Sa Copa Italia arreggalat giai is primus ispantus e custu fini e cida is scuadras torrant in campu po is campionaus

E duncas, atacu a scriri custas rigas su mengianu de su tres de su mesi de Cabudanni, mancai siat berus, puru, ca s'artìculu chi ndi seu pesendi at a bessiri a pillu (cumenti apu sèmpiri intèndiu narai de sa bon'anima de mamma mia) feti su doxi, sèmpiri de su mesi de Cabudanni. Ma de su restu, e custa est una cosa chi mi seu arrepitendi fatu fatu meda, cumenti narat su dìciu, chi tenit su tempus po fai una cosa no iat a depi abertai chi nd'arribbit sa dì apustis, ma si iat a depi feti arramangai is manigas e si nci fuiai, a fundu 'e susu (cumenti si narat, a su mancu, innoi in bidda mia, chi est Bidd'e Sorris), in sa faina chi depit sighiri. 

E duncas, fadendi su contu ca, in dì de oi (megu a chistionai de oi, chi est su tres de su mesi de Cabudanni, cumenti s'apu arremonau ainnantis, e mi parit craru puru ma si ddu torru a arrapiti, ca mancai calincunu de bosatrus est perdendi su contu cun totus custus numerus e totus custas datas) is campionaus no funt ancora torraus a partiri, e fadendi su contu, duncas, ca tèngiu ancora cussas parigas de oriteddas libberas (una pariga a sa sarda, si cumprendit), scapiadas, ancora po una cidixedda, de su trabballu mannu chi apa a depi sighiri de su cuindixi de su mesi de Cabudanni (candu ant a torrai a incumentzai is giogus po is scuadras chi currint in sa lista de s'Ecellenza e mescamente me is duas listas de sa Promotzioni), e fintzas a s'acabbu de sa stagioni de su duamilla e binticuatru – duamilla e binticincu. 

Ma sa cosa de importu prus mannu e chi, mancai apustis de totus custus annu, sigu a fai su trabballu cosa mia cun gana bona e cun s'afròddiu chi tènia sa primu dì chi apu incumentzau cun custa carriera, chi mi permiteis de si ddu narai. E chi si depu narai sa beridadi, immoi chi nci seu (chi no si dispraxit tropu, po si ddu narai diaici puru), torru gràtzias a su Cielu, dònnia dònnia dì, po sa possibbilidadi chi tèngiu de podi guadangiai su dinai chi mi serbit po mi comperai su pani cun is fueddus chi ndi bogu aforas, cun is rigas chi scriu, mescamente po is rigas chi scriu in su sardu chi si fueddat innoi in su Campidanu de mesu. E duncas mi seu guadangendi su pani cun sa lingua mia, cussa chi apu sèmpiri chistionau, in domu, cun sa famìllia cosa mia, po incumentzai, cun mamma e babbu miu, duncas, est craru, e cun is ajajus, e cun is amigus puru; sa lingua cosa mia, chi ia a podi tzerriai "lingua materna" (e mi praxit diaderus meda cumenti sonat sa cosa, cumenti sonat sa bidea), est cussa chi est donendumì de bivi, de papai, pròpriu cumenti fessit una mamma, e mi parit diaderus unu bisu mannu totu custu, unu miràculu, cumenti ddu ia a podi tzerriai. 

E duncas, chentza giai giai de si nd'acatai, seus arribbaus giai a sa metadi de su mesi de Cabudanni puru, e sa cosa de importu prus mannu (a su mancu po mei, est craru) est chi, tra una cidixedda feti, at a brintai puru s'atonzu; est a nai, duncas, ca tra seti diis (prus o mancu), s'istadi de su duamilla e binticuatru puru at a essi bella ca scarèscia, e po mei, a su mancu, est unu pagheddeddu una fortuna, fadendi su contu ca, chi pròpriu si ddu depu narai, no seu cuncodrendi beni meda cun s'istadi, pruschetotu po sa basca chi at fatu, e chi est sighendi a fai. Chi pròpriu si ddu depu narai (e dda acabbu de mi stròllicai, po oi puru, e iat a essi ora puru, s'at a megai calincunu de bostrus), seu unu piciocu chi s'agatat meda, ma meda mellus me is tres mesis de s'atonzu, e duncas, po cust'annu puru, isperu de mi ndi prandi po beni, e no m'abarrat chi abertai un'antra parighedda de diis. 

Ma torraus a nosu, e duncas, a s'artìculu de custa cida, e duncas, a totus is novas chi nc'apa a stichiri aintru: tèngiu sa possibbilidadi de incarrerai a scriri custas rigas dexi diis ainnantis de sa data innoi nd'ant a bessiri aforas, poita, comentecasiat, is novas de si torrai a contai no ammancant de seguru, cumenti podeis cumprendi e biri a solus: in su giàssu de is amigus de su Diàriu Sportivu, difatis, (chi est su giàssu innoi scriu, e duncas, su giàssu chi mi donat su trabballu, e cusa costa andat ainnantis de su duamilla e undixi, de su mesi de dònniassantu, po essi prus prètzisus, e funt passaus prus de doxi annus, e duncas, custu est pagu ma seguru, prus de duus giòbias, a fai beni is contus, cumenti si iat a podi narai) ddoi funt unu muntoni (unu muntoni mannu meda, fadendu su contu chi ndi bessint a pillu unu bellu tanti de artìculus dònnia, dònnia dì chi Deus si arregallat de bivi) de novas, ma scritas, peròu, in italianu. E fadendi su contu de su logu, e de su tempus chi tèngiu po scriri s'artìculu in lìngua sarda, chi est meda ma chi no est de seguru infiniu, cumenti si iat a podi narai, e gei ddu cumprendeis a solus cumenti andant is cosas, deu creu, e intzandus s'arriscu (mescamente chi sigu a mi stròllicai diaici meda, dònnia cida) est su de no acudi a si chistionai de totus is cosas de importu chi sucedint in su mundu de su càlciu de is diletantis sardus. 

E duncas, mi megu a solu a solu, chi atacu, chi incarreru immoi cun su trabballu cosa mia,  chentza de perdi atru tempus (e chentza de si fai perdi su tempus chi, mancai, nemmancu tèneis), fortzis arrannèsciu a ndi bogai aforas totus is legas chi tèngiu badda badda in conca, chentza de ndi perdi nemmancu una, cumenti si iat a podi narai. 

E duncas, sèmpiri chi seis de acòrdiu, atacu cun sa nova acapiada a Gianni Cadoni, ca est torra su numeru unu (ddi nau diaici) de su Cumitau Regionali po su chi pertocat sa Federatzioni Italiana de su Giogu de su Càlciu e po su chi pertocat, puru, est craru, sa Lega Natzionali de is Diletantis de sa Sardìnnia: su trintunu de su mesi de agustu, difatis, is presidentis de is duuscentus e trintacincu scuadras chi faint parti de su mundu de is diletantis sardus ant votau po decìdiri su nomini de su presidenti, po su chi pertocat, est craru, s'isula cosa nosta. Is de s'Assemblea si funt atobiaus, duncas, in Tramatza, e po Cadoni est stètia una giorronada de oru, mi benit de ddu narai diaici, fadendi su contu chi at arriciu is votus de totus is presidentis e nd'at cassau, duncas, cumenti si narat, s'unanimidadi. Custu bollit narai, intzandus, ca Cadoni at a apoderai me is manus cosa sua is crais de sa Lega e de su Cumitau po atrus cuatru annus, est a nai, partendi de cust'annu etotu, est craru, chi est su duamilla e binticuatru, e fintzas a su duamilla e bintotu. Cadoni est arribbau, duncas, a sa de tres bortas chi tenit sa possibbilidadi de essi su presidenti de sa Lega e de su Cumitau Regionali po su chi pertocat sa Sardìnnia, fadendi su contu ca sa primu borta ddi fiat capitada in su duamilla e sexi (giai giai dexi annus fait, ca a fai is contus nci poneus pagu meda). «Seu prexau meda meda, e si cumprendit, e tèngiu su coru prenu de afròddiu po benni a sciri ca is assòtzius de bòcia chi currint me is campionaus pesaus de sa Federatzioni Italiana de su Giogu de su Càlciu e de sa Lega Natzionali de is Diletantis ant decìdiu de donai is crais a mei, ddi nau diaici. Seu prexau de podi essi torra su presidenti de su Cumitau, e si cumprendit beni, no est mai una cosa facili, o simple, su de benni a essi, torra, su prus votau. Mi parit bastanti craru, duncas, ca su trabballu ca apu fatu, e chi eus fatu, chistionu puru po totus is personas chi m'ant donau una manu de agiudu, e no funt pagus de seguru, est stètiu bonu e est stètiu de aggradessu po totus is presidentis de is assòtzius». 
S'atobiu, deu creu chi si cumprendat bastanti beni, est stètiu de importu mannu meda: bastat a fai su contu, de su restu, ca ddoi fiant puru, tra is atrus, Giancarlu Abete, chi est, in dì de oi puru, si cumprendit, su presidenti de sa Lega Natzionali de is Diletantis, impari a Brunu Perra, chi est su presidenti de su CONI (chi benit a essi, gei ddu eis a sciri cantu chi no mellus de mei puru, su Cumitau Olimpicu Natzionali Italianu). 
Po su chi pertocat is personas chi ant a fai parti de su Cunsillu Diretivu, funt stètius eletus Antoniu Begliutti, Andrea Contini, Fabriziu D'Elia, Robertu Desini, Frantziscu Mereu, Gianpieru Pinna e Mathias Urru. 

Tra is novas prus callentis ca funt bessidas me is ùrtimas diis, agataus, de seguru, chentza timi de si sballiai, cussa chi pertocat su calendariu de is partidas de s'Ecellenza; sa nova, po essi prus pretzisus (e si cumprendit, e si sciri beni puru, ca unu giornalista fait beni su trabballu cosa sua candu arrannescit a essi su prus pretzisu possibbili), nd'est bessida aforas, nd'est bessida a pillu, cumenti si iat a podi narai, puru (e cumenti naràt sèmpiri sa bon'anima de mamma mia) su cuatru de custu mesi etotu, e mi parit giustu, mi parit chi potzat essi una cosa bona, su de nci dda stichiri, ddi nau diaici, me in s'artìculu de custa cida (chi at a bessiri aforas su doxi de su mesi de Cabudanni), chi est, tra is atras cosas, pròpriu cussa ainnantis de s'incumentzu de is giogus, fadendi su contu, duncas, ca is partidas po sa stagioni noba, est a nai po is campionaus de su duamilla e binticuatru – duamilla e binticincu, s'ant a giogai pròpriu custu domìnigu chi est po nd'arribbai, est a nai, duncas, est craru, su cuindixi. 

E duncas, su calendàriu est stètiu presentau, su tres de su mesi de Cabudanni, de su presidenti Gianni Cadoni, chi eus arremonau, mancu a ddu fai aposta, pròpriu immubagora. Su calendàriu, fia narendi, chi pertocat totus is giorronadas e, duncas, totus is partidas, de su campionau prus mannu e prus de importu tra totus cussus chi teneus in Sardìnnia (si iat a podi narai ca su campionau de s'Ecellenza est a trassa de sa Sèrie A po su mundu de is professioneris, si iat a podi narai, duncas, ca su campionau de s'Ecellenza benit a essi sa Sèrie A po su mundu de is diletantis sardus). E duncas, cumenti si apu giai nau (ma a torrai a arrapiti is cosas mabi no fait de seguru, cumenti si megànt, de su restu, is antigus latinus; ddu eis a connòsciri bosatrus puru su dìciu chi narat ca su de arrapiti is cosas agiudat; agiudat a ddas cumprendi e a si ddas arragodai, nc'aciungu deu), sa primu giorronada de sa stagioni noba at a essi pròpriu su cuindixi, de domìnigu, e is giogus ant a sighiri a andai ainnantis (po su prexu de totus is giogadoris, mescamente de is prus giòvuneddus, po su prexu de is allenadoris ma po su spàssiu e su prexu, est craru, de totus is tifosus puru, chi sighint is fainas de is scuadras chi ddoi funt spratas in totu s'isula) po catodixi giorronadas, chentza de si frimai nudda. 

In custa primu parti de sa stagioni, fait a narai custu puru, immoi chi nci seus (cussa chi ballit po sa lista de partidas de s'andada, diaici si tzerriant, puru, diaici ddas podeus tzerriai, po ddu narai mellus puru), no nc'ant a essi partidas aintru de sa cida, a su mancu po su chi pertocat su campionau de s'Ecellenza, est craru (poita is partidas chi pertocant sa Copa Italia, invècias, s'ant a giogai sèmpiri aintru de sa cida, de martis e de mercuis, po su prus), ma feti su domìnigu. E duncas, a fai is contus nci poneus pagu meda, s'ùrtima giorronada po su chi pertocat sa lista de partidas chi ant a balli po s'andada, s'at a giogai su bintiduus de su mesi de Idas, est a nai, est craru (seu seguru chi nc'arribbais a solus a solus bosatrus puru, chentza de s'agiudu cosa mia, e megu a brullai, deu creu ca unu pagheddeddu si cumprendat puru), su domìnigu ainnantis de is festas po su Nadali (o de sa Pasca, chi si praxit de prus, ca no depeus cunfundi cun sa dì, cun sa festa po sa Pascamanna), est a nai, duncas, feti tres diis ainnantis de su Nadali. 

Apustis de is festas po s'annu nou, duncas, is scuadras de s'Ecellenza ant a torrai a cabai in campu po sa dì de sa Befana, chi at a essi de lunis (su ses de su mesi de gennàrgiu, gei nc'arribbais a solus), po sa primu partida de sa lista de giorronadas po su chi pertocat sa torrada. E duncas, de su ses de su mesi de gennàrgiu, is giogus ant a sighiri a andai ainnantis, torra, chentza de si frimai nemmancu po una cida, fintzas a su trexi de su mesi de abrili, chi at a essi, nemmancu a ddu fai aposta, su domìnigu ainnantis a sa Pascamanna (chi eus arremonau immubagora). 

Impari a is scuadras de s'Ecellenza, duncas, ant a torrai a partiri, su dominigu de su cuindixi, is scuadras de sa Promotzioni puru (po ddu nai mellus: is scuadras chi faint parti de is duas listas de sa Promotzioni); in custu momentu (est a nai: candu megu a scriri custu artìculu, chi est su cuatru de su mesi de Cabudanni, cumenti s'apu giai scoviau) no tèneus ancora sa possibbilidadi de sciri cumenti at a essi su calendàriu po is giogus de sa Promotzioni, ma nc'est su tanti po crei ca is datas ant a essi agualis a cussas chi pertocant s'Ecellenza. Eus a biri cumenti ant a essi cuncodradas is cosas e si promitu giai de immoi, e nci iat a mancai atru puru, ca nd'eus a chistionai, torra, e mellus, me is artìculus chi nd'ant a bessiri me is cidas chi nd'ant a arribbai in su benidori. 

E duncas, chi seis de acòrdiu, podeus sighiri a andai a castiai is novas apicadas a su campionau de s'Ecellenza: una de is prus mannas est chi, giai a partiri de su campionau, de sa stagioni de cust'annu, no nc'at a essi prus s'òbbrigu de nci mandai in campu is piciocheddus prus piticheddus, est a nai, is "fuori-quota", cumenti ddus tzerriaus, in italianu. Est a nai, duncas, ca in totus is annus passaus, sa Federatzioni Italiana de su Giogu de su Càlciu, impari a is de sa Lega Natzionali de is Diletantis, poniant s'òbbrigu a is assòtzius, a is scuadras, de fai giogai a su mancu unu piciocheddu piticheddu de edadi, est a nai unu piciocheddu de cuindixi, sexi annus, in sa scuadra de is mannus (ma podiant arribbai a essi puru duus e fintzas tres), e custu ddu fadiant po donai sa possibbilidadi a is giogadoris prus giòvuneddus de agatai su logu in sa scuadra e duncas, a ddu nai mellus puru, in sa truma de giogadoris chi ndi cabant in campu de su primu minudu de sa partida (cussus ca, a trassa de s'italianu etotu tzerriaus "giogadoris titolaris"). A nai sa beridadi nci funt sèmpiri stètius allenadoris chi ant tentu cosa de narai (e meda puru, a nai sa beridadi), e chi ant murrungiau po annus duncas (po ddu narai mellus) contras a custa regula, poita, si megànt, chi unu giogadori est bravu, est forti e si minescit de giogai, intzandus no nc'est nesciunu bisòngiu (no nci iat a essi nesciunu bisòngiu, po ddu nai mellus puru) de ponni una regula po ddu fai giogai po s'ammarolla. E difati de cust'annu sa regula no nc'est prus. 

E immoi chi is giogus de s'Ecellenza funt giai giai po torrai a partiri (e no bidemus s'ora, berus est?) nc'est giai chini incumintzat a giogai, ddi nau diaici, a intzertai cali at a essi sa scuadra chi at a essi bona a ndi cassai su primu postu de sa lista e, duncas, s'artziada in su campionau de sa Sèrie D, po sa stagioni de su duamilla e binticincu – duamilla e bintises, si cumprendit. E duncas, su campionau de cust'annu at a essi togu meda, custu est su chi pentzat su prus de is tifosus, fadendi su contu chi, in sa lista (e duncas in su campionau) nc'ant a essi, torra, duas scuadras fortis, e cun una storia de importu mannu a is pabas, cumenti is de sa Nuorese e is de s'Alghero: is primus, si ddu eis arregodai mancai a solus (e chi no si ddu arragodais nci pentzu deu), funt arrannèscius a binci su campionau de sa Promotzioni de s'annu passau e ndi funt torraus a artziai in Ecellenza apustis de unu annu (in su campionau de su duamilla e bintitres – duamilla e binticuatru, difatis, fiant arribbaus me is ùrtimus postus de sa lista e ndi fiant dèpius cabai torra in su campionau de sa Promotzioni); is segundus ant fatu una cursa de importu mannu, e toga meda, chi est berus ca po medas medas mesis, e duncas, po medas medas giorronadas de sighiu, si dda funt gherrada, cumenti si iat a podi narai, impari e, duncas, contras a is scuadras prus fortis de su campionau, incumintzendi pròpriu de is de sa Nuorese, ma chentza de si ndi scaresi de is de s'Usinese puru. Impari a is de sa Nuorese e de s'Alghero, torrant a curri in su campionau de s'Ecellenza is campidanesus de su Muristeni puru (ca funt bixius de domu, diaici si iat a podi narai, fadendi su contu, e a fai is contus nci poneus pagu meda, ca tra Bidd'e Sorris e Muristeni ddoi funt calincuna cosa cumenti a dexi chilometrus), ca ant bintu su campionau de sa Promotzioni po su chi pertocat sa Lista A (chi est cussa innoi ddoi funt totus is scuadras de su sud de sa Sardìnnia) e immoi ant cuncodrau (mellus: funt arrannèscius a cuncodrai) una rosa toga e forti meda, e a cantu parit (de su chi scieus, de su chi eus potziu biri me is primas bessidas de s'annu nou) funt tra cussus chi iant a podi curri, e funt duncas tra cussus chi si dda iant a podi gherrai, po ndi cassai su primu postu e duncas s'artziada in su campionau de sa Sèrie D. 

E apustis, chi m'abarrat su tempus e su logu po nci stichiri custa nova puru, deu creu chi si iat a podi andai a castiai totus is giogadoris nous (est a nai, mellus, is achistus) chi funt arribbaus in s'assòtziu de su presidenti Marcu Carboni chi, ddu naraus acoitu, immoi chi nci seus, at scerau (impari a su diretori sportivu Mateu Zanda) de donai torra is crais de sa scuadra a Marcellu Angheleddu ca, de su restu, mancai siat unu de is allenadoris prus giòvunus, prus piticheddus de edadi, si iat a podi narai diaici puru, chi ddoi funt in dì de oi in totu su mundu de is diletantis sardus (e duncas, no feti po su chi pertocat is campionaus de s'Ecellenza e de sa Promotzioni, est craru), s'annu passau at fatu unu trabballu bonu meda, fadendi su contu (e a fai is contus nci poneus pagu meda, cumenti mi praxit a s'arrapiti fatu fatu) ca at serrau sa stagioni cun unu muntoni de puntus in prus de is chi funt arrannèscius a ndi cassai is de su Castiadas (una de is scuadras prus fortis chi ddoi fiant in sa Lista, fadendi su contu chi ant serrau sa stagioni a su segundu postu), ant'essi stètius calincuna cosa cumenti a binti ca, si cumprendit, e ddu cumprendeis beni bosatrus puru, no funt pagus de seguru. Calincunu est incumintzendi a pentzai, puru, ca is de su Buduni iant a podi curri, est craru, po circai de ndi torrai acoitu in su campionau de sa Sèrie D, chi ant serrau me is ùrtimus postus pròpriu in sa stagioni ainnantis a custa, est a nai, est craru, in sa stagioni de su duamilla e bintitres – duamilla e binticuatru. De su restu, est pròpriu su chi funt arrannèscius a fai is de s'Ilva de Sa Maddalena s'annu passau, candu ant bintu su campionau de s'Ecellenza apustis de nd'essi cabaus de sa Sèrie D. 

Tra is scuadras prus fortis po su chi pertocat s'Ecellenza, sigheus cun sa lega chi eus pigai immubagora, agataus puru (a su mancu, custu est su chi pentzant totus is espertus, e no feti is tifosus, est craru, chi funt sighendi is giogus) is de s'Ossese, cun is biancus-nieddus (ddus tzerriaus diaici fadendi su contu ca is camiseddas chi manigiant po ndi cabai in campu, a su mancu me is partidas chi giogant in domu, funt de cussus duus caboris, e deu creu chi seis bonus a nc'arribbai a solus puru, chentza de s'agiudu cosa mia) chi me is ùrtimus duus annus funt arribbaus a su segundu postu de sa lista e duncas iant a podi arrannèsci a ndi pesai una stagioni ancora prus toga de su chi ant fatu fintzas a immoi, ma nc'at a essi, puru, de fai is contus cun is de su Tèmpiu, una de is scuadras, unu de is assòtzius cun sa storia prus manna a is pabas, chi po cust'annu ant scerau de donai is crais de sa scuadra a unu de is allenadoris chi ant bintu de prus in su mundu de s'Ecellenza in Sardìnnia, ma no feti in su campionau de s'Ecellenza, si cumprendit, e seus chistionendi de Mauru Giorico. 

E duncas, chi seis de acòrdiu cun mei, deu ia a andai a castiai cumenti funt cuncodradas is rosas de is scuadras prus fortis de s'Ecellenza (cussas, de su restu, ca eus arremonau pròpriu immubagora), andendi a castiai, duncas, calli funt is cropus (ddi naraus diaici, a trassa de cumenti si narat in italianu etotu) de importu prus mannu chi funt arrannèscius a sparai is diretoris sportivus ca, si cumprendit (ma ddu naraus po totus cussas personas chi, mancai, no funt acapiadas a strintu cun is chistionis de su càlciu e, mescamente, cun is chistionis acapiadas a su mercau), funt cussus chi sighint is fainas chi pertocant is giogadoris, cussus de bendi, si cumprendit beni, ma ballit aguali, chi no de prus, po is giogadoris de comparai, de cunvinci a giogai po sa scuadra cosa tua, duncas. 

E parteus, immoi chi nci seus, pròpriu de is ùrtimus chi eus arremonau immubagora, est a nai is de su Tèmpiu, cun is caboniscus (ddus tzerriaus diaici, si ddu arragodu torra, chi mabi de seguru no fait, po su disegnu, unu cabonischeddu, chi tenint in su simbulu de s'assòtziu) chi, gràtzias a su trabballu, de importu mannu e bonu meda, chi at fatu su diretori sportivu Alessandru Sassu, po custa stagioni noba ant a podi contai apitzus de unu giogadori forti, e de esperièntzia, cumenti Marco Aiana, chi ndi lompit, chi nd'arribbat apustis de su campionau chi at fatu impari a is de sa Costa d'Amalfi (mancai nc'apat giogau feti po una pariga de mesis), ma chi at agiudau, e meda puru, a ndi cassai s'artziada in su campionau de sa Sèrie D (po cussa chi tzerriaus, chi estus a podi tzerriai, puru, chi si sonat mellus, "promotzioni"), fadendi su contu ca is amalfitanus ant bintu is partidas finalis chi ant dèpiu giogai contras a is atras scuadras ca ant acabbau sa stagioni a su segundu postu (po cussus ca, a sa moda, a trassa de is ingresus, seus costumaus a tzerriai "play-off"). Aiana duncas at a tenni torra sa possibbilidadi de trabballai impari a Mauro Giorico: su giogadori e s'allenadori, de su restu, si connoscint beni meda, chi fadeus su contu ca ant bintu unu campionau impari a is tempus de s'Altzaghena (est a nai, mellus, candu totus e duus fiant in sa scuadra de s'Altzaghena, su primu in campu e su segundu sètziu in sa panchina, cumenti si narat); Aiana duncas iat tentu sa possibbilidadi de giogai in Sèrie C puru. Tres annus fait, invècias, Marco Aiana iat donau una bella manu de agiudu a is de s'Ilva de Sa Maddalena a binci su campionau de s'Ecellenza, e fiat abarrau impari a is maddaleninus, cumenti si narat, puru in sa stagioni apustis, in su campionau de sa Sèrie D. De su chi eus narau fintzas a immoi, duncas, si cumprendit, e beni puru, ca Marco Aiana est unu de is giogadoris prus fortis chi ant a curri, ant a giogai in su campionau de s'Ecellenza po s'annu de su duamilla e binticuatru – duamilla e binticincu. In sa rosa de is cabonischeddus, sigheus a andai ainnantis in custu arrastu etotu, est arribbau puru Ahmed Mejri, unu portieri nàsciu in su duamilla e unu, ca est artu giai duus metrus (unu metru e norantatres centimetrus, po essi prus pretzisus, e ddu scieis cantu siat una cosa de importu po unu giornalista su de arrannèsci a essi pretzisu, po su chi si podit, est craru); Mejiri, tra is atras scuadras, at giogau impari a is de s'Ilva de Sa Maddalena feti duus annus fait, po calincuna cosa cumenti a bintitres partidas. Un antru giogadori chi est arribbau a su Tèmpiu, ma chi iat giai tentu su modu de giogai in Sardìnnia, est Hervè Bazile, unu piciocu francesu nàsciu in su milli e noicentus noranta, ca s'annu passau nd'at cassau sa bìncida de su campionau de s'Ecellenza impari, pròpriu, a is de s'Ilvamaddalena (chi seus sighendi a arremonai, cumenti podeis cumprendi a solus). Impari a is de su Tèmpiu at a giogai, puru, Simone Solinas, unu difensori chi de piciocu at tentu sa possibbilidadi, de importu mannu, de giogai, e duncas, de cresci, si iat a podi narai diaici puru, in sa scuadra de su Casteddu, ma chi apustis at giogau impari, puru, a is tattaresus de sa Torres, ma apustis est andau a circai fortuna, cumenti si narat, a trassa de s'italianu, cun atras scuadras de su continenti (chi est su modu ca is sardus manigiant po chistionai de s'Italia; si sonat cumenti a cosa berus est? Seu seguru ca no est sa primu borta chi intendeis sa cosa, e megu a brullai, gei si cumprendit). E de su restu, Simone Solinas pròpriu s'annu passau at tentu sa possibbilidadi de giogai impari a is de su Calanzanos, e mancu a ddu fai aposta, su diretori sportivu de is grogus – arrùbius fiat pròpriu Sassu. At a sighiri a giogai impari a is de su Tèmpiu puru Ousmane Gomez, unu centrucampista forti meda chi est bèniu a essi su bisu de medas scuadras, in su mercau de cust'istadi, apustis de su campionau bonu meda chi at fatu, est craru, pròpriu impari a is cabonischeddus. E si cumprendit, candu nc'arrannescis a no bendi unu giogadori chi, mancai, bolint e circant is atras scuadras puru, est cumenti a ddu essi torrau a comparai (ca si cumprendit beni, de su restu, ca badda badda in su pratu, mescamente candu chistionaus de giogadoris fortis, ddoi funt unu bellu muntoneddu de arriabis). Tra is chi funt arribbaus in su mercau de custa istadi, ddoi est puru Luca Carboni, unu piciocheddu nàsciu in su duamilla e tres, ca me is ùrtimus duus campionaus at giogau impari a is de su Biddacidru, ma chi at giai trabballau impari a Mauru Giorico, chi est berus chi s'allenadori ddu iat fatu cabai in campu po giogai candu Carboni teniàt feti sexi annus, a is tempus de s'Altzaghena. Po su chi pertocat is giogadoris prus giòvuneddus, prus piticheddus de edadi, cumenti si iat a podi narai puru, ddoi funt puru Frantziscu Bianco, nàsciu in su duamilla, chi iat giai giogau impari a is de su Tèmpiu me is annus passaus, ma chi in su campionau de su duamilla e bintitres – duamilla e binticuatru at bistiu, ddi naraus diaici, cumenti si narat, de su restu, sa camisedda biancu-asullas de is de sa Macumerese, sighius de Gianluigi Scotto. Impari a Bianco, est a nai sèmpiri de sa Macumerese, nd'aproillat puru Enrico Zirolia, nàsciu in su duamilla e cincu, cun su giogadori chi s'annu passau est stètiu bonu, est stètiu àbbili a ndi cassai calincuna cosa cumenti a ses gol. Po sa difesa, ma su giogadori si scabullit beni puru candu giogat in mesu a su campu, est arribbau Jacopo Malesa, nàsciu in su milli e noicentus norantatres, e issu puru est unu de cussus chi at giai tentu sa possibbilidadi de giogai in una scuadra sighida de Mauru Giorico. Malesa nd'arribbat in domu de is de su Tèmpiu, ddi naraus diaici, apustis de is duus annus chi at giogau cun sa camisedda de is de su Santu Tiadoru – Poltu Ridundu. Puru Cristian Sosa est unu de cussus giogadoris nous, ddus tzerriaus diaici, chi de cust'annu ant a bistiri sa camisedda de is de su Tèmpiu: su difensori, nàsciu in su milli e noicentus otantacincu, torrat a giogai in s'isula cosa nosta apustis de essi giogau in s'Altzaghena, po duus annus de sighiu, in sa stagioni de su duamilla e bintunu – duamilla e bintiduus e in cussa, puru, est craru, de su duamilla e bintiduus – duamilla e bintitres. Mauru Giorico at a podi trabballai torra puru cun Agustin Olivera, chi at a tenni me is manus cosa sua is crais de su centrucampu de is de su Tèmpiu: su giogadori, chi est nàsciu in Uruguai in su milli e noicentus norantaduus, at giogau me is ùrtimus duus annus impari a is de su Latte Dolce, cun Giorico in panchina. Impari a is arribbus nous (tzerriaus diaici totus is giogadoris nous chi ndi funt arribbaus cust'annu, custa istadi, gei si cumprendit, berus est?) agataus una truma manna meda de giogadoris chi ant decìdiu de abarrai po cust'annu puru in sa rosa de is caboniscus, partendi de Paolu Arca, chi est a se de tres stagionis de sighiu impari a is de su Tèmpiu, apustis de essi giogau cun is de s'Ossese; passendi de Alessandro Pinna e fintzas a arribbai a Edoardu Donati, Giovanni Bulla e Luigi Zappareddu. Custu, duncas, po su chi pertocat sa rosa (e is giogadoris nous, is giogadoris arribbaus in custa fentana de su mercau) de is de su Tèmpiu. E immoi, chi seis de acòrdiu, podeus andai a castiai impari cumenti ant cuncodrau sa rosa is de su Budoni puru, immoi chi nci seus. Po su chi pertocat sa difesa e, duncas, is difensoris, is gadduresus ant agatau s'acòrdiu cun Mael Riberon, nàsciu in su milli e noicentus norantanoi in Francia, chi nd'arribbat a giogai a bòcia in Sardìnnia apustis de essi giogau in Italia, impari a is de su Tolentino, chi est un assòtziu chi currit in su campionau de sa Sèrie D, e apustis si nd'est andau a giogai in Spagna puru, impari a is de su Plasencia. In custu ùrtimu annu, Riberon at sighiu a girai, fadendi su contu (e a fai is contus nci poneus pagu meda) chi at giogau in Svizzera, po sa primu parti de s'annu, impari a is de su Chaux de Fonds e apustis si nd'est bobau (m'est bènniu de ddu narai diaici, e mi parit chi su fueddu potzat cratzai beni meda) in Bolivia, po giogai cun is de su Pasion Celeste. Po su centrucampu, is de su Buduni ant scerau de donai is crais de su giogu me is manus (o chi boleis, chi si sonat mellus, me is peis; e giai si cumprendit ca seu brullendi, berus est?) de Hadad Nadir, nàsciu in Argentina in su milli e noicentus norantanoi, chi benit a fai sa primu esperièntzia cosa sua in su mundu de sa bòcia in Italia e, duncas, in Sardìnnia; in Argentina Nadir iat giogau cun is de su Club Olimpo, un assòtziu chi currit in cussu chi si tzerriat Torneo Federal A, ca benit a essi, prus o mancu, sa Sèrie C cosa nosta. Tra is giogadoris chi ant scerau de sighiri s'aventura, sa storia cun sa camisedda de su Buduni nc'est, tra is atrus, Diego Barboza, nàsciu in su milli e noicentus norantunu in Uruguai, chi in custus ùrtimus annus passaus at giogau, tra is atrus, impari a is de su Huracan, e apustis cun is de su Montevideo Wanderers, po cincuantacincu partidas fatas in sa Sèrie A uruguaiana (cun tres partidas fatas puru po sa Copa Libertadores, chi benit a essi sa Copa Campioni cosa nosta po is uruguaianus); Barboza at girau mesu mundu, fait a narai custu puru, fadendi su contu chi at giogau cun sa camisedda de is de su Correcamino, in Mexico, cun is de su Ararat-Armenia in Colombia e in Spagna puru, impari a is de su Novelda, ainnantis de lompi innoi in Italia a giogai, e duncas, po giogai cun is de su Manfredonia, po essi prus pretzisus, in Puglia. Tra is giogadoris chi ant a sighiri a giogai torra cun is de su Budoni, agataus Marco Farris, chi est puru su capitanu e no feti unu de is difensoris prus fortis chi tenint in sa rosa is gadduresus, Samuele Spano, in atacu, e su centrucampista, giòvuneddu meda, ma giai forti, chi est Amos Stefanoni, chi s'annu passau at giogau calincuna cosa cumenti a bintises partidas in su campionau de sa Sèrie D. In sa panchina de is gadduresus nc'at a essi, torra po cust'annu puru, Raffaele Cerbone. 


Attività realizzata col contributo della Regione Sardegna - IMPRENTAS 2023-2024. LR 22/2018, art. 22