A s’Arzachena no lu firmat nemos in domo sua, finas sa Nuorese ruet a in antis de sa lege de su Biagio Pirina

Un’Arzachena “Bator pro bator” si nche leat su derby contra de sa Nuorese, pigat una positzione e ismesat su disvantàgiu dae sa cabulista chi est torrada a èssere s’Ostiamare. Su “Bator” est pro su nùmeru de sas bìnchidas fatas in domo dae sos ismeraldinos de sas bator giogadas in su Biagio Pirina, su “pro bator” est pro sa tratzione anteriore de unu che a Andrea Sanna decisivu in su 90’ cun unu iscatu serradu cun unu “collo” deretu anguladu chi at fatu ballare su pòpulu biancu-birde a un’anca sola semper prus gosende de sas impresas de s’iscuadra de Giorico. Sa Nuorese ingollit sa prima derruta istajonale disfrutende male su vantàgiu de Cappai chi diat àere abertu sa bia intamas de la istrobbare. Pro sos birde-asulos su rescatu podet arribare luego bidu chi a su Frogheri arribat s’Ostiamare.