Domìnigu arricu de partidas: primu giorronada po is scuadras de s'Eccellenza, prexu in Copa Italia po is de s'Atletico Uri e de sa Torres

Sa bòcia torrat a curri in medas campus de totu sa Sardìnnia: est custa, podeus nai diaici, sa noba de importu prus mannu de custa cida e cumenti sa cida passada etotu, fadendi su contu de totu su muntoni de partidas chi si funt giogadas domìnigu passau, est a nai su doxi de su mesi de Cabudanni, nc'est diaderus pagu tempus de perdi in atras chistionis chi no siant cussas acapiadas a sa faina chi de prus de dexi annus sigheus in su giassu de su Diario Sportivo. E intzandus, est stètiu unu domìnigu de spàssiu mannu, de prexiu e de afrodhius po medas piciocus e po totus is tifosus de is scuadras sardas, cumentzendi de is de s'Olbia, chi batallant in su campionau de sa Sèrie C, arribbendi a is scuadras de s'Eccellenza, chi funt cabadas in campu po sa primu bessida de su campionau nou, apustis de cussus duus mesis de partidas giogadas tra Abrili e Maju, (ma cun feti otu scuadras in totu), ma chenza si ndi scaresci de is scuadras sardas de sa Sèrie D, chi ant giogau sa primu partida chi pertocat sa Copa Italia. E intzandus, si cumprendit beni ca de cosas de torrai a contai nci ndi funt una biga manna, partendi pròpriu de is resultaus e de is nominis de is giogadoris chi ant fatu is gol. Ma mancai is cosas de contai siant medas (e giai giai no scieus chi nc'ant a capi totus me in s'articulu de custa cida) mi permitu de nc'aciungi duus fuedhus (ma diaderus feti duus), apitzus a is tempus (dhi naraus diaici) chi seus bivendi, o mellus, chi seus sighendi a bivi, de prus de un annu, po crupa de cussu tialu de dannu mannu chi si nd'est propiu apitzus e chi tzerriaus Covid. In s'interis chi is de su Guvernu funt trabballendi po cunvinci totus cussus chi no si funt ancora fatus su vacinu a si fai sa puntura, sighint a andai ainnantis is fainas acapiadas a su chi tzerriant Green Pass, est a nai su certificau chi serbit po brintai me is logus serraus (cumenti iant a podi essi is bar o is pizzerias), poita de sa primu dì de su mesi de Cabudanni funt brintadas leis nobas, in custu sensu, e duncas su Green Pass at a serbiri puru po brintai me is bibbliotecas, tanti po nd'arremonai una, o po brintai me is aposentus de is universidadis e fintzas po nd'artziai apitzus de is trenus e de is navis. Me is ùrtimas diis, a nai sa beridadi, su Green Pass serbit puru po brintai me is logus innoi trabballaus, e no si cumprendit diaderus ita fini ant a fai totus cussus chi no tenint su certificau, ma cumenti si narat, eus a biri ita totu nd'at a bessiri aforas, fadendi giai su contu chi is protestas funt giai medas, po cussu chi parit, a bortas, un afrontu lègiu meda po sa libbertadi e sa dignidadi de is personas. Ma is de su Guvernu, comentecasiat, sighint a contai a totus chi su Green Pass, e duncas su vacinu, serbit po garantiri sa seguresa de sa genti, e no si ndi podit fai de mancu. Calincunu est arribbau fintzas a nai chi iant a podi torrai is òbbrigus e is leis (e totus is atividadis serradas...), chi eus depiu inguti po calincuna cosa cumenti a dexi mesis. Po essi pretzisus, seus chistionendi de su ministru de sa saludi, Speranza, chi sa primu cida de su mesi de Cabudanni at scoviau: «Su Covid est ancora tra nosu, chi sa genti no si fait su vacinu iant a podi torrai is serradas po is atividadis e is fainas de sa genti». Certu, si cumprendit beni chi a ligi custus fuedhus nc'est pagu de abarrai allirgus, pruschetotu imoi chi funt torrendi a partiri no feti is giogus e is campionaus po s'annu de su duamilla e bintunu \ duamilla e binti duus, ma puru is fainas me is scolas, po totus is piciochedhus prus giòvunus, cun s'atonzu chi iat a podi essi prus trabballosu de su chi podeus pentzai in dì de oi, ma boleus, a su mancu po custu mengianu, abarrai cun su coru prenu, fintzas a cuccuru, de isperas bonas, e no s'abarrat atru de fai chi bivi sa vida, po cumenti nd'arribbat, e abertai po cumprendi mellus cumenti ant a andai, diaderus, is cosas. Serru sa chistioni, e custa borta d'apa fai diaderus, cun is ùrtimus duus fuedhus: a bortas mi parit ca a s'òmini dhi bastat pagu cosa po si nd'abarrai chietu: mancai feti una bella partida de bòcia de castiai a sa tialu de televisioni, e su giogu est fatu. Nc'est s'arriscu, e mannu mannu meda, a parri de chini scriri, a su mancu, chi imoi chi is campionaus de bòcia torrant a partiri, in Sardìnnia puru, si nd'eus a scaresi, e drabessi puru, de totus is cosas chi eus pèrdiu in custu annu e mesu de daboris e de trumentus, partendi pròpriu de is festas chi si pesànt me is bidhas, e chi po imoi, a su mancu de su chi potzu biri e intendi in su Campidanu de mesu, innoi bivu, funt torradas a nudha, dhi naraus diaici: de totu su prexu, detotu su budrellu de is giostras, de totu sa genti allirga me is tzilleris e me is locandas in trumas mannas, no est abarrau giai nudha; sighint a andai ainnantis (candu is cosas andant beni) feti is processionis, est a nai sa parti de sa festa chi pertocat a sa cresia (e mellus de nudha!, iat a podi arrespundi calincunu), e po su restu, si bint (e si intendint) feti is fogus de is guetus chi bobant in su cielu. Certu, s'iat a praxi torrai a bivi chitzi is festas cumenti festus costumaus a fai ainnantis de totu custu dannu mannu, ma po imoi, a su mancu si parit, tocat a sighiri a aguantai, cun su coru prenu de passièntzia, po su segundu atonzu de sighiu, ma mancai is cosas ant a podi mellorai chitzi, chi est totu cussu chi isperaus in dì de oi. E cun custu serraus sa chistioni e si nci ghetaus, in prenu, me is fainas chi pertocant su mundu de sa bòcia in Sardìnnia, ma partendi de una noba chi nd'est bessida aforas pròpriu sa cida passada, e chi est s'acapiu, dhi naraus diaici, tra su chi eus nau fintzas a imoi e is arrexonamentus chi seus acanta acanta de incumentzai. Is de su Cumitau Regionali de sa LND nd'ant bogau aforas, cun d'unu comunicau, totus is règulas chi si depint sighiri candu calincunu giogadori si ndi pigat sa mobadia, est a nai s'influèntzia acapiada a su Covid: nudha de nou, a nai sa beridadi, de cussu chi sciestus giai e chi balliat po is scuadras chi currint me is campionaus de sa Sèrie D e chi est balliu puru po is otus scuadras chi funt torradas in campu po giogai is ùrtimas partidas de su campionau de s'Eccellenza, cumenti scieus beni. Is règulas, intzandus, ant a balli puru po is scuadras chi currint me is campionaus de sa Promotzione, de sa Primu e de sa Segunda Categoria, ma ballit puru po is piciochedhus prus piticus chi giogant me is scuadras de is "Allievi" e de is "Giovanissimi". Candu unu giogadori, intzandus, si ndi buscat su puntori (dhi naraus diaici) depit abarrai serrau in domu, stesiau de totu is atrus, cumenti sucèdiat s'annu passau, de su restu, e sa pròpriu cosa ballit po totus is giogadoris chi si funt atobiaus e funt abarraus acanta de s'apuntorau, naraus diaici. Sa partida no si giogat (est a nai chi sartat) chi una scuadra arribbat a tenni prus de tres giogadoris apuntoraus (o totus e duus is portieris mobadius, o tres piciochedhus piticus, est a nai cussus chi in italianu si tzerriant "fuori quota"), e pròpriu po custu, is de su Cumitau ant pentzau (beni) de aciungi una lista de scuadras a is duas chi giai dhoi fiant, in su campionau de sa Promotzione, e una lista de scuadras po su chi pertocat su campionau de sa Primu Categoria puru, custu po ndi pesai campionaus cun prus pagus partidas de cussas chi festus costumaus a biri me is annus passaus, po tenni prus tempus po recuperai torra is partidas chi ndi depessint sartai. Nau totu custu, podeus andai a castiai cumenti funt andadas is cosas po is scuadras sardas chi funt cabadas in campu sabadu e domìnigu passau, partendi duncas de is de s'Olbia, chi currint sèmpiri in su campionau de sa Sèrie C, e chi in s'ùrtima bessida in domu cosa insoru ant bintu cun su resultau de tres a duus contras a is allenus de sa Viterbese e ndi artziant, diaici, a su segundu postu in sa lista, cun feti unu puntu in mancu de is de su Pescara e de su Siena, chi s'agatant in su primu postu. Sa partida po is biancus de domu incumentzat mabi meda, poita apustis de noi minudus de giogu Volpicelli intzertat su tiru de atesu meda e scudit sa bòcia a is pabas de Ciocci, cun su portieri de s'Olbia chi no nci podit fai pròpriu nudha. Is meris de domu circant de ndi artziai sa conca cun Lella (togu meda su cropu de conca de su giogadori de s'Olbia, ma sa bòcia bobat prus in artu de sa traversa, mancai de pagu), Brignani, Udoh, ma is lazialis aguantant beni. A su de trinta-oi minudus, Udoh aciapat su gol chi ballit po su unu a unu e apustis, a su de cincu minudus in su segundu tempus, torra Udoh agatat su gol (gràtzias a su passagiu de Travaglini) chi ballit po su duus a unu po is biancus de domu. Udoh est sèmpiri una ispina me is peis de is difensoris de sa Viterbese, cun Martinelli chi, circhendi de frimai su giogadori aversariu, si ndi buscat su segundu cartellinedhu grogu e lassat is suus cun feti dexi ominis is campu. Ma mancai in dexi, is de sa Viterbese arrannescint a agatai torra su gol chi ballit po su duus a duus, cun su corpu de conca de D'Ambrosio, candu seus lòmpius a su de binti-cincu minudus. Is de s'Olbia, in s'interis, arriscant puru de ndi buscai su de tres gol, mancai tengiant un omini in prus in campu; candu mancant feti cincu minudus a sa fini de sa partida, peròu, nd'arribbat su gol fatu de Biancu, chi arriciri sa bòcia scuta de Arboleda e abbruxat su portieri de is strangius Daga cun d'unu tiru togu meda. Po is de s'Olbia, duncas, nd'arribbat sa segunda bìncida de sighiu in domu. Primus bessidas, puru, po is scuadras sardas de sa Sèrie D chi currint po sa Copa Italia: seus chistionendi, ducas, de is de sa Torres, chi funt andaus a giogai in domu de is de su Murera, e de is de s'Atletico de Uri, chi si dha funt gherrada contras a is meris de domu de s'Altzaghena, po decìdiri chini, tra is cuatru scuadras, podit sighiri a curri in sa Copa, conca a su primu turnu de partidas, chi s'ant giogai, duncas, pròpriu sa cida chi at a benni, est a nai de mèrcuis, su binti-duus de su mesi de Cabudanni. Is arrubius-brau de sa Torres, duncas, bincint cun su resultau de duus a zeru, gràtzias a is gol fatus de Piredda, apustis de mes'ora de giogu, e de Scotto, chi at agatau su segundu gol a su de coranta-tres minudus, est a nai duus minudus ainnantis de sa fini de su primu tempus. Po is tattaresus de sa Torres, imoi, nc'at a essi de giogai su derby, dhu tzerriaus diaici cumenti faint is ingresus po chistionai de sa partida tra scuadras chi nd'arribbant de sa pròpriu citadi, contras a is de su Latte Dolce. Afrodhiu a is steddas po is de s'Atletico de Uri puru, chi bincint sa primu partida, in totu sa storia de sa scuadra, in su mundu de sa Lega Natzionali de is Diletantis, gràtzias a su gol fatu cun d'unu bellu corpu de conca de Hernan Altolaguirre, un atacanti chi nd'aproillat de s'Argentina, nasciu in su milli e noicentus noranta-tres. Is grogus-arrubius, sighius de Massimiliano Paba, funt partius torra cun giai is pròprius giogadoris chi iant bintu su campionau de s'Eccellenza, chi est torrau a partiri, cumenti eus giai arremonau, in su mesi de Abrili. Imoi is de s'Atletico de Uri ant a giogai, sèmpiri po su chi pertocat sa Copa, contras a is lazialis de su Trastevere, apustis de sa primu partida de su campionau de sa Sèrie D, chi s'at a giogai pròpriu custu domìnigu, est a nai su dexianoi de su mesi de Cabudanni, in domu de is de su Murera. Arribbaus duncas, diaici, a is scuadras sardas chi currint in su campionau de s'Eccellenza, chi pròpriu domìnigu passau est torrau a partiri cun sa primu giorronada, e is spantus funt stètius una biga: in totu, seus chistionendi de seti bìncidas apitzus de noi partidas, cun binti-noi gol fatus in totu e feti una partida chi s'est serrada cun su resultau de zeru a zeru. Apustis de sa primu bessida, duncas, nc'est afrodhiu meda in domu de is niedhus-birdi de su Castiadas, chi ant fatu cuatru gol a is de su Bosa, diaici cumenti in domu de sa Ferrini de Castedhu, cun is piciocus sighius de Pinna chi funt arrannescius a si ndi pigai is tres puntus in sa batalla de Nùgoro contras a is de sa Nuorese; bincint atesu de domu puru is de su Taloro de Gavoi, contras a su Ilàrtzi, is de su Sant'Aleni de su Cuartu, in domu de is campidanesus de su Muristeni, e puru is arthanesus de s'Idolo, contras a is asseminesus de s'Asseminese, chi sighint a giogai is partidas in domu in Bidd'e Sorris. Bincint in domu, invecias, is de su Gùspini e is de sa Villacidrese puru, is primus contras a is de su Poltu Ridundu, is segundus contras a is tattaresus de su Li Punti. Feti unu puntu po is de s'Ossese, chi paregiant sa partida contras a is de s'Ilva, e po is de su Budoni, contras a is de s'Arbus. Is de su Castiadas, intandus, bobant gràtzias a is duus gol fatus de Scioni e a is gol de Tesfai e de Villa, cun s'atacanti argentinu chi po imoi at fatu a su mancu unu gol in dònnia partida chi at giogau. Primus tres puntus, d'eus arremonau pròpriu ainnantis, puru po is de su Taloro, chi bobant cun sa giogada de Littarru, chi torrat a fai gol apustis de is duus gol fatus in sa segunda bessida de sa Copa Italia, in sa partida contras a sa Nuorese. Si serrat, invecias, cun seti gol in totu, cuatru po is meris de domu, sa partida tra is de su Gùspini e is de su Poltu Ridundu: is allenus agatant su gol gràtzias a sa giogada de Mulas, ma Fernandez ponit is cosas apostu po is meris de domu cun su gol chi ballit po s'unu a unu. De Bruno Floris, invecias, su segundu gol de is campidanesus. Is olbiesus si depint acuntentai, naraus diaici, de duus paus: unu d'at pigau Vitiello, su segundu de sa partida cun su tiru de is undixi metrus scutu de Saggia. In su segundu tempus, is de su Poltu Ridundu abarrant cun feti dexi ominis in campu, apustis de su cartellinedhu arrubiu bodhitu de Fenu. Is de su Gùspini, in s'interis, aciapant puru su de tres gol cun Uccheddhu, cun d'unu bellu cropu de conca. Me is ùrtimus minudus de sa partida, peròu, Ruzzittu torrat a oberri is giogus, cun su gol chi ballit po su tres a duus (de conca, apustis de su passagiu de Rassu), ma is meris de domu si ndi torrant a fuiri gràtzias a su gol de Pedoni. Is strangius serrant sa partida cun su segundu gol de Mulas. Is de su Sant'Aleni bobant cun Mboup e Zuddas, chi me is ùrtimus minudus de sa partida ndi furriant a fundu 'e susu (dhi naraus diaici) is gol fatus de Melis e de Magnin; de Claudio Mura, invecias, su gol chi ballit po s'unu a unu, fatu de is strangius. Festa manna po is castedhaius de sa Ferrini, chi bincint contra a sa Nuorese cun is gol fatus de Podda, cun d'unu tiru de is undixi metrus, e apustis, in su segundu tempus, cun Matteo Argiolas. Abarrant a buca asciuta, est a nai chenza gol, is de s'Ossese, chi ant arriciu in domu is de s'Ilvamaddalena. Primus tres puntus po is de sa Villacidrese puru, chi bincint contras a is de su Li Punti gràtzias a is gol fatus de Figos e de Piras. Is de s'Idolo si ndi pinnigant is tres puntus in domu de s'Asseminese cun is gol de Nieddu e Cocco; de Manca su gol po is asseminesus, chi est balliu po s'unu a unu. Cuatru gol in totu, ma unu puntu feti in buciaca, po is de su Budune e is de s'Arbus: is allenus ant agatau su gol cun Salazar e Mainardi, ma Spina, cun su gol de s'unu a unu, e Gungui, po su duus a duus, arrannescint a sarvai is meris de domu.
 

Attività realizzata col contributo della Regione Sardegna. IMPRENTAS 2020-2021. LR 22/2018 art. 22