Is nobas de is scuadras sardas: su Crabònia agatat domu in Silicua, su Murera imprassat Mancosu

Funt duuas, a su mancu diaici si parit de cumprendi, is chistionis prus callentis po custa cida, chi at acabbai pròpriu cun sa festa de s'Assunta, su cuìndixi de Agustu (est a nai domìnigu chi benit), chi est sa dì chi ballit, prus o mancu, po saludai s'arribbu de sa mitadi de s'istadi, chi est sa stagioni chi totus stimaus de prus e, mescamente, custa de su duamilla e bitunu est un'istadi chi eus disigiau meda de si bivi, po tantu tempus, una cosa chi ballit po is mannus e is piticus, pruschetotu chi fadeus su contu chi eus passau calincuna cosa cumenti a noi mesis (fortzis de prus puru...), me is ùrtimus duus annus, tupaus in domu, in assètiu, diaici dhu tzerriaus, est a nai chenza podi bessiri de is aposentus o de is corratzedhus (po is prus fortunaus chi dhu tenint), chenza podi andai a su bar, po nd'arramonai unu, po si bufai unu cafè impari a is amigus, e intzandus est pròpriu po custu motivu chi custus tres mesis chi seus bivendi (e chi funt bobendi, aici si parit a su mancu, de cantu funt currendi allestru), tenint unu tastu diaici druci chi fortzis is fuedhus no bastant po du contai. Chi s'istadi est sèmpiri stètia sa stagioni de s'allirghia, cussa de cust'annu si parit una grandu festa, mancai feti poita si ndi podeus andai in giru me is bias e me is pratzas chenza depi portai, a totu dì, cussa tialu de carotedha cravada in pitzus de su nasu e de sa buca (e diaici, no si parit mancu berus, podeus torrai a si chistionai, s'unu cun s'atru, castiendusì in faci), e poita seus torrendi a fai is cosas chi si praxint de prus, cumenti andai a badhai in cussas chi, in italianu, tzerriaus "discoteca", o andai a si biri unu cuncertu. Po su restu, custa cida noba chi nd'est brintada feti de una pariga de oras parit giai callenti meda: nc'est chi narat puru chi at a essi una de is cidas prus tostadas, po su chi pertocat is temperaduras, e eus a depi aturai atentus a no pigai tropu sobi a su megama, po nd'arremonai una, e eus a depi bufai prus acua de su chi fadeus me is atrus mesis. Nudha de nou, a nai sa beridadi: funt sèmpiri is pròprius cosas chi intendeus dònnia, dònnia annu in custu periodu e chi si arrapitint fatu fatu. Ma dhu scieus beni cumenti andant is istadis innoi in Sardìnnia, e fortzis chi no ci fessit totu custa basca, medas de nosus iant a abarrai a totu dì prangi prangi po su tempus mau, e intzandus no podeus fai atru che apoderai, cun coru forti e passientzia, (custu ballit po chini at a depi abarrai in logu de bidha o de citadi), o, po is prus fortunaus chi tenint sa possibilidadi de spreviai in logu de monti o de mari, nosu speraus chi su spàssiu siat meda, e su coru prenu de prèxiu. In s'interis chi s'istadi sighit a andai ainnantis, arribbant nobas, dònnia dònnia dì, apitzus a sa chistioni, callenti cumenti custus megamas in su mesi de Agustu, chi pertocat su chi tzerriaus "green pass", chi est su paperi chi at a serbiri po brintai me is logus pubbricus. Su documentu, cumenti scieus beni, at a tocai a totus cussus (mannus e piticus, est craru) chi tenint fata a su mancu sa primu puntura de su vacinu, o a totus cussus chi nd'ant pigau s'influèntzia e ndi funt giai sanaus a solus. Is cosas funt andendi cumenti pentzastust: est a nai chi su "green pass" at a essi una cosa de importu mannu po sighiri a bivi impari a totus is atrus, ma is dudas apitzus a sa chistioni no funt pagus: ita nd'at a essi, difatis, de totus cussus chi, po unu motivu o po un'atru, no du tenint fatu? Est sa chistioni de importu prus mannu de custa ùrtimas diis, a su mancu diaici si parit; una chistioni chi is de su Guvernu funt circhendi de sighiri cun atentzioni e chi ancora no est crara. Is leis nobas (cun is òbbrigus) ballint de su ses de Agustu, est a nai de cenabara passau, ma po imoi is strobus po sa genti funt pagus, poita nci funt ancora una biga manna de logus innoi si podit brintai chenza tenni su green pass, cumenti is supermercaus, po nd'arremonai unu; no si cumprendit ancora beni, invecias, cumenti funt andendi (e pruschetotu cumenti ant a bandai) is cosas po is trasportus de is cristianus. De su chi si cumprendit in dì de oi, a cantu parit a partiri de sa primu dì de su mesi de Cabudanni su green pass at a serbiri, est a nai at a essi obbrigatòriu, po ndi artziai apitzus de is trenus o de is traghetus; a cantu narant, peròu, su green pass no at a serbiri po ndi artziai apitzus de is pulman (cumenti si tzerriant in italianu) me is citadis. Abarrat ancora de cumprendi cumenti ant a andai is cosas me is scolas: po imoi, a cantu parit, su green pass (e duncas sa puntura de su vacinu) at a essi obbrigatòriu po totus is maistus, is professoris e cussus chi dhoi trabballant, ma no po is piciochedhus. Su "green pass" serbit giai de imoi, peròu, po brintai me is bibbliotecas, e calincunu est pentzendi de du ponni obbrigatòriu puru po brintai me is aposentus de is universidadis, ma is cosas s'ant a cumprendi mellus feti tra una pariga de cidas. Po imoi, su chi scieus est chi nc'at a bolli su paperi po brintai a si biri unu cuncertu, o po si papai unu pratu de pasta, o de arrosu, me is logus serraus de is ristorantis; nareus chi po imoi, chi nci funt coranta gradus de is noi de su mengianu fintzas a is otu de su merì, no teneus pròpriu totu custa gana, totu custu bisòngiu de si tupai me is aposentus, antzis, sa cosa chi si spedhiat de prus, aici si parit de cumprendi, est de si pigai sa friscura, po cantu est possibbili. Intzandus, nd'eus a chistionai mellus tra una pariga de cidas, po imoi podeus puru si permitiri de pentzai a atru, ma podeus puru incumentzai a nai chi su green pass at a serbiri po brintai me is campus innoi si giogat a bòcia puru, e at a balli po is giogadoris e po is tifosus puru,  po sa Sèrie A e po totus is atrus campionaus prus pitichedhus. Una de is dudas chi abarrant badha badha in sa conca de sa genti est: candu, e pruschetotu cumenti, ant a torrai a partiri is giogus po is scuadras sardas de bòcia? Po imoi, su chi si parit craru, puru castiendi a totu is trabballus chi is assòtzius funt fadendi in su mercau, est chi is campionaus de is scuadras de sa Sèrie D e de s'Eccellenza ant a torrai a partiri de seguru, isperendi sèmpiri chi is giogus potzant sighiri chenza strobus e arribbai a sa fini, cosa chi s'annu passau no est sutzedia pròpriu cumenti bisastus, chi est berus, cumenti si arregodaus beni, chi po is giogus de s'Eccellenza, po nd'arremonai una, de dexiotu scuadras chi dhoi fiant a s'inghitzu de sa cursa, ndi funt abarradas feti otu chi, in su mesi de Maju e in su mesi de Lampadas, si funt giogadas s'artziada in Sèrie D. Me is ùrtimas oras funt arribbendi nobas po su chi pertocat is trabballus in sa fentana de su mercau po is scuadras de sa Promozione, ma pagu si sciri ancora apitzus de is scuadras chi ant a curri in cussa chi tzerriaus Primu Categoria e mescamente in cussa chi tzerriaus Segunda Categoria: po imoi podeus feti nai chi funt ancora obertas is iscritzionis po is campionaus de s'annu duamilla e bintunu \ duamilla e binti duus, e feti candu ant a essi serradas (est a nai feti candu su tempus po si iscriri at a essi acabbau) eus a podi fai totus is contus apitzus de is campionaus. Po imoi, difatis, no scieus beni cantu scuadras funt abarradas in peis apustis de cussa chi eus imparau beni a tzerriai "pandemia", unu trumentu mannu e legiu po sa saludi de sa genti, est craru, ma puru po is buciacas de is cristianus, cun d'una biga de genti chi nd'at depiu sciusciai is pròprias aziendhas e bai e circa cantu dinai ant agatai is sociedadis (po is chi tzerriaus "sponsor", cumenti narant is ingresus) po ndi pesai sa stagioni noba, poita scieus giai chi me is bidhas prus pitichedhas no at a essi una faina facili. Ma po oi obeus sighiri a castiai a su benidori cun su coru prenu de isperas fintzas a cucuru. In s'interis, mercuis passau, est a nai su cuatru de su mesi de Agustu, is de sa FIGC nd'ant fatu bessiri aforas totu sa lista de règulas chi ant a balli po sa stagioni chi at a benni e chi ant a serbiri po cumbati contras a su spaniamentu de su tialu de su virus, chi si parit, ancora, sèmpiri sa pròpria cantzoni. Apustis de essi nau totu custu, podeus castiai mellus cumenti funt andendi is cosas po is scuadras sardas: cun sa bòcia frima, in s'istadi, e dhu scieus, s'afrodhiu prus mannu po is tifosus nd'arribbat de is cropus (diaici si narant, diaici dhu sus tzerriaus a su mancu) chi is presidentis de is assòtzius funt sparendi in su mercau. Po oi, duncas, boleus partiri cu is de su Crabònia, chi ant a giogai torra, po un antru annu de sighiu, in su campionau de Sèrie D, cun sa "Commissione di Vigilanza" (diaici si tzerriat, in italianu) chi nd'at sciusciau su chi iant nau is de su Co.Vi.So.D e nd'at aculliu su recursu de is minerarius, chi ant a giogai is partidas in domu, po totu su duamilla e bintunu \ duamilla e binti-duus, in su campu de Silicùa, chi est stètiu pigau po bonu de is de sa Commissioni, cumenti ant fatu sciri is de su Cunsillu Diretivu de sa Lega Natzionali de is Diletantis. Diaici, su Crabònia podit sighiri a trabballai po cuncodrai sa rosa chi at a curri in su campionau chi at a benni: is crais de sa scuadra, seus chistionendi, est craru, de s'allenadori, ant a tocai torra a David Suazo, chi totus si arregodaus cun sa camisedha de su Castedhu, una pariga de annus fait, in Sèrie A. Is de su Crabònia, duncas, apustis de su de noi postu cassau in sa lista a sa fini de is giogus, ant a curri torra, po su segundu annu de sighiu, impari a is atras scuadras mannas de sa Sèrie D; Suazo at a podi contai apitzus, tra is atrus, de su difensori – centrucampista Marco Russu, de su centrucampista Nicola Serra e apitzus de su portieri Valerio Bigotti, chi ant scerau de abarrai cun is biancus – asullus po un antru annu puru. No mancant peròu is primas facis nobas in sa scuadra, partendi de Alessio Murgia, unu centrucampista forti meda, chi at giogau puru impari a is de s'Olbia e de su Budune, chi iat giai trabballau cun Suazu a is tempus de su Castedhu, candu Murgia giogàt in sa scuadra de is piciochedhus piticus. Puru is atrus duus giogadoris chi funt arribbaus imoi gratzias a sa fentana oberta de su mercau tenint un'esperièntzia bona e toga meda cun sa scuadra de is giòvunus de su Castedhu: seus chistionendi de Fabio Doriatotto, nasciu in su milli e noicentus noranta-cincu, chi nd'arribbat apustis de is campionaus giogaus cun is camisedhas de is de su Chions e de sa Sanremese, e de su portieri Mirko Atzeni, nasciu in su duamilla e duus, chi in s'ùrtimu campionau at giogau impari a is de s'Atletico Fiuggi. In s'interis, nd'arribbant nobas de importu mannu puru po is de su Tempio, cun s'assotziu chi passat me is manus de Salvatore Sechi, chi est, diaici, su presidenti nou de sa scuadra. Sechi at lassau is crais de sa Torres apustis de cuatru annus e imoi bolit fai de totu po donai una manu de agiudu a is tempiesus, chi s'agatant a curri in su campionau de Primu Categoria, ma is tifosus bisant de torrai chitzi me is campionaus de importu prus mannu, in Sardìnnia e mancai aforas de s'isula puru, fadendi su contu chi is de su Tempiu ant giogau calincuna cosa cumenti a trexi campionaus in Sèrie C, de su milli e noicentus otanta-seti fintzas a su duamilla. Is asullus isperant sèmpiri de ci artziai in Promozione cun cussus chi, in italianu, si tzerriant "ripescaggi", ma po sciri cumenti ant a essi pesaus e cuncodradus is campionaus ant a serbiri a su mancu un'antra pariga de diis. Po su chi pertocat s'allenadori, is ùrtimas boxis chi ndi funt aproilladas aforas chistionant de Carlo Nativi, chi at giogau cun sa camisedha asulla in Sèrie C e puru in Eccellenza, e chi at trabballau, me is ùrtimus annus, impari a is de su Luogosanto. Custus, duncas, funt is primus fuedhus de Sechi, chi contat: «Apu acabbau de trabballai cun sa scuadra de sa citadi cosa mia, e duncas apu scerau de sighiri sa storia cosa mia in su mundu de sa bòcia, impari a totus is dirigentis de su Tempio. Su de biri sa scuadra frima ancora in Primu Categoria mi donat disprexei meda, e pentzu chi ballat su pròpriu po totus is tifosus. Custa scuadra est sèmpiri stètia unu bantu po totu su mundu de su sport de sa Sardìnnia, e apa fai de totu po dhus agiudai a torrai a giogai me is categorias prus artas. No podemu agatai unu logu po trabballai chi podessit essi mellus de custu; nc'est sa gana de ndi pesai una bella scuadra, nc'est meda afrodhiu e no potzu che essi cuntentu de essi innoi». Unu de is cropus prus mannus in su mercau, seus chistionendi sèmpiri po su chi pertocat custa cida e, mescamente, is ùrtimas oras, nd'arribbat de is de su Murera, chi ant agatau unu acapiu, po sa stagioni chi at a benni, cun Matteo Mancosu, unu de is giogadoris sardus prus fortis chi s'agatant in dì de oi, chi pentzaus chi Mancosu at giogau me is ùrtimus annusin Sèrie B, impari a is de sa Virtus Entella. Mancosu, pròpriu impari a is de sa Virtus, iat bintu su campionau de Sèrie C in s'annu duamilla e dexiotu \ duamilla e dexianoi. Mancosu, chi est nasciu in su milli e noicentus otantacuatru, at giogau puru in su campionau de su Canada. S'annu passau at acutu a giogai calincuna cosa cumenti a dexiaseti partidas, cun cincu gol fatus. Mancosu torrat torra in Sardìnnia apustis de undixi annus, e at a essi unu de is giogadoris prus fortis (antzis, su prus forti) in s'atacu de is grogus-brau, impari a Sergio Nurchi. In Sardinnia, Mancosu at giogau impari a is de s'Atletico Calcio (fiant is primus annus de su duamilla), apustis nc'st stètia s'esperièntzia impari a is de sa Nuorese, e in su duamilla e ses s'acapiat cun is de sa Villacidrese, chi in cuss'annu curriànt in su campionau de sa Sèrie D. Pròpriu cun sa Villacidrese de Bernardo Mereu, Mancosu fait calincuna cosa cumenti a dexiotu gol in trinta-duus bessidas, e ndi artziat diaici in cussa chi in italianu si tzerriat "Seconda Divisione". Pròpriu cun sa scuadra de Biddaxidru giogat po sa primu borta in su campionau de is professionistas, cun seti gol pesaus in binti-duus partidas. Mancosu intzandus andat a giogai in continenti (cumenti tzerriaus s'Italia nosu sardus), impari a is de su Latina, cun cincu gol in binti bessidas, e apustis impari a is de su Vigor Lamezia, cun binti gol in buciaca chi ballint po s'artziada de categoria. Cun su Trapani, Mancosu sighit a giogai beni meda, poita est su giogadori chi arrannescit a fai prus gol de totus, in Sèrie C, cun cuindixi gol pesaus in binti bessidas, chi ballint po s'artziada in Sèrie B. In su duamilla e trexi, sèmpiri cun sa camisedha de su Trapani, arrannescit a fai calicuna cosa cumenti a binti-ses gol in coranta partidas. Puru in s'annu chi benit apustis, Mancosu sighit a fai beni meda su trabballu cosa sua, chi est cussu de fai is gol: funt dexi, pesaus in dexianoi bessidas, diaici is de su Bologna decidint de dhu comperai, e impari a is arrubius-brau ndi artziat fintzas a sa Sèrie A, innoi agatat puru su primu gol in su campionau prus mannu chi nc'est in Italia. Mancosu peròu at a serrai sa stagioni impari a is de su Carpi, cun d'unu gol. In su duamilla e sexi bolat fintzas in Canada, po giogai impari a is de su Montreal Impact. In su mesi de Gennargiu de su duamilla e dexianoi, Mancosu nd'aproillat at sa Virtus Entella, cumenti eus nau, e imoi incumentzat una storia totu noba impari a is sardus de su Murera.
 

Attività realizzata col contributo della Regione Sardegna. IMPRENTAS 2020-2021. LR 22/2018 art. 22