e invècias a is de su Pirri e a is de sa Baunese iat a tocai a giogai is ùrtimas duas partidas (is partidas finalis po ndi cassai sa sarvesa, chi tzerriaus, a trassa de cumenti faint is ingresus etotu, play-off), apustis chi s'at a serrai sa stagioni regolari, dda tzerriaus diaici. 
Ma cumenti s'apu narau, fadendi su contu ca nci funt ancora tres mesis de partidas (ddi naru diaici, isperendi ca si cumprendat su chi seu circhendi de si contai), podit sucedi de totu, siat po su chi pertocat sa cursa po su primu postu e siat po su chi pertocat sa batalla po ndi cassai sa sarvesa. 

E duncas, fadendi su contu de totu su chi s'apu contau fintzas a immoi, eia, podeus narai ca tra totus is scuadras chi funt currendi po ndi cassai sa sarvesa, agataus puru is de su Tonara, chi funt sighius de un allenadori giòvuneddu, ma bravu meda, cumenti est Andrea Pia. 
E pròpriu cun Pia apu tentu su prexeri, e duncas s'ocasioni, de ciaciarrai unu pagheddeddu a su telefunu, po cumprendi, po sciri de issu (e chini mellus de un allenadori podit sciri cumenti funt andendi is cosas po su chi pertocat sa scuadra cosa sua?) cali funt is bideas cosa sua (e cussas de is piciocus cosa sua) po su chi pertocat is cuindixi partidas chi nci funt ancora de giogai. «Eus incumentzau sa stagioni de su duamilla e binticincu – duamilla e bintises cun su pei bonu, cumenti si iat a podi narai, fadendi su contu ca seus arrannèscius a ndi cassai dexi puntus me is primus cuindixi giorronadas, mancai tochit a narai, puru, ca eus pèrdiu sa primu partida de s'annu, sa primu partida de su campionau, cun su resultau de tres a unu, contras a una scuadra forti meda cumenti est, de su restu, du Terraba Frantziscu Bellu. Apustis seus stètius bonus a ndi cassai cuatru puntus, cun cuatru partidas chi si funt serradas cun su resultau in paridadi, me is cuatru bessidas chi eus giogau, cun s'ùnica partida chi eus pèrdiu chi est stètia cussa contras a is de su Castiadas, cun su resultau de unu a zeru, e tocat a narai, puru, po cumprendi mellus de ita seus chistionendi, ca is aversàrius cosa nosta nd'ant cassau su gol feti me is minudus finalis. Si potzu narai puru, intzandus, ca is partidas innoi si seus minescius de perdi, poita eus giogau mabi meda, funt stètias pagus, gràtzias a su Cielu. Apustis de nd'essi cassau custus cuatru puntixeddus, eus dèpiu bivi unu periodu ca no est stètiu bonu cumenti, invècias, bisastus; e in su contu tocat a nci ponni sa maba sorti, po incumentzai, e apustis tocat a fai su contu, puru, chi tenestus una biga de giogadoris strupiaius e ingotus, ca no ndi podiant cabai in campu po si donai una manu de agiudu. E in prus, medas giogadoris ant dèpiu fai is contus cun is scualificas chi nd'ant ingotu, chi nd'ant arregotu. No podeus narai, custu est pagu ma seguru, de essi stètius basaus de sa bona sorti, a su mancu po sa primu parti de sa stagioni, cumenti si iat a podi narai. Is cosas po su chi pertocat sa lista fiant incumintzendi a si fai mabas meda, e candu is cosas no andant beni, intzandus, benit a essi meda ma meda prus trabballosu su de si ndi torrai a strantaxai, poita sa conca de is piciocus, de is giogadoris, si prenit fintzas a cucuru de pentzamentus lègius, cumenti si iat a podi narai. Cumenti ndi funt sanaus is giogadoris chi fiant ingotus e strupiaus, ma peròu, is cosas funt andendi unu pagheddeddu mellus, e immoi podeus isperai totu su mellus, po nosu, po su chi pertocat su benidori. Immoi eus a circai de ndi cassai sa cantidadi prus manna de puntus, e su de essi arrannèscius a binci sa primu partida apustis de is festas po su Nadali e po s'annu nou s'at donau unu tzicheddu de afròddiu in prus po sighiri a curri e a cumbati po ndi cassai sa sarvesa». 




Attività realizzata col contributo della Regione Sardegna. IMPRENTAS 2025-2026. LR 22/2018 art. 22