Salta al contenuto principale
villasimius esultanza
Grandu festa puru po sa Tharros, Paulese e Porto Cervo

Sa Primu Categoria serrat is contus: Crabonaxa e Atletico de Casteddu artziant a bratzetu in Promozione

Sa Primu Categoria puru, fiat ora, aciungeus nosus, fait totus is contus po sa stagioni duamilla e dexianoi \ duamilla e binti: su campionau, fortzis est sa primu borta chi sutzedit, no s'est potziu serrai in campu po crupa, cumenti scieus beni, de su Coronavirus, chi nd'at fatu studai totus is giogus me is primus diis de su mesi de Martzu. Diaici, po decidiri is scuadras chi ant a giogai in Promotzione s'annu chi benit, nc'est stetiu bisòngiu de su traballu e de is arrexonamentus de is de su Cunsillu Diretivu, chi ant pigau po bona sa lista chi nd'est bessida aforas apustis de binti-duas partidas.

In su Girone A, intzandus, faint festa in duus: prexu mannu po is de su Crabonaxa de mister Andrea Piccaretta e po cussus de s'Atletico de Casteddu de Carlo Saba, chi cun cincuanta-otu puntus castiant totus is atras scuadras de su primu postu de sa lista e ndi artziant, impari, in Promozione. Su pecau prus mannu, de sicuru, est chi sa batalla tra is duas scuadras prus fortis de su campionau no est lompia a sa fini: su dexiaseti de su mesi de Maju dhoi fiat de giogai, difatis, sa partida chi podiat balli po sa bìncida finali, propriu in domu de is castedhaius.
Ma, est craru, no si nd'est fatu prus nudda.

Po su chi pertocat su Girone B, invècias, sa Tharros de mister Maurizio Nulchis e de bomber Alex Tomasi bolat in Promozione cun coranta-seti puntus, cuatru in prus de s'Atletico de Narcau chi, a nai sa beridadi, fiat isperendi de cassai torra su primu postu de sa lista, candu mancànt otu giorronadas ancora de giogai.
In su Girone C, tzacarrus de manus po is de sa Paulese de mister Massimilano Pinna, cincu puntus in prus de sa Bittese, ma cun d-una partida in mancu.
In su Girone D, invècias, su prexu est totu po cussus de su Porto Cervo, cincuanta-duus puntus, cun sexi bìncidas, chi funt arrannescius a abarrai ainnantis a duas scuadras fortis medas cumenti a su Tempio e a s'Ozierese de Otteri.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Campionato:
Argomenti:
Stagione:
2019/2020
Tags:
Prima Categoria
ultimora