Giovanni Malagò est prontu a scumiti: «Sa Sèrie A at a torrai a partiri de sicuru, ma apustis nc'at a essi de biri chi arrannescint diaderus a serrai is giogus»

Sa nova est aproillada aforas feti de una pariga de diis, est berus, ma is primus cummentus funt giai arribendi: su prexu est mannu e, de su restu, si cumprendit beni su motivu.
Su mundu de sa bòcia de sa Sèrie A no est una cosa de importu feti po is tifosus, chi comentecasiat funt medas e no bint prus s'ora de torrai a fai su tifu e nci passai su tempus castiendi is grandus campionis currendi in campu. Po imoi, est berus, seus a depi acuntentai de dhus su sighì a sa televisioni, poita, est craru, is partidas s'ant a giogai a portas serradas, est a nai chenza de su prùbbicu: est unu pecau, po unu giogu chi bivit e contat apitzus, puru e pruschetotu, de is sentidus de sa genti, ma no si ndi podeus scaresci chi cussu mabi chi si nd'est protziu apitzus custu ierru no d'eus ancora bintu. Mellus de nudda, si narat.

Contendi su muntoni de dinai chi Juventus, Inter, Milan, Roma, Làzio e totus is atras sotziedadis ndi pesat dònnia annu, difatis, su fatu chi su campionau potzat torrai a partiri, cumenti eus giai nau, su trexi de su mesi de Làmpadas, fait prexei puru a totus is atrus sportivus.
Seus chistionendi de una de is asiendhas prus mannas chi nci funt in Italia e, forcis, in Europa: fai is contus de cantus euros torrant agoa, a su Guvernu, cun is tassas, est fatzili.

Podeus scumiti ca, chi sa Sèrie A torrat diaderus a partiri cumenti funt narendi, ant a arribai prus agiudus po totus, chistionaus de is professionistas ma diaici puru de is diletantis, una cosa chi no ballit feti po su giogu de sa bòcia ma po totus is atrus chi dhoi funt.

Agoa de is timorias po sa mobodia e po su virus, difati, nc'at a essi de arrangiai is dannus a s'economia, e scieus giai chi no ant a essi pagus. Pròpriu po custu no faint spantu is fueddus, tra is atrus, de Giovanni Malagò, su presidenti de su Cumitau Olimpicu Natzionali Italiano, chi no cuat is afrodius: «Cantu possibilidadis nci funt chi sa Sèrie A torrit a partiri? A parri miu seus a su norantanoi po centus — at scoviau in d-una ciaciarrada a sa radio  — ma apustis at a tocai a biri chi arrannescint diaderus a serrai totus is giogus. Po dhu sciri imoi iat a serbiri unu deinu».



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020