Binci is partidas agiudat a curri prus a forti: candu sa conca fait sa diferèntzia

Seus arribbaus, giai giai, a sa metadi de su mesi de Donniasantu puru (sèmpiri chi su calendàriu no est contendumì brullas) e fadendi su contu, cumenti s'apu giai arremonau me in s'artìculus chi nd'est bessiu a pillu sa cida passada, su de s'undixi mesis in s'annu est unu de is prus tostaus (a su mancu po mei, est craru), e dònnia, dònnia annu, candu arribbu a custu puntu (de sa storia, si iat a podi narai, puru, brullendi e gioghendi a fai unu pagheddeddu, ma unu pagheddeddu feti, su poeta) mi parit cumenti chi seu atziendinci apitzus a unu monti, de cussus atus meda, po si cumprendi, po cussa ca in italianu si iat a podi tzerriai "scalata", e in sardu, duncas, su fueddu si iat a podi furriai (sighendi su chi nc'est scritu, a su mancu, in su fueddariu pesau de Antoninu Rubattu, "Su fueddariu universali de sa lingua sarda" diaici si tzerriat, cun su fueddu "iscalada"); e custu, feti, po si fai cumprendi cumenti mi intendu. 

E si iat a podi narai, duncas, ca po sa metadi (po una bona metadi, po ddu narai a trassa de s'italianu etotu) su trabballu chi pertocat su mesi de Donniasantu est giai bellu ca fatu, e de custu seu prexau meda, e immoi no s'abarrat atru de fai (est prus facili a ddu narai chi a ddu fai, gei si cumprendit cumenti andant is cosas in custa vida) ca si nci fuiai a fundu 'e susu (cumenti apu sèmpiri intèndiu narai innoi in Bidd'e Sorris) in sa segunda parti, chi est s'ùrtima, puru, de custu mesi, e apustis at a brintai (sèmpiri chi su Cielu bollit custu beni po mei e po bosatrus, est craru) su mesi de Idas, chi est cussu prus druci de totus, at a essi, feti, mancai, po totus is festas chi ddoi funt, partendi de cussa chi nd'arruit su otu de su mesi de Idas, chi tra is atras cosas at a essi de domìnigu, e duncas dì de partidas. E su mesi de Idas, tra is atras cosas, at a incumentzai pròpriu de dominigu, e custu bollit narai ca nc'at a essi su tanti po si spassiai po beni (e sa cosa ballit siat po is piciocus, chi a sa fini funt cussus chi ndi cabant in campu po curri avatu de sa bòcia, ma sa cosa ballit, puru, est craru, po totus is allenadoris de is assòtzius de bòcia, e ballit, puru, e nci iat a mancai atru, po totus is tifosus chi, a sa fini, andant a su campu po sighiri is isfidas. E si iat a podi narai, puru, ca is tifosus, pròpriu issus, funt su coru de custu giogu), fadendi su contu ca in s'ùrtimu mesi de s'annu s'ant a giogai cuatru giorronadas: su primu (si ddu apu arremonau immubagora), s'otu (arremonau immubagora torra), su cuindixi e su bintiduus, ca at essi sa giorronada fortzis prus druci, fadendi su contu chi nd'arribbat pròpriu ainnantis de su Nadali, e mi intendu giai giai a trassa de notzenteddu (po manigiai unu fueddu chi apu sèmpiri intèndiu innoi in bidda mia), po custa cosa chi seu abertendi su mesi de Idas, a trassa de macu, mancai nci siant de si scroxai (ddi nau diaici) ancora dexesseti diis, e no funt pagus de seguru, ma deu isperu chi su tempus potzat sighiri a curri, a si ndi bobai, po ddu narai mellus puru, ma mi fait prexei su de mi dda bivi diaici, abellu abellu, dì po dì (e mi benint in conca is fueddus chi fatu fatu m'arregalant is allenadoris, candu si megant ca sa cosa mellus chi una scuadra de bòcia podit fai est cussa de pentzai a una partida a sa borta). 

E duncas, de su tempus chi est passendi si nd'apu chistionau po custa cida puru (est a nai, in s'artìculu de custa cida puru, po bolli essi prus pretzisus puru), e ddu pigu, unu pagheddeddu, cumenti chi fessat unu ritu: cun custa cosa de fai su contu de su tempus chi est passau, est cumenti (diaici mi praxit a dda pentzai, a su mancu, e ddu sciu ca po calincunu de bosatrus bèngiu a essi unu pagheddeddu machillotu, cumenti si iat a podi narai) chi torru gràtzias (e torru gràtzias de parti cosa de bosatrus puru, chi a sa fini seis cussus ca custus artìculus ddus ligint) a su Cielu po m'agatai ancora in peis, e in saludi; e no, mancai, totu sciasciau, totu apuntorau e, mancai, crocau a totu dì in unu letu de unu uspidali.

E duncas, mancu mali chi su tempus sighit a andai ainnantis; e apustis chi acabbu, po oi puru, cun is strollichiminis, e si domandu giai iscusa chi, mancai, si ndi seu furendi su tempus chi nemmancu teneis, estus a podi andai a castiai a ita puntu funt arribbaus is campionaus de is diletantis chi sigheus cun is amigus de su Diàriu Sportivu, partendi de sa Sèrie C, duncas, e fintzas a nd'arribbai a sa Segunda Categoria, e passendi, mi parit craru puru, de is campionaus de s'Ecellenza, de sa Promotzioni e de sa Primu Categoria puru. E duncas, si fia narendi, mancu mali chi su tempus sighiti a curri, mi megu a solu a solu, e mancu mali chi mi intendu beni, est a nai, duncas, chentza daboris e chentza de fastìdius, e mancu mali, pruschetotu, ca tèngiu unu trabballeddu de atendi, po oi puru, e chi mi permitit de mi guadangiai su tanti de arriabis chi mi serbint (chi mi bastant, ca sonat mellus puru) po abarrai in pitzus de custu mundu bellu e macu meda (bellu cantu est macu, si iat a podi narai diaici), impari a bosatrus, est craru. 

E duncas, ainnantis de mi nci ghetai a fundu 'e susu me is chistionis acapiadas a strintu cun su mundu de su càlciu sardu, ndi bogu aforas feti atrus duus strollichiminis (cumenti mi praxit a ddus tzerriai). 
Su primu pertocat (cumenti scieis beni) su tempus chi est fadendi, e custu puru benit a essi unu pagheddeddu unu ritu. Custa cida nci funt stètias diis bellas medas, e innoi in Sardìnnia, cun "dì bella" tzerriaus una de cussas diis prenas de sobi (mi benit de ddu narai diaici); est a nai, ca po nosu, una dì bella est cussa innoi ddoi funt a su mancu binti gradus. E su de bivi in un'isula cumenti a sa nosta, feti mancai po custa cosa de is temperaduras, artas medas, chi ddoi funt in s'atonzu, in s'ierru e in su beranu, iat a depi essi una fortuna manna meda. E poberus, mi megu a solu a solu, de totus cussus sardus, est a nai de totus cussas personas chi, mancai siant nàscias e crèscias in s'isula, si ndi funt dèpius andai o ant scerau de si ndi andai, chentza obbrigus ma po isceberu, est craru, a trabballai e a bivi a travessu, mancai in logus medas ma medas prus frius, cumenti iant a podi essi Londra, o sa Germania, o s'Olanda, o, andat beni aguali po sa chistioni, po sa lega chi apu pigau, cumenti iant a podi essi is regionis de su nord de s'Italia etotu, partendi de su Piemonte (e duncas sa citadi de Torinu) e fintzas a arribbai a Milano, chi abarrat (cumenti scieis beni, e nci iat a mancai puru) in Lombardia. 

E pròpriu s'annu passau apu tentu s'ocasioni de chistionai cun unu piciocheddu nàsciu e pàsciu in Tattari, ma chi a sa fini dda at acabbada a bivi in Londra: e mi fiat contendi (est sucèdiu me is diis ainnantis de su Nadali de s'annu passau etotu) ca in sa citadi, a is tres de su megama, ddoi fiant calincuna cosa cumenti a tres gradus asuta de su zeru, po su chi pertocat, est craru, is temperaduras. E a nci pentzai beni tèngiu unu amigu chi bivit, de una bella pariga de annus, a nai sa beridadi, in sa citadi de Milano, e ingunis puru su tempus no est pròpriu allirgu (po si imboddiai sa chistioni a trassa de poeta etotu), fadendi su contu ca su cielu est sèmpiri prenu de nuis bellas nieddas, e carrigas de acua, po no chistionai de su frius mau chi fait (e po unu chi est stètiu costumau a bivi in Sardìnnia, cun su tempus druci chi su Cielu s'arregallat po su prus de is diis, e de is mesis, deu creu ca su frius siat ancora prus mau, ancora prus lègiu, po ddu narai mancai diaici). 
E deu no cumprendu cumenti unu omini (ma sa cosa ballit puru, est craru, po is femineddas, e nci iat a mancai atru) potzat abarrai, po diis e diis de sighiu, po cidas e cidas de sighiu, chentza de biri, mancai, su cielu lìmpiu de is nuis; mi domandu, fatu fatu, de cumenti potzat essi possibbili a aguantai, a bivi chentza de podi biri is isteddus, o sa luna, o su sobi, mi parit craru. E duncas, mi intendu fortunau meda (basau de sa bona sorti, si iat a podi narai, po sighiri a giogai a fai su poeta) a mi podi gosai custas diis bellas, a podi sighiri a bivi in s'isula stimada cosa mia, e mi intendu basau de Deus, e de sa Gratzia, a podi trabballai scriendi (e pesendindi unu scantu, cumenti si narat, ma si iat a podi scriri, puru, unus cantus, ponendi a menti su chi apu aciapau in su fueddariu) custus artìculus in lingua sarda. 

E a sa fini, at a essi berus puru ca no seu s'omini prus arricu ca ddoi est in custa isula, ma chi pròpriu si depu narai sa beridadi, no apu mai pediu, mai domandau a su Cielu de benni a essi s'omini cun is buciacas prus prenas de dinai tra totus is personas chi s'agatant in dì de oi in Sardìnnia, ma apu sèmpiri pediu, invècias, de tenni, mancai, unu pagheddeddu de tempus scapiu de su trabballu po podi sighiri a studiai sa filosofia, chi est sa passioni prus manna chi apu agatau in custa vida. E diaici mi funt andendi is cosas, a su mancu. 

E fatu fatu (e seu po serrai cun custa lega puru) mi benit de pentzai puru a unu amigu cosa mia, chi stimu meda, e chi fiat, tra is atras cosas, cumpàngiu miu a is tempus de is scolas, e chi dda at acabbada a fai unu trabballu (unu trabballu de oru, si iat a podi narai, fadendi su contu ca sighit is contus, ddi naru diaici, po una cumpàngia de assicuratzionis, cumenti si iat a podi narai, a trassa de s'italianu etotu, in Svizzera. E mi ddu arregodu cumenti unu piciocu chi bessiàt aforas de conca, ca fiat macu (cumenti si iat a podi narai puru) po su sobi, po su callenti e mescamente po su mari. E duncas, s'ùrtima borta chi si seus atobiaus, m'est bèniu de ddi domandai (a trassa de is domandas chi faint fatu fatu is giornalistas, si cumprendit, berus est?) chi ddi speddiessit sa Sardìnnia, su mari cosa nosta, e issu m'at arrespustu ca dònnia tanti, candu podit, candu su trabballu si ddu permitit, torrat in domu cosa sua, innoi in Casteddu (a Su Masu, po essi prus pretzisus), opuru si nci ghetat (biau issu chi podit!, mi megu a solu a solu) in su mari de is isulas de is Canarie. 

Ma, chi pròpriu si ddu potzu narai (antzis, chi pròpriu si ddu depu arrapiti) a mei no dispraxit po nudda, chi si ddu potzu narai diaici, su de abarrai innoi in su Campidanu de mesu, fadendi su contu ca tèngiu su mari de Casteddu a una mes'oredda de machina (o de trenu, chi si praxit de prus), e m'agatu a una mes'oredda, puru, de is montis de Biddacidru. E duncas, tra is atras cosas, abarrendi frimu in domu mia, innoi m'agatu, innoi bivu, tèngiu sa possibbilidadi de podi gosai, puru, su sartu (is sartus chi ddoi funt totu a giru a giru de sa bidda mia etotu, e chi si perdint, ddi nau diaici, po chilometrus e chilometrus e chilometrus, ca candu ddoi andu mi parit chi potzant, giai giai, no acabbai mai, cumenti su mari etotu). 

E duncas, dònnia unu de nosu a sa fini, a s'acabbu, si bivit sa vida chi scerat de si bivi: deu, po su chi mi pertocat a su mancu, apu scerau de no mi ndi andai de s'isula cosa mia, e potzu narai, puru, ca su Cielu est agiundendumì, e no pagu. E duncas (e immoi serru po diaderus, a su mancu po custa lega), si naru ca s'atra dì, ca fiat s'undixi de su mesi de Donniassantu (s'undixi de su de undixi mesis in s'annu) apu biu sa fotografia (in cussu tialu de Facerbook, est craru) de unu piciocu (chi bivit a lada de Sa Maddalena) chi si nc'est ghetau in acua, cumenti chi fessit su mesi de Treulas o su mesi de Agustu; e po no andai tropu atesu, pròpriu ariseu, a su mengianu, apu biu su bixinu de domu (unu piciocheddu meda prus giòvuneddu de mei) ca fiat andendi a sa statzioni, po pigai su trenu, a cratzoneddus crutzu (mi nc'est brintau su frius de parti sua, fadendi su contu ca fiant is otu de su mengianu e s'aria fiat frisca frisca, gei ddu eis a cumprendi a solus) e a maigas crutzas (cumenti si narat). 
E duncas, cun custu, acabbu, po oi puru,  is strollichiminis acapiaus a su tempus chi est fadendi. 

E duncas, s'apu scoviau, pròpriu immubagora, ca una de is passionis prus mannas chi tèngiu in custa vida est su studiu de sa filosofia (ca no potzu abarrai a totu dì a pentzai, a scriri e a chistionai de bòcias e de resultaus de is partidas, mancai a is giogadoris, a is allenadoris e duncas a totus is tifosus puru sa cosa no ddis iat a dispraxi de seguru, ca cumenti m'arrapitu fatu fatu, iant a abarrai a totu dì, e seu chistionendi de is giogadoris e mescamente de is allenadoris, a mi scoviai, a mi torrai a contai cumenti ddis funt andadas is cosas in campu po is partidas), e duncas, pròpriu in unu libbru chi apu acabbau de ligi me in custas ùrtimas notis (seu costumau a ligi calincuna paginedda ainnantis de mi dromiri, e custu ballit po dònnia, dònnia dì de sa cida, chentza de ndi sartai nemmancu una, duncas), e chi fiat apitzus de s'esistentzialismu (cumenti si iat a podi furriai su fueddu, de s'italianu etotu); e duncas, Kierkegaard (chi est stètiu, fait a ddu narai diaici, unu de is babbus de su movimentu de s'esistentziàlismu) si megat, pròpriu, ca una de is cosas prus togas, e prus de importu, po sa vida cosa nosta, po sa vida de s'omini, duncas, est su fatu ca is cosas torrant a essi, dònnia dònnia annu, sèmpiri agualis, chi arrannèsceis a mi sighiri in custu arraxonamentu. 
Est a nai, duncas, po si cumprendi mellus, ca apustis de s'atonzu nd'at arribbai, sèmpiri, s'ierru; e apustis de s'ierru ndi torrat a arribbai su beranu, e apustis de su beranu nd'arribbat torra s'istadi, e apustis torra s'atonzu. E custa cosa iat a podi andai ainnantis po atrus milli e prus annus (sèmpiri chi s'omini, mi parit bastanti craru puru, no acabbat de ndi sciusciai su mundu e, mescamente, su clima), e sa cosa prus toga de sa vida, duncas, est chi is cosas s'arrapitint in su tempus. Chi mi cumprendeis po su chi seu circhendi de si narai. Ca podeis abarrai segurus (e serru cun una mesu brulla) ca apustis de su mercuis nd'at a arribbai su giòbia, e apustis de su giòbia, e gràtzias a Deus, nc'est sèmpiri unu fini de cida ca si permitit de si pasiai unu pagheddu (po chini tenit custa fortuna, po chini si ddu podit permiti, est craru), ca si permiti, duncas, de si spreviai unu pagheddeddu, mancai gioghendi a bòcia cun sa scuadra cosa nosta. 
E apustis de is festas de su Nadali nd'arribbant is festas po sa fini de s'annu, e apustis de is festas po s'annu nou arribbant is festas po sa Befana, e apustis is festas po Sant'Antoni; e apustis su Carrasciali, e pròpriu cumenti sucedit dònnia, dònnia annu, nd'arribbant puru is festas po sa Pasca Manna, ma ainnantis de is festas po Pasca nci funt de si scroxai is coaranta diis de sa Caresima. E gràtzias a Deus, duncas, ca su mundu sighit a girai, ddi nau diaici. E custu, chi pròpriu si ddu depu scoviai, fiat su modu mellus chi tènia, candu fia unu pipieddu piticu, de mi bivi sa vida, e de mi bivi su tempus chi passat: fadendi su contu de cantu ammancat po sa primu festa chi nd'at a benni, fadendi su contu de cantu ammancat po sa brintada de s'ierru, o de su beranu, o de s'istadi. E chi unu fait is contus feti (e si ddu bollu arrapiti torra: feti) de is festas chi nci funt de si bivi, intzandus custa vida parit diaderus, una cosa druci cumenti a su tzucuru, e su tempus, intzandus, parit diaderus chi si nci bobat. 
Ma sa vida (cumenti scieus beni) no est feti a fai festa, e deu creu chi si cumprendat beni, e duncas, in prus, nci funt de si scroxai una biga manna de diis fadiosas, ma cumenti m'at scoviau, cumenti m'at contau Homar Farina, chi est s'allenadori, de custa stagioni, de is de su Tuttavista, sa scuadrixedda chi nd'ant pesau in Garteddì, e chi apu intèndiu pròpriu in custas ùrtimas diis, po ndi pesai una ciaciarrada a su telefunu e, duncas, po ndi pesai un'intervista, "est sa conca chi fait sa diferèntzia", e sa cosa ballit, duncas, no feti po su chi pertocat su giogu de sa bòcia, ma puru po su chi pertocat sa fida cosa nosta de dònnia dì. Est su modu, sa trassa chi teneus candu si biveus sa vida, sa trassa chi teneus candu, mancai, is cosas si faint prus tostadas de su chi podestus isperai (o timi, ballit aguali, mi parit craru), ca a sa fini fait sa diferèntzia. E immoi chi nci seu, immoi chi ddu apu arremonau, andaus a biri, impari, chi seis de acòrdiu, cali funt stètias is cosas de importu prus mannu chi mi funt abarradas in conca, a su mancu, apustis de sa ciaciarrada chi eus fatu cun Homar Farina. 
Diaici dda acabbu de mi strollicai (e fiat ora puru, s'at a megai calincunu de bosatrus, berus est?) e incumintzu a arraxonai apitzus de partidas, de bòcias, de gol, e de resultaus. Ca sciu, e ddu sciu beni puru, ca no biestis s'ora, ma si bollu arragodai, puru, ca chi teneis a disìgiu de ligi calincunu artìculu bellu, apitzus de totus is partidas chi si funt giogadas in custu ùrtimu fini de cida passau, in su giàssu de is amigus de su Diàriu Sportivu ddoi funt una biga manna meda de artìculus, ma scritus in italianu, mi parit craru, innoi podeis agatai totus is novas chi seis circhendi. Po is artìculus in sardu, invècias, e de su restu chi eis lìgiu a su mancu unu de is artìculus chi nd'apu pesau in totus custus ùrtimus annus, scieis beni chi circu de nci stichiri in mesu, e sa cosa andat ainnantis diaici dònnia, dònnia cida, calincuna lega chi siat scapia de su giogu de sa bòcia, e custu, duncas, ddu fatzu mescamente po ndi cassai s'atentzioni, puru, de totus cussas personas chi, mancai, no funt acapiadas a strintu cun su giogu de sa bòcia e, duncas, cun su mundu de sa bòcia de is diletantis sardus. E duncas, torrendi a nosu, si megamu a contai de is de su Tuttavista de Garteddì, chi currint in sa Lista B de su campionau de sa Promotzioni. E duncas, is scuadras sardas de sa Promotzioni tenint giai giogadas calincuna cosa cumenti a dexi giorronadas, po torrai a pigai sa chistioni (cumenti si iat a podi narai, a trassa de s'italianu), torra, ca a bortas su tempus parit, diaderus, ca si nci bobit, e custu sucedit, mescamente, candu ses fadendi calincuna cosa de spassiosu, poita invècias, candu stais mabi, candu ses apuntorau, o candu ses fadendi unu trabballu lègiu, grai, malu e fadiosu, intzandus parit ca su tempus no passit mai. 
E duncas, a fai is contus nci poneus pagu meda, is scuadras de sa Promotzioni ant a cabai in campu, tra una pariga de diis feti (fadendi su contu chi apu incumentzau a ndi pesai is rigas po cust'artìculu de mèrcuis, ma s'artìculu a sa fini nd'at a bessiri aforas feti de giòbia, est a nai cras, chi su Cielu bollit, est craru), po giogai sa de undixi giorronadas de partidas; e custu bollit narai, puru, ca seus giai giai a sa metadi de s'annu, sèmpiri po su chi pertocat sa stagioni de giogus de su duamilla e binticuatru – duamilla e binticincu, fadendi su contu ca po sa lista de partidas de s'andada (e po sa torrada funtzionat aguali, mi parit craru puru) nci funt de giogai dexesseti isfidas

E duncas, torrendi a nosu, si potzu narai ca is de su Tuttavista nd'ant cassau sa primu bìncida, po su chi pertocat su campionau, est craru, pròpriu custu domìnigu passau, in domu de is de su Coghinas, sighius de Paolo Congiu, chi funt una de is scuadras prus fortis, una de is scuadras chi nd'ant pesau una de is rosas prus fortis, tra totus cussas chi nci funt in sa Lista B, po ddu narai mellus puru. E intzandus, a fai is contus nci poneus pagu meda, is de su Tuttavista in dì de oi tenint calincuna cosa cumenti a seti puntus in buciaca, chi ndi funt arribbaus gràtzias a sa bìncida, toga meda, cun su resultau de duus a unu, chi funt stètius bonus a ndi cassai in s'ùrtima giorronada, e is atrus cuatrus puntus ddus ant cassaus gràtzias, est craru, a cuatru partidas chi ant serrau cun su resultau siddau in paridadi, a incumentzai duncas de su zeru a zeru chi nd'ant pesau in sa isfida contras a is de sa Montalbo de Thiniscole , candu fiat sa de tres giorronadas de su campionau, e chi s'est giogada, po essi prus crarus e pretzisus, su binticincu de su mesi de Cabudanni (e fiat de mèrcuis, po s'unicu turnu de partidas chi is de sa Promotzioni ant dèpiu giogai in mesu a sa cida, cumenti si narat); e apustis, is de su Tuttavista funt stètius bonus a ndi cassai un antru puntu bellu, e grai cumenti a s'oru (cumenti si iat a podi narai, e si narat, a trassa de s'italianu etotu), in sa partida chi ant giogau in domu de is de su Bosa (a sa de cuatru giorronadas, candu fiat su bintinoi de su mesi de Cabudanni, po s'ùrtima bessida, ddu estus a podi narai diaici puru, de su mesi de Cabudanni), cun sa isfida chi s'est serrada cun su resultau, torra, de duus a duus. E in sa de cincu partidas de s'annu (sa de cincu partidas chi ballint po sa lista de s'andada, est craru), chi s'est giogada sa primu cida de su mesi de Ladàmini (fiat su cincu, po essi prus pretzisus puru), is de su Tuttavista ant serrau sa isfida, chi ant giogau in domu cosa insoru etotu, contras a is de su Tonara, cun su resultau de duus a duus. 
Me is duas cidas apustis, invècias, est a nai me is partidas chi ant giogau su trexi (sèmpiri de su mesi de Ladamini, est craru, berus est?) e cussa chi ant giogau sa cida avatu, su binti, is de su Tuttavista funt abarraus, cumenti si narat, a buca asciuta (est a nai ca no funt stètius bonus a ndi scabulli nemmancu unu puntixeddu), poita ant pèrdiu in domu de is de su Istintinu, cun su resultau finali de duus a zeru, e in domu cosa insoru, in sa partida contras a is de su Logusantu, cun su resultau de duus a unu (po is allenus, est craru). Su bintiseti de su mesi de Ladàmini, invècias, is de su Tuttavista funt stètius bonus a apoderai su resultau de zeru a zeru in sa partida in domu de is de s'Abbasanta, chi funt un'antra de cussas scuadras chi funt currendi po ndi cassai sa sarvesa e, duncas, si cumprendit (ma ddu arrapitu po totus is personas chi no funt acapiadas a istrintu cun is regulas de is campionaus de càlciu de is diletantis), po tenni sa possibbilidadi de giogai, po un antru annu torra, in su campionau de sa Promotzioni. Apustis de custu puntixeddu, is de su Tuttavista funt abarraus torra chentza prexus (cumenti ia a podi narai, gioghendi, sèmpiri, a fai su poeta, prus che su tialu de giornalista), fadendi su contu ca su duus de su mesi de Donniasantu, ant pèrdiu, in domu cosa insoru etotu (a su Comunali S. Loriga, po essi prus pretzisus puru, e a mei su de essi pretzisu mi fait prexei meda, ca mi parit ca fatzu beni su trabballu cosa mia), in sa isfida contras a is de s'Altzaghena, un'antra de cussas scuadras chi ndi funt artziadas in su campionau de sa Promotzioni apustis de essi bintu, e custu est sucèdiu pròpriu s'annu passau, su campionau de sa Primu Categoria. E duncas, arribbaus a su dexi de su mesi de Donniasantu, is de su Tuttavista nd'ant cassau, e fiat ora puru, is primus tres puntus prenus, apustis de nc'essi provau, in totus is modus, cumenti si iat a podi narai, in totus custus duus mesis de partidas. 
«Seu prexau meda, prexau cumenti una Pasca, si iat a podi narai, puru, fadendi su contu ca is piciocus miu funt cabaus in campu, domìnigu passau, poi sa partida chi eus dèpiu giogai in domu de is de su Coghinas etotu, cun sa gana bona, chi serbit po giogai custas isfidas. Seu prexau poita ndi funt cabaus in campu cun sa conca giusta, mi benit de narai diaici, poita, chi pròpriu depeus narai sa beridadi, in totus custas primus noi bessidas no seus arrannèscius a binci nemmancu po una borta. E sa lista, sa positzioni cosa nosta in sa lista, fadendi su contu ca in dì de oi teneus feti duas scuadras a is pabas cosa nosta (e seus chistionendi de is de s'Abbasanta, chi tenint feti duus puntus in mancu, est a nai, duncas, cincu; e is de su Tonara, chi s'agatant a s'ùrtimu postu, cun feti tres puntixeddus ndr), no est contendu brullas, cumenti si iat a podi narai. Fintzas a oi, duncas – at sighiu a mi scoviai Homar Farina, ca s'annu passau sighiàt is fainas de is de su Posada – nd'eus pesau pagus puntus, calincunu in mancu, duncas, de cussus chi sperastus, a su mancu, de tenni apustis de noi-dexi partidas. E custu est unu pecau mannu, cumenti si narat, fadendi su contu, mescamente, ca is piciocus cosa mia ant giogau sèmpiri partida bonas in totus custas cidas, mancai, peròu, no seus arrannèscius a si ponni totus is puntus in busciaca chi, mancai, si minescestus. Potzu narai, duncas, cumenti si narat, chi po immoi nd'eus bodditu meda ma meda prus pagu de su chi eus seminau». 

Custu, a su mancu, balliàt fintzas a s'ùrtima bessida, fintzas a s'ùrtima partida chi is de su Tuttavista ant giogau, pròpriu custu domìnigu passau, in domu de is de su Coghinas. «De su restu sciestus, e beni puru, ca depestus giogai contras a una de is scuadras prus fortis chi ddoi funt cust'annu in sa Lista B de su campionau de sa Promotzioni. In prus, su de andai a giogai in domu de is de su Coghinas no est stètia una passilada, e cumenti si narat fatu fatu, deu seu seguru, abarru seguru de su fatu ca no ant a essi in medas is scuadras chi, a sa fini, ant a arrannèsci a torrai a domu cun calincunu puntixeddu in buciaca apustis de essi giogau a su Comunali de Santa Maria. Is piciocus cosa mia, is piciocus chi sigu, duncas, si funt fatus balli e funt stètius bonus a no sballiai giai nudda: seus abarraus cumpatus meda po totu sa partida e, una cosa chi ancora fortzis no si fiat bessida diaici beni, seus arrannèscius, puru, a fai una bella partida po su chi pertocat s'atacu, fadendi su contu chi seus stètius bonus a ndi cassai duus gol. Eus giogau a faci manna, cumenti si iat a podi narai; e custu bollit narai, duncas, ca is piciocus cosa mia ndi funt cabaus in campu chentza nesciuna timoria, ca de su restu, seus chistionendi sèmpiri de una partida de bòcia. Mancai is tres puntus, cumenti si iat a podi narai, si srebessint cumenti serbit su pani a unu cristianu po bivi, po sighiri a andai ainnantis. Custus tres puntus duncas - at sighiu a mi contai Homar Farina – si faint beni meda, no feti po sa positzioni in sa Lista, ma mescamente po s'umori, po sa conca. Chi fadeus su contu de sa rosa de s'annu passau, sa rosa de cust'annu est mudada po calincuna cosa cumenti a su noranta po centus; est a nai ca is giogadoris chi ddoi fiant s'annu passau e chi ant giogau cun sa camisedda de su Tuttavista no nci funt prus, e duncas seus torrendi a incumentzai da zeru, de bellu e nou, cumenti si iat a podi narai: cust'annu, duncas, nci funt una biga de giogadoris nous, cumenti nou est s'allenadori, de su restu (arrit). Sciestus beni, duncas, ca su trabballu ca nc'est de fai no est pagu de seguru, ma candu no nc'arrannescit a ndi boddiri su tanti de puntus chi iast a minesci, intzandus is cosas benint a essi prus tostadas de cussu chi podiast timi, o bisai. Sa cosa de importu prus mannu, a su mancu a parri miu, in su giogu de sa bòcia, in su giogu de su càlciu, est pròpriu sa conca. Chi tui abarras po medas cidas de sighiu chentza de fai nemmancu unu puntu, intzandus nd'arribbat sa tristura, mi parit craru; e candu ses tristu is cosas benint a essi meda, ma meda prus fadiosas, partendi, pròpriu, de is allenamentus chi ndi pesas, chi ndi pesaus aintru de sa cida. Is piciocus cosa mia, custu est pagu ma seguru, nc'ant sèmpiri ghetau in campu totu su chi teniànt in su coru, ma podeus narai, puru, ca sa bona sorta no est stètia pròpriu a su costau cosa nosta, chi cumprendeis su chi si bollu narai. Sa scuadra cosa mia, invècias, in custu domìnigu passau m'at donau totus is respustas chi mi abertammu: seus chistionendi, po diaderus, de una partida de importu mannu, una reatzioni toga meda, chi nd'est arribbada apustis de una biga de cidas isfortunadas. Su chi serbiàt, pruschetotu, fiat su de arrannèsci a ndi cabai in campu cun s'atentzioni chi serbit po giogai is partidas contras a is scuadras prus fortis, e potzu narai, puru, ca me in su campionau de sa Promotzioni totus is scuadras chi ddoi currint sciint su fatu cosa insoru, a partiri de is allenamentus chi faint, fintzas a arribbai a sa fortza de is rosas chi nd'ant pesau is aversàrias cosa nosta etotu. Su de binci una partida fait beni a sa conca, a su coru, e no feti a sa lista: ti donat sa possibbilidadi de cumprendi cali funt is cosas chi ti funt bessendi mellus, e podis cumprendi, puru e mescamente, cali funt is cosas chi, mancai, no ti bessint cumenti iast a bolli, e duncas, is sballius ti donant sa possibbilidadi de ti nd'acatai de totus is cosas chi no andant beni. Immoi, peròu, seus incumintzendi a cumprendi ca nosu puru seus fortis, ma scieus beni, e no si ddu podeus scaresci, ca totus is partidas chi nc'ant a essi de giogai de oi fintzas a sa fini de sa stagioni, no ant a essi facilis; ma peròu, e de custu ndi seu seguru, est craru, chi ndi cabaus in campu cun custa gana bona de giogai, chi ndi cabaus in campu cun sa conca giusta, cun sa conca chi serbit, cun s'atentzioni chi domandu a is piciocus cosa mia, intzandus eus a podi giogai is cartas cosa nostas, a trassa de totus is atrus, contras a totus is scuadras aversàrias. E ddu sciu chi bosatrus, mancai, no nc'eis a crei, ma si potzu narai ca puru candu seus bessius de su campu chentza de si podi ponni nemmancu unu puntixeddu in buciaca, e duncas, in totus is bortas, in totus is partidas chi eus pèrdiu, is piciocus cosa mia si funt fatus balli sèmpiri. Su chi dispraxit est ca in totus custus duus mesis de giogus, eus fatu sbàllius mannus, ca a sa fini s'ant portau a tenni pagu puntus, meda prus pagus de su chi nd'estus potziu incasciai. Eus sèmpiri pagau, a pretziu caru meda, cumenti si narat, dònnia sbàlliu chi eus fatu; e is erroris, e is arroris, no pertocant totu sa scuadra, ma feti calincunu piciocheddu chi, mancai, est stètiu pagu fortunau. Ma cumenti s'apu giai narau ainnantis, e si ddu torru a arrapiti poita custa est una de is cosas de importu prus mannu po mei, est pròpriu candu sbàllias, candu scramentas, cumenti si iat a podi narai, ca cumprendis ca in dònnia bòcia, in dònnia atzioni nci iat a essi sa crai po binci sa partida; no podis sciri cali at a essi s'atzioni de importu chi ti portat, mancai, a fai, o a incasciai su gol, ballit aguali, e pròpriu po custu, duncas, ca domandu a is piciocus cosa mia de giogai cun atentzioni, cun sa conca lìmpia de totus is pentzamentus chi no serbint, chi no nci brintant nudda cun una partida de bòcia. In medas partidas chi eus giogau, eus pèrdiu po crupa de una giogada sballiada, una cosa ca in su giogu de sa bòcia, in su mundu de su càlciu, nci podit stai, e nci iat a mancai atru puru, fadendi su contu ca, cumenti intendu narai fatu fatu, in su càlciu su chi bincit est pròpriu cussu chi arrannèscit a sballiai prus pagu. Est unu pecau, ddu sciu, ma a su pròpriu tempus potzu narai, puru, ca is piciocus cosa mia si funt allenaus, fintzas a oi, e funt sighendi in custu arrastu etotu, cun totu sa gana bella chi serbit; no ndi sartant nemmancu un allenamentu, e custu mi fait prexei meda; est a nai ca, fadendi diaici, mi faint a cumprendi ca tenint a coru is chistionis acapiadas a sa scuadra, a su progetu chi nd'ant pesau is de su Tuttavista. Dònnia partida, duncas, contat una storia a parti, una storia diferenti de sa partida ainnantis, e nosu, podeus narai custu puru, no seus stètius de seguru is prus fortunaus de totus, antzis. Candu is cosas no andant beni, o andant peus de su chi podiat sucedi, intzandus depis abarrai selenu, po su chi fait, e circai de ti fai fortza; sa cosa de importu prus mannu est cussa de si lassai a is pabas is momentus lègius, circhendi, duncas, de ti ndi strantaxai acoitu. Desinò, s'arriscu prus mannu est cussu de abarrai prantaus me is ùrtimus postus de sa lista, cumenti est sucedendi a nosu, de su restu; chi no arrannèscis a ndi pesai sa conca acoitu, duncas, arriscas de no ndi bessiri prus de su stampu innoi, mancai, ses arrutu e t'agatas». 




Attività realizzata col contributo della Regione Sardegna - IMPRENTAS 2023-2024. LR 22/2018, art. 22