Fadeus is contus in buciaca a is scuadras de sa Segunda Categoria chi currint po ndi cassai s'artziada in Primu Categoria: sa batalla prus toga, po immoi, est cussa in sa Lista D cun duas scuadras a su primu postu

E duncas, eia, immoi ddu potzu narai a forti: seus arribbaus, po diaderus, a is ùrtimas ora de s'ierru po su chi pertocat s'annu duamilla e bintises, e no mi parit nemmancu berus, chi pròpriu si depu narai sa beridadi, de cumenti parit ca si nci bobit su tempus a bortas; e mancu mali, m'arrapitu a solu a solu dònnia borta, chi su tempus est sighendi a curri, a passai po mei puru (e a sa truma nc'aciungu bosatrus puru ca lìgeis custus artìculus, e seis dònnia cida de prus!, tra is atras cosas), desinò, chi su tempus no iat a sighiri a andai ainnantis, iat a bolli narai, cumenti mi praxit a arrapiti fatu fatu, ca nc'est stètiu calincunu dannu mannu, e si cumprendit cumenti andant is cosas, ma nou, po custa cida puru, po custu giòbia puru, candu nd'ammancat feti un antru (e seu chistionendi de is giòbias, si cumprendit bastanti beni, berus est?) po serrai su de tres mesis de s'annu, no m'agatu in logu de uspidali o in mesu a is arroris e a is dannus, e a is daboris, e duncas, eia, nc'est su tanti po ndi pesai una bella festa, feti po s'agatai ancora sanus e cun totus is ossus a su postu cosa insoru; ca ddu scieis, cumenti andant is cosas (megamu a si narai): ca bastat a ponni mabi unu pei e in su giru de una pariga de segundus (pariga a sa sarda, e si cumprendit) t'agatas totu sciasciau in terra. 

Ma de su chi ndi potzu cumprendi in dì de oi, tengu bastanti bona sorti, e saludi, po podi torrai gràtzias a su Cielu chi su bisu cosa mia, e megu a chistionai de sa vida cosa mia, chi a bortas mi parit bona, e bella e pretziosa cumenti chi fessit unu miraculu, una prenda de oru, podit sighiri a andai ainnantis. 

E duncas, eia, fia narendusì ca seus acabbendi de si scroxai is ùrtimas diis, is ùrtimas ora de s'ierru e apustis, de custu cenabara chi nd'at a arribbai, eus a essi, torra, in sa stagioni de su beranu (mancai calincunu fetzat partiri su beranu giai de sa primu dì de su mesi de martzu, est a narai, duncas, chentza de abertai s'equinoziu, po ndi furai su fueddu de s'italianu etotu), chi est una de is prus drucis, e duncas, eia, seus po brintai (fait a ddi narai diaici puru) in unu de is periodus de s'annu, a su mancu po su chi pertocat su bivi in un'isula cumenti a sa nosta, cumenti a sa Sardìnnia, prus bonus e prus chietus, fadendi su contu ca sa Nadura (ddu scriu cun sa "N" in mannu, isperendi ca no siat unu dannu po nesciunu) est torrendi a si ndi scidai (chi est, tra is atras cosas, unu de is fueddus chi mi praxint de prus po cumenti sonant, e chi torrat giai giai paris cun sbelliai, ca si narat, peròu, cumenti eis a sciri giai, candu mancai calincunu incumentzat a fai mabioris, e benit narau mescamente a is piciocheddus e a is piciocheddas piticas, ca si sbelliant cumenti arribbant, mancai, a trexi-catodixi annus, fadendi su contu ca is pipius faint, o iant a depi fai, a bonus. E nd'aprofitu, diaici fadeus puru unu pagheddu de grammatica, ca mabi no fait de seguru), ma iat a fai su contu ca sa Nadura no si drommit mai, ma in s'ierru, eia, parit ca si pighit unu pagheddeddu de pàsiu, po torrai a partiri (e nosu impari a issa!), de su restu, pròpriu cumenti ndi brintat su beranu. 

E sa cida passada s'apu narau, puru (chi si ddu arregodais, desinò deu seu innoi puru po fai custu trabballu, est a narai, duncas, seu innoi po si torrai a arrapiti is cosas mancai po duas, o fintzas po tres bortas, o mancai cuatru puru, e megu a brullai!, gei s'at a cumprendi, berus est?) ca mi pariat ispantu ca ancora no emu biu is arrondibis bobendi in su Cielu, e apustis chi apu serrau cun s'artìculu, cumenti seu andau a mi fai sa passillada chi m'arregallu (su fueddu prus bonu, prus togu chi potzu manigiai est pròpriu custu) dònnia dì apustis chi studu su tialu de su computer, e duncas, eia, apustis chi acabbu de trabballai, intzandus eia, no nc'eis a crei, ma apu biu una bella parighedda de arrondibis bobendi in su cielu, e su coru cosa mia s'est prenu fintzas a cucuru de prexu; eia, mi fait custu efetu su beranu, mescamente candu nd'arribbat, e ita si potzu narai deu? De seguru no tengu nudda de mi bregungiai, antzis, mi praxit, e meda puru, su prexu chi mi nd'arribbat, chi mi intendu in su coru in custu perìodu, e duncas, eia, sigu a andai ainnantis cun s'afròddiu a cucuru: e su de arrannesci a fai sa festa, ddi naru diaici, mancai cun is cositeddas prus piticheddas (eia, mancai feti biendu is primus arrondibis in su cielu), mi parit una cosa toga e bona meda, una gràtzia de Deus; su de podi intendi sentidus diaici mannus, feti castiendi sa Nadura, mi parit unu de is giogus prus togus chi si podint fai in custu mundu, e seu prexau meda, e diaderus, de mi podi bivi totu su chi mi bivu, in sa manera cosa mia. 

E duncas, eia, a sa fini de su mesi de martzu at a torrai a cambiai torra s'ora (o s'orariu, chi si praxit de prus cumenti sonat, e chi abarrat unu pagheddeddu prus pretzisu), e s'eus a lassai a is pabas su periodu innoi nc'est s'ora solari, cumenti dda tzerriant e cumenti dda tzerriaus nosu puru, e nc'at a torrai a essi s'ora legali, e is diis s'ant a parri (e ant a essi) ancora prus longas de su chi si parint immoi, fadendi su contu, de su restu, ca is oras de luxi funt benendu a essi sèmpiri de prus; e custa cosa puru, apustis de ses mesis tra s'atonzu e s'ierru, mi speddiat meda. 
Mancai apustis de su beranu (chi no est ancora incumentzau e deu seu chistionendi giai de candu at a acabbai) nd'at a torrai s'istadi e, deu creu de podi narai custu puru, cun s'istadi nd'at a torrai sa basca manna, ma in calincunu modu eus a fai a custu giru puru, ma po immoi, eia, podeus (estus a depi, chi pròpriu ddu depu scriri cumenti Deus cumandat) pentzai feti a su beranu e a totu su bellu ca custa stagioni s'arregallat dònnia annu. 
Ca una de is cosas prus togas, prus bonas chi nci funt in sa vida in custu mundu, est pròpriu ca is cosas torrant, agualis, de annu in annu: apustis de s'ierru ndi torrant is arrondibis, chi si portant sa basca bella de su beranu. E custa est una cosa, chi pròpriu si ddu depu narai, ca no apa a arrosci mai. 
E antzis, su de tenni sa possibbilidadi de podi bivi innoi in su Campidanu de mesu (e no in una citadi de su nord Italia, po nd'arremonai una, fadendi su contu ca me in una citadi deu no arrannèsciu a abarrai po prus de trintases oras de sighiu, poita apustis mi intendu mabi meda, e mi dispraxit ma custa borta no seu brullendi, no nc'est nudda de brullai), mi parit una fortuna manna meda: su de podi biri, torra, sa Nadura chi si ndi scidat, mancai deu m'agatu in logu de sartu, est una cosa chi no si podit pagai cun su dinai, cumenti si narat. 

E custu, duncas, si ddu scriu po fai su contu, impari a bosatrus, de su tempus chi passat, de su tempus chi si seus lassaus a is pabas e de su tempus chi s'ammancat de si scroxai (ddu naru diaici, prus a trassa de cumenti iat a fai unu poeta, prus ca de cumenti iat a narai unu giornalista) po lompi a su mesi de abrili. 
E duncas, eia, una cosa, po custa cida puru, est bella ca fata. 

Sa segunda cosa chi fatzu sèmpiri, ainnantis de atacai a chistionai de bocias, de partidas e de resultaus, est cussa de andai a castiai is previsionis de su tempus (e duncas, eia, si chistionu sèmpiri pagu pagu de su tempus chi fait): funt diis bellas e callentis, cun is temperaduras chi nd'arribbant fintzas a dexiotu gradus (e no funt pagus de seguru, e si cumprendit beni, est una cosa chi fait prexei; e poberus, mi megu a solu a solu, totus cussus sardus chi bivint mancai in Torinu, o in Milanu) ma is temperaduras peròu ndi cabant ancora fintzas a lompi a ses-seti gradus; est a narai ca a su megama nc'est unu bellu sobi e unu bellu callenti, ma cumenti sparessit o si cuat su sobi, e duncas, cumenti scurigat (po manigia un antru de cussus fueddus chi mi praxint fintzas a m'amachiai), intzandus ndi torrat su frius. 
E custa cosa puru fait prexei, poita si permitit comentecasiat de podi dromiri beni a su noti, una cosa chi s'at a speddiai, e meda puru, ndi seu seguru, in totus is tres mesis chi at a fai de istadi, innoi, nci podeis scumiti giai in dì de oi, at a fai diaici basca chi s'at a passai sa gana de papai e de dromiri. 
E pròpriu po custu ca naraus ca su beranu est unu de is periodus prus drucis chi nci funt aintru de s'annu, e po su chi mi pertocat, apa a circai de mi gosai fintzas a s'ùrtimu segundu, e si cumprendit. 

Immoi no depu, no depeus fai atru ca nci lompi fintzas a sa Pasca Manna, chi at a essi, chi nd'at a arribbai tra prus pagu de tres cidas; e duncas, eia, de su chi narant is previsionis custu fini de cida, est a narai cenabara – sabudu e dominigu, no iat a depi proi (no iat a depi proi meda, chi si praxit mancai de prus), ma nci iat a podi essi unu pagheddeddu de friscura, mescamente me is primus oras de su mengianu. 
E po su chi pertocat custa lega puru, podeus narai ca po custa cida eus fatu totu su chi si spetat, totu su chi si tocat a fai. 
E deu sigu diaici, in cust'arrastu etotu, ca de su restu ddu scieis chi mi praxit unu pagheddeddu (ma unu pagheddeddu feti!) a mi strollicai impari a bosatrus, ainnantis de mi ponni a chistionai, a arraxonai apitzus de is resultaus de is partidas, e chi funt sa farra (ddi naru diaici) chi manigiaus po sforrai is artìculus chi podeis lìgi, dònnia dònnia dònnia dì, chentza de ndi sartai una, in su giàssu de su Diàriu Sportivu (mancai po su prus, cumenti eis a sciri giai, funt scritus in italianu). 

E duncas, eia, is scuadras sardas de bòcia, chi currint me is campionaus pesaus de sa Federatzioni Italiana de su Giogu de su Càlciu, impari a is de sa Lega Natzionali de is Diletantis, tenint calincuna cosa cumenti a atru duus mesis de giogus, e si iat a podi narai, puru, ca seus a sa metadi de sa lista de partidas chi ballint po sa torrada. 
E apitzus de custa cosa, eia, immoi si ddu naru, nc'est unu dìciu chi tengu badda-badda in conca de una biga de tempus, de una biga de cidas, e immoi, e fiat ora puru!, andu a si ndi chistionai. E duncas, eia, su dìciu narat (e chi pròpriu si ddu depu narai, custu est unu de is dicìus chi mi praxint de prus tra totus cussus chi connosciu) ca "is cuaddus bonus si biint a sa torrada" e chi est, no nc'eis nemmancu a crei (e megu a ddu narai po brullai, ca gei ddu sciu ca no mi pigais po frobànciu, po dda narai a trassa de cumenti si narat innoi in Bidd'e Sorris, mancai in su fueddariu apu agatau feti frabànciu, cun sa "a" e non cu sa "o", po sighiri a fai unu pagheddeddu de grammatica puru) su chi m'arrapitint, fatu fatu meda, is allenadoris chi intendu po ndi pesai is ciaciarradas e, duncas, is intervistas, cida po cida. E si cumprendit beni cumenti andant is cosas: me in su giogu de sa bòcia, po su chi pertocat, puru, is scuadras de is diletantis chi currint, mancai, me is campionaus de s'Ecellenza, de sa Promotzioni, de sa Primu e de sa Segunda Categoria, in su mesi de idas (cumenti eis a sciri, e chi no ddu scieis, o chi no si ddu arregodais, intzandus deu seu innoi po fai custu trabballu puru) si torrat a oberri su mercau (sa fentana de su mercau, po ddu narai mellus puru) e custu bollit narai, intzandus (gei nc'eis a arribbai a solus puru), ca is giogadoris podint mudai sa scuadra innoi giogant, e podint lassai sa scuadra innoi s'agatant po andai a giogai, a curri, cun un'antra camisedda inpitzus, chi cumprendeis su chi seu circhendi de si narai. E duncas, benit a essi bastanti craru, deu creu, is scuadras benint a essi prus fortis (o prus debbilis) in sa segunda parti de sa stagioni, e nci funt allenadoris chi narant, chi pentzant ca sa segunda parti de sa stagioni giai giai no nci brintit pròpriu nudda cun sa prima, tanti ca parit de giogai un antru campionau ancora. 
E sa pròpriu cosa iat a podi sucedi in sa vida, in sa vida chi si depeus bivi totus: e est pròpriu custa parti de sa lega chi mi fait prexei a si intregai. In sa vida de una persona puru podit capitai ca is cosas ti andint mabi meda po una biga de annus de sighiu, diaici mabi, mancai, ca incumentzas a pentzai de no podi prus torrai a biri sa luxi, chi cumprendeis su chi seu circhendi de si narai. E invècias, podit sucediri, puru (e gràtzias a Deus ca is cosas in custa vida andant diaici cumenti megu a si contai) ca unu potzat, ca unu arrannèsciat, puru, a si ndi torrai a strantaxai apustis chi nd'arruit a terra; mancai, candu ses in terra, iat a parri ca tui no ti ndi depast, no ti ndi potzast strantaxai mai prus. Chi cumprendeis su chi si bollu narai. 
E nci funt, ballit aguali, perìodus in custa vida innoi totus is cosas si andant beni meda, e unu iat a podi pentzai ca una persona basada de sa bona sorti no at a podi mai agatai sa maba sorti in sa bia cosa sua; e invècias, sucedit pròpriu su contràriu. Candu naraus ca is cuaddus bonus si biint a sa torrada, duncas, boleus narai ca mancai tui ti siast agatau a annadai in acua lègias meda, custu no bollit narai ca no ti ndi iast a podi scabulli de totus is arroris, e de totus is dannus; sa parti prus manna in custu giogu, deu creu, est sa fortza chi nci ponis tui etotu: sa gana chi ndi tenis, po si ddu narai craru e tundu, de ti ndi strantaxai torra, mancai siat una cosa dificili meda, e trabballosa, e fadiosa. Mancai siat una de cussas cosas ca parint impossibbilis. Ma in custa vida, a bortas fait a narai custu puru, e a bortas fait a ddu crei puru, no nci funt cosas impossibbilis, e no nci funt dannus diaici mannus chi no si podint aparixai. E custa, eia, est s'ispera prus manna chi tengu in su coru in dì de oi, e custu est s'augùriu prus mannu chi si potzu fai: cussu de arrannèsci, mancai, a torrai a partiri, prus a forti puru, chi fait, chi est possibbili, apustis chi nd'arrueis. Ca in custa vida su dannu no est a nd'arrui a terra (podit sucedi, diaderus, a totus), ma sa isfida prus manna, su giogu prus togu chi podeus fai, est pròpriu cussu de si ndi torrai a strantaxai, mancai no nci siat nesciunu chi fait su tifu po nosu, chi cumprendeis su chi seu circhendi de si narai, e chi mi permiteis de manigiai custus fueddus. E si naru totu custu, eia, candu seu currendi concas a sa de cincu domìnigu de caresima, e mi parit ca potzat essi una letzioni, dda tzerriu diaici, chi potzat cratzai, e beni puru, cun totus is sentidus chi mi bivu (e chi si biveus, in sa truma nci sticu a bosatrus puru) in custu perìodu innoi, pruschetotu, si depeus arregodai ca sa vida est fata puru de trumentus, e de sacrìficius, de daboris, e de partidas pèrdias (e no feti de partidas bintas, chi pròpriu si depu piscai un eseèmpiu de su mundu de su giogu de sa bòcia, chi, tra is atras cosas, est sèmpiri una cosa chi fatzu cun prexei mannu, su de acapiai is chistionis chi pertocant sa vida cosa nosta cun is chistionis chi nd'arribbant, deretas deretas, de is partidas chi si giogant, po noi mesis de sighiu, dònnia dònnia fini de cida). 

E po custa cida puru, deu creu de si podi narai ca apu spaciau cun totus is strollichiminis e cun totus is contus e is contixeddus chi tenia badda badda in conca. 

E duncas, chi seis de acòrdiu cun mei, deu ia a sighiri cun su gioghiteddu, ddu tzerriu diaici, chi seu fadendi de una pariga de cidas, e chi est cussu de andai a castiai, impari, cumenti funt cuncodradas is cosas po su chi pertocat sa cursa concas a su primu postu in totus is campionaus chi sigheus cun su giàssu de su Diàriu Sportivu, e megu a chistionai, intzandus, de is campionaus de s'Ecellenza, is duas listas de sa Promotzioni, is cuatru listas de sa Primu Categoria e is otu de sa Segunda Categoria. E sa cida passada, chi si ddu arregodais, in s'artìculu chi nd'est bèssiu giòbia de su dexennoi (e chi no si ddu arregodais, intzandus nci pentzu deu, desinò podeis andai a si ddu circai in su giàssu de su Diàriu Portivu etotu), emu acutu a si chistionai, feti, de cumenti funt cuncodradas is cosas in sa Lista A (e megu a chistionai, eia, de su campionau de sa Segunda Categoria, isperu chi siat bastanti craru), e immoi deu creu ca sa cosa mellus chi potzu fai est sighiri in cust'arrastu etotu, e duncas, eia, andaus a biri cumenti funt postas is cosas (ddi naru diaici, chi mi permiteis de manigiai custus fueddus a su mancu) in sa Lista B, e po su restu, eus a biri chi apa a acudi a lompi fintzas a sa Lista H, chi est s'ùrtima tra totus is otu, cumenti podeis cumprendi beni a solus. 
Po primu cosa, si bollu feti arregodai (mi iat a praxi a s'arregodai, po ddu narai mellus puru) ca in dì de oi, a is scuadras de sa Segunda Categoria ammancant feti cincu giorronadas po lompi a sa fini de sa stagioni regolari, e duncas, fadendi su contu ca custu domìnigu passau no nci funt stetias partidas (po su chi pertocat sa Segunda Categoria e feti sa Segunda Categoria) intzandus ant a depi giogai custu domìnigu chi est giai giai po nd'arribbai, est a narai, su de su bintitres de su mesi de marzu, e apustis ant a torrai a giogai su domìnigu avatu, chi at a essi su de su bintinoi; e duncas, apustis, nc'at a essi sa pausa (ddi naraus diaici, a trassa de cumenti si narat in italianu etotu) po sa festa de sa Pasca Manna (biat siat s'ora candu nd'at a lompi! Mi megu a solu a solu!), e apustis is de sa Segunda ant a depi giogai atras tres partidas, atras tres giorronadas: su doxi, su dexennoi e su bintises de su mesi de abrili. 
A contus fatus, is de sa Segunda Categoria ant a serrai is giogus po su chi pertocat su campionau e, duncas, po su chi pertocat sa stagioni regolari (cumenti seus costumaus a dda tzerriai) impari a is scuadras de s'Ecellenza e a is scuadras de sa Promotzioni puru. Sa stagioni regolari de is scuadras de sa Primu Categoria, invècias, s'at a serrai feti su dexi de su mesi de maju, ma tocat a narai puru ca is partidas finalis (cussas chi tzerriaus, a trassa de is ingresus etotu, partidas de is play-off) po is de s'Ecellenza e po is de sa Promotzioni ant a essi de prus, in cantidadi prus manna, e duncas eia, si iat a podi narai, puru, ca su mundu de sa bòcia in Sardìnnia si nd'at a studai, cumenti a dònnia annu, feti a sa fini de su mesi de maju. Ma de custu, podeis abarrai segurus, nd'eus a chistionai mellus mancai in su benidori. 

E torraus a nosu: in sa Lista B, a su primu postu, agataus is de su Cabuderra, sighius de Cadelano: is biancus-arrùbius tenint allogaus a su callenti, in buciaca, calincuna cosa cumenti a cincuantaduus puntus, chi ndi funt arribbaus gràtzias a dexesseti partidas bintas apitzus de bintunu bessidas, cun una partida feti chi ant serrau cun su resultau siddau in paridadi. Is de su Cabuderra, fait a narai custu puru immoi chi nci seus, ant pèrdiu feti po tres bortas, e castiendi is numerus chi nd'ant pesau, chi funt stètius bonus a ndi pesai fintzas a oi, si nd'acataus ca tenint s'atacu prus forti, cun sessantunu gol pesaus in totu, a su mancu fintzas a immoi, e ant incasciau, nd'ant bodditu feti sexi gol, chi benit a essi prus pagu de unu gol a partida, a fai sa media matematica, cumenti si iat a podi tzerriai, a trassa de s'italianu etotu. 
Is de su Cabuderra tenint, intzandus, noi puntus in prus de is chi tenint is de su Domunoas, chi agataus a su segundu postu de sa lista, cun corantatres puntus, chi nd'ant cassau gràtzias a trexi partidas bintas e a cuatru partidas chi ant serrau cun su resultau in paridadi. A narai sa beridadi, e immoi chi nci seu mi tocat, a su segundu postu ddoi fiant, po una biga de cidas de sighiu, is de sa Frassinetti de Su Masu, ca peròu in dì de oi s'agatant a su de tres postus, cun coranta puntus in mancu de is chi tenint is primus de sa classi, e cun feti tres puntus in mancu de is chi tenint is de su Domunoas. E duncas, fadendi su contu ca po serrai sa stagioni, cumenti s'apu giai arremonau, de su restu, ammancant feti cincu giorronadas (cun calincuna cosa cumenti a cuindixi puntus in su pratu), parit craru ca is de sa Frassinetti funt giai giai aforas de sa cursa po ndi cassai su primu postu, ma calincuna cosa in prus s'at a cumprendi a sa fini de sa giorronada de partidas chi s'at a giogai custu domìnigu. Is cabuderresus tenint is cartas prus bonas po ndi cassai sa bìncida de su campionau e, duncas, s'artziada in su campionau de sa Primu Categoria, ma no si ndi podeus scaresci ca ddoi ant a essi partidas chi ant a balli po is play-off puru in su campionau de sa Segunda Categoria, e duncas, eia, su segundu postu at a balli cumenti s'oru. Fait a narai ca, po su chi pertocat sa Lista B, s'ant a giogai su segundu postu is de su Domunoas, is de sa Frassinetti ma at a tocai a ponni in sa truma, in sa lista, puru is de su Cortoghiana, chi tenint allogaus in buciaca trintanoi puntus, e chi funt unu in mancu de is chi tenint is de su Domunoas. Immoi, custu domìnigu chi nd'at a arribbai (chi su Cielu at a bolli) is de su Cabuderra si dda ant a depi biri, in domu cosa insoru, contras a is ùrtimus de sa lista de sa Fermassenti, chi ant pèrdiu po dexennoi bortas apitzus de bintunu bessidas, e nd'ant cassau feti duus puntus fintzas a immoi; custu bollit narai, mi parit bastanti craru puru, ca is de sa Fermassenti no ant bintu, no funt arrannèscius a binci nemmancu una partida. Is de su Domunoas si dda ant a depi biri in domu de is de su Cortoghiana, chi eus arremonau pròpriu immubagora, po una de is partidas prus togas, e de importu prus mannu po su chi pertocat sa cursa concas a su segundu postu. 

E intzandus, podeus sighiri e andai a castia, impari, cumenti funt postas, invècias, is cosas in sa Lista C: a su primu postu, intzandus, agataus is de su Santu Basibi, sa scuadrixedda, bona meda, chi nd'ant pesau in Gomajori, e chi tenit allogaus in buciaca calincuna cosa cumenti a cincuantacuatru puntus, e chi ndi funt arribbaus gràtzias a dexesseti partidas bintas e a tres partidas chi ant serrau cun su resultau in paridadi; a fai is contus nci poneus pagu meda, e intzandus custu bollit narai ca is de su Santu Basibi ant pèrdiu feti una partida fintzas a oi, e seus chistionendi de sa isfida chi ant giogau su duus de su mesi de donniassantu, in domu de is de sa Monreale de Santu 'Engiu, e chi s'est serrada cun su resultau, de importu mannu, de cincu a duus po is biancus-arrùbius. Is de su Santu 'Engiu s'agatant, in dì de oi, a su segundu postu de sa lista, cun corantaseti puntus in totu, chi funt, a fai is contus nci poneus un àtimu, seti in mancu de cussus chi tenint is primus de sa lista. 
A su de tres postus in sa lista agataus is de su Seulo, cun corantatres puntus, est a narai undixi in mancu de cussus chi tenint is primus de sa classi (e duncas, po is de su Seulo, podeus narai custu puru immoi chi nci seus, sa cursa po ndi cassai su primu postu est giai giai serrada, est a narai ca est dificili meda chi potzant torrai a recuperai cussu tanti de puntus, fadendi su contu ca ammancant feti cincu giorronadas a sa fini), ma ndi tenint cuatru in mancu de is de sa Monreale, e duncas, eia, po sa cursa concas a su segundu postu depeus fai su contu ca sa scuadra innoi giogatTore Boi, unu de is giogadoris prus matucheddus (e chistionu de s'edadi, mi parit bastanti craru, berus est?) chi nci funt in dì de oi in su campionau de sa Segunda Categoria, e de seguru est unu de cussus chi nd'at pesau sa cantidadi prus manna de gol in totu custu tempus, iat a podi ancora narai s'ùrtimu fueddu apitzus de sa chistioni, cumenti si iat a podi narai. 
E tantu ballit, mi megu a solu a solu, ca in sa truma de scuadras chi funt currendi po ndi cassai su segundu postu (ca cumenti s'apu narau immubagora, at a balli po ndi cassai sa possibbilidadi de si giogai is partidas finalis, e duncas, sa possibbilidadi de ndi piscai, ddi naru diaici, unu postu po su campionau de sa Primu Categoria chi s'at a giogai in su benidori, est a narai, s'annu chi at a benni, cun sa stagioni de su duamilla e bintises – duamilla e bintiseti) nci poneus puru is de su Scalepranu, cun calincuna cosa cumenti a trintaseti puntus in buciaca, chi, est berus, funt dexi in mancu de is chi tenint is de sa Monreale, ma chi fadeus su contu ca in su pratu nci funt ancora atrus cuindixi puntus (cumenti s'apu giai arremonau, de su restu), intzandus is de su Scalepranu podint sighiri a isperai, mancai su bisu cosa insoru siat meda dificili de cassai, chi mi permiteis de manigiai custus fueddus e chi cumprendeis su chi seu circhendi de si narai. 
E immoi, in sa giorronada chi s'at a giogai pròpriu custu domìnigu, is de su Santu Basibi ant a torrai sa visita (cumenti si narat, a trassa de cumenti si narat in italianu etotu) a is de su Lunamatrona; po is de sa Monreale de Santu 'Engiu, invècias, nc'at a essi sa partida, in domu cosa insoru etotu, contras a is de su Sardara. Is de su Seulo, invècias, e mancu a ddu fai aposta, pentzendi a su chi apu scritu immubagora, ant a depi giogai sa isfida, in domu cosa insoru, contras a is de su Scalepranu: est craru, duncas, ca chi is allenus no depessint binci, intzandus ndi iant a bessiri aforas de sa cursa po su segundu postu; e duncas, eia, si iat a podi narai ca est una de is ùrtimas ocasionis chi tenint po circai de s'acostai a is de sa Monreale. Eus a biri, duncas, cumenti ant a andai is cosas: a su campu, cumenti a sèmpiri, at a spetai, at a tocai s'ùrtimu fueddu. 
A contus fatus, e sigheus a andai ainnantis in su pròpriu arrastu, e mi parit bastanti craru, sa cursa po sa bìncida de su campionau in sa Lista D benit a essi una de is prus spassiosas in totu su mundu de sa Segunda Categoria, e po si ispiegai su motivu, intzandus, nci pongu pagu meda: a su primu postu de sa lista agataus duas scuadras, cun corantunu puntus in buciaca, e seus chistionendi de is de su Circulu Ricreativu de s'Arborea, e de is de su Marrubiu: is duas scuadras tenint trexi partidas bintas, duas partidas chi ant serrau cun su resultau in paridadi, e po ses bortas ndi funt arrutus, est a narai, duncas, ca ant acabbau sa partida chentza de nemmancu unu puntu. A narai sa beridadi is de s'Arborea ant fatu medas cidas de sighiu a su primu postu a solus a solus, e deu chi seu sighendi sa stagioni cosa insoru, po su trabballu, est craru, pentzamu ca si podessint stesiai, in pagu tempus, de totus is atras scuadras, cumenti de su restu est sucedendi a is scuadras chi s'agatant a su primu postu de sa lista me is atras tres listas chi eus castiau fintzas a immoi (e megu a chistionai, est bastanti craru, de sa Lista A, de sa Lista B e de sa Lista C), e invècias, is grogus-asullus ant pèrdiu cuatru partidas totu paris, est a narai, s'una avatu de s'atra, in custas ùrtimas cuatru bessidas; e in prus, si potzu narai ca in custas otu partidas chi si funt giogadas immoi po sa lista de sa torrada (is cuaddus bonus si biint a sa torrada, de su restu, cumenti narat su dìciu chi s'apu arremonau pròpriu a s'incumintzu de custu artìculu etotu) ant pèrdiu puru contras a is de sa Folgore de Aristanis (una scuadra chi s'agatat, in dì de oi, me is partis bascias de sa lista; e in su mundu de su càlciu, duncas, podit sucediri ca una scuadra chi s'agatat in acua lègias podit arrannèsci a binci contras a una scuadra chi s'agatat in artu, mancai a su primu postu), po cincu partidas pèrdias apitzus de custas ùrtimas otu bessidas. 
E duncas, is de sa Cr Arborea ant bintu feti po duas bortas in custus ùrtimus duus mesis: in sa partida chi ant giogau in domu de is de su Gesturi (fiat s'undixi de su mesi de gennàrgiu) e in domu cosa insoru, contras a is de su Simàghis, chi ant fatu unu bellu arrogu de custa stagioni in artu in sa lista, me is primus duus postus, ma immoi s'agatant, invècias (e giai giai no fait a ddu crei, ma su giogu de sa bòcia andat pròpriu diaici, ca po ndi cabai in basciu, po nd'arrui, e mabi meda, bastant duas o tres partidas mesu trotas) a su de ses postus de sa lista, cun noi puntus in mancu de cussus chi tenint is primus de sa classi. Totu beni, invècias, po is de su Marrubiu, ca po su chi pertocat is partidas de sa torrada ant bintu po ses bortas apitzus de otu bessidas, e ant serrau in paridadi, cun su resultau de unu a unu, sa isfida contras a is de s'Ales e ant pèrdiu in domu cosa insoru sa partida contras a is de s'Oratoriu de Terraba (un'antra de cussas scuadras, mancu a ddu fai aposta, ca s'agatant in dì de oi a curri po ndi cassai sa sarvesa). 
In cursa po su primu postu de sa lista agataus puru is de sa Busachese (sa scuadra chi nd'ant pesau in Busache, e gei si cumprendit beni de su nomini, deu creu), cun coranta puntus e duncas, eia, cun feti unu puntixeddu in mancu de is primus de sa classi, e no si ndi podeus scaresci de is de s'Ales, chi tenint trintanoi puntus, cun is de su Meana Sardo, chi s'agatant a su de cincu postus cun trintases puntus. E immoi, custu domìnigu chi at a benni, is de su Marrubiu si dda ant a depi biri pròpriu contas a is de sa Busachese, in domu allena; e is de su Circulu Ricreativu ant a circai de torrai a binci una partida, in domu cosa insoru, contras a is de s'Atzara. Is de su Meana ant a circai de abarrai apicigaus a su trenu (ddi naraus diaici, a trassa de cumenti si narat in italianu etotu) de is primus de sa classi, fadendi su contu ca ant a depi arriciri sa visita de is de su Ruinas, chi peròu, po su chi ddis pertocat, funt circhendi de ndi cassai sa sarvesa, e duncas, eia, issus puru nd'ant a bolli ingolli is tres puntus prenus. E serraus sa chistioni acapiada a sa Lista D cun sa partida chi is de su Simàghis ant a depi giogai contras a is  de su Sini Masullas, in domu cosa insoru etotu. 

E duncas, andaus ainnantis, po su chi fait, po su chi acudu, po su logu chi ancora m'abarrat de preni po s'artìculu de custa cida, cun is contus acapiaus a sa Lista E, e megaus a chistionai, est craru, sèmpiri de su campionau de sa Segunda Categoria. E intzandus, in custa lista is giogus po su chi pertocat su primu postu funt giai giai bellus ca fatus, bellus ca serraus, fadendi su contu (e no ddis bollu portai sa sfortuna, e sa maba sorti, cun custus fueddus, e isperu chi potzat essi craru) ca is de su Bunnànnaru tenint, allogaus in buciaca, calincuna cosa cumenti a cincuantases puntus, e chi funt otu in prus de is chi tenint is de su Minerva, sa scuadra chi nd'ant pesau in Biddanoa Monteleone: is primus de sa classi funt arrannèscius a ndi cassai calincuna cosa cumenti a dexiotu partidas bintas apitzus de bintunu bessidas giogadas in totu, cun feti duas partidas chi ant serrau cun su resultau in paridadi, e una partida pèrdia, pròpriu contras a is de su Minerva, in sa isfida chi s'est giogada su catodixi de su mesi de idas, cun is meris de domu chi nd'ant cassau is tres puntus gràtzias a su resultau de tres a unu, togu meda, a narai sa beridadi, chi funt arrannèscius a ndi pesai me is noranta minudus de giogu. Is de su Minerva, intzandus, ant bintu fintzas a oi cuindixi partidas (e no funt pagus de seguru), cun tres partidas serradas cun su resultau in paridadi e, peròu, tenint puru tres partidas pèrdias. Cun corantunu puntus agataus is de su Putumajore, ca s'agatant a su de tres postus de sa lista, est berus, ma cun calincuna cosa cumenti a cuindixi puntus in mancu de is chi tenint is de su Bunnànnaru, e duncas, eia, si iat a podi narai ca po ndi cassai su primu postu de sa lista ddoi funt feti duas scuadras, poita is de su Putumajore iant a depi binci totus is cincu partidas chi ammancant po acabbai sa stagioni regolari, e a narai sa beridadi no nci iat a essi nudda de strambu, nudda de impossibbili, ma su chi benit a essi dificili meda est su fatu ca is de su Bunnànnaru iant a depi perdi totus e cincu is partidas chi depint giogai, e fadendi su contu ca, cumenti s'apu giai arremonau, cust'annu ant pèrdiu feti po una borta, intzandus benit a mabi feti a ddu pentzai, e si cumprendit beni. E duncas, chi po sa cursa po ndi cassai su primu postu ddoi funt feti duas scuadras, in dì de oi, chi tenint is cartas bonas po arribbai fintzas a sa fini, ddi naru diaici, isperendi ca si cumprendat su chi si bollu narai, po sa cursa po su segundu postu de sa lista nci podeus ponni puru is de sa Calmedia de Bosa, chi tenint trintanoi puntus, noi in mancu de is chi tenint is de su Minerva etotu, e is de su Borore puru, cun undixi puntus in mancu de is chi tenint, torra, is de su Minerva. Is de su Bunnànnaru, immoi, in sa partida chi s'at a giogai pròpriu custu fini de cida, si dda ant a depi biri contras a is meris de domu de su Sedilo; po is de su Minerva, invècias, nc'at a essi de giogai sa partida in domu cosa insoru etotu contras a is de su San Nicola de Otieri.



Attività realizzata col contributo della Regione Sardegna. IMPRENTAS 2025-2026. LR 22/2018 art. 22